चालक दलया खुम्ह नाप ७४ म्ह च्वनावंगु छगः रुसी विमान युक्रेनया सीमानापं दुर्घटना जूगु दु। रुसी रक्षा मन्त्रालयया कथं इल्युशिन–७६ नांया सैन्य विमान युक्रेननापं बेलगोरोद प्रान्तया याबलोनोवो गामय् दुर्घटना जूगु खः।

दुर्घटना जूगु विमानय् च्वनावःपि दक्को ७४ म्हेसिगु ज्यान वंगु दु धका बीबीसीं धाःगु दु। रुसी अधिकारी तय्गु खँ कथं विमानय् ६५ युक्रेनी बन्दी, खुम्ह चालक दलनापं स्वम्ह एस्कर्ट (गार्ड) दुगु खः। उगु विमान युक्रेनं कुुतुकुगु धका द्धपः बिःगु दु।

खार्किभ सीमा क्षेत्रय् तैनाथ युक्रेनी सेनां विमानय् निगु क्षेप्यास्त्र प्रहार याःगु धका रुसी रक्षा मन्त्रालयं धाःगु दु। मन्त्रालयं उगु घटनायात ‘आतंकवादी ज्या’ धका धाःगु दु।

जापानया चन्द्रयान चन्द्रमाय् सफलतापूर्वक अवतरण जूगु दु। थुगु यान अमेरिका, रुस, चीन व भारतया लिपा जापान चन्द्रमाय् अवतरण यागू न्यागुगु देय् जूगु दु।

जापानया अन्तरिक्ष एजेन्सीं थःगु स्मार्ट ल्यान्डर फर इन्भेस्टिगेटिङ मुन (स्लिम) न चन्द्रमाया सतहय् सफ्ट ल्यान्डिङ याःगु दु धका धागू दु। जापान एरोस्पेस एक्सप्लोरेसन एजेन्सीं मुन स्निपर नामक प्रोबया लक्ष्य १०० मिटर (३२८ फिट) दुने अवतरण यायेगु कुतः याःगु खः।

जापानया अन्तरिक्ष एजेन्सी स्लिमं थःगु आज्जु पाय्छी जुगु मजुगु धइगु लच्छिया दुने सिइ दइ धका धाःगु दु।

बिबिसीया कथं जापानया अन्तरिक्ष एजेन्सीें ‘मून स्नाइपर’ धका म्हसूगु थःगु अन्तरिक्ष यान चन्द्रमाय् अवतरण याःगु दु धका धाःगु दु।

भारतया गुजरातय् वडोदरा हरनी तालय् डुङ्गा डुबे जूया १४ म्हेसिगु ज्यान वंगु दु। अथेहे खुम्ह बेपत्ता जूयाच्वंगु दु ।

म्हिगः जूगु दुर्घटनाय् १२ म्ह मचापि व निम्ह शिक्षकया ज्यान वंगु दु धका बीबीसीं धाःगु दु। डुङ्गाय् २७ म्ह च्वना वंगु खः। न्ह्यय्म्हेसित उद्धार याना अस्पतालय् भर्ना याःगु दु।

तःपिन्त मालेगु ज्या जुयाच्वंगु दु।

युक्रेन सेनां आजोभ सागरय् रुसी जासूस सैन्य विमान कूतुकाःगु दाबी याःगु दु। युक्रेनी सेना प्रमुखं वायुसेनां ताहाकःगु दूरीया राडार पत्ता लगे याइगु रुसया विमानयात नष्ट याःगु धका बीबीसी हिन्दीं धाःगु दु।

थुगु विमानं रुसया हवाई सुरक्षा प्रणाली पत्ता लगे याइगु जेट विमान सम्भावित निशाना न्हापा हे पत्ता लगे याइगु खः। थ्व स्वया न्हापा युक्रेन लगातार दक्षिणपूर्वी क्षेत्रय् रुसयात कब्जा यायेत ताः मलागु खः ।

तर युक्रेनं सैन्य विमान कूतुकुगुयात कया विज्ञतय्सं रुसया हवाई शक्तिया लागि तधःगु धक्का लाःगु धका धयावया च्वंगु दु। रुसी विशेषज्ञ तय्सं ए–५० नांया रुसी जासूस सैन्य विमानया विनाश तधःगु खँ जुगु धका धाउगु दु।

जापानया हानेदा विमानस्थलय् बिमान दुर्घटना जूगु दु। बिमान दुर्घटना जूया अन दक्को उडान अबरुद्ध जूगु दु। उडान रद्द जुइवं समस्या जूया अन यात्रु तय्ग लागि सरकारं बुलेट ट्रेनया व्यवस्था याःगु दु।

हानेदा एयरपोर्टय् जापान एयरलाइन्सया छगः विमान अवतरण यायेगु झ्वलय् मेगु छगः तटरक्षक विमान (कोस्ट गार्ड) नापं ल्वायेवं मिँन्वंगु खः। उगु घटनाय् न्यागः मनू सीउगु दु।

मेपि ३७९ म्ह यात्रु व चालकया दुजःपि धासा सकुशल उद्धार याःगु दु। हानेदा एयरपोर्टय् करिब सच्छि मल्याक उडान स्थगित जुगु दु। उगु घटनां करिब १० हजार यात्रु प्रभावित जुगु दु।