Display Style:
Column Style
ब्राजिलय् कैदीत दथुइ ल्वापु जुयाः ५२म्ह सित
लहना न्यूज | ने.सं. ११३९ दिल्लागा त्रयोदशि (३० जुलाइ, २०१९), मंगलवाः
ब्राजिलया पारा राज्यया छगू जेलय् कैदीत दथुइ ल्वापु जूगु इलय् म्होतिं ५२म्ह सीगु दु । उकी १६म्हेसिगु छ्यं ध्यनाब्यूगु दु ।
अधिकारीया कथं अल्टामिरा जेलय् थ्यंमथ्यं न्याघौतक ल्वापु जूगु खः । स्थानीय ईकथं सुथसिया ७ताः इलंनिसें शुरु जूगु उगु ल्वापु न्हिनय् जक नियन्त्रणय् काःगु खः ।
स्थानीय मिडियाकथं जेलया छखे च्वनाच्वंपिं कैदीत मेखेर च्वंपिं कैदीत थ्यनेवं शुरु जूगु विवादं ल्वापु जूगु खः । कैदीतसें जेलया निम्ह अधिकारीपिन्त बन्धक नं दयेकूगु खः । अथेखःसां उमित कैदीया नियन्त्रणपाखें मुक्त यायेधुंकूगु दु ।
ल्वापुया झ्वलय् जेलदुने हे मि तयाब्यूगु खः । कुँया हुनिं सासः ल्हाये थाकुयाः नं सुंसुं कैदीत सीगु खँ धाःगु दु । ब्राजिलया टेलिभिजनं जेलया भवनपाखें कुँ पिहां वयाच्वंगु व सुं सुं कैदीत जेलया पल्लिइ न्यासि वनाच्वंगु लू प्रसारण याःगु खः ।
ब्राजिलया सञ्चारमाध्यमकथं अल्टामिरा जेलया क्षमता २सः म्ह जक दुसां अन ३११म्ह कैदीत तयातःगु दु ।
ब्राजिलय् जेल दुने जुइगु हिंसायात सामान्यकथं कायेगु याः । वंगु मे महिनाय् छन्हुं हे प्यंगू अलग अलग जेलय् हिंसा जूगु इलय् ४०म्ह सीगु खः ।
इथियोपियाय् छन्हुं ३५०गू लख सिमा पिनाः विश्वकीर्तिमान
लहना न्यूज | ने.सं. ११३९ दिल्लागा त्रयोदशि (३० जुलाइ, २०१९), मंगलवाः
अफ्रिकी देय् इथियोपियां छन्हुं हे ३गू करोड ५०गू लख स्वयां अप्वः सिमा पिनाः विश्व कीर्तिमान तःगु दु ।
संयुक्त राष्ट्र संघ व अफ्रिकी युनियनया स्वयम् सेवीपिन्सं १२घौया इलय् उकथं सिमा पीगु ज्या जूगु इथियोपियाया खोज लिसें प्रविधि मन्त्रीयात उद्धृत यासें बिबिसीं न्ह्यथंगु दु । हरियाली वातावरणया नितिं धयादिसें प्रधानमन्त्री अबी अहमदं न्ह्यब्वयादीगु योजनाकथं देय् न्यंकया द्वःछि स्वयां अप्वः थासय् सिमा पीगु ज्या जूगु खः ।
बन फडाँनी नापं जलवायु परिवर्तनया हुनिं खडेरीपाखें ग्रस्त जुयाच्वंगु देशयात हरियाली दयेकेगु नितिं सिमा पीगु अवधारणा हःगु अहमदया धापू दु । इथियोपियाय् मुक्कं ४गू अर्ब सिमा पीगु लक्ष तयातःगु दु ।
संयुक्त राष्ट्र संघयाकथं २०गूगु शताब्दीइ ३५गू प्रतिशत बन लागा दुगु धयातःगु इथियोपियाया वन लागा सन् २०००तक थ्यंबलय् ४गू प्रतिशतय् कयेकुंगु अन सार्वजनिक याःगु तथ्याङ्कयात उद्धृत यासें विविसीं न्ह्यथंगु दु ।
अफगानिस्तानय् जूगु आत्मघाती विष्फोटय् लानाः २०म्ह सित
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
अफगानिस्तानया राजधानी काबुलय् आइतबाः जूगु आत्मघाती बम विष्फोटय् लानाः २०म्ह स्वयां अप्वः सीगु दु ।
उपराष्ट्रपति पदया उम्मेदवार अम्रुल्लाह सालेहयात निशाना दयेकाः वय्कःया ज्याकुथि न्ह्यःने जूगु आक्रमणय् ५०म्ह स्वयां अप्वः घाःपाः जूगु दु ।
अफगानिस्तानया जुइत्यंगु राष्ट्रपति चुनावया नितिं याःगु प्रचारया न्हापांगु दिनस थजाःगु घटना जूगु खः ।
सालेह सामान्य घाःपाः जूगु दु । वय्कः राष्ट्रपति असराफ घानी पक्षया उम्मेदवार खः ।
आन्तरिक मन्त्रालयया प्रवक्ताकथं आक्रमणकारीं विष्फोटक पदार्थं जाःगु कार सालेहया ज्याकू न्ह्यःने चाःहीकाच्वंगु खः ।
