Display Style:
Column Style
काबुलया उच्च सुरक्षा लागाय् कार बम विष्फोट
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
अफगानिस्तानया राजधानी काबुलय् विदेशी कूटनीतिक नियोगहरू दुगु उच्च सुरक्षा लागाय् कार बम विस्फोट जूगु दु ।
स्थानीय ईकथं थौं विहिवाः सुथय् अमेरिकी दूतावास भवन लिक्कसं जूगु विष्फोटय् लानाः १०म्ह सीगु दुसा दर्जनौं मनूत घाःपाः जूगु दु ।
गृह मन्त्रालयया प्रवक्ता नसरत रहीमीया कथं कतारया राजधानी दोहाय् अमेरिकालिसे शान्ति वार्ता यानाच्वंगु तालिबानी पुचलं उगु आक्रमण याःगु दावी दु ।
वंगु सोमवाः चान्हय् नं तालिवानी पुचलं आत्मघाती बम विष्फोटन याकूगु इलय् १६म्ह सीगु खःसा सच्छिम्ह स्वयां अप्वः मनूत घाःपाः जूगु खः । सोमबाः जूगु आत्मघाती विष्फोट लिपा प्रहरीं उगु लागाय् वनेत पंगु खः ।
अमेरिका व तालिवान दथुइ थीथी चरणय् अफगानिस्तापाखें अमेरिकी सेना लित यंकेगु खँय् सैद्धान्तिक सहमति याःसां नं अमेरिकी दूतावास भवन लिक्क थुकथं विष्फोट जूगु खः ।
बेलायती प्रधानमन्त्रीया किजापाखें सांसद व राज्यमन्त्रीपाखें राजीनामा
लहना न्यूज | ने.सं. ११३९ ञलाथ्व सप्तमि (५ सेप्टेम्बर, २०१९), विहिवाः
बेलायती प्रधानमन्त्री बोरिस जोनसनया किजा जो जोनसनं सांसद व राज्यमन्त्रीपाखें राजीनामा बियादीगु दु ।
अक्टोबर ३१तक सम्झौता जूसां मजूसां नं यूरोपियन युनियनपाखें अलग्ग जुइगु (ब्रेक्जिट) बचं याःम्ह बोरिसया उगु ग्वसालय् पंगः जूगु खः । वय्कःया कन्जरभेटिभ पार्टीया सांसद ब्रेक्जिटया विरोधय् दुं दु । सांसदत विपक्षय् दनेवं जोनसनं हाउस अफ कमन्सय् दुगु सामान्य बहुमत नं तंकूगु दु ।
अथे हे, ई न्ह्यः हे आमनिर्वाचन याकेगु जोनसनया प्रस्ताव नं संसदं अस्वीकृत याःगु दु । थःगु प्रस्तावयात ग्वाहालि मयाःगु धासें जोनसनं २१म्ह सांसदपिन्त निलम्बन यानादीगु दु । थ्व हे संकटया दथुइ बोरिसया किजा जो जोनसनं थौं विहिवाः सांसद व मन्त्रीपाखें राजीनामा बियादीगु खः ।
जो जोनसनं थः यक्व ई छेँजः व देसया हित मध्ये गुकियात ल्ययेगु धइगु द्विविधाय् लाःगु व अन्त्यय् देसया हितया पक्षय् निर्णय कयागु धयादिल ।
जो सन् २०१० निसें लगातार सांसद जुया वयाच्वनादीम्ह खः । २०१६या जनमत संग्रहया इलय् जों यूरोपियन युनियनय् च्वनेमाःगु पक्षय् भोट कुर्कादीगु खः ।
जो थेरेसा मेया सरकारय् नं मन्त्री जुयादीगु खः । तर दथुइ वय्कलं मे सरकारया मन्त्रीपाखें राजीनामा बियादीगु खः ।
वंगु जुलाइस दाजु बोरिस प्र्रधानमन्त्री जुइधुंकाः जो ब्यापार तथा शिक्षा मन्त्रालय जुनियर मन्त्री जुयादीगु खः ।
ब्रेक्जिटयात कयाः जोनसन परिवार हे विभाजित जूगु दु । बोरिस न्ह्याथे जूसां नं बेलायतयात यूरोपियन युनियनपाखें अलग्ग जुइमाः धइगु पक्षय् दुसा वय्कःया अबु व केहेँ यूरोपियन युनियनया कट्टर समर्थक खः ।
हङकङं सुपुर्दगी विधेयक लित काल
