Display Style:
Column Style
हङकङं सुपुर्दगी विधेयक लित काल
लहना न्यूज | ने.सं. ११३९ ञलाथ्व षष्ठि (४ सेप्टेम्बर, २०१९), बुधवाः
स्वलातक मदिक्क जुयाच्वंगु आन्दोलनलिपा हङकङं सुपुर्दगी विधेयक लित काःगु दु ।
हङकङया प्रमुख ल्यारी क्यामं थौं बुधवाः उगु विधेयक लित कयागु घोषणा यानादीगु खः ।
हङकङ चीनया अजाःगु थाय् खः, गुगु चीनदुने ला लाः, तर बेइजिङया कानूनयात नाला काइमखु । अथे धइग चीन व हङकङ छगू देय् निगू व्यवस्था दु ।
झिंस्ववाः न्ह्यः हङकङया विधायिकां हिरासतय् दुम्हेसित चीन सुपुर्दगी यायेगु सम्बन्धि विधेयक हःगु खः ।
थ्यंमथ्यं २०गू लख मनूत सतकय् कुहां वयाः उगु विधेयकया विरोध लिपा बेइजिङं नियुक्त याःम्ह प्रमुख क्यामं विधेयक न्ह्यःने मयंकेगु धयादीगु खः, तर लित कायेत माने मजूगु खः । व लिपा आन्दोलनकारीतसें थप मागतकं तयाः आन्दोलनयात अझ तच्वयेकूगु खः ।
वाःया अन्तय् जुइगु ततःधंगु ब्वज्यां हङकङया जनजीवनयात लिच्वः लाकूगु खः । छुं ई न्ह्यः प्रदर्शनकारीतसें अन्तर्राष्ट्रिय विमानस्थलय् तकं पंग थनाब्यूगु खः । लिसें आन्दोलनकारीतसें हङकङय् च्वंगु बेइजिङया सम्पर्क ज्याकुथि तकं स्यंकाब्यूगु खः ।
चीनं हङकङया आन्दोलन क्वत्यलेत जनमुक्ति सेना परिचालन यायेफइगु अनुमान तकं याःगु खः । हङकङया सीमा लिक्क जनमुक्ति सेनां तालिम नं न्ह्याकूगु खः ।
क्यामया राजीनामा व चुनावपाखें प्रमुख ल्यये दयेमाःगु माग नं तःपिं प्रदर्शनकारीत विधेयक लित कायेधुंकाः आन्दोलन दिकी व दिकिमखु धइगु अझ नं सीमदुनि ।
ब्रेक्जिटयात कयाः बेलायती संसद स्थगन
लहना न्यूज | ने.सं. ११३९ गुंलागा चःह्रे (२९ अगष्ट, २०१९), विहिवाः
बेलायती प्रधानमन्त्री बोरिस जोन्सनया संसद निलम्बन यायेगु क्वःछिनालिपा सांसद व अभियाकःमित आक्रोशित जूगु दु । जोन्सनया लिपांगु दिकेत स्वःगु अभियानय् १३गू लखस्वयां अप्वस्यां ल्हाःचिं तयेधुंकूगु दु । ब्रेक्जिटया ई क्वचाइगु छवाः न्ह्यः सेप्टेम्बर व अक्टोबरया न्यावाःया नितिं संसद निलम्बन यायेगु प्रधानमन्त्री जोन्सनया इनाप म्हिगः बुधवाः बेलायती महारानी एलिजाबेथं स्वीकृत यानादीगु खः ।
प्रधानमन्त्रीया प्रस्ताव महारानीं स्वीकार यायेधुंकाः बेलायती राजनीतिं न्हूगु मोड काःगु दु । राजनीतिक घोषणायात कयाः खास हे प्रतिकृया मबीगु ‘हाउस अफ कमन्स’या नेता जन बुर्कों संसद निलम्ब्न यायेगु पलाःयात संविधान उल्लंघनकथं ब्याख्या याःगु दु ।
जोन्सनया बेलातयी पलाखं राजनीति अझ विभाजित जूगु बेलायती सञ्चार माध्यमं न्ह्यथंगु दु । बेलायत यूरोपियन युनियनपाखें बिना सम्झौता हे थ्व हे अक्टोबर ३१ तारिखय् बहिर्गमन (ब्रेक्जिट) जुइमाःगु अडानया सामना यायेत प्रधानमन्त्री जोन्सनं थुकथंया जोखिम काःगु खनेदु । वंगु बुधवाः बेलायतया प्रतिपक्षी दलतसें बिना सम्झौता ईयूपाखें पिहां वयेगु पलाः विरुद्ध छप्पँ जुइगु व संसदय् कानूनीकथं पास जुइकथं विधेयक हयेत सहमति याःगु खः । बहुमत बेलायती सांसदत धाःसा विना सहमति ईयूपाखें बेलायत पिहां वयेगु पक्षय् मदु ।
