श्रीलंकाय् थौं राष्ट्रपति पदय् निर्वाचन जुइत्यःगु दु।

थ्व स्वया न्ह्यःयाम्ह राष्ट्रपति गोटाबाया राजापाक्षं राजीनामा बिइवं न्हुम्ह राष्ट्रपति ल्ययेत्यःगु खः। आर्थिक संकट वयेवं आन्दोलन तःच्वःगुलि राष्ट्रपति गोटाबाया देश त्वःता बिस्यु वःगु खः।

आः अन्तरिम राष्ट्रपति जुम्ह रनिल विक्रमसिंघे हे न्हुम्ह राष्ट्रपति जुइगु सम्भावना दु धका अनया समाचार एजेन्सीपिन्स धाउगु दु। संसदय् राष्ट्रपति पदया निर्वाचन न्ह्यः हे श्रीलंकाय् आपतकाल घोषणा याउगु खः।

थ्व स्वया न्ह्यः राष्ट्रपति पदया मेम्ह दाबेदार विपक्षी नेता सजिथ प्रेमादासां मंगलबाः राष्ट्रपति ल्यज्याय् थः मदु धका धाये धुकुगु खः।

श्रीलंकाय् न्हुम्ह राष्ट्रपतिया लागि मनोनयन दर्ता जुइ त्यंगु दु।

राष्ट्रपति गोटाबाया राजापाक्षं राजीनामा बिउगुलि न्हुम्ह राष्ट्रपति ल्ययेत्यःगु खः। न्हुम्ह राष्ट्रपतिया लागि कन्ह्यः बुधबाः सांसदपिन्स मतदान याइगु जुगु दु।

आर्थिक संकटया विरोधय् प्रदर्शन उग्र जुइवं राष्ट्रपति गोटाबाया त्वःता बिस्यू वंगु खः। न्हुम्ह राष्ट्रपतिया रुपय् कार्यवाहक राष्ट्रपति रनिल विक्रमसिंघेया नां न्ह्यने वयाच्वंगु दु।

राजापाक्षे परिवारनाप न्ह्यने दुम्ह वयकःयात सत्ताधारी श्रीलंका पिपुल्स फ्रन्टया समर्थन दु। अथेहे श्रीलंकाया मुख्य विपक्षी दलया नेता सजिथ प्रेमदासा धाःसा राष्ट्रपति पदया दाबीयाना च्वंम्ह खःसा थःगु नां लितकाइ धका धाउगु दु।

छु दिं न्ह्यः जक वयकलं राष्ट्रपतिया दाबी यासे समाचार सार्वजनिक याउगु खः।

दक्षिण पश्चिम युरोपय् तान्ववगुलि युरोपेली सङ्घ (ईयू) य् बच्छि भू–भागय् खडेरीया जोखिम जुगु धका युरोपेली आयोगया अनुसन्धानकर्तापिन्स चेतावनी बिउगु दु।

युरोपेली आयोगया मंकाः अनुसन्धान केन्द्रं सार्वजनिक याउगु प्रतिवेदनय् ईयूया ४६ प्रतिशत भू–भागय् खडेरीया तधःगु जोखिम दु धका उल्लेख याउगु दु।

ईयूया ११ प्रतिशत भू–भागय् खडेरीया कारण विशेष सतर्कता अपने याये माःगु अवस्था दु धका धाउगु दु। खडेरीया दकलय् अप्पो प्रभाव इटली खने दुगु दु। अथेहे स्पेनय् १० दँया दुने लःया मात्रा ३१ प्रतिशतं घटे जुगु दु धका रिपोर्ट धाउगु दु।

पोर्चुगलय् जलविद्युत् ऊर्जा उत्पादन याइगु न्ह्यय् दुने बच्छि कम जुगु दु। लःया अभाव व यक्को क्वाना फ्रान्स, रोमानिया, स्पेन, पोर्चुगल व इटलीइ बालीया उत्पादन कम जुइगु विज्ञपिन्स चेतावनी बिउगु दु।

बेलायतय् आःतकया हे दकलय् अप्पो ४० डिग्री सेल्सियस मापन जुगु दु। मौसम कार्यालयया कथं राजधानी लन्डनय् तापक्रम आःतक हे दकलय् अप्पो ४० डिग्री थ्यःगु दु धका धाउगु दु। सन् २०१९ य् क्याम्ब्रिजय् ३८ दशमलव ७ डिग्री सेल्सियस तापक्रम मापन जुगु खः।

श्रीलंकाय्  राष्ट्रपतिया सरकारी निवासय् प्रदर्शन श्रीलंकाय् प्रदर्शनकारीपिन्स राष्ट्रपतिया सरकारी निवासय् प्रदर्शन याउगु दु।

हजारौं प्रदर्शनकारीपिन्स राजधानी कोलम्बोय् प्रदर्शन यासे प्रहरीया अवरोध दथुइ राष्ट्रपतिया निवास वना थौं शनिबाः प्रदर्शन याउगु दु।

श्रीलंकाय् आर्थिक मन्दी जुया तच्वःगुलि श्रृङ्खलावद्ध प्रदर्शन जुयाच्वंगु खः। थौं जुगु प्रदर्शन दकलय् तधःगु खः।

श्रीलंकाय् राष्ट्रिय ध्वाँय् व हेलमेट पुना प्रदर्शनकारीपिन्स राष्ट्रपति कार्यालय तोडफोड याउगु खः।

थज्यागु स्थिति वंगुलि राष्ट्रपति गोटावाया राजापाक्षे दोषी दु धका प्रदर्शनकारीपिन्स न्याला निसे राजीनामा फ्वना वयाच्वंगु खः।

जापानया पूर्वप्रधानमन्त्री शिन्जो आबेयात गोली क्यकूगु दु। देशया पश्चिम क्षेत्रया नारा धैगु थासय् सतकय् भाषण यानाच्वंगु इलय् आबेयात ल्यूनेपाखें गोली क्यकूगु खः।

जापानया समाचार एजेन्सी एनएचकेया कथं गोली लाःगु थासं हि बाः वःगु खः। आबेयात नारा मेडिकल युनिभर्सिटीइ भर्ना याःगु दु। वया अवस्था तच्वः जूगु दु।

गोली प्रहार याःम्ह मनूयात नियन्त्रणय् कयाः घटनाया अनुसन्धान यानाच्वंगु प्रहरीं जानकारी ब्यूगु दु।