व लिपा सुंसं आतंककारीत ज्याकुथिइ दुहां वःगु व उपिं सुरक्षा बलपाखें स्याये न्ह्यः खुघौतक अन हे दुगु खः ।
सालेहया ज्याकू दुग भवन ग्रीन ट्रेण्ड (सामाजिक भ्रष्टाचार विरोधी संस्था)पाखें थ्यंमथ्यं १५०म्ह नागरिकपिन्त उद्धार याःगु खः ।
राष्ट्रपति अर्साफ घानीं थ्व स्वयां न्ह्यः आइतवाः सुथय् जक देशय् शान्ति वयाच्वंगु धयादीगु खः । उगु आक्रमणयात छुं नं उग्रवादी पुचलं जिम्मेवारी काःगु मदुनि ।
अफगानिस्तानया चुनाव सेष्टेम्बरय् जुइगु अपेक्षा यानातःगु दु । तर थ्व स्वयां न्ह्यः नं चुनाव निक्वःतक लिछ्यायेधुंकूगु दु ।
बन्दुकधारीया गोलिं लानाः प्यम्ह सित
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
अमेरिकाया क्यालिफोर्निया राज्यय् छम्ह बन्दुकधारीं गोलिं कयेकूगु इलय् प्यम्ह सीगु दु ।
स्थानीय ईकथं म्हिगः आइतवाः सनिलया ५ताः ई जुयाः ४१गू मिनेटय् क्यालिफोर्नियाया छगू गार्लिक फेष्टिभलय् बन्दुकधारीं गोलिं कयेकूगु इलय् प्यम्ह मनूत सीगु खःसा १५म्ह घाःपाः जूगु प्रहरीं न्ह्यथंगु दु । सीपिं मध्ये छम्ह संदिग्ध बन्दुकधारी जूगु खँ धाःगु दु ।
फेष्टिभलय् वःम्ह म्ये हालामि ज्याक भ्यान ब्रिनं आक्रमणकारी वाउँगु लं फिनातम्ह व बन्दुक ज्वनाच्वंगु खँ धाःगु दु ।
मेम्ह प्रत्यक्षदर्शीकथं आक्रमणकारीं फेष्टिभल जुयाच्वंगु थासं पिने तयातःगु बार चानाः दुहांवःगु खः ।
मेटल डिटेक्टर व सुरक्षाकःमियात छले यायेत अथे याःगु खः । प्रहरीं बन्दुक आक्रमणय् निम्ह/स्वम्ह दुथ्यायेफूगु खँ धाःगु दु । घटनायात कयाः अनुसन्धान जुयाच्वंगु दु ।
स्वन्हुया नितिं न्ह्याःगु उगु फेष्टिभल बन्दुक आक्रमणलिपा बन्द जूगु दु । अमेरिकाय् आमनागरिकयात नं बन्दुक तयेत छुट दु । फुक्कस्यां बन्दुक तयातइगुलिं इलय् ब्यलय् थजाःगु आक्रमणय् लानाः निर्दोष मनूत सिनाच्वंगु दु ।
बन्दुक तये दइगु खँय् प्रतिबन्ध तयेमाःगु माग जूसां नं अमेरिकां बन्दुकयात प्रतिबन्ध तयेगु कानून दयेकेफूगु मदुनि ।
हङकङय् आन्दोलन झन् तच्वया वन
लहना न्यूज | ने.सं. ११३९ दिल्लागा द्वादशि (२९ जुलाइ, २०१९), सोमवाः
हङकङय् लोकतन्त्र समर्थकतसें याःगु ब्वज्याय् प्रहरीं दमन याःगु धासें आन्दोलन अझ तच्वया वंगु दु ।
म्हिगः आइतवाः निन्हुया दिनस जूगु ब्वज्याय् चीन सरकारया ज्याकुथियात ताः तयाः ब्वज्या यानाच्वंगु इलय् प्रहरीं प्रदर्शनकारीपिन्त अश्रु ग्यास व रबरया गोलि कयेकेवं आन्दोलन अझ तच्वयावंगु विबिसीं न्ह्यथंगु दु ।
प्रहरीं कयेकूगु रबरया गोलि व अश्रु ग्यासया हुनिं सलंसः मनूत घाःपाः जूगु खः । हङकङ द्वीपया साई वेन व कजवे बे लागाय् द्वलंद्वः प्रदर्शनकारीतसें ब्वज्या याःगु खः ।
सरकार विरोधी आन्दोलनया च्यागूु वालय् थ्यनाच्वंगु इलय् हलिंया हे शान्त शहरकथं कयातःगु हङकङय् स्वतन्त्रता पक्षधरत सरकारपाखें हे असुरक्षित महसूस जूगु धासें आन्दोलनय् कुहांवःगु इलय् प्रहरीया दमनं यानाः हिंसा झन् तच्वयावंगु खः ।
लिपांगु इलय् न्ह्यानाच्वंगु विरोध प्रदर्शन, प्रहरी व नकावधारी दथुइ जूगु हिंस्रक ल्वापुया हुनिं हलिंया हे शान्त शहरकथं नांजाःगु उगु लागा आपराधिक गिरोहत च्वनीगु थाय्कथं म्हसीया
वनाच्वंगु दु ।
