Display Style:
Column Style
जापानय् भुखाय् धुंकाः सूनामीया चेतावनि
लहनान्यूज सम्वाददाता | कछलागा अष्टमि ११३७ (नोभम्बर २२ २०१६)
जापानया उत्तर पूर्वी तटय् भुखायया तःधंगु धक्का महसूस जुइधुंकाः फुकुशिमा परमाणु संयन्त्रया लागाय् १ मिटर जाःतक्क सूनामी वःगु दु ।
आःतक्क छुं नं कथंया क्षतिया खबर मदुनि तर सूनामीया चेतावनी धाःसा जारी याःगु दु । २०११य् वःगु सुनामीया हुनिं थुगु परमाणु संयन्त्र पूवंक हे क्षतिग्रस्त जूगु खः ।
भुखाय् लिपा जापानय् क्याबिनेटया मुख्य सचिव योशिहिदे सुगां फुकुशिमा परमाणु संयन्त्रया स्वंगूगु रियाक्टरया कुलिङ सिस्टमं ज्या मयाःगु धाःगु दु ।
यद्यपि आःतक्क तापक्रम थहांवंगु खनेमदुनि । मेमेगु परमाणु संयन्त्रय् नं छुं नं कथंया अनियमितता खनेमदुनि ।
सुगां सरकारं स्थितीया जाँचया नितिं टास्क फोर्स गठन याःगु धाःगु दु ।
जापान मौसम विज्ञान एजेन्सीयाया कथं स्थानीय ई कथं मंगलबार सुथसिया ६ताः इलय् भुखाय् ब्वःगु खः ।
६.९ म्याग्निच्यूड मापन जूगु भुखायया केन्द्र फुकुशिमां ७० किलोमिटर तापाक ११ गालय् लाःगु खः ।
आःतक्क भुखाचं छुं नं कथंया धनजनया क्षतिया खबर मदुनि तर भुखायया धक्का टोकियोतक्क मससूस जूगु धाःगु दु ।
जापानया कमामोटो प्रान्तय् वंगु अप्रिलय् ब्वःगु भुखाचय् ५० सीगु खः । २०११य् फुकुशिमाय् ब्वःगु भुखाचय् १८द्वःम्ह स्वयां आपाःसिया स्थिती आःतक्क सीमदुनि ।
अफगाननिस्तानय् आत्मघाती आक्रमणय् २७ सित
लहनान्यूज सम्वाददाता | कछलागा सप्तमी ११३७ (नोभम्बर २१ २०१६)
अफगानिस्तानय् थौं याकूगु छगू आत्मघाती आक्रमणय् २७ सीगु दु ।
अफगानिस्तानया राजधानी काबुलय् शिया मुस्लिम मस्जिद बकीर उल ओलम मस्जिदय् छम्ह आत्मघाती आक्रमणकारीं याकूुगु विष्फोटय् म्ह्वतिं नं २७ सीगु प्रहरीं धाःगु खः । स्थानीय रिपोर्टया कथं सीपिंलय् मस्त नं लाःगु दु ।
घटनाय् मेपिं ३५ घाःपाः जूगु बिबिसिं न्ह्यथंगु दु ।
आक्रमणकारी मस्जिद भवन दुने मनूतयगु पुचलय् हे च्वनाच्वंगु दुगु खः । घटनाया भाला आःतक्क सुनां काःगु मदुनि ।
मनूत पैगम्बर मोहम्मदया छय् इमाम हुसैनयात श्रद्धांजलि प्वंकेत मुनाच्वंगु इलय् घटना जूगु खः ।
अफगानिस्तानय् शिया समुदाय १५ प्रतिशत दु ।
सुषमा स्वराजया जँलास्येँ स्यन
लहनान्यूज सम्वाददाता | कछलागा द्वितीया ११३७ (नोभम्बर १६ २०१६)
भारतीय विदेशमंत्री सुषमा स्वराजया जँलास्येँ स्यंगु दु ।