लहना न्यूज | ने.सं. ११३९ ञलाथ्व षष्ठि (४ सेप्टेम्बर, २०१९), बुधवाः
स्वलातक मदिक्क जुयाच्वंगु आन्दोलनलिपा हङकङं सुपुर्दगी विधेयक लित काःगु दु ।
हङकङया प्रमुख ल्यारी क्यामं थौं बुधवाः उगु विधेयक लित कयागु घोषणा यानादीगु खः ।
हङकङ चीनया अजाःगु थाय् खः, गुगु चीनदुने ला लाः, तर बेइजिङया कानूनयात नाला काइमखु । अथे धइग चीन व हङकङ छगू देय् निगू व्यवस्था दु ।
झिंस्ववाः न्ह्यः हङकङया विधायिकां हिरासतय् दुम्हेसित चीन सुपुर्दगी यायेगु सम्बन्धि विधेयक हःगु खः ।
थ्यंमथ्यं २०गू लख मनूत सतकय् कुहां वयाः उगु विधेयकया विरोध लिपा बेइजिङं नियुक्त याःम्ह प्रमुख क्यामं विधेयक न्ह्यःने मयंकेगु धयादीगु खः, तर लित कायेत माने मजूगु खः । व लिपा आन्दोलनकारीतसें थप मागतकं तयाः आन्दोलनयात अझ तच्वयेकूगु खः ।
वाःया अन्तय् जुइगु ततःधंगु ब्वज्यां हङकङया जनजीवनयात लिच्वः लाकूगु खः । छुं ई न्ह्यः प्रदर्शनकारीतसें अन्तर्राष्ट्रिय विमानस्थलय् तकं पंग थनाब्यूगु खः । लिसें आन्दोलनकारीतसें हङकङय् च्वंगु बेइजिङया सम्पर्क ज्याकुथि तकं स्यंकाब्यूगु खः ।
चीनं हङकङया आन्दोलन क्वत्यलेत जनमुक्ति सेना परिचालन यायेफइगु अनुमान तकं याःगु खः । हङकङया सीमा लिक्क जनमुक्ति सेनां तालिम नं न्ह्याकूगु खः ।
क्यामया राजीनामा व चुनावपाखें प्रमुख ल्यये दयेमाःगु माग नं तःपिं प्रदर्शनकारीत विधेयक लित कायेधुंकाः आन्दोलन दिकी व दिकिमखु धइगु अझ नं सीमदुनि ।
ब्रेक्जिटयात कयाः बेलायती संसद स्थगन
लहना न्यूज | ने.सं. ११३९ गुंलागा चःह्रे (२९ अगष्ट, २०१९), विहिवाः
बेलायती प्रधानमन्त्री बोरिस जोन्सनया संसद निलम्बन यायेगु क्वःछिनालिपा सांसद व अभियाकःमित आक्रोशित जूगु दु । जोन्सनया लिपांगु दिकेत स्वःगु अभियानय् १३गू लखस्वयां अप्वस्यां ल्हाःचिं तयेधुंकूगु दु । ब्रेक्जिटया ई क्वचाइगु छवाः न्ह्यः सेप्टेम्बर व अक्टोबरया न्यावाःया नितिं संसद निलम्बन यायेगु प्रधानमन्त्री जोन्सनया इनाप म्हिगः बुधवाः बेलायती महारानी एलिजाबेथं स्वीकृत यानादीगु खः ।
प्रधानमन्त्रीया प्रस्ताव महारानीं स्वीकार यायेधुंकाः बेलायती राजनीतिं न्हूगु मोड काःगु दु । राजनीतिक घोषणायात कयाः खास हे प्रतिकृया मबीगु ‘हाउस अफ कमन्स’या नेता जन बुर्कों संसद निलम्ब्न यायेगु पलाःयात संविधान उल्लंघनकथं ब्याख्या याःगु दु ।
जोन्सनया बेलातयी पलाखं राजनीति अझ विभाजित जूगु बेलायती सञ्चार माध्यमं न्ह्यथंगु दु । बेलायत यूरोपियन युनियनपाखें बिना सम्झौता हे थ्व हे अक्टोबर ३१ तारिखय् बहिर्गमन (ब्रेक्जिट) जुइमाःगु अडानया सामना यायेत प्रधानमन्त्री जोन्सनं थुकथंया जोखिम काःगु खनेदु । वंगु बुधवाः बेलायतया प्रतिपक्षी दलतसें बिना सम्झौता ईयूपाखें पिहां वयेगु पलाः विरुद्ध छप्पँ जुइगु व संसदय् कानूनीकथं पास जुइकथं विधेयक हयेत सहमति याःगु खः । बहुमत बेलायती सांसदत धाःसा विना सहमति ईयूपाखें बेलायत पिहां वयेगु पक्षय् मदु ।
