Display Style:
Column Style
हलिमय् कोरोना सक्रमित ३ करोड ४१ लख स्वया अप्वोल
लहानान्युज | अनलागा २ ११४०,असोज १७ सनिवाः
वःगु २४ घण्टाया दुने विश्वय् ३ लाख १५ हजार ६२८ म्ह कोरोना संक्रमण पुष्टि जूगु दु।
वःगु २४ घण्टाय् जक ६ हजार ३४७म्ह सीगु दु।
थ्व नाप संक्रमितपि ३ करोड ४१ लाख ६१ हजार ७२१ म्ह थ्यःगु दु।
भारतय् कोरोनां सीपि १ लाख थ्यनिन
मनिष | अनलागा २ ११४०,असोज १७ सनिवाः
भारतय् कोरोना संक्रमणया कारण सीपि १ लाख थ्यने त्यःगु दु ।
विश्व स्वास्थ्य संगठनया तथ्यांक कथं भारतय् आःतक ९९ हजार ७७३ म्ह संक्रमितपि सी धुकुगु दु ।
वःगु २४ घण्टाय् जक भारतय् १ हजार ९५म्ह कोरोना संक्रमितपि सी धुकुगु दु धका धाःगु।
अथेहे वःगु २४ घण्टाय् ८१ हजार ४८४म्ह कोरोना संक्रमित सी धुकुगु दु। भारतय् कोरोना संक्रमितपि ६३ लाख ९४ हजार ६८ म्ह थ्यःगु दु धका विश्व स्वास्थ्य संगठनया तथ्यांकय् उल्लेख
याःगु दु।
भारत कोरोना संक्रमितपि जुगु देय् या धलखय् मध्ये ल्यू लाना च्वंगु दु।
दक्षिण कोरियाय् संक्रमण कम जुया वन
लहानान्युज | अनलागा १ ११४०,असोज १६ शुक्रवाः
दक्षिण कोरियाय् अगस्ट निसे शुरु जुगु निक्वःगु लहरया कोरोना भाइरस संक्रमण वःगु निवाः निसे लगातार कम जुया वयाच्वंगु दु।
कोरिया रोग नियन्त्रण केन्द्रया कथं न्हुपि संक्रमित थपे जुगु झ्वलय् स्वन्हुनिसे सच्छि स्वयम कम दु।
वःगु २४ घण्टाय् जक न्हुपि ६१म्ह जक संक्रमित पिहा वयेवं कोरियाय् आःतक कुल संक्रमितपि २३ हजार १०६ म्ह थ्यःगु दु धका धाःगु दु। मंगलवाः थपे जुपि ६१ म्ह मध्ये १०म्ह पिने वःपि खः।
वःगु अगस्ट १४ य् राजधानी सउलया छगु चर्चं नेतृत्व याःगु सरकार बिरोधी प्रदर्शन लिपा कोरोनाया निगु लहर माहामारीया रुप काःगु खः।
वया लिपा सरकारं भाइरस नियन्त्रणया लागि तत्काल २.५ मिटर सामाजिक दुरीया अभियानयात कडाइया साथ लागु याःगु खः। आः संक्रमण क्वहा वःगुलि सामाजिक दुरीयात छु भचा छ्वासुकुगु खः।
कोरियाय् आःतक कोरोना भाइरसया कारण सीपि ३८८म्ह थ्यःगु दु सा वासः याना छेँय् लिहावःपि २० हजार ४४१म्ह थ्यःगु दु। कोरियाय् आःतक २२ लाख ४५ हजार ११२ म्हेसिगु पिसिआर विधिपाखे कोरोना भाइरस परीक्षण याये धुकुगु दु।
डोनाल्ड ट्रम्प व मेलानियायात कोरोना संक्रमण
लहानान्युज | अनलागा १ ११४०,असोज १६ शुक्रवाः
मेरिकी राष्ट्रपति डोनाल्ड ट्रम्प व अमेरिकी फर्स्ट लेडी मेलानिया ट्रम्पयात कोरोना भाइरस (कोभिड(१९) या संक्रमण पुष्टि जूगु दु। शुक्रवाः सामाजिक सञ्जाल ट्विटरपाखे थःत कोरोना संक्रमण पुष्टि जूगु जानकारी बिःगु खः।
थ्व नाप थः क्वारेन्टिनय् च्वनेगु व थः याकन हे थिक जुइ धका विश्वास प्वकूगु दु। थ्व स्वया न्ह्यःय ट्रम्पया वरिष्ठ सल्लाहकार मध्ये होप हिक्सयात कोरोना संक्रमण पुष्टि जुगु खः।
वया लिपा ट्रम्प व मेलानिया कोरोना परीक्षण याःगु खः। परीक्षणया झ्वलय् उमित कोरोना संक्रमण पुष्टि जूगु खः।
ट्रम्पया सल्लाहकार हिक्सयात छु भचा कोरोनाया लक्षण खनेदुगु खः। ट्रम्पं हिक्सया कडा अनवरतरुपं कडा परिश्रम याःगु धका प्रशंसा याःगु दु।
भारतया उपराष्ट्रपति वेंकैया नायडू कोरोना संक्रमण
मनिष | अनलागा १ ११४०,असोज १६ शुक्रवाः
भारतया उपराष्ट्रपति वेंकैया नायडूयात न कोरोना भाइरसया संक्रमण जुगु दु। उपराष्ट्रपति नायडूया आधिकारिक ट्विटर ह्याण्डलपाखे नायडूयात संक्रमण जूगु जानकारी बिःगु दु।
नियमित परीक्षण यायेग् झ्वलय् कोभिड १९ संक्रमणया पुष्टि जुगु धका धाःगु खः। अय्न लक्षण खने मदुगु व स्वास्थ्य सामान्य अवस्थाय् दु धका उपराष्ट्रपति नायडूं ट्वीटया जानकारी बिःगु खः। आः छेँय् हे क्वरेन्टाइनय् च्वना च्वंगु दु। वयकःया तिरिमय्जु उषा नायडू धाःसा रिपोर्ट नेगेटिभ वःगु दु। वयात सेल्फ आइसोलेसनय् तया तःगु दु।
भारतय् कोरोना भाइरस संक्रमित ७१ दँया नायडू बहालवाला दकलय् उच्च पदय् च्वम्ह खः। थ्व स्वया न्ह्यः केन्द्रीय मन्त्रीपि गृहमन्त्री अमित शाह, नितिन गडकरी, धमेन्द्र प्रधान, गजेन्द्र सिंह शोखावतपिन्त न संक्रमण पुष्टि जुइ धुकुगु खः। उपि दक्को थिक जुइ धुकुगु दु।
अथेहे आतक भारतय् प्रदेशया निम्ह मन्त्री, स्वम्ह संघीय सांसद व खुम्ह विधायकपि कोरोनाया कारण सी धुकुगु दु।
