Display Style:
Column Style
यौन दुव्र्यवहार याःगुलिं भारतया छम्ह पूर्वमन्त्रीयात ज्वन
लहना न्यूज | ने.सं. ११३९ ञलागा सप्तमि (२१ सेप्टेम्बर, २०१९), सञ्चरवाः
मिसामचायात यौन दुव्र्यवहार याःगु द्वपनय् भारतया छम्ह पूर्वमन्त्रीलिसें सत्तारुढ दलया नेतायात ज्वंगु दु ।
भारतीय जनता पार्टीया नेता स्वामी चिनमायानन्दयात उत्तरी प्रदेशया छम्ह ब्वँमि मिसामचायात यौन दुव्र्यहार याःगु द्वपनय् ज्वंगु खः ।
चिनमायानन्दयात वय्कःया हे छेँपाखें ज्वंगु व वय्कःया स्वास्थ्य अवस्था गम्भीर जूगु नं चिनमायानन्दया वकिल पूजा सिंहं जानकारी बियादीगु दु । वय्कलं चिनमायानन्दयात आः चिकित्सकया निगरानीइ तयातःगु जानकारी बियादिसें थः वय्कःया वकिल जूसां नं नापलाके मब्यूगु नं धयादिल ।
ज्वनेधुंकाः चिनमायानन्दया स्वास्थ्य परीक्षणया नितिं अस्पताल यंकूगु खः । चिकित्सकया कथं वय्कःयात नियमितकथं स्वास्थ्य परीक्षणया नितिं हय्गु यानाच्वंगु दु ।
अफगान राष्ट्रपतिया चुनावी -यालिइ आत्मघाती हमला
लहना न्यूज | ने.सं. ११३९ ञलागा तृतिया (१७ सेप्टेम्बर, २०१९), मंगलवाः
अफगानिस्तानया राष्ट्रपति असरफ घानीया चुनावी -यालिइ आत्मघाती हमला जूगु दु ।
सेप्टेम्बर २८य् जुइगु चुनावय् हाकनं राष्ट्रपति जुइत उम्मेदवारी बियादीम्ह घानी थौंकन्हय् चुनावी प्रचार प्रसारय् व्यस्त जुयाच्वंगु दु ।
उत्तरी अफगानिस्तानया चरिकार सहरय् घानीं ब्वति कयाच्वंगु -यालिइ थौं मंगलबाः न्हिनय् आत्मघाती हमला जूगु खः । उगु हमलाय् लानाः २४म्ह नागरिकत सीगु दु । विष्फोटपाखें घानीयात धाःसा छुं मजूगु वय्कःया ग्वाहालिमिं न्ह्यथंगु दु ।
विष्फोटया जिम्मा आःतक सुनां नं काःगु मदुनि । तर अतिवादी पुचः तालिवानं हमला याःगु जुइफइगु अनुमान याःगु दु ।
अमेरिकालिसे वार्ताय् छुं नं प्रगति मजुइधुंकाः तालिवानं लिपांगु इलय् आत्मघाती आक्रमणयात तच्वयेकूगु दु ।
अमेरिकां १८दँ न्ह्यःनिसें अफगानिस्तानय् सेना तयातःगु दु । तालिवानलिसे वार्ता यानाः सेना लित यंकेगु अमेरिकाया तयारी खः । तर वंगु वालय् उगु वार्ता त्वाःदल ।
मनूतय्त ख्यानाः सेप्टेम्बर २८या चुनावय् ब्वति कायेके मबीत थःपिनिगु रणनीति जूगु तालिवानं न्ह्यथंगु दु ।
जोनसनया निर्वाचन सम्बन्धी प्रस्ताव बेलायती संसदपाखें निक्वःखुसी अस्वीकृत
लहना न्यूज | ने.सं. ११३९ ञलाथ्व द्वादशि (१० सेप्टेम्बर, २०१९), मंगलवाः
बेलायती प्रधानमन्त्री बोरिस जोनसनं तयादीगु निर्वाचन प्रस्ताव अनया हाउस अफ कमन्सं निक्वःखुसी नं अस्वीकृत याःगु दु ।
यूरोपेली युनियनं पिहां वनेगु अर्थात ब्रेक्जिट प्रस्ताव संसदपाखें अस्वीकृत जुइधुंकाः हतास जुयाः बोरिसं अक्टोबर १५य् चुनाव यायेगु प्रस्ताव संसदय् यंकादीगु खः । तर जोनसनया उगु प्रस्ताव निक्वःखुसी नं सांसदतसें अस्वीकृत याःगु खः ।
बिबिसीकथं २९३ सांसदतसें जक जोन्सनया प्रस्तावय् समर्थन याःगु खः । निर्वाचन प्रस्ताव पारित जुइगु नितिं दुई तिहाई अर्थात ४३४कू मत माःगुली १४१कू मत मगाःगु खः ।
विपक्षीतसें जक मखु, सत्तारुढ दलया सांसदतसें नो–डिल ब्रेक्जिट सम्बन्धी विधेयक पारित याके मबीवं जोनसनं निवार्चन याकेत स्वःगु खः । तर सत्तारुढया नापनापं विपक्षी दलया सांसदतय्त ब्रेक्जिटया नितिं बाध्य यायेत जोनसनं निर्वाचनया कार्ड छ्यःगु धासें विरोध प्वंकूगु खः ।
