अमेरिकाया टेनेसीय् छगु निजी स्कुलय् गोली चले जुगुलि स्वम्ह मस्त नाप खुम्ह सीगु दु।

न्यासभिलस्थित क्रिश्चियन स्कुल कोभेन्टय् छम्ह मिसां असाल्ट राइफल व ह्याण्ड गनं अन्धाधुन्द गोली चले याःगु खः। उम्ह मनू न प्रहरीया गोली सीगु दु।

गोली लाना स्कुलया विद्यार्थी व शिक्षिकयाना खुम्ह सीगु दु धका बीबीसीं धाःगु दु। स्वम्ह विद्यार्थीपि नाप स्कुलया प्रमुख, शिक्षिका व सुरक्षा गार्ड खः। कोभेन्ट स्कुलय् करिब २०० म्ह विद्यार्थीपि दु।

अन स्वदँनिसे १२ दँ दुपि मस्त ब्बनेगु याइ।

अफगानिस्तानया सहर जुर्म स्वया ४० किलोमिटर दक्षिणपूर्वय् पाकिस्तान व ताजकिस्तानया सीमा नाप केन्द्रविन्दु जूया भुखाय् ब्बगुलि १३ म्ह सीगु दु।

६.५ म्याग्निच्युडया भुखाय् ब्बःगुलि दर्जनौँ मल्याक मनूत घाःपाः जूगु दु धका अन्तर्राष्ट्रिय सञ्चार माध्यमं धाःगु दु। उगु भुखाय् ब्बःगु भारतया राजधानी न्हुगु दिल्लीतक महसुस जुगु धका धाःगु दु।

उत्तरपश्चिमी पाकिस्तानय् ब्बःगु भुखाचं गुम्ह मनू सीगु दु सा ४४ म्ह घाःपाः जुगु दु धका सरकारी अधिकारीपिन्स धाःगु दु।

म्हिगः मंगलबाः चान्ह्यः १०ः३० बजेति भुखाय् ब्बगुलि उत्तरी खैबर पख्तुनख्वा प्रान्तया अस्पतालय् आपतकालीन अवस्थाय् तयातःगु खः।

अफगानिस्तानय् प्यम्ह सीगु दु सा ५० म्ह घाःपाः जूगु दु धका स्वास्थ्य मन्त्रालयया अधिकारीं धाःगु दु।

इन्टरनेशनल क्रिमिनल कोर्ट (आईसीसी) नं रुसी राष्ट्रपति भ्लादिमिर पुटिनविरुद्ध पक्राउ पुर्जी जारी याःगु दु।

आईसीसीं पुटिनविरुद्ध युद्ध अपराधया द्धपः बिउसे, उकिइ मस्तय्त गैरकानुनी रुपमा युक्रेनपाखे रुस छ्वःगु धका बीबीसीं धाःगु दु। रुसं २४ फेब्रुअरी २०२२ निसे युक्रेनय् आक्रमण सुरु याःगु दु।

अय्न उगु आक्रमणया झ्वलय् युद्ध अपराध जूगु द्धपः अस्वीकार याना वयाच्वंगु खः। पक्राउ पुर्जीबारे टिप्पणी यासे रुसी विदेश मन्त्रालयया प्रवक्ता मारिया जखारोवां ‘इन्टरनेशनल क्रिमिनल कोर्टया फैसला झीगु देशया लागि कानुनी रुपं छु न अर्थ मदु’ धका वयकलं धाःगु दु।

रुसय लडाकु विमाननाप अमेरिकाया ड्रोन ल्वाना दुर्घटना जुगु अमेरिकी अधिकारीपिन्स दाबी याःगु दु।

युक्रेन युद्धया विषययात कया अमेरिका व रुस दथुइ तनाव अप्पोया च्वंगु इलय् थुगु दुर्घटना लिपा निगु देया सेनापि सतर्क अवस्थाय् दुगु धका बीबीसीं धाःगु दु। मंगलबाः रुसीया एसयू–२७ लडाकु विमान व अमेरिकाया मानवरहीत ड्रोन सर्गतय् ब्बयाच्वंगु खः।

ब्बयाच्वंगु झ्वलय् अमेरिकी ड्रोन ‘ब्ल्याक सी’ (हाकू सागर)य् कुतुवना पूर्णरुपं क्षतिग्रस्त जूगु अमेरिकी अधिकारीपिन्स धाःगु दु।

अमेरिकी वायु सेनाया अधिकारी जनरल जेम्स हेकरं थःपिनिगु ड्रोन अन्तर्राष्ट्रिय जल क्षेत्रय् नियमित उडान जुयाच्वंगु इलय् रुसी जेट लडाकु विमान सिइक सिइक हे न्ह्या वया ल्वाकूगु खः धका धाःगु दु।

रुसया अधिकारीपिन्स धाःसा अमेरिकी ड्रोन थः हे कुतु वःगु धका धाःगु दु। रुसया विमाननाप ड्रोन ल्वागु मदु धका रुसी अधिकारीपिन्स दाबी याःगु दु।

सी जिनपिङ स्वक्वःगु कार्यकालया लागि चीनया राष्ट्रपति जूगु दु ।

वयकः १४ क्वःगु राष्ट्रिय जनकंग्रेसं जारी अधिवेशनपाखे शुक्रबाः सर्वसम्मतिं राष्ट्रपतिइ निर्वाचित जूगु खः। ग्रेट हल अफ द पिपलय् उपस्थित नेशनल पिपुल्स कंग्रेस (एनपीसी) या स्वद्धः न मल्याक दुगु दुजःपिन्स ६९ दँ दुम्ह सीयात सर्वसम्मत कथं राष्ट्रपतिइ ल्यःगु दु धका समाचार एजेन्सी सिन्ह्वां धाःगु दु।

थ्व नाप वयकः माओत्सेतुङ लिपा दकलय् अप्पो शक्तिशाली नेताया कथं थःगु पकड बलाकाः च्वंगु दु। सीविरुद्धय् सू न प्रतिस्पर्धी मदुगु खः। वयकः देशया केन्द्रीय सैन्य आयोगया अध्यक्षय् न स्वक्वःगु कार्यकालया लागि सर्वसम्मत निर्वाचित जूगु खः।

झाओ लेजी संसदया न्हुम्ह सभामुख व हान झेंग उपाध्यक्षय् निर्वाचित जूगु खः।