Display Style:
Column Style
मलेसियाया प्रधानमन्त्री महाथिर मोहम्मदपाखे राजीनामा
लहनान्युज | चिल्लाथ्व पारु ११४०
मलेसियाया प्रधानमन्त्री महाथिर मोहम्मदं थःगु पदं राजीनामा बिगु दु । प्रधानमन्त्री मोहम्मदं ट्वीटमार्फत राजीनामाया घोषणा याःगु खः ।
प्यःगु दशक निसे मलेसियाली राजनीतिया केन्द्र बिन्दु जुया ९४ दँ तक महाथिर विश्वया दकलय् अप्वो दँया जेष्ठ प्रधानमन्त्री जुयादिम्ह खः । प्रधानमन्त्री मोहम्मदं सन् १९८१ निसे २००३ तक मलेसियाया प्रधानमन्त्री जुयादिम्ह खः । २०१८ य् नजीब रज्जाहयात बुक्का हाकन सत्ताय् वःगु खः ।
उगु इलय् अनवर इब्राहिम नाप गठबन्धन याना सत्ताय् थ्यःगु खः ।
अफगानिस्तानय् जूगु आक्रमणय् जापानी डाक्टर मन्त
लहना न्यूज | ने.सं. ११४० थिंलाथ्व अष्टमि (४ डिसेम्बर २०१९), बुधवाः
अफगानी जीवनस्तर थकायेत थःगु जीवन पानादीम्ह जापानी डाक्टरया छगू बन्दुकधारी पुचःया आक्रमणय् लानाः मन्त ।
७३दँ दुम्ह डा. टेत्सु नाकामुरायात आयोजनाया निरीक्षण यायेत कारय् वनाच्वंगु इलय् थौं बुधवाः सुथय् बन्दुकधारीतसें गोलिं कयेकूगु अफगानी अधिकारीतसें धाःगु दु । नाकामुरां अफगानिस्तानया सिँचाइ सुधार यायेत केन्द्रित जापानी च्यारिटीया नेतृत्व यानादीगु खः ।
अफगानिस्तानया जललावादय् जूगु उगु आक्रमणय् मेपिं न्याम्ह नं सीगु खः । उगु आक्रमणय् नाकामुरालिसें वय्कःया स्वम्ह सुरक्षाकःमि, कार चालक व सहकःमि सीगु खः । नाकामुराया छातिया जवय् गोलि कयेकूगु खः । अस्पतालतय् यंकेगु झ्वलय् वय्कः जललावाद विमानस्थलय् सीगु अधिकारीयात उद्धृत यासें एफपीं न्ह्यथंगु दु ।
डा. नाकामुरायात अफगानी सरकारं वंगु अक्टोबरय् मानार्थ नागरिकता लःल्हाःगु खः ।
उगु घटनाया जिम्मेवारी सुना नं मकाःगुलिं आक्रमणया कारण सीकेफूगु मदुनि ।
यौन दुव्र्यवहार याःगुलिं भारतया छम्ह पूर्वमन्त्रीयात ज्वन
लहना न्यूज | ने.सं. ११३९ ञलागा सप्तमि (२१ सेप्टेम्बर, २०१९), सञ्चरवाः
मिसामचायात यौन दुव्र्यवहार याःगु द्वपनय् भारतया छम्ह पूर्वमन्त्रीलिसें सत्तारुढ दलया नेतायात ज्वंगु दु ।
भारतीय जनता पार्टीया नेता स्वामी चिनमायानन्दयात उत्तरी प्रदेशया छम्ह ब्वँमि मिसामचायात यौन दुव्र्यहार याःगु द्वपनय् ज्वंगु खः ।
चिनमायानन्दयात वय्कःया हे छेँपाखें ज्वंगु व वय्कःया स्वास्थ्य अवस्था गम्भीर जूगु नं चिनमायानन्दया वकिल पूजा सिंहं जानकारी बियादीगु दु । वय्कलं चिनमायानन्दयात आः चिकित्सकया निगरानीइ तयातःगु जानकारी बियादिसें थः वय्कःया वकिल जूसां नं नापलाके मब्यूगु नं धयादिल ।
ज्वनेधुंकाः चिनमायानन्दया स्वास्थ्य परीक्षणया नितिं अस्पताल यंकूगु खः । चिकित्सकया कथं वय्कःयात नियमितकथं स्वास्थ्य परीक्षणया नितिं हय्गु यानाच्वंगु दु ।
अफगान राष्ट्रपतिया चुनावी -यालिइ आत्मघाती हमला
