Display Style:
Column Style
राहुल गान्धी व प्रियंका गान्धीयात प्रहरीपाखे दुव्यर्वहार
मनिष | अनलागा १ ११४०,असोज १६ शुक्रवाः
निन्हु न्ह्यः वासः यायेगु झ्वलय् मदुम्ह भारत उत्तरप्रदेश हाथरसया दलित मिसाम्हसिया परिवारयात नाप लायेगु भ्वलय् वःपि भारतीय राष्ट्रिय कांग्रेसया नेता राहुल गान्धी व प्रियंका गान्धीयात प्रहरीं नियन्त्रणय् काःगु दु।
छु घण्टा नियन्त्रणय् कया उमित दिल्ली हे लित छ्वःगु धका स्थानीय सञ्चारमाध्यमं धाःगु दु। थः कार्यकर्ता नाप यमुना एक्सप्रेसपाखे दिल्लीपाखे करिब दुई सय किलोमिटर तापाक्क हाथरसपाखे वना च्वंगु इलय् लँय् हे प्रहरीं रोके याना नियन्त्रणय् काःगु खः। व स्वया न्ह्यः न प्रहरी उमिसं गःगु गाडीयात रोके याःगु खः।
व्या लिपा राहुल व प्रियंका न्यासि वःगु खः। तर, प्रहरीं न्यासि न वका मबिगु खः। वया लिपा कार्यकर्तापि नाप हे सतकय् हे धर्ना बिःगु खः। प्रहरी धर्ना न च्वके मबियगु खः। वया लिपा प्रहरीं धक्का बिःगु यलय् राहुल दउगु खः। वया लिपा प्रहरीं उमित नियन्त्रणय् कया दिल्लीपाखे लित छ्वःगु खः।
राहुल व प्रियंका थःगु कार्यकर्ता नाप निवाः न्ह्यः सामूहिक बलात्कारया शिकार जुम्ह मिसाया परिवारयात नाप लायेगु लागि युपी हासरथ वने त्यःगु खः ।
१९ दँ दुम्ह दलित मिसा वास यायेगु झ्वलय् वःगु मंगलवाः दिल्लीइ मदुगु खः। छेँय् न घाँय् ल्येगु लागि वःगु इलय् सामूहिक बलात्कार जूगु खः। गम्भीर घाइते अवस्थाय् वयात न्हापां युपीया हे अलिगढया अस्पतालय् वासः यायेगु यकूगु खः। लिपा स्वास्थ्य गम्भीर जुया वःगुलि सोमवाः जक दिल्ली हःगु खः। तर, उपचारया हे झ्वलय् मदुगु खः।
अथेहे राहुल गान्धीयात हासरथ वनेत रोके याःगुलि व दुव्यर्वहार याःगु धाःसे कांग्रेस व मेपि विपक्षी दल नाप चर्चित कलाकारपिन्स उत्तरप्रदेश (युपी) सरकारया विरोध याःगु दु।
पूर्व प्रधानमन्त्री एचडी देवगौडां ट्विट यासे विरोध यायेगु लोकतान्त्रिक अधिकार दुगु धाःसे राहुल व प्रियंकायात तत्काल रिहा यायेत माग याःगु दु।
अथेहे अभिनेता कमल हसन न ट्विट यासे घटनायात राजनीतिक दुव्यर्वहारया हद जुगु दु धका धाःगु दु।
भारतय् कोरोनां सीपि ९८ हजार थ्यन
मिलन कुमार | अनलागा १ ११४०,असोज १६ शुक्रवाः
कोरोना संक्रमणया कारण सीपि ९८ हजार ६७८म्ह थ्यःगु दु। वःगु २४ घण्टाय् जक भारतय् १ हजार १८१म्ह कोरोना संक्रमितपि सीगु दु धका विश्व स्वास्थ्य संगठनं धाःगु दु।
भारतय् वःगु २४ घण्टाया दुने ८६ हजार ८२१ म्ह कोरोना संक्रमित थपे जुगु दु। भारतय् कोरोना संक्रमितपि ६३ लाख १२ हजार ५८४म्ह थ्यःगु दु धका विश्व स्वास्थ्य संगठनया तथ्यांकय् उल्लेख याःगु दु।
थ्व हे दथुइ भारतं अक्टोबर १६ निसे स्कुल, कलेज व सिनेमा हल चायेकेगु अनुमति बिःगु दु। अय्न चायेकेगु व मचायकेगु निर्णय धाःसा राज्य सरकारं याइ।
इजरायलनाप एग्रिकल्चर सेन्टर अफ एक्सिलेन्स व श्रम सम्झौताय् हस्ताक्षर
नृपेन्द्रलाल श्रेष्ठ | अनलाथ्व १५ ११४०,असोज १५ बिहीवाः
नेपालय् ईजरायली कृषि प्रविधि दुत हयेगु लागि न्ह्यय्गु हे प्रदेशय् ‘एग्रिकल्चर सेन्टर अफ एक्सिलेन्स’ स्थापना यायेगु सम्वन्धय् समझारीपत्रय् ल्हाःचिं तःगु दु।
