Display Style:
Column Style
चीनयात दमन यायेत स्वपिं ‘ग्रेट वाल अफ स्टिलय्’ छँय् न्याइ : राष्ट्रपति सी
बछलागा सप्तमी ११४१, असार १७ बिहिवाः
चीनय् सत्तारुढ कम्युनिष्ट पार्टी निस्वंगु सच्छि दँ पूवंगु दु । दिवसया झ्वलय् राष्ट्रपति सी चीनफिङं देशवासीया नामय् सम्बोधन याइगु धाःसा औपचारिक ज्याझ्वबारे छुं नं जानकारी मयाःगु खः ।
चीनं वंगु वाःलय् सत्तारुढ पार्टीया इतिहास बारे थीथी प्रचार यानावयाच्वंगु खः । थुखे हङकङं नं थःगु स्वतन्त्रता दिवस हंगु दु ।
चिनियाँ कम्युनिष्ट पार्टी सन् १९२१ निस्वंगु खः । तःहागु गृहयुद्ध लिपा ७२दँ न्ह्यः चीन शक्तिशाली देय्या कथं खनेदूगु खः । उबले याःगु थीथी गतिविधिबारे लिपांगु वाःलय् प्रचारप्रचार याःगु खः। थःगु पार्टी सच्छि दँ थ्यंगु लसताय् दँयंके हे नाटक नं न्ह्यब्वइगु धाःगु दु ।
थ्वे हे दथुई चिनियां राष्ट्रपति सी जिनपिङं चीनयात सुनांत हेपे याये मपूmगु धयादिल । अमेरिकायात ताकेता याना सुयागु न्ह्यने झुके मजुइगु चेतावनी तकं बियादिल । वय्कलं चीनयात दमन यायेत स्वपिंनिगु छ्यँ ग्रेट वाल अफ स्टिलय न्याइगु चेतावनी तकं बियादिल ।
छघौ तक्क याःगु सम्बोधनय् राष्ट्रपति सीं चीनया विकासय् कम्युनिष्ट पार्टीया मू भूमिका दूगु धासें थुकियात जनतापाखें अलग यायेगु प्रयास असफल जुइगु दावी यानादिल । वय्कलं सुयात नं चीनविरुद्ध दमन यायेगु ह्वःता मबिइगु भलसाः नं बियादिल ।
अफगानिस्तानं थःगु देशय् आंतकवादी ज्याखँ न्ह्याकूगु पाकिस्तानया द्वपं
बछलागा सप्तमी ११४१, असार १७ बिहिवाः
अफगानिस्तानया पिकाटिका प्रान्तय् अज्ञात बन्दुकधारीं कयेकूगु गोलि लानाः निम्ह पाकिस्तानी सैनिक सीगु दु ।
अफगानिस्तानया सीमा लिक्क सुरक्षाय् दुपिं पाकिस्तानी सैनिकयात गोलिं कयेकाः स्याःगु अन्तर्राष्ट्रिय समाचार संस्थातय्सं न्ह्यथंगु दु । उत्तरी पाकिस्तानस्थित बजिरिस्तान क्षेत्रया सैनिक चेकपोष्टय् अज्ञात पुचःया आक्रमणय् उपिं सैनिक सीगु पाकिस्तानी सेनां दावी याःगु दु ।
थुखे पाकिस्तानं थःगु देशय् आतंकवादी ज्याखँ न्ह्याकेत अफगानिस्तानयात छ्यःगु धासें तं प्वंकूगु दु । पाकिस्तानं उगु घटना पूर्वी अफगानिस्तानय् दुगु तहरीक ए तालिबानी पाकिस्तानं हताः याःगु दावी याःगु दु ।
तर अफगानिस्तानं धाःसा उगु हताः व पाकिस्तानया द्वपंप्रति छुं हे प्रतिक्रिया मक्यंनि । लिपांगु इलय् अफगानिस्तानं पाकिस्तानील्सेइँ २६ किलोमिटर सीमा क्षेत्रइ् तारबार तयेगु पाकिस्तानया निर्णयया विरोध यानावःगु दु ।
पाकिस्तानं सन् २०१७य् छखेरं सीमा सुरक्षाया लागिं धासें तारबार तयाहयेधुंकाः अफगानिस्तानं थुकिया विरोध यानावःगु दु ।
क्यानडाय् तापक्रम अप्वोया ६०म्ह मनू सीत
लहानान्युज | बछलागा षष्ठी ११४१, असार १६ बुधवाः
क्यानडाया दक्षिणी प्यासिफिक नर्थवेष्ट थासय् तापक्रम अप्वोया ६०म्ह मनू सीगु दु।
