Display Style:
Column Style
नर्वे लेबर पार्टी तःधंगु बहुमत लिसें त्यात
ञंलाथ्व अष्टमी ११४१, भाद्र २९ मंगलवाः
उत्तर युरोपेली देय् नर्वेय् वामपन्थी झुकाव तइगु विपक्षी लेबर पार्टीं आमनिर्वाचन तःधंगु बहुमत लिसें त्याकुगु दु ।
जोनस गहर स्टोरं नेतृत्व याःगु लेबर पार्टीं सोमबाः जूगु आम चुनावय् सन् २०१३ निसें सत्ताय् दूगु प्रधानमन्त्री एर्ना सोलबर्गया मध्यमार्गी गठबन्धनयात त्याकुगु खः । मतगणना क्वचाइगु दिशापाखे न्ह्याबलय् लेबर नेतृत्वया वामपन्थी गठबन्धनं सच्छि व ६९म्ह दुजःया संसद सीट मध्ये म्होतिइ सच्छिगू सिट त्याकिगु निश्चित जूगु खः ।
नर्वेय् लिपांगु ई अप्वयावंगु सामाजिक असमानताया हुनिं जनतां वामपन्थी धारया पार्टीया गठबन्धनयात ल्यःगु विश्लेषण याःगु दु । प्रधानमन्त्री सोलबर्गया कञ्जरभेटिब पार्टीं हार स्वीकार यायेधुंकुृगु दु । विपक्षी नेता स्टोरं धाःसा जनतायात शुभाय् बिउसें न्हूगु दृष्टिकोणलिसेंया न्हूगु सरकार गठन यायेगु धाःगु दु ।
युरोपया दक्वःलय् तःधंगु चिकं व ग्यास उत्पादक देय् नर्वेय् जलवायु हिउपाया मुद्धा लिपांगु ई तच्वकं न्ह्यागु खः । वातावरणवादीतयेसं चिकंनय् आधारित अर्थतन्त्रं बुलुहुँ देय्यात न्ह्याकेमाःगु लविङ यानावःगु दु । गुकिइ वामपन्थी धारया पार्टीतयेत नं समर्थन बियावःगु दु ।
उत्तर कोरियां हाकनं मिसाइल परीक्षण यात
ञंलाथ्व सप्तमी ११४१, भाद्र २८ सोमवाः
उत्तर कोरियां हाकनं मिसाइल परीक्षण याःगु दु । निगः न्हूगु तःहाकगु क्रुज मिसाइलया सुथांलाक्क परीक्षण यानागु दावी याःगु दु ।
परीक्षण याःगु उगु मिसाइलं १५सः किलोमिटरया दूरी तय यायेफइगु धाःगु दु । उत्तर कोरियां उगु मिसाइलयात महत्वपूर्ण रणनीतिक हतियार कथं कयावयाच्वंगु दु ।
वंगु जनवरीइ अमेरिकाया राष्ट्रपति जो बाइडेनं शपथ काःबले नं उगु क्रुस मिसाइल परीक्षण याःगु खः । छुं दिं न्ह्यः जक उत्तर कोरियाया ७३क्वःगु वर्षगाँठया लसताय् स्वनिगः प्योङयाङय् विशाल सैनिक परेड याःगु खः ।
पेरुया विद्रोही नेता गुजम्यान मन्त
ञंलाथ्व षष्ठी ११४१, भाद्र २७ आईतवाः
पेरुइ ३० दँ निसें कारागारय् तयातःम्ह कम्युष्निट नेता अबिमल गुजम्यान ८६ दँया वैंशय् मन्त ।
पेरुइ न्हूगु जनवादी ब्यवस्थाया नितिं गुरिल्ला युद्ध यानाच्वंम्ह गुजम्यानयात अनया तत्कालिन सरकारं ज्वना आजीवन कारावासया सजाय बिउगु खः ।
कारागारय् ताः ई निसें विरामी दूम्ह वयेक वासः यायेगु झ्वलय् सैनिक अस्पतालय् मदूगु खः । हलिंया कम्युनिष्टतये दथुइ गोञ्जालो उपनामं म्हसिका दूम्ह वयेकयात सन् १९९२ या सेप्टेम्बर १२ निसें बन्दी दयेकुगु खः ।
वयेक लिपांगु ई छ्यंगुया क्यान्सर ल्वचं ग्रस्त जुयादी । गोञ्जालोया पार्टी पेरु कम्युनिष्ट पार्टी साइनिङपथं सन १९८० निसें सशस्त्र ल्वापु न्ह्याकुगु खः । उगु १९९९ य् थ्यंबलय् निस्तेज जूगु खः ।
ब्रिक्स दुजः देय्तये १३क्वःगु शिखर सम्मेलन थौंनिसें भर्चुअल रुपय् जुइगु
ञंलाथ्व तृतीया ११४१, भाद्र २४ बिहीवाः
ब्राजिल, रुस, इण्डिया, चाइना व साउथ अफ्रिका दुथ्यागु ब्रिक्स देय्तये १३क्वःगु शिखर सम्मेलन थौंनिसे न्ह्यायेत्यंगु दु ।
रुसं ग्वसाःग्वइगु शिखर सम्मेलनया अध्यक्षता धाःसा भारतीय प्रधानमन्त्री नरेन्द्र मोदीं यानादीगु त्यंगु सम्मेलनय् दुजः देय्तये फुक्क राष्ट्राध्यक्ष दुथ्याइगु जूगु दु । अफगानिस्तानय् तालिवानं नियन्त्रण कायेधुंका जुइत्यंगु थुगु सम्मेलनय् अफगानिस्तानया अवस्था, क्षेत्रीय विषयत लिसें दुजः देयेतये दथुया एजेण्डाय् सहलह जुइगु न्ह्यथंगु दु ।
सैन्य प्रणालीइ सुधार, प्रति आतंकवाद, विकास लक्ष्य प्राप्तिया नितिं प्रविधिया विकास व छ्यलाबुला थप जनस्तरया स्वापू विस्तार लिसेंया विषयलय् नं सहलह जुइगु धाःगु दु ।
अथेहे कोभिडं अर्थतन्त्रय् लाकुगु लिच्वःया खँ नं सहलहया मेगु विषय जुइगु धाःगु दु । भर्चुअल मुँज्याया ग्वसाःखलः धाःसा रुस जूगु दु ।
अफगानिस्तानय् तालिवानं इस्लामिक इमिरेट घोषणा यात
ञंलाथ्व द्धितीया ११४१, भाद्र २३ बुधवाः
अफगानिस्तानय् तालिवानं अन्तरिम सरकार गठन याना देय्यात इस्लामिक इमिरेट घोषणा याःगु दु ।
तालीवानया संस्थापक नेता मुल्ला मोहम्मद हसन अखुन्दजादाया नेतृत्वय् अन्तरिम सरकार दयेका देय्यात इस्लामिक इमिरेट घोषणा याःगु खः । मुल्ला गनी बरादर व मुल्ला अबदस सलाम उपप्रधानमन्त्री जूगु दु ।
रक्षामन्त्रीया भालाय् मुल्ला याकुब वःगु दुसा सिराजुद्दिन हक्कानी गृहमन्त्री जूगु दु । सरकार प्रमुख अखुन्दजादा संयुक्त राष्ट्रसंघया हाकुगु धलःखय् दूम्ह मनू खःसा आन्तरिक मामिला मन्त्रीया भाला बिउम्ह हक्कानी अमेरिकाया फेडरल ब्युरो अफ इन्भेष्टिगेसन एफबीआइं मालाच्वंम्ह मनू खः ।
१७म्ह दुजःया अन्तरिम सरकारया अप्वः धैथें मन्त्रीत वंगु २० दँ निसें अमेरिकी सेनायात जूगु हताःलय् दुथ्यागु थी थी सशस्त्र पुचःया नाइकेत जूगु दु । सुं नं मिसायात सरकारय् दुथ्याकुगु मदु । सरकार प्रमुख अखुन्दं देशय् इस्लामिक कानुन लागु यायेत फुक्क मन्त्रीतयेत निर्देशन बिइधुंकुगु दु ।
अमेरिकी नेतृत्वया गठबन्धन सेनाया बहिर्गमन प्रक्रिया न्ह्यागु लिसें अगस्ट १५य् तालिबानं देय्या फुक्क धैथें प्रान्त लिसें राजधानी काबुल थःगु नियन्त्रणय् काःगु खः । अफगानिस्तानय् थःगु युद्ध क्वचागु न्ह्यथंगु २४ घौ दुने हे तालिवान पुचःलं अन्तरिम सरकारया नेतृत्व ल्यःगु खः ।
