बेलायतय् कोरोनाया न्हूगु भेरिएन्ट समुदाय स्तरय् न्यनेधुंकुगु खुलासा जूगु दु ।

बेलायती संसदय् सम्बोधन यासें अनया स्वास्थ्यमन्त्री साजिद जाविदं ३ सः व ३६म्ह ओमिक्रोन संक्रमित पुष्टी जुइधुंकुगु जानकारी बिउसें इलय् हे नियन्त्रण याये मफूसा थुकिं ग्यानापूगु अवस्था ब्वलंकिगु धयादील ।

बेलायतय् ओमिक्रोन संक्रमितपिं अन्तर्राष्ट्रिय यात्रालिसे सम्बन्धित मजूगु पुष्टी यासें वयेकलं इङल्याण्डय् २सः व ६१म्ह, स्कटल्याण्डय् ७१म्ह व वेल्सय् ४ म्ह संक्रमित लूगु जानकारी बियादील ।

ओमिक्रोन नियन्त्रणया नितिं बेलायतं रेड लिष्टय् तःगु देय्या प्रतिबन्धयात निरन्तरता बिइगु स्वास्थ्यमन्त्री जाविदं उल्लेख यानादील ।

भारतया छन्हूया भ्रमणय् झाम्ह रूसी राष्ट्रपति भ्लादिमिर पुटिनं मस्कों भारतयात छगू महान् शक्ति व बाहाँलाम्ह पासाया रुपपय् थुृइकुगु धयादीगु दु ।

भारत–रूस वार्षिक शिखर सम्मेलनया उलेज्या सत्रय् म्हिगः नुगः खँ प्वंकुसें राष्ट्रपति पुटिनं भारतयात छगू महान् शक्ति व परीचित पासाया रुपय् थुइकाःगु धयादीगु दