Display Style:
Column Style
इराकय् आत्मघाती हमला
लहनान्यूज सम्वाददाता | कछलाथ्व षष्ठी ११३७ (नोभम्बर ६ २०१६)
इराकया तिकरीत व समारा शहरय् जूगु अलग अलग निगू आत्मघाती हमलाय् २१म्ह सीगु दु ।
न्हापांगु हमला तिकरित शहरय् एम्बुलेन्सय् छगलय् विस्फोटक जायेकाः विष्फोट याकूगु धाःगु दु । स्थानीय पुलिसया कथं तिकरीतय् तःग्वः हे कार छगू सुरक्षा नाकाय् मु्नाच्वंबलय् विष्फोट जूगु खः ।
समारा शहरय् शिया तीर्थयात्रितयत आज्जु दयेकाः आत्मघाती हमला जूगु खः । थत मस्जिदलिक्क दिकातःगु छगः कारय् याकूगु विष्फोय् १० ईरानी सीगु दु ।
इराकी सेनाया काउन्टर टेरोरिज्म टीमया मूसल शहरय् न्ह्याकाच्वंगु अभियानं ध्यान छखे लाकेत इस्लामिक स्टेटया चरमपंथितयसं थुगु आत्मघाती हमला याकूगु अनुमान याःगु दु ।
थौं हे तिनि इराकी सेनाया विशेष दलं इस्लामिक स्टेटया चरमपंथितयत मूसल शहरं लिनाछ्वःगु बुखँ वःगु खः ।
अमेरिकी सैनिक प्रशिक्षकयात स्यानाबिल
लहनान्यूज सम्वाददाता | कछलाथ्व पञ्चमि ११३७ (५ नोभेम्बर २०१६)
जोर्डनय् स्वम्ह अमेरिकी सैनिक प्रशिक्षकतयत स्यानाब्यूगु दु ।
जोर्डनय् च्वंगु हवाई सुरक्षा अड्डाय् गोलिं कयेकाः स्वम्ह सैनिक प्रशिक्षकत स्यानाब्यूगु अमेरिकी अधिकारीं न्ह्यथंगु दु । छम्ह घटना जूगु थासय् सीगु खःसा मेपिं निम्ह वासः यायेगु झ्वलय् अस्पतालय् सीगु खः ।
जोर्डनया दक्षिणी लागाय् च्वंगु अल जाफ्र हवाइ अड्डाया आर्मी प्रशिक्षण केन्द्रया मू लुखाय् थ्यनेत्यंगु इलय् अमेरिकी सैन्य प्रशिक्षक गयावंगु गाडीइ गोली कयेकूगु सिएनएनं न्ह्यथंगु दु । घटनाया कारण छु खः धकाः सीमदुनिगु व जोर्डनलिसे जानाः अनुसन्धान जुयाच्वंगु अमेरिकी रक्षा मन्त्रालय पेन्टागन व राष्ट्रपति ज्याकू ह्वाइट हाउसं न्ह्यथंगु दु ।
मेयरयात जेलय् हे गोलिं कयेकल
लहनान्यूज सम्वाददाता | ने.सं. ११३७ कछलाथ्व पञ्चमि, ५ नोभेम्बर २०१६
फिलिपिन्सय् लागू वासःया तस्करीलिसे स्वापूदुम्ह छम्ह मेयरयात प्रहरीं जेलय् हे गोलिं कयेकूगु दु ।
प्रहरीया कथं अलबेयुराया मेयर रोनाल्डो एस्पीनोसां प्रहरी अधिकारीयात हे गोलिं कयेकूगु खः । समाचारय् न्ह्यथनातःकथं लिपांगु निगू वालय् सीम्ह वयकः निम्हम्ह मेयर खः ।
राष्ट्रपति रोड्रिगो डुटार्टें निम्हेसिगु नां लागू वासःया ब्यापारलिसे स्वानाच्वंगु खँ धाःगु दु । फिलिपिन्सया राष्ट्रपति डुटार्टेया लागू वासःया ब्यापारलिसे स्वानाच्वंपिं मनूतयत मदयका छ्वयेगु चाहाना खः ।
वयकलं लागू वासःया ब्यापारलिसे स्वानाच्वंपिं ब्यापारी व वलिसे स्वापू तयाच्वंपिं मेयर विरुद्ध कारवाही न्ह्याकेगु खँ छुं वाः न्ह्यःनिसें धयाच्वंगु खः । राष्ट्रपतिया चुनाव जुइधुंकाः न्ह्याकूगु लागू वासः विरुद्धया ज्याझ्वःयात देयन्यंकया समर्थन प्राप्त जुयाच्वंगु दु ।
तर थुकियात कयाः मानवाधिकार हनन जूगु धासें अन्तर्राष्ट्रिय स्तरय् आलोचना जुयाच्वंगु दु । मेयर सीगु खँय् छानवीन यासें जेलया कोठाय् गुकथं ल्वाभः थ्यन धइगु खँ सीकेमाःगु माग जुयाच्वंगु बिबिसीं न्ह्यथंगु दु ।
आइएस नेताया अडियो हसना सार्वजनिक
लहनान्यूज सम्वाददाता | कछलाथ्व चौथी ११३७ (नोभम्बर ३ २०१६)
चरमपंथी संगठन इस्लामिक स्टेटंं थः नेता अबू बकर अल बगदादीया छगू अडियो हसना जारी यासें मूसल शहरया रक्षा यायेत अपील याःगु दु ।
थःत इस्लामिक स्टेट का उत्तराधिकारी धाइम्ह बगदादीया हसनाय् सुं नं लिचिले म्वाःगु व थः त्याइगुलिइ आश्वस्त जुइत धयातःगु बिबिसिं न्ह्यथंगु द । थ्यंमथ्यं दच्छि दुने बगदादीयापाखें थ्व न्हापांगु हसना खः ।
आईएसयात वयागु लिपांगु गढ मूसल शहरं लिनाछ्वयेगु इराकी सेनाया अभियान न्ह्याःगु तःन्हु लिपा थुगु हसना वःगु खः ।
इराकया उत्तरय् स्थित मूसलय् इराकी सेना व इस्लामिक स्टेटया लडाकुतय् दथुइ भीषण ल्वापु जुयाच्वंगु दु । इराकी सेना व वया ग्वाहालिमि लडाकुत छन्हु न्ह्यः तिनि मूसलया पिनेया लागाय् दुहांवनते ताःलाःगु खः ।
आईएसं २०१४य् मूसलय् कब्जा याःगु खः ।
‘सुन्नी लडाकुतयसं ब्वला सालाच्वन’
मानवाधिकारवादी संस्था एमनेस्टी इंटरनेशनलं धाःसा इस्लामिक स्टेटयात लिनाछ्वयेगु अभियानय् सुन्नी लड़ाकुं मूसलया पिनेया लागाय् आईएसयात ग्वाहालि याःगु शंका दुपिन्त ब्वला सालेगु ज्या यानाच्वंगु धाःगु दु ।
एमनेस्टीया कथं उमित सार्वजनिक रुपं हे अपमानित यायेगुया लिसें कसा बीगु, दायेगु यानाच्वंगु बिबिसिया बुखँय् न्ह्यथनातःगु दु ।
इराकी विशेष बलं बुधबाःकुन्हु लडाईया १७न्हुगु दिनय् मूसलया पूर्वी लागाय् ल्यं दुपिं आईएसया के लडाकुतयत सडकय् व छेँय् छेँय् हे मालेगु अभियान न्ह्याकूगु खः ।
इस्लामिक स्टेटयात लिनाछ्वयेगु अभियानय् ५०द्वः इराकी सैनिक, कुर्द लडाकु, सुन्नी अरब कबीलाया लडाकु व शिया लड़ाकुत जानाच्वंगु दु । इमित अमरीकी सेनाया नं ग्वाहालि दु ।
सोमवारया दिनय् इराकया प्रधानमंत्री हैदर अल आबदीं मूसलय् ३द्वःनिसें ५द्वः चरमपंथी दुगु व इमिके आत्मसमर्पण यायेगु वा सिनावनेगु बाहेक मेगु पले मदुगु धाःगु खः ।
पाकिस्तानया सूचनामन्त्रीयात पदं चीकल
लहनान्यूज सम्वाददाता | कौलागा चतुर्दशि ११३६ (अक्टोबर २९ २०१६)
पाकिस्तानया प्रधानमंत्री नवाज़ शरीफं थः सूचनामंत्री परवेज़ रशीदयात पदं चीकाब्यूगु दु ।
पाकिस्तानया प्रधानमंत्री ज्याकुथिं सूचनामन्त्री रशीदयात पदं चीकूगु खँया पुष्टि यासें आःया नितिं वयकःयात पद त्वःतेत उजं ब्यूगु धाःगु दु । ६ अक्टोबरय् राष्ट्रीय सुरक्षा समितिया मुँज्या सम्बन्धि बुखँ पिदंगुलिं राष्ट्रीय सुरक्षा खतराय् लाःगु प्रधानमंत्री ज्याकुथिं धाःगु खः ।
अक्टोबर ६ स पाकिस्तानी पत्रिका डनं मुँज्याय् सेना व सरकारया दथुइ मतभेद न्ह्यःने वःगु व सरकारं सेनाया अफ़सरतयत ब्वः ब्यूगु धइगु बुखँ छापे याःगु खः । व धुंकाः डनया पत्रकार सिरिल अलमीदायात विदेश वनेगुलिइ रोक तयाब्यूगु खः ।
आःतक्कया अनुसन्धानय् थुगु घटना सूचनामंत्रीया हुनिं जूगु खनेदुगु बिबिसिया बुखँय् न्ह्यथनातःगु दु ।
सरकारं आईएसआई, एमआई व आईबीया वरिष्ठ अधिकारीत दुथ्याःइगु छगू जाँच समिति गठन याःगु दु । समितिं थुगु घटनाया दोषियात मालेगु ज्या याइ ।
सरकारं सेनाया दबाबय् थुगु निर्णय काःगु धयाच्वंगु दु । बुखँ पिदंगु कन्हयकुन्हु हे पाकिस्तानी सेनाया प्रमुख जनरल राहील शरीफं प्रधानमंत्री शरीफ़यात नापलानाःथ्व राष्ट्रीय सुरक्षाया उल्लंघनया खँ खःगु व थुकियात गंभीरतापूर्वक कायेमाःगु धाःगु खः ।
थुगु उहलं सरकार सेनाया दबाबय् दुगु स्पष्ट जूगु टिप्पणी विश्लेषकतयगु दु । मेखे हाकनं छुं विश्लेषकतयसं सरकारं जाँच याकाः पारदर्शितालिसें थःगु ज्या यानाच्वंगु टिप्पणी नं याःगु दु ।
