Display Style:
Column Style
अष्ट्रेलियाय् वर्किङ भिसा खारेज जुइगु
लहनान्यूज | चिल्लाथ्व चतुर्थी ११३७ (मार्च २ २०१७)
अष्ट्रेलियां बिदेशी नागरीकया नितिं बिया वयाच्वंगु वर्किङ भिसा खारेज याइगु जूगु दु ।
अष्ट्रेलियाया अध्यागमनमन्त्री पिटर डटनं अष्ट्रेलियाली युवाशक्तिया लजगाःया व्हःताः बीमाःगु धासें फास्टफुड उद्योगय् विदेशी कामदारयात वर्किङ भिसाय् रोक तयेगु क्वःज्यूगु धाःगु खः ।
अष्ट्रेलियाया फास्टफुड रेस्टुरेन्टय् सन् २०१२या अध्ययनय् ९५ लख स्वयां आपाः विदेशी कामदार वर्किङ भिसाय् दुगु खनेदुगु खः । आः उगु ल्याः १ करोड पुलेधुंकूगु सीदुगु खः ।
व मध्ये दक्कले आपाः भारतीय कामदार दु । वयां लिपा बेलायती व चिनियाँत दुगु तथ्यांकय् खनेदुगु दु । अष्ट्रेलियायाया थुगु उहलं अन दुपिं नेपाःमितयत नं लिच्वः लायेफुगु अनुमान याःगु दु ।
सन् २०१२ निसें अष्ट्रेलियाया विपक्षी दल लेबर पार्टीं विदेशी नागरिकयात वर्किङ भिसा बीगु प्रावधान न्ह्याकूगु खः ।
नांजाःम्ह च्वमि तारक मेहता मन्त
लहनान्यूज | चिल्लाथ्व तृतीया ११३७ (मार्च १ २०७३)
ताः इलंनिसें म्हं मफयाच्वंम्ह नांजाःम्ह गुजराती नाटककार तारक मेहता थौं सुथय् मन्त ।
८८दँयाम्ह मेहता मदुगु पुष्टि यासें वयकःया परीवारं वयकःया अंगदान याइगु नं धाःगु दु ।
मदुम्ह मेहतां च्वयातःगु सिरीयल तारेक मेहताका उल्टा चश्मा अतिकं लोकं व्हाः । गुजराती म्यागेजिनय् पिदनीगु अतिकं लोकंव्हाःगु स्तम्भ ‘दुनिया ने औंधों चश्मा’पाखें हे टीभि सीरियल ‘तारक मेहता का उल्टा चश्मा’ दयेकूगु खः ।
वयकलं खुगू लोकंव्हाःगु जराती नाटक नं च्वयादीगु दु । मेहताया ८० सफूत बजारय् पिदंगु दु ।
२६ दिसेम्बर, १९२९ कुन्हु बूम्ह तारक मेहतायात २०१५य् पद्मश्री सिरपाः ब्यूगु खः ।
मेहता मदुगुलिइ दुःख प्वंकुसें भारतीय प्रधानमंत्री नरेन्द्र मोदी लिसें आपाःसिनं श्रद्धान्जलि प्वंकूगु दु ।
हिटलरया फोन २,५०,००० डलरं लिलाम
लहनान्यूज | सिल्लागा नवमि ११३७ (फेब्रुअरी २० २०१७)
जर्मन नेता एडोल्फÞ हिटलरया टेलीफोन सेट मुक्कं २,५०,०० डलरं लीलाम जूगु दु ।
अमरीकाय् जूगु लिलामिइ छम्ह अज्ञात मनुखं हिटलरया फोन करीब २त्या लख डलरं न्यानाकाःगु खः । फोन न्यानाकाःम्हेसिया म्हसिका धाःसा सार्वजनिक याःगु मदुनि ।