मन्त्री स्वराजं बुधवाः सुथय् ट्वीट यासें थःगु जँलास्येँ स्यंगु जानकारी बियादीगु खः । लिसें वयकलं थःगु हे देशय् एम्स (अखिल भारतीय आयुर्विज्ञान संस्थान) य् वासः याकाच्वनागु नं धयादीगु दु ।
वयकःया जँलास्येँ प्रत्यारोपण यायेमाःगु धाःगु दु ।
छुं दिं न्ह्यः जक वयकःयात एम्सय् भर्ना याःगु खः । प्रोफेसर बलराम एरनं वयकःया वासः यानाच्वंगु दु ।
मन्त्री स्वराजयात एम्सय् भर्ना यायेधुंकाः वयकःयात कॉर्डियोथोरेसिक विभाग अर्थात नुगः ल्वयलिसे सम्बन्धित विभागपाखें वासः यायेगु ज्या न्ह्याकूगु खः । सुषमा स्वराजयात छुं दिं न्ह्यःनिसें उसाँय् सम्बन्धि समस्या जुयाच्वंगु खः ।
न्यूजिलायन्डय् भुखाय् ब्वल
लहनान्यूज सम्वाददाता | कछलाथ्व चतुर्दशि ११३७ (नोभम्बर १३ २०१६)
न्यूजिलायन्डया क्राइस्टचर्चय् ७.४ म्याग्निच्यूडया भुखाय् ब्वःगु दु ।
अमरीकी जियोलोजिकल सर्वेया कथं स्थानीय ईकथं क्राइस्टचर्च स्वयां ९५ किलोमिटर तापाक्क केन्द्रविन्दु दयेकाः ७.४ म्याग्निच्यूडया भुखाय् ब्वःगु खः ।
भुखाचं आःतक्क छुं नं कथंया धनजनया क्षतिया बुखँ मवःनि । भुखायया धक्का वेलिंगटनय् तकं महसूस जूगु धाःगु दु ।
अमरीकाया प्यासिफिक सुनामी चेतावनी केन्द्रं आःतक्क सुनामीया चेतावनी नं ब्यूगु मदुनि ।
२०११य् क्राइस्टचर्चय् ब्वःगु शक्तिशाली भुखाचय् लानाः १८५म्ह सीगु खः । उगु भुखाचय् शहरया सिटी सेन्टरय् तःधंगु हे क्षति जूगु खः ।
ट्रम्प अमेरीकाया न्हूम्ह राष्ट्रपति
लहनान्यूज सम्वाददाता | कछलाथ्व नवमि ११३७ (नोभम्बर ९ २०१६)
डोनाल्ड ट्रंप चुनावी धेंधें बल्लाखय् थः प्रतिद्वन्दि डेमोक्रेट उम्मेदवार हिलारी क्लिन्टनया ल्यूने लाकाः अमेरीकाया ४५म्हम्ह राष्ट्रपति जुइत ताःलाःगु दु ।
त्यायेधुंकाः थःगु सम्बोधनय् अमेरीकाया न्हूम्ह राष्ट्रपति ट्रम्पं थः सकसिगु राष्ट्रपति जुइगु धासें थःके तसकं बांलाःगु आर्थिक योजना दुगु धाल । अर्थव्यवस्थाया आकार निदुगं दयेकाः हलिंया दक्कले बल्लाःगु इकोनोमि जुइगु ट्रम्पया धापू खः ।
अमेरीकाया पासा जुइ न्ह्याःगु दक्वं देयतलिसे क्वात्तूगु स्वापू दयेकेगु नं ट्रम्पं धाल । लिसें ट्रम्पं हरेक अमेरीकिं थःगु प्रतिभायात पूवंक छ्यलेगु व्हःताः बीगु नं धाःगु खः ।
थः त्याःगुलिइ प्रतिद्वन्दि क्लिन्टनं नं थःत फोन यानाः भिंतुना ब्यूगु जानकारी ट्रम्पं बिल । थम्हं नं क्लिन्टनयात न्ह्यइपूगु व क्वात्तूगु धेंधें बल्लाःया नितिं भिंतुना देछासें सकसितं नापं ब्वनाः न्ह्याःवनेगु धयागु ट्रम्पं कंगु खः ।
