लहना न्यूज | ने.सं. ११३९ गुंला पुन्हि (१५ अगष्ट, २०१९), विहिवाः

रुसको राजधानी मस्को लिक्कसं थौं विहिवाः छम्ह चालकं कःनिब्वय् जहाज अवतरण याःगु दु ।

 

मस्कोया जुकोभ्स्की विमानस्थल क्राइमियाया सिम्फेरोपोल वनेगु नितिं ब्वःगु जहाजय् टेक अफ याःगु छुं ई धुंकाः हे चखुंया बथान न्याःगु खः ।

 

चखुं ठक्कर नयेवं जहाजया निगुलिं इन्जिनय् समस्या वःगु खः ।

 

जहाज ब्वयेसातं हे यक्व हे संगु छम्ह यात्रुं धाःगु दु ।

 

जहाज दुनेया मत सीवं यात्रुत तसकं आत्ते जूगु खः । तर चालकं तसकं हे संयम जुयाः जहाजयात कःनिब्वय् आपतकालीन अवतरण याःगु खः ।

 

युराल एअरलाइन्सया उगु जहाजय् २२६म्ह यात्रु व ७म्ह चालकदलया दुजःपिं दुगु खः ।

 

विमानस्थलपाखें थ्यंमथ्यं १गू किलोमिटर तापाक्क दुगु कःनिब्वय् जहाज सुरक्षित अवतरण यायेत ताःलाःगु खः । उगु घटनाय् २३म्ह यात्रुपिं घाःपाः जूगु रुसी अधिकारीं न्ह्यथंगु दु । 

 

जहाजपाखें फुक्क यात्रुयात पिने हःगु दुसा घाःपाः जूपिन्त अस्पताल यंकूगु खः । घाःपाः जूपिं मध्ये ५म्ह मस्त जूगु रुसी स्वास्थ्य मन्त्रालयं न्ह्यथंगु दु ।

 

युराल एअरलाइन्सं जहाजया पाइलट तसकं हे अनुभवी जूगुलिं सफलतापूर्वक अवतरण यायेफूगु न्ह्यथंगु दु । नां मधाःगु उम्ह पाइलटं ३द्वः घौ उडान यायेधुंकूगु खः ।

लहना न्यूज | ने.सं. ११३९ सप्तमि (७ अगष्ट, २०१९), बुधवाः

भारतया पूर्व विदेशमन्त्री सुष्मा स्वराजया राजकीय सम्मानया लिसें अन्त्येष्टि यात ।

 

लोधी रोडय् च्वंगु विद्युतीय शव दाहगृहस वय्कःया अन्त्येष्टि याःगु खः । वय्कःया म्ह्याय् बाँसुरीं अन्तिम संस्कार यानादीगु खः ।

 

अन्त्येष्टिया झ्वलय् प्रधानमन्त्री नरेन्द्र मोदीलिसें भारतीय जनता पार्टीया नेतापिनिगु उपस्थित दुगु खः । थ्व स्वयां न्ह्यः स्वराजया सीम्ह अन्तिम श्रद्धाञ्जलिया नितिं भारतीय जनता पार्टीया ज्याकुथिइ तयातःगु खः ।

 

म्हिगः मंगलवाः ६७दँय् मदुम्ह भारतीय पूर्व विदेशमन्त्री स्वराज मदय् न्ह्यः हृदयघात जुयाः न्हू दिल्लीइ च्वंगु एम्स अस्पतालय् भर्ना यानातःगु खः । जलास्येँ प्रत्यारोपण यानादीम्ह स्वराज बांमलाःगु उसाँय्या हुनिं वंगु मे व अप्रिलय् जूगु लोकसभा चुनावय् उम्मेदवारी मबीगु घोषणा यानादीगु खः ।

 

सन् २०१४ निसें २०१९ या मार्चतक भारतया विदेशमन्त्री जुयादीम्ह स्वराजं भारतीय जनता पार्टी बिजेपीया इलय् दिल्लीया मुख्यमन्त्रीया जिम्मेवारी तकं कयादीगु खः ।

 

सुष्मा स्वराज दकलय् म्हो २५दँ दुबलय् भारतया केन्द्रीय मन्त्रीमण्डलय् मन्त्री जुयादीम्ह खः । प्यंगू दशक ताःहाकःगु राजनीतिक यात्राय् स्वराज, ईन्दीरा गान्धी लिपा विदेशमन्त्रीया जिम्मेवारी कयादीम्ह निम्हम्ह मिसाम्ह खः । ५दँ भारतया विदेशमन्त्री जुयादीम्ह स्वराजया नेतृत्वय् नेपाल भारतया स्वापू बांलाकेगु कुतः याःसां नं नेपालय् नाकाबन्दी वय्कःया हे इलय् जूगु खः ।

लहनान्युज | गुंलाथ्व सप्तमी ११३९ (अगष्ट ७ २०१९)

भारतया पूर्व विदेशमन्त्री सुष्मा स्वराज दिल्लीया एम्स अस्पतालय् वासः याकेगु झ्वलय् मन्त ।

 

 

नीन्यादँ निसे राजनीति यानादिम्ह स्वराज स्वकः तक विधानसभा त्याःगु खः सा न्ह्यकः तक सांसद जुयादिगु खः ।

 

 

मदुम्ह स्वराज छम्ह प्रखर वक्ता, प्रभावी राजनीतिकःमि व कुशल प्रशासक न खः ।

 

 

भारतीय जनता पार्टीया नेता स्वराज ६७ दँया म्ह खः । वयकः पार्थिव शरीरयात थौं बुधवाः १२ बजे निसेख३ तक अन्तिम श्रदाञ्जलीया लागि पाटी कार्यालय तइगु दु ।

 

 

थौं हे लोधी रोडया क्रेमेटोरियमय् राष्ट्रिय सम्मानया साथ अन्तिम संस्कार याये त्यःगु दु ।

 

लहना न्यूज | ने.सं. ११३९ दिल्लागा षष्ठि (६ अगष्ट, २०१९), मंगलवाः

पाकिस्तानका प्रधानमन्त्री इमरान खानं भारतीय जनता पार्टी (बीजेपी) हिटलरया नाजी पार्टीथें जूगु टिप्पणी यानादिल ।

 

भारत सरकारं संविधानया अनुच्छेद ३७० खारेज यासें जम्मू कश्मीरयात केन्द्र शासित दय्कूगु कन्हय् खुन्हु प्रधानमन्त्री खानं पाकिस्तानी संसदयात सम्बोधन यानादिसें उकथं टिप्पणी यानादीगु खः । प्रधानमन्त्री खानं बीजेपी सरकार थःगु देशया संविधान, सर्वोच्च व जम्मू कश्मीर उच्च अदालतया फैसला व संयुक्त राष्ट्रसंघया प्रावधान विरुद्ध वंगु तकं धयादिल ।

 

‘आः पुलवाथें जाःगु आक्रमण जुइफइगु धयादिसें प्रधानमन्त्री खानं धयादिल, ‘थुकिया नितिं नं पाकिस्तानयात दोष बी, जब कि थ्व कश्मीरया जनतायात क्वत्यःगुया लिच्वः खः । आः ग्याचिकु दु कि तःधंगु ल्याखय् मुसलमानतय्गु नरसंहार जुइफु ।’

 

खानं जम्मू कश्मीर प्रकरणय् विश्व समुदायं हस्तक्षेप मयाःसा लिबाइगु तकं धायादिल ।

लहना न्यूज | ने.सं. ११३९ गुंलाथ्व पञ्चमि (५ अगष्ट, २०१९), सोमवाः

भारत सरकारं उत्तरी राज्य जम्मु कश्मिर कयाः वयाच्वंगु विशेष राज्यया मान्यतायात खारेज यायेगु ऐतिहासिक निर्णय याःगु दु ।

 