न्हूगु सरकारया कार्ययोजना व नीतिया नितिं वइगु सेप्टेम्बरया निगूगु वाःनिसें न्यावाःतक संसद स्थगन याःगुलिं थ्व छुं राजनीतिक चाल मजूगु प्रधामन्त्री जोन्सनं धयादीगु दु । बिबिसीकथं हाउस अफ कमन्स नेता ज्याकोब रेस–मोगं धाःसा प्रधानमन्त्रीया पलाःया बचाउ यासें विरोध पाय्छि मजूगु धयादिल । विपक्षीतसें प्रधानमन्त्रीया न्हूगु पलाः प्रजातान्त्रिक मूल्य व मान्यता अःखः जूगु धासें विरोध बुलन्द यायेगु उद्घोष याःगु दु । उमिसं क्वःछिनाया विरोध यासें प्रधानमन्त्रीया पलाखं सांसदतयुत ब्रेक्जिटलिसे स्वानाच्वंगु विषयस सहलह यायेत म्हो जक ई ब्यूगु धाःगु दु ।
लेबर पार्टी नेता जेरेमी कोर्बिनं बिना सम्झौता यूरोपेली संघपाखें पिहां वयेत सरकारं षडयन्त्र यानाच्वंगु दावी यानादिल । ब्रेक्जिटयात कयाः संसदय् कानून पारित यायेत माःकथंया ई मतःगु वय्कःया दावी दु । प्रधानमन्त्री जोन्सनं बेलायती प्रजातन्त्रयात हे प्रहार याःगु धयादिसें कोर्बिनं सरकारयात कयाः अविश्वास प्रस्ताव दर्ताया तयारी यायेगु ख्याच्वःतकं बियादिल ।
संसद स्थगन यायेगु सरकारी घोषणा लिपा हे बेलायती संसद भवन न्ह्यःने नारा जुलुसलिसेंया ब्वज्या शुरु जूगु दु । लिपांगु क्वःछिनायात कयाः असहमत प्वंकूसें स्कटिस टोरी नेता रुथ डेभिडसनं राजीनामा बियादीगु दु ।
ईयूया कट्टर विरोधीतसें धाःसा प्रधानमन्त्री जोन्सनया वंगु स्वदँ न्ह्यःनिसें अनिर्णयया बन्दीकथं जुयाच्वंगु ब्रेक्जिट सार्थक जुइत्यंगु धासें समर्थन याःगु दु । प्रधानमन्त्री जोन्सनं छुं नं हालतय् ईयूपाखें बेलायत ३१ अक्टोबरय् अलग जुइगु घोषणा तःक्वःमछि हे यानादीगु खः ।
भारतया पुलांम्ह अर्थमन्त्री चिदम्बरमयात ज्वन
लहना न्यूज | ने.सं. ११३९ गुंलागा सप्तमि (२२ अगष्ट। २०१९), विहिवाः
भारतीय टेलिभिजन कम्पनी आइएनएक्स मिडियालिसे सम्बन्धित भ्रष्टाचार व मुद्रा निर्मलीकरण मुद्दाय् दुथ्याःगु शंका यासें भारतीय कंग्रेसया नेतालिसें पुलांम्ह अर्थमन्त्री पी चिदम्बरमयात ज्वंगु दु । म्हिगः बुधवाः सनिलय् चिदम्बरमयात केन्द्रीय अनुसन्धान ब्यूरों ज्वनाः हिरासतय् तःगु खः ।
भारतीय अनलाइन पत्रिका स्क्रोल इनकथं चिदम्बरमयाके थौं विहिवाः सुथसिया झिताः इलंनिसें न्हिनसिया छताः ईतक सिबिआइं बयान काःगु खः ।
मनमोहन सिंहया सरकारय् चिदम्बरम गृहमन्त्री जुयादीगु खः । उगु इलय् अर्थमन्त्री जुयादीम्ह प्रणव मुखर्जी राष्ट्रपति जुयादीधुंकाः चिदम्बरमं अर्थ मन्त्रालय् स्वयादीगु खः ।
आइएनएक्स मिडियाया मालिकया जहानया बयानया लिधंसाय् पी चिदम्बरमयात हिरासतय् काःगु खः । अर्थमन्त्री जूगु इलय् चिदम्बरमं थः काय् कर्ती चिदम्बरमया कम्पनीयात आर्थिक ग्वाहालि यायेत इनाप याःगु धासें बयान बियादीगु खः ।
कःनिब्वय् जहाज अवतरण, फुक्क यात्रु सकुशल