बेलायत यू्रोपियन युनियनपाखें पिहां वनेगु ईया सीमा अक्टोबर ३१ खः । उगु अवधिइ विना सम्झौता हे जूसां बेलायत इयूपाखें अलग्ग जुइगु सम्बन्धी कानून दय्केगु नितिं हःगु विधेयकया पक्षय् वंगु वालय् ३०१ मत व विपक्षय् ३२८ मत लाःगु खः ।
जोनसनया प्रस्तावय् बेलायतया संसद आः न्यावाःया नितिं निलम्बित जुइ । सम्झौतापाखें लिहां वयेधुंकाः बेलायतया संसदं यूरोपेली युनियनय् हे च्वनेगु वा पिहां वनेगु सम्बन्धी कानून पारित यायेमाः ।
काबुलया उच्च सुरक्षा लागाय् कार बम विष्फोट
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
अफगानिस्तानया राजधानी काबुलय् विदेशी कूटनीतिक नियोगहरू दुगु उच्च सुरक्षा लागाय् कार बम विस्फोट जूगु दु ।
स्थानीय ईकथं थौं विहिवाः सुथय् अमेरिकी दूतावास भवन लिक्कसं जूगु विष्फोटय् लानाः १०म्ह सीगु दुसा दर्जनौं मनूत घाःपाः जूगु दु ।
गृह मन्त्रालयया प्रवक्ता नसरत रहीमीया कथं कतारया राजधानी दोहाय् अमेरिकालिसे शान्ति वार्ता यानाच्वंगु तालिबानी पुचलं उगु आक्रमण याःगु दावी दु ।
वंगु सोमवाः चान्हय् नं तालिवानी पुचलं आत्मघाती बम विष्फोटन याकूगु इलय् १६म्ह सीगु खःसा सच्छिम्ह स्वयां अप्वः मनूत घाःपाः जूगु खः । सोमबाः जूगु आत्मघाती विष्फोट लिपा प्रहरीं उगु लागाय् वनेत पंगु खः ।
अमेरिका व तालिवान दथुइ थीथी चरणय् अफगानिस्तापाखें अमेरिकी सेना लित यंकेगु खँय् सैद्धान्तिक सहमति याःसां नं अमेरिकी दूतावास भवन लिक्क थुकथं विष्फोट जूगु खः ।
बेलायती प्रधानमन्त्रीया किजापाखें सांसद व राज्यमन्त्रीपाखें राजीनामा
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
बेलायती प्रधानमन्त्री बोरिस जोनसनया किजा जो जोनसनं सांसद व राज्यमन्त्रीपाखें राजीनामा बियादीगु दु ।
अक्टोबर ३१तक सम्झौता जूसां मजूसां नं यूरोपियन युनियनपाखें अलग्ग जुइगु (ब्रेक्जिट) बचं याःम्ह बोरिसया उगु ग्वसालय् पंगः जूगु खः । वय्कःया कन्जरभेटिभ पार्टीया सांसद ब्रेक्जिटया विरोधय् दुं दु । सांसदत विपक्षय् दनेवं जोनसनं हाउस अफ कमन्सय् दुगु सामान्य बहुमत नं तंकूगु दु ।
अथे हे, ई न्ह्यः हे आमनिर्वाचन याकेगु जोनसनया प्रस्ताव नं संसदं अस्वीकृत याःगु दु । थःगु प्रस्तावयात ग्वाहालि मयाःगु धासें जोनसनं २१म्ह सांसदपिन्त निलम्बन यानादीगु दु । थ्व हे संकटया दथुइ बोरिसया किजा जो जोनसनं थौं विहिवाः सांसद व मन्त्रीपाखें राजीनामा बियादीगु खः ।
जो जोनसनं थः यक्व ई छेँजः व देसया हित मध्ये गुकियात ल्ययेगु धइगु द्विविधाय् लाःगु व अन्त्यय् देसया हितया पक्षय् निर्णय कयागु धयादिल ।
जो सन् २०१० निसें लगातार सांसद जुया वयाच्वनादीम्ह खः । २०१६या जनमत संग्रहया इलय् जों यूरोपियन युनियनय् च्वनेमाःगु पक्षय् भोट कुर्कादीगु खः ।
जो थेरेसा मेया सरकारय् नं मन्त्री जुयादीगु खः । तर दथुइ वय्कलं मे सरकारया मन्त्रीपाखें राजीनामा बियादीगु खः ।
वंगु जुलाइस दाजु बोरिस प्र्रधानमन्त्री जुइधुंकाः जो ब्यापार तथा शिक्षा मन्त्रालय जुनियर मन्त्री जुयादीगु खः ।
ब्रेक्जिटयात कयाः जोनसन परिवार हे विभाजित जूगु दु । बोरिस न्ह्याथे जूसां नं बेलायतयात यूरोपियन युनियनपाखें अलग्ग जुइमाः धइगु पक्षय् दुसा वय्कःया अबु व केहेँ यूरोपियन युनियनया कट्टर समर्थक खः ।