ब्रिटिश कोलम्बिया प्रहरीं सोमवाः लिपा सीपि ६० म्ह स्वया अप्वो थ्यंगु दु। सीपि अप्वो ज्येष्ठ नागरिकपि खः। ब्रिटिश कोलम्बियाया लीटन तापक्रम ४९ दशमलव ९ डिग्री सेल्सियस थ्यंगु खः।
गर्मी अप्वोया अनयागु जनजीवन तक प्रभावित जुगु दु। अनयागु ग्लोब व मेल पत्रिकाया कथं लीटनय् छेँ न पिहाँ वयेत तक थाकूगु दु। तापक्रमया क्यानडा वातावरण सम्बन्धी निकाय न ब्रिटिश कोलम्बिया व अल्बेर्टाय् चेतावनी सहित सूचं जारी यागु दु। उगु थासया उत्तरपश्चिमी भू–भागय् सचेत जुया च्वनेत धागु दु।
अशान्त अफगानिस्तान्
बछलागा षष्ठी ११४१, असार १६ बुधबाः
अफगानिस्तानय् विद्रोही तालिवानीपिन्सं सैनिक क्याम्पय् हःताः याःगु दु ।
मध्य अफगानिस्तानया छगू शहरय् हःताः यायेगु झ्वलय् सरकारी सेना व विद्रोहीदथुइ ल्वापू जूगु अलजजिरां धागु दु । ल्वापुइ विस्फोटक ज्वलं छ्यःगु अधिकारीपिन्सं धागु दु ।
राजधानी काबुलं दक्षिणी प्रान्त कन्धार स्वाइगु राजमार्गयात लक्षित यानाः विद्रोहीतय्सं हःताः याःगु खः । अमेरिकां थः सेना स्वदेश लित यंकेगु निर्णय याःसां लिपांगु स्वलाय् तालिवानीतय्गु ज्यापहः अप्वःगु दु ।
थुकिइ अन्तर्राष्ट्रिय समुदायं च्यूताः तःगु दु । वरिष्ठ अफगानी अधिकारीतय्सं विद्रोहीलिसे सरकारी सेनाया ल्वापू जूगु पुष्टि याःसां क्षतिबारे नमवाःनि । चान्हय् विद्रोहीतय्सं सुरक्षा चौकीइ हःताः याःगुलिं बजार बन्द याःगु अफगान सरकारं धागु दु ।
सन् २००१ निसें अमेरिकां अफगानिस्तानय् थः सेना छ्वयाः विद्रोहीविरुद्धया कारवाही तच्वयेकाच्वंगु दु । अमेरिकी सेनाया हःतालय् लानाः अफगानिस्तानय् आःतक निगू लख ४१द्व मल्याक मनूत मदयेधुंकूगु दु ।
अस्ट्रेलियाया न्हुम्ह उपप्रधानमन्त्री बर्नाबी जोसेयात प्रहरीं जरिवानायात
लहानान्युज | बछलागा पंचमी ११४१, असार १५ मंगलवाः
लकडाउनया इलय् मास्क मतःगु धासे अस्ट्रेलियाया न्हुम्ह उपप्रधानमन्त्री बर्नाबी जोसेयात प्रहरीं जरिवाना यागु दु।
सत्ताधारी गठबन्धनया छगु घटक नेशनल पार्टीया मुख्यनेता जोसया स्थानीय प्रहरीं न्यु साउथ वेल्स राज्यया उत्तर पश्चिमी आर्मिडेलया पेट्रोल पम्पय् पेट्रोल जायेका सर्भिस सेन्टर दुने मास्क मतस्ये च्वंंगु खः।
“मास्कविना च्वंगुलि उम्ह भद्र महाशयं प्रहरीयात क्षमायाचना सहित विनम्रतापूर्वक सहयोग याये, वयात निसः सय डलरया जरिवाना तोके याये,” स्थानीय प्रहरीं धागु दु। उपप्रधानमन्त्री जोसें थः विमानस्थल वने लिबागुलि थः जहानया लागि गाडीइ चिकं तयेत क्वहावंगु व सर्भिस सेन्टर दुने दुहावइगु ३० सेकेन्डय् थः प्रहरीया कार्बाहीइ लागु स्वीकार यानादीगु दु।
अस्टेलियाय् कोरोना भाइरसया जोखिम अप्वोया वगुलि न्यु साउथ वेल्स, क्विन्स्ल्याण्ड, पश्चिम अस्ट्रेलिया व नथर्न टेरिटोरीय् प्रतिबन्ध तःगु दु। वंगु २४ घन्टाय् अस्ट्रेलियाय् २९ म्ह न्हुपि संक्रमण जुपि खने दुगु खः। उकि २३ म्ह स्थानीय व प्यम्ह विदेशपाखे वया क्वारेन्टिनय् च्वना च्वपि खः।
