पाकिस्तानया पूर्वप्रधानमन्त्री इमरान खान व वया जहान बुशरा बीबीयात अदालतं भ्रष्टाचारया मुद्दाय् झींप्यदँ कैद सजाय न्यंकूगु दु।

सार्वजनिक पदय् दुुगु इलय् वःगु उपहार मिइगु द्धपनय् अदालतं खानयात झीप्यदँया जेल सजाय तोके याःगु खः। राज्यया गोप्य सूचं बिउगु द्धपनय् अदालतं इमरान खान व पूर्वविदेशमन्त्री शाह महमूद कुरैशीयात झीदँ कैद सजाय न्यकूगु खः।

सन् २०२२ य् विश्वासया मत कायेमफय्वं इमरान खान प्रधानमन्त्री पदपाखे लिचिलेमाःगु खः । इमरान खानं थःगु विरुद्ध लगे याःगु मुद्दा राजनीतिक उद्देश्यपाखे प्रेरित जूगु खः धका धयादीगु खः। पाकिस्तानय् थ्व हे फेब्रुअरी ८ य् आमचुनाव जुइ त्यःगु दु।

व स्वया न्ह्यः हे इमरान खानयात सजाय न्यकूगु खः । खानयात थ्व स्वया न्ह्यः हे चुनाव प्रतिस्पर्धा रोके याये धुकुगु खः । प्रधानमन्त्री जुगु इलय् वःगु उपहारयात इमरान खान व वया कला न थःगु फाइदाया लागि मिःगु द्धपं बिःगु खः।

रुसं युक्रेनय् आक्रमण याये धुकां विश्व बजारय् अमेरिकी हातहतियारया माग अप्पोगु दु।

सन् २०२३ य् अमेरिकां सीमापार बजारय् २ खर्ब ३८ अर्ब डलर बराबरया हतियार मिइ धुकुगु दु। अमेरिकी सरकारया प्रत्यक्ष संलग्नताय् ८१ अर्ब डलरया हतियार मिइ धुकुगु दु।

थ्व न्हापागु दँ स्वया तुलनामक ५६ प्रतिशत स्वया अप्पोगु दु । ल्यः दुगु हतियार धासा अमेरिकी रक्षा उपकरण निर्माता कम्पनीं मिउगु खः। अमेरिकां मिउगु हतियारया तधःगु हिस्सा युक्रेनया जलाखः पोल्याण्डं न्याःगु खः।

वंगु दँय् पोल्यान्डं १२ अर्ब डलर बराबरया सैन्य हेलिकप्टर न्याःगु खः। शक्तिशाली रकेट प्रणालीया लागि पोल्याण्डं १० अर्ब डलर पुगु दु सा ३ अर्ब ७५ करोड डलर युद्धपोतया लागि खर्च याःगु दु।

भारतया राजधानी दिल्लीइ मिँन्वया प्यसः स्वया अप्पो निजी गाडी च्याना नष्ट जूगु दु। दिल्लीया वजिराबाद प्रहरी स्टेशनय् छगु भण्डारय् मिँ न्वंगु धका स्थानीय अग्नि सेवा विभागं धाःगु दु।

मिँ न्वंगु कारण गोदामय् तयातःगु गाडी च्याःगु धका भारतीय सञ्चारमाध्यमं धाःगु दु । मिँ न्वया नष्ट जूगु गाडी स्थानीय प्रहरीं ट्राफिक नियम उल्लङ्घन याःगु व दुर्घटनाय् संलग्न जूपिन्त नियन्त्रणय् काःगु धका धाःगु दु।

मिँ गुकथं च्याःगु धका कारण धाःसा सिइमदुनि।

युक्रेनया सुरक्षा सेवां सेनाया हतियार न्यायेगु इलय् ४ करोड डलर भ्रष्टाचार जुगु दु धका धाःगु दु।

भ्रष्टाचारया द्धपनय् रक्षा मन्त्रालयया न्याम्ह वरिष्ठ मनू व छम्ह हतियार आपूर्तिकतायात अनुसन्धान जूयाच्वंगु दु धका सुरक्षा सेवां धाःगु दु। सन् २०२२ य् १ लाख गु मोर्टार गोलाया लागि जूगु सम्झौताय् अग्रिम भुक्तानी यागुलि, गुलि ध्यवा विदेशय् स्थानान्तरण याःगु खः।

तर यक्को हे म्हो जक हतियार दुहावःगु सुरक्षा सेवां धाःगु दु। छम्ह आरोपी युक्रेन त्वःता पिहावंगु इलय् ज्वंगु खः धका बीबीसीं धाःगु दु। ट्रान्सपरेन्सी इन्टरनेशनलया २०२२ य् भ्रष्टाचार धारणा धलखय् युक्रेन १८० देश मध्ये ११६ गु थासय् दु धका धाःगु खः।

भ्रष्टाचार अप्पोया च्वंगुलि युक्रेन न छगु लानाच्वंगु दु। लिपागु इलय् छगु दशक दुने युक्रेन भ्रष्टाचार अप्पो देय्या धलखय् २८ गु थासय् लाःगु दु।

हलिमयय् दकलय् तग्वःगु लः जहाजं थःगु न्हापागु यात्रा शुरु याःगु दु। अमेरिकाया फ्लोरिडाय् मियामीपाखे जहाजं न्ह्यय् न्हुया यात्रा शुरु याःगु दु धका बीबीसीं धाःगु दु।

रोयल क्यारिबियन समूहया स्वामित्वय् दुगु ३ सय ६५ मिटर ताहाकगु जहाजमा ७ हजार ६ सय यात्रुपि च्वनेफइ।

२ अर्ब अमेरिकी डलर लागतय् निर्माण जूगु उगु जहाज २० तल्ला याःगु खःसा न्ह्यय्गू स्विमिङ पुल, खुगु वाटरस्लाइड नापं पीगु स्वया अप्पो रेष्टुरेन्ट व बारया ब्यवस्था दु। वातावरणविद् तय्सं धाःसा तरल प्राकृतिक ग्यासपाखे न्ह्याइगु जहाजं हानिकारक मिथेन ग्यास फसय् चुहावट याइगु चेतावनी बिउगु दु।

मिथेन ग्यासं कार्वन डाइअक्साइडया तुलनाय् ८० गुणा स्वया अप्पो तापक्रम ज्वनइि । अथेहे पृथ्वीया अप्पोे तापक्रमयात नियन्त्रण याइगु मिथेन ग्यासया उत्सर्जन कटौती यायेमाःगु वातावरणविद् तयेगु धापू दु।