लहना न्यूज | ने.सं. ११३९ गुंला पुन्हि (१५ अगष्ट, २०१९), विहिवाः
रुसको राजधानी मस्को लिक्कसं थौं विहिवाः छम्ह चालकं कःनिब्वय् जहाज अवतरण याःगु दु ।
मस्कोया जुकोभ्स्की विमानस्थल क्राइमियाया सिम्फेरोपोल वनेगु नितिं ब्वःगु जहाजय् टेक अफ याःगु छुं ई धुंकाः हे चखुंया बथान न्याःगु खः ।
चखुं ठक्कर नयेवं जहाजया निगुलिं इन्जिनय् समस्या वःगु खः ।
जहाज ब्वयेसातं हे यक्व हे संगु छम्ह यात्रुं धाःगु दु ।
जहाज दुनेया मत सीवं यात्रुत तसकं आत्ते जूगु खः । तर चालकं तसकं हे संयम जुयाः जहाजयात कःनिब्वय् आपतकालीन अवतरण याःगु खः ।
युराल एअरलाइन्सया उगु जहाजय् २२६म्ह यात्रु व ७म्ह चालकदलया दुजःपिं दुगु खः ।
विमानस्थलपाखें थ्यंमथ्यं १गू किलोमिटर तापाक्क दुगु कःनिब्वय् जहाज सुरक्षित अवतरण यायेत ताःलाःगु खः । उगु घटनाय् २३म्ह यात्रुपिं घाःपाः जूगु रुसी अधिकारीं न्ह्यथंगु दु ।
जहाजपाखें फुक्क यात्रुयात पिने हःगु दुसा घाःपाः जूपिन्त अस्पताल यंकूगु खः । घाःपाः जूपिं मध्ये ५म्ह मस्त जूगु रुसी स्वास्थ्य मन्त्रालयं न्ह्यथंगु दु ।
युराल एअरलाइन्सं जहाजया पाइलट तसकं हे अनुभवी जूगुलिं सफलतापूर्वक अवतरण यायेफूगु न्ह्यथंगु दु । नां मधाःगु उम्ह पाइलटं ३द्वः घौ उडान यायेधुंकूगु खः ।
राजकीय सम्मानया लिसें सुष्मा स्वराजया अन्त्येष्टि
लहना न्यूज | ने.सं. ११३९ सप्तमि (७ अगष्ट, २०१९), बुधवाः
भारतया पूर्व विदेशमन्त्री सुष्मा स्वराजया राजकीय सम्मानया लिसें अन्त्येष्टि यात ।
लोधी रोडय् च्वंगु विद्युतीय शव दाहगृहस वय्कःया अन्त्येष्टि याःगु खः । वय्कःया म्ह्याय् बाँसुरीं अन्तिम संस्कार यानादीगु खः ।
अन्त्येष्टिया झ्वलय् प्रधानमन्त्री नरेन्द्र मोदीलिसें भारतीय जनता पार्टीया नेतापिनिगु उपस्थित दुगु खः । थ्व स्वयां न्ह्यः स्वराजया सीम्ह अन्तिम श्रद्धाञ्जलिया नितिं भारतीय जनता पार्टीया ज्याकुथिइ तयातःगु खः ।
म्हिगः मंगलवाः ६७दँय् मदुम्ह भारतीय पूर्व विदेशमन्त्री स्वराज मदय् न्ह्यः हृदयघात जुयाः न्हू दिल्लीइ च्वंगु एम्स अस्पतालय् भर्ना यानातःगु खः । जलास्येँ प्रत्यारोपण यानादीम्ह स्वराज बांमलाःगु उसाँय्या हुनिं वंगु मे व अप्रिलय् जूगु लोकसभा चुनावय् उम्मेदवारी मबीगु घोषणा यानादीगु खः ।
सन् २०१४ निसें २०१९ या मार्चतक भारतया विदेशमन्त्री जुयादीम्ह स्वराजं भारतीय जनता पार्टी बिजेपीया इलय् दिल्लीया मुख्यमन्त्रीया जिम्मेवारी तकं कयादीगु खः ।
सुष्मा स्वराज दकलय् म्हो २५दँ दुबलय् भारतया केन्द्रीय मन्त्रीमण्डलय् मन्त्री जुयादीम्ह खः । प्यंगू दशक ताःहाकःगु राजनीतिक यात्राय् स्वराज, ईन्दीरा गान्धी लिपा विदेशमन्त्रीया जिम्मेवारी कयादीम्ह निम्हम्ह मिसाम्ह खः । ५दँ भारतया विदेशमन्त्री जुयादीम्ह स्वराजया नेतृत्वय् नेपाल भारतया स्वापू बांलाकेगु कुतः याःसां नं नेपालय् नाकाबन्दी वय्कःया हे इलय् जूगु खः ।
