डब्लुडब्लूईया संस्थापक भिन्स म्याकमोहनयात यौन उत्पीडनया द्धपः वयेवं राजीनामा बिःगु दु। म्याकमोहनयात यौन उत्पीडन, मनू मिइगु व शारीरिक दुर्व्यवहारया त्रासदायक द्धपः वयेवं ड ब्लुडब्लूईया मूल कम्पनी टिकिओया कार्यकारी अध्यक्ष पदपाखे राजीनामा बिइमाःगु खः।

कुश्ती बेहेमोथ म्याकमोहनया मुख्यालय ज्या यानाच्वंम्ह पूर्व टिकिओ कर्मचारी जेनेल ग्रान्टं दायर याःगु मुद्दा लिपा थुगु घटना पिहावःगु खः। तर, म्याकमोहनं थःत वंगु द्धपः धासा अस्वीकार याःगु दु, म्याकमोहन उगु द्धपःया प्रतिरक्षाया लागि अदालत वनेत तयार दु धका धाःगु दु।

अय्न, छगु विज्ञप्ति जारी यासे म्याकमोहनं थाःगु राजीनामाया घोषणा याःगु दु। डब्लुडब्लुइ व टिकिओया असाधारण व्यवसायी व उगु बोर्ड सदस्यपि व शेयरधारकपि, साझेदारपि व घटकतय्त थुगु कम्पनियात विश्व नेता दयकेत ग्वाहालि यायेगुलि दक्को कर्मचारीतय्त व सुपर स्टारतय्त सम्मान यासे थःगु पदपाखे राजीनामा बिइगु निर्णय यानागु दु’ धका धाःगु दु।

कार्यकारी अध्यक्षता व टिकिओया बोर्ड अफ डाइरेक्टर पदपाखे बिःगु राजिनामा याकन हे लागु न जुइ।

बेलायतया जुजु चार्ल्स दितिय तधःगु प्रोस्टेटया उपचार यायेगु निति अस्पतालय् भर्ना जुयादीगु दु।

निर्धारित उपचारया लागि शुक्रवाः लन्डनया छगु निजी अस्पतालय् भर्ना जुयादीगु खः। बकिंघम प्यालेसया कथं जुजुया आः स्वास्थ्य अवस्था सामान्यय् दु।

वयकःयागु उपचार प्रभावकारी व सकारात्मक दु धका दरबारं धाःगु दु।

अमेरिकाया एलाबामा राज्यय् मनू स्यागू द्धपनय् छम्ह मनूयात नाइट्रोजन ग्यास नतूकां मृत्युदण्ड बिःगु दु।

५८ दँ दुम्ह केनेथ युजिन स्मिथयात सन् १९८९ य् एलिजाबेथ सेनेटयात स्यागू द्धपनय् दोषी जुगु खः।

हलिमयय् न्हापागु पटक नाइट्रोजन ग्याँस नतूकां मृत्युदण्ड बिःगु न्हापागु घटना जूगु दु धका बीबीसीं धाःगु दु।

सन् १९८८ या मार्चय् १ हजार डलर दइगु भलसाय् एलिजाबेथ सेनेटयात हत्या याःगु द्धपनय् स्मिथ व मेम्ह छम्ह दोषी ठहर जूगु खः।

लिपागु इलय् याःगु अपिल बुइवं वयात नाइट्रोजन ग्यास नतूकां मृत्युदण्ड बिःगु खः। स्मिथया वकिल तयेसं क्रूर व असामान्य सजाय धका धासे अमेरिकी सर्वोच्च अदालत व पुनरावेदन अदालतय् याःगु अपिल न अदालतं उगु अपिलयात अस्वीकार याःगु खः।

भारतं थीथी ज्याझ्वः दथुइ ७५ क्वःगु गणतन्त्र दिवस हंगु दु। भारत ब्रिटिस उपनिवेशपाखे १९४७ या अगष्ट १५ य् स्वतन्त्र जूगु खः।

१९५० या जनवरी २६ य् संविधान जारी जुइवं भारत सार्वभौम, लोकतान्त्रिक व गणतन्त्रात्मक राष्ट्र घोषित जूगु खः। दिवसया लसताय् थुगु दँय् फ्रान्सया राष्ट्रपति इम्यानुएल म्याक्रोनयात मूपाहाँ दयकूगु दु।

थौं वयकः ट्याङ्क, ऊँट घोड गया व लडाकू जेट फ्लाई पास्टनाप रङ्गीन सैन्य मार्चपासय् सहभागी जुइ धका बीबीसी हिन्दीं धाःगु दु। भारतया विदेश मन्त्रालयं न्हुगु दिल्ली व पेरिस ‘रणनीतिक साझेदार’ जूगु धका धाःगु दु।

फ्रान्सेली राष्ट्रपतिं थःगु भ्रमणं भारत व फ्रान्स दथुइ कुटनीतिक व आर्थिक सम्बन्धयात बालक्क यकिइगु जुइ धका धयादीगु दु।

इथियोपिया सरकारं कफी निर्यात याना खुल्लाया दुने ५ सय ७१ मिलियन डलर दुकागु दु। उगु ध्यवा धइगु नेपाःया ७६ अर्ब रुपैयाँ जुवनिइ।

वंगु जुलाई ८ तारिखनिसे शुरु जूगु चालु आर्थिक वर्ष २०२३÷२४ या निगुगु त्रैमासतक १ लाख १८ हजार टन कफी निर्यात याना इथियोपियाली कफी लिसे चिया प्राधिकरणं निर्यात याःगु धका चिनियाँ समाचार संस्था सिन्ह्वां धाःगु दु।

इथियोपियां मुख्ययाना साउदी अरेबिया, दक्षिण कोरिया, संयुक्त राज्य अमेरिका, जर्मनी, जापान व चीनय् कफी निर्यात याना वयाच्वंगु खः।

विश्व कफी बजारय् अनिश्चितता व कफी आयात याना वयाच्वंगु देशय् जुयाच्वंगु द्वन्द्वं याना चुनौती दु धका प्राधिकरणं धाःगु दु।

इथियोपियां वंगु आर्थिक वर्षय् निगु लाख ४० हजार टन कफी निकासीपाखे १ अर्ब ३ करोड डलर दुकाःगु खः। आः धासा निकासीइ म्हो जुगु खनेदु।