चीनय् छु भूभागय् उष्णलहरया कारण आः झीन्हुतक भचा तापक्रम थहावनेगु अनुमान याउगु दु।

छु प्रान्तय् तापक्रम ४० डिग्री सेल्सियस स्वया अप्पो थ्यनिगु अनुमान याउगु दु। सङ्घीय सरकारं जङ्गलय् मिँ च्याउगुलि अथे चेतावनी बिउगु खः।

दक्षिण–पूर्वी जेजियाङ प्रान्तय् छु सहरय् उच्च तहया चेतावनी जारी याउगु दु धका बीबीसीं धाउगु दु।

उष्णलहरं याना चीनय् यक्को मनू तयेगु छेँ, ज्याकू व उद्योगय् वातानुकूलित उपकरण प्रयोग याये धुकूगुसा राष्ट्रिय ऊर्जा आपूर्तिइ असर जुइ खने दु धका धाउगु दु।

मानव सिर्जित जलवायु ह्यूपाःया कारण हलियकं उष्णलहर नियमित, जोखिमपूर्ण जुयावया च्वंगु खः।

अमेरिकाय् छगु दशक लिपा न्हापागु पटक पोलियोया बिरामी पुष्टि जुगु दु। न्युयोर्कया स्वास्थ्य विभागं रकल्यान्ड काउन्टीइ च्वम्ह छम्ह मनूयात परीक्षण लिपा पुष्टि जुगु खः।

रोग नियन्त्रण तथा रोकथाम केन्द्रया कथं अमेरिकां सन् २०१३ य् लिपागु पटक पोलियोया बिरामी लुगु खः। म्हुतू बिइगु पोलियो खोप (ओपीभी) काम्ह मनूपाखे लिपागु सङ्क्रमण सर जुगु खनेदुगु धका स्वास्थ्य अधिकारीं धाउगु दु।

तर, सन् २००० य् संयुक्त राज्य अमेरिकाय् पोलियोया लागि म्हुतू बिइगु खोप बन्द याउगु खः। न्युयोर्कया स्वास्थ्य विभागं खोप मकापिन्त पोलियो खोपया मात्रा कायेत इनाप याउगु दु। पोलियोयात उन्मूलन यायेगु हलियकंकतः जुयावया च्वंगु दु।

पोलियो घातक भाइरल रोग माने यानातःगु दु। सन् १९८८ य् १ सय २५ गु देशय् पोलियो फैलै जुइ धुकुगु दु । अमेरिकाय् सन् १९६० दशक लिपा खोप विकास जुइ धुका पोलियो न्यूनीकरण जुगु खः।

युक्रेनया राष्ट्रपति भ्लोदोमिर जेलेन्स्कीं रुसं कब्जा यानातःगु थाय् लितः मबिउतले युद्धविराम जुइ मखु धका धाउगु दु।

द वाल स्ट्रीट जर्नलनाप खँल्हायेगु झ्वलय् युक्रेनी राष्ट्रपति जेलेन्स्कीं रुसं कब्जा यानातःगु थाय् लितः मबिउतले युद्धविराम यायेगु इलय् रुसयात अपूइ मखु धका धाउगु खः।

युद्धविरामया फाइदा कया रुसं युद्धया थप तयारी याइगु व हाकनं आक्रमण याइगु जुगुलि भलसा दुगु सम्झौताविना युद्धविराम याये मज्यु धका जेलेन्स्कीं धाउगु खः।

थीथी  त्वहः तया रुसं तत्कालीन सोभियत संघय् आबद्ध राज्ययात थःगु नियन्त्रणय् कायेगु कुतः यानाच्वंगु धासे युक्रेनी राष्ट्रपति जेलेन्स्कीं रुसयात हलियकं दवाब व प्रतिबन्ध मतःतले हलियकं रुसया गतिविधि खतरनाक जुयावनि धका दाबी यानदीगु खः।

रुस व युक्रेन दथुइ अन्न निर्यात खुले यायेगु बारे महत्त्वपूर्ण सम्झौताय् हस्ताक्षर जुगु दु।

टर्कीया इस्तानुबल जुगु वार्ता लिपा निगु पक्ष खाद्यान्न निर्यात खुले यायेगु सहमत जुगु खः। युद्ध यानाच्वपि रुस व युक्रेनं सम्झौताय् हस्ताक्षर याउगु इलय् छगु हे टेबलय् धासा मच्वं।

सम्झौताय् न्हापां रुसया रक्षामन्त्री सर्गेई सोयुगु न हस्ताक्षर याउगु खःसा वया लिपा मेगु टेबलय् युक्रेनया पूर्वाधारमन्त्री ओलेक्सान्दर कुब्राकोभं हस्ताक्षर याउगु धका बीबीसीं धाउगु दु।

सम्झौता कथं आः युक्रेनी बन्दरगाहय् रोके जुयाच्वंगु हजारौँ टन खाद्यान्न कृष्ण सागर जुया विश्व बजारय् निर्यात याइ। थ्व सम्झौता १ सय २० दिं तक लागू जुइ। वंगु फेब्रुअरी २४ निसे रुसं युक्रेनय् आक्रमण याउगु खः।

आक्रमण याउगु खुल्ला लिपा सम्झौता जुगु खः।

श्रीलंकाय् प्रधानमन्त्रीइ दिनेश गुणावर्धने नियुक्त जुगु दु।

गुणावर्धन न थौं पद व गोपनियताया शपथ ग्रहण याइगु जुगु दु। खुक्वःतक प्रधानमन्त्री जुइ धुकुम्ह रनिल विक्रमसिंघे राष्ट्रपति जुइ धुका गुणावर्धने प्रधानमन्त्री जुगु खः।

७३ दँ दुम्ह गुणावर्धने थ्व स्वया न्ह्यः विदेशमन्त्री, शिक्षामन्त्री व गृहमन्त्री जुइ धुकुगु दु। वंगु अप्रिलये तत्कालीन राष्ट्रपति गोटाबाया राजापाक्षे न गुणावर्धनेयात गृहमन्त्रीइ नियुक्त याउगु खः।