ह्याउँगु रंगया थुगु फोनय् हिटलरया नां, स्वस्तिक चिं व चीलया चित्र कियातःगु दु । सन् १९४५स निगूगु विश्वयुद्ध क्वचायेधुंकाः बर्लिनया छगू बन्दरगाहलय् थुगु फोन लूगु खः ।
फोन लिलाम याःगु मेरीलायन्ड राज्यं थुकियात ‘आः तक्कया दक्कले विध्वंसक ल्वाभः’या नां ब्यूगु दु । जर्मनीं सरेन्डर यायेधुंकाः सोभियत सैनिकतयसं थुगु फोन ब्रितेनी ब्रिगेडियर राल्फ रेनरया चिं कथं ब्यूगु खः ।
अक्सन हाउसया अधिकारी बिल पैनागोपुलसं हिटलरं युद्धया झ्वलय् थुगु हे फोनपाखें ब्यूगु आदेशं यक्व हे मनूत सीगु जूगुलिं थुकियात जनसंहारया ल्वाभः धाःगु बिबिसिं न्ह्यथंगु दु ।
लाहौरय् विष्फोट, १० सित
लहनान्यूज | सिल्लागा तृतीया ११३७ (फेब्रुअरी १३ २०१७)
पाकिस्तानया लाहौरया पूर्वी लागाय् जूगु विष्फोटय् १० सीगु दुसा ४० स्वयां आपाः घाःपाः जूगु दु ।
घटनाय् सीपिंलय् लाहौरया ट्राफिक पुलिसया डीआईजी अहमद मुबीन व एसएसपी अपरेशन जाहिद महमूद गोंदल नं लाःगु दु । घाःपाः जूपिंलय् ७म्हेसिया अवस्था तच्वः दुगु धाःगु दु ।
घटनाप्रति समवेदना प्वंकुसें पाकिस्तानया प्रधानमन्त्री नवाज शरीफं लाहौरयात आज्जु दयेकेगु कुतः जुयाच्वंगु धाःगु दु । प्रधानमन्त्री शरिफं सरकारया सिक्रेट एजेन्सीयात सतर्क च्वनाच्वनेत नं उजं बीधुंकूगु दु ।
लाहौरय् स्थानीय फर्मासिस्टतयगु विरोध प्रदर्शनया झ्वलय् थुगु घटना जूगु खः । विरोध ब्वज्या जुयाच्वंथाय् मोटरसाइकलं वःपिन्सं विष्फोट याकूगु धाःगु दु ।
थुगु विरोध प्रदर्शन वासःया विक्रि सम्बन्धि न्हूगु कानूनया विरोधय् जूगु खः ।
श्रोत : बिबिसि
पाकिस्तान एअरलाइन्सया विमान दुर्घटना
लहनान्यूज सम्वाददाता | थिंलाथ्व अष्टमि ११३७ (डिसेम्बर ७ २०१६)
पाकिस्तान इंटरनेशनल एयरलाइन्सया विमान पीके–६६१ पाकिस्तानया उत्तरपाखे हवेलियां लिक्क दुर्घटनाग्रस्त जूगु दु ।
एयरलाइंसया प्रवक्ता दानियाल गिलानीयात उद्धृत यासें विमानय् ४० यात्री लिसें न्याम्ह चालक दलया दुजः गयावंगु दुगु बिबिसिं न्ह्यथंगु दु ।
गिलानीया कथं विमान ३ः४०ताः इलय् चितरालं इस्लामाबादया नितिं ब्वःगु खः । ४ः१६ताः इलंनिसें विमान स्वापुतिं पिहांवंगु खः ।
थुगु विमानयात न्हापा नं ‘सेफ्टी फेलियर’या द्वपं लायेधुंकूगु दु । सन् २००६स नं पीआईएया हे छगू विमान दुर्घटनाय् ४४म्ह मनूत सीगु खः ।
यूरोपीय संघं सन् २००७य् पीआईए विमानयात यूरोपय् उडानया नितिं रोक तयाब्यूगु खः ।