न्हूगु सरकारया कार्ययोजना व नीतिया नितिं वइगु सेप्टेम्बरया निगूगु वाःनिसें न्यावाःतक संसद स्थगन याःगुलिं थ्व छुं राजनीतिक चाल मजूगु प्रधामन्त्री जोन्सनं धयादीगु दु । बिबिसीकथं हाउस अफ कमन्स नेता ज्याकोब रेस–मोगं धाःसा प्रधानमन्त्रीया पलाःया बचाउ यासें विरोध पाय्छि मजूगु धयादिल । विपक्षीतसें प्रधानमन्त्रीया न्हूगु पलाः प्रजातान्त्रिक मूल्य व मान्यता अःखः जूगु धासें विरोध बुलन्द यायेगु उद्घोष याःगु दु । उमिसं क्वःछिनाया विरोध यासें प्रधानमन्त्रीया पलाखं सांसदतयुत ब्रेक्जिटलिसे स्वानाच्वंगु विषयस सहलह यायेत म्हो जक ई ब्यूगु धाःगु दु ।
लेबर पार्टी नेता जेरेमी कोर्बिनं बिना सम्झौता यूरोपेली संघपाखें पिहां वयेत सरकारं षडयन्त्र यानाच्वंगु दावी यानादिल । ब्रेक्जिटयात कयाः संसदय् कानून पारित यायेत माःकथंया ई मतःगु वय्कःया दावी दु । प्रधानमन्त्री जोन्सनं बेलायती प्रजातन्त्रयात हे प्रहार याःगु धयादिसें कोर्बिनं सरकारयात कयाः अविश्वास प्रस्ताव दर्ताया तयारी यायेगु ख्याच्वःतकं बियादिल ।
संसद स्थगन यायेगु सरकारी घोषणा लिपा हे बेलायती संसद भवन न्ह्यःने नारा जुलुसलिसेंया ब्वज्या शुरु जूगु दु । लिपांगु क्वःछिनायात कयाः असहमत प्वंकूसें स्कटिस टोरी नेता रुथ डेभिडसनं राजीनामा बियादीगु दु ।
ईयूया कट्टर विरोधीतसें धाःसा प्रधानमन्त्री जोन्सनया वंगु स्वदँ न्ह्यःनिसें अनिर्णयया बन्दीकथं जुयाच्वंगु ब्रेक्जिट सार्थक जुइत्यंगु धासें समर्थन याःगु दु । प्रधानमन्त्री जोन्सनं छुं नं हालतय् ईयूपाखें बेलायत ३१ अक्टोबरय् अलग जुइगु घोषणा तःक्वःमछि हे यानादीगु खः ।
भारतया पुलांम्ह अर्थमन्त्री चिदम्बरमयात ज्वन
लहना न्यूज | ने.सं. ११३९ गुंलागा सप्तमि (२२ अगष्ट। २०१९), विहिवाः
भारतीय टेलिभिजन कम्पनी आइएनएक्स मिडियालिसे सम्बन्धित भ्रष्टाचार व मुद्रा निर्मलीकरण मुद्दाय् दुथ्याःगु शंका यासें भारतीय कंग्रेसया नेतालिसें पुलांम्ह अर्थमन्त्री पी चिदम्बरमयात ज्वंगु दु । म्हिगः बुधवाः सनिलय् चिदम्बरमयात केन्द्रीय अनुसन्धान ब्यूरों ज्वनाः हिरासतय् तःगु खः ।
भारतीय अनलाइन पत्रिका स्क्रोल इनकथं चिदम्बरमयाके थौं विहिवाः सुथसिया झिताः इलंनिसें न्हिनसिया छताः ईतक सिबिआइं बयान काःगु खः ।
मनमोहन सिंहया सरकारय् चिदम्बरम गृहमन्त्री जुयादीगु खः । उगु इलय् अर्थमन्त्री जुयादीम्ह प्रणव मुखर्जी राष्ट्रपति जुयादीधुंकाः चिदम्बरमं अर्थ मन्त्रालय् स्वयादीगु खः ।
आइएनएक्स मिडियाया मालिकया जहानया बयानया लिधंसाय् पी चिदम्बरमयात हिरासतय् काःगु खः । अर्थमन्त्री जूगु इलय् चिदम्बरमं थः काय् कर्ती चिदम्बरमया कम्पनीयात आर्थिक ग्वाहालि यायेत इनाप याःगु धासें बयान बियादीगु खः ।