लहना न्यूज | ने.सं. ११३९ ञलागा तृतिया (१७ सेप्टेम्बर, २०१९), मंगलवाः
अफगानिस्तानया राष्ट्रपति असरफ घानीया चुनावी -यालिइ आत्मघाती हमला जूगु दु ।
सेप्टेम्बर २८य् जुइगु चुनावय् हाकनं राष्ट्रपति जुइत उम्मेदवारी बियादीम्ह घानी थौंकन्हय् चुनावी प्रचार प्रसारय् व्यस्त जुयाच्वंगु दु ।
उत्तरी अफगानिस्तानया चरिकार सहरय् घानीं ब्वति कयाच्वंगु -यालिइ थौं मंगलबाः न्हिनय् आत्मघाती हमला जूगु खः । उगु हमलाय् लानाः २४म्ह नागरिकत सीगु दु । विष्फोटपाखें घानीयात धाःसा छुं मजूगु वय्कःया ग्वाहालिमिं न्ह्यथंगु दु ।
विष्फोटया जिम्मा आःतक सुनां नं काःगु मदुनि । तर अतिवादी पुचः तालिवानं हमला याःगु जुइफइगु अनुमान याःगु दु ।
अमेरिकालिसे वार्ताय् छुं नं प्रगति मजुइधुंकाः तालिवानं लिपांगु इलय् आत्मघाती आक्रमणयात तच्वयेकूगु दु ।
अमेरिकां १८दँ न्ह्यःनिसें अफगानिस्तानय् सेना तयातःगु दु । तालिवानलिसे वार्ता यानाः सेना लित यंकेगु अमेरिकाया तयारी खः । तर वंगु वालय् उगु वार्ता त्वाःदल ।
मनूतय्त ख्यानाः सेप्टेम्बर २८या चुनावय् ब्वति कायेके मबीत थःपिनिगु रणनीति जूगु तालिवानं न्ह्यथंगु दु ।
जोनसनया निर्वाचन सम्बन्धी प्रस्ताव बेलायती संसदपाखें निक्वःखुसी अस्वीकृत
लहना न्यूज | ने.सं. ११३९ ञलाथ्व द्वादशि (१० सेप्टेम्बर, २०१९), मंगलवाः
बेलायती प्रधानमन्त्री बोरिस जोनसनं तयादीगु निर्वाचन प्रस्ताव अनया हाउस अफ कमन्सं निक्वःखुसी नं अस्वीकृत याःगु दु ।
यूरोपेली युनियनं पिहां वनेगु अर्थात ब्रेक्जिट प्रस्ताव संसदपाखें अस्वीकृत जुइधुंकाः हतास जुयाः बोरिसं अक्टोबर १५य् चुनाव यायेगु प्रस्ताव संसदय् यंकादीगु खः । तर जोनसनया उगु प्रस्ताव निक्वःखुसी नं सांसदतसें अस्वीकृत याःगु खः ।
बिबिसीकथं २९३ सांसदतसें जक जोन्सनया प्रस्तावय् समर्थन याःगु खः । निर्वाचन प्रस्ताव पारित जुइगु नितिं दुई तिहाई अर्थात ४३४कू मत माःगुली १४१कू मत मगाःगु खः ।
विपक्षीतसें जक मखु, सत्तारुढ दलया सांसदतसें नो–डिल ब्रेक्जिट सम्बन्धी विधेयक पारित याके मबीवं जोनसनं निवार्चन याकेत स्वःगु खः । तर सत्तारुढया नापनापं विपक्षी दलया सांसदतय्त ब्रेक्जिटया नितिं बाध्य यायेत जोनसनं निर्वाचनया कार्ड छ्यःगु धासें विरोध प्वंकूगु खः ।
बेलायत यू्रोपियन युनियनपाखें पिहां वनेगु ईया सीमा अक्टोबर ३१ खः । उगु अवधिइ विना सम्झौता हे जूसां बेलायत इयूपाखें अलग्ग जुइगु सम्बन्धी कानून दय्केगु नितिं हःगु विधेयकया पक्षय् वंगु वालय् ३०१ मत व विपक्षय् ३२८ मत लाःगु खः ।
जोनसनया प्रस्तावय् बेलायतया संसद आः न्यावाःया नितिं निलम्बित जुइ । सम्झौतापाखें लिहां वयेधुंकाः बेलायतया संसदं यूरोपेली युनियनय् हे च्वनेगु वा पिहां वनेगु सम्बन्धी कानून पारित यायेमाः ।