बुधवाः नेपाल व ईजरायलया दथुइ समझदारीपत्रय् ल्हाःचि तयेगु ज्या जुग धका ईजरायलया लागि नेपाली राजदूत डा. अन्जान शाक्यं जानकारी बियादिगु दु। उगु समझदारीपत्रय् नेपालपाखे ईजरायलया लागि नेपाली राजदूत शाक्य व ईजरायलपाखे इजरायली परराष्ट्रमन्त्री गावी अस्केनाजी न ल्हाःचिं तयादिगु खः।
ईजरायली अन्तर्राष्ट्रिय विकास साझेदार संस्था (मसाभ) या उपस्थितिइ ईजरायली परराष्ट्र मन्त्रालयय् ग्वसाः ग्वःगु छगु ज्याझ्वलय् समझदारीपत्रमा ल्हाःचिं तयेगु ज्या जुगु खः।
मसाभ इजरायली सरकारया उच्चस्तरया आधिकारिक संस्था खः।
नेपालपाखे ल्हाःति तयेगु लागि असोज ११ गते च्वंगु मन्त्रिपरिषद् नं निर्णय याना राजदूत शाक्ययात अनुमति बिःगु खः।
वःगु मंसिरय् राजदूत शाक्यया विशेष पहल व नेपाल सरकारया ब्वनाय् मसाभ प्रमुख गील हासकेलया टोली नेपालय् वःगु खः । नेपालय् वःगु इलय् प्रधानमन्त्री नापं परराष्ट्र, अर्थ, शिक्षा, कृषि, स्वास्थ्य व ऊर्जा मन्त्रीपिन्त नाप लायेगु ज्या जुगु खः।
मसाभ न नेपालय् एग्रिकल्चर, स्मार्ट ग्रिड सेन्टर अफ एक्सीलेन्स वीथ सोलुसन व सेन्टर अफ एक्सीलेन्स इन एजुकेशन, साइन्स, कल्चर एण्ड स्पोर्ट याना सरकार नाप सम्झौताया लागि प्रक्रिया न्ह्यने यकूगु खः। राजदूत शाक्यं थःगु जिम्मेवारी सम्हाले यासानिसे इजरायल उगु विषयय् निरन्तर पहल यानागुलि थौं थुगु ज्यायायेत ताःलागु धका जानकारी बियादिगु खः।
एगु समझदारीपत्रय् ल्हाःचिं तये धुका नेपालय् कृषि पूर्वाधार निर्माणय् ज्या न्ह्यने वःगु धका राजदूत शाक्यं धयादिगु खः। ‘कृषि प्रधान देय् नेपालया लागि थ्व तधःगु उपलब्धी खः धका राजदूत शाक्य धयादिगु दु।
अथेहे बुधवाः हे नेपाल व ईजरायल दथुइ ‘ईजरायलय विशिष्ट श्रम बजारय् नेपाली कामदारया अस्थायी रोजगारी सम्बन्धी सम्झौता’ य् ल्हाःचिं तयेगु ज्या जूगु दु धका राजदूत शाक्यं जानकारी बियादिगु दु।
उगु सम्झौताय् नेपालपाखे ईजरायलया लागि नेपाली राजदूत शाक्यं व ईजरायलपाखे ईजरायली परराष्ट्र मन्त्री गावी अस्केनाजी न ल्हाःचिं तयादिगु खः। थ्व नाप आ ईजरायली श्रम बजारय् नेपालीया लागि लँ चाःगु दु। थकिइ केयरगिभर क्षेत्र, कृषि क्षेत्र, होटल–रेष्टुरेष्ट, निर्माण लगायतया थासय् नेपालीपिन्त रोजगारीया अवसर वःगु दु।
भारतय् कोरोनां सीपि ९७ हजार स्वया अप्वोल
मनिष | अनलाथ्व १५ ११४०,असोज १५ बिहीवाः
भारतय् कोरोना संक्रमणं सीपि ९७ हजार ४९७ म्ह थ्यःगु दु।
वःगु २४ घण्टाया दुने भारतय् १ हजार १७९ म्ह कोरोना संक्रमितपि सीगु दु धका विश्व स्वास्थ्य संगठनया तथ्यांकय् धाःगु दु।
भारतय् वःगु २४ घण्टाय् जक ८० हजार ४७२ ह कोरोना संक्रमित थपे जूगु दु।
भारतय् आःतक कोरोना संक्रमितपि ६२ लाख २५ हजार ७६३ म्ह थ्यःगु दु धका विश्व स्वास्थ्य संगठनया तथ्यांकय् उल्लेख याःगु दु।
बिश्वय् संक्रमितपि ३ करोड ३० लाख स्वया अप्वोल
मनिष | अनलाथ्व त्रयोदशी ११४०,असोज १३ मंगलवाः
वःगु २४ घण्टाय् विश्वय् ३ लाखa २ हजार २७७ म्ह कोरोना संक्रमण खने दुगु दु।
विश्वय् आःतक ९ लाख ९६ हजार ३४२म्ह संक्रमितपि सी धुकुगु दु धका बिश्व स्वास्थ्य संगठनया तथ्यांकय् उल्लेख याःगु दु ।
वःगु २४ घण्टाया दुने ५ हजार ११४ म्ह संक्रमितपि सीगु दु।
अथेहे आःतक बिश्वय् संक्रमितपि ३ करोड ३० लाख ३४ हजार ५९८ म्ह थ्यःगु दु।