भारत शासित जम्मु कश्मिरय् राजनीतिक संकट तच्वया वनाच्वंगु इलय् न्हू दिल्लीया लोककल्याण मार्गय् च्वंगु प्रधानमन्त्री नरेन्द्र मोदीया निवासय् थौं सोमवाः च्वंगु मुँज्यां उकथंया निर्णय याःगु खः ।

 

मुँज्यां दफा ३७० खारेज यायेकथं भारतया संविधानय् संशोधन यायेगु प्रस्ताव पारित याःगु खः । मन्त्रीपरिषदया मुँज्या लिपा हे जम्मु कश्मिरया सुरक्षा व्यवस्थायात कयाः सहलह यायेत सुरक्षा समितिया मुँज्या तकं च्वंगु खः ।

 

उगु धारां जम्मु कश्मिरयात विशेष राज्यया मान्यता बियातःगु खः । थुकिया अतिरिक्त सरकारं जम्मु कश्मिरयात निगू अलग केन्द्र शासित राज्यय् विभाजन यायेगु निर्णय तकं याःगु दु । गुकिया कथं आः जम्मु कश्मिर नापं लद्दाख निगू केन्द्र शासित राज्य जुइ । 

 

मन्त्री परिषदया मुँज्या लिपा न्ह्याःगु राज्यसभाया मुँज्याय् गृहमन्त्री अमित शाहं विपक्षीतय्गु विरोधया दथुइ दफा ३७० खारेज यायेगु सम्बन्धय् संकल्प प्रस्ताव न्ह्यब्वयादीगु खः । यदि संसदया निगुलिं सदनय् उगु प्रस्ताव पारित जुल धाःसा भारतीय राष्ट्रपतिं ल्हाःचिं तयेवं जम्मु कश्मिरं कया वयाच्वंगु विशेष राज्यया अधिकार अन्त्य जुइ ।

 

उगु धाराय् रक्षा, विदेश मामिला, अर्थ व सञ्चार बाहेकया कानून लागू यायेमाःसा केन्द्र सरकारं राज्य सरकारया सहमति माःगु व्यवस्था दु । सरकारया निर्णययात कायः विपक्षीतसें तसकं विरोध याःगु दु ।

 

राज्यसभाय् विपक्षी दलया नेता गुलाम अवि आजादं दफा ३७० खारेज यायेगु सरकारया निर्णयपाखें भारतया संविधानया हत्या जूगु दावी यानादीगु दु । अथे हे, जम्मु कश्मिरया पुलांम्ह मुख्यमन्त्री महबुबा मुफ्तिं ट्वीट यानादिसें सरकारया निर्णय गैरकानूनी व लोकतन्त्रया हाकूगु दिं जूगु धयादीगु दु । नापं वय्कलं उगु निर्णयपाखें बांमलाःगु लिच्वः ब्वलनीगु तकं ख्याच्वः बियादिल ।

 

मन्त्रीपरिषदया मुँज्यां संविधानया धारा ३५ (क)या सम्बन्धय् धाःसा छुं नं निर्णय याःगु मदुनि । जब कि थौंया मन्त्रीपरिषदया मुँज्यां उगु धाराया संशोधन यायेगु सम्बन्धय् नं निर्णय याइगु अपेक्षा यानातःगु खः । उगु धारां जम्मु कश्मिरय् छेँ जग्गा न्यायेत व स्थायी बसोबास यायेत अनया नागरिकयात विशेष सुविधा ब्यूगु दु । भारतीय जनता पार्टी भाजपां थःगु चुनावी घोषणापतिइ हे उकियात संशोधन यायेगु न्ह्यथनातःगु खः ।

 

मोदी सरकारं निक्व खुसी निर्वाचित जुइवं उगु धारा संशोधन याइगु अनुमान याना वयाच्वंगु खः । तर, राज्यया राजनीतिक दलं धाःसा उगु धारा संशोधन याःसा थःपिन्त मान्य मजुइगु धया वयाच्वंगु खः ।

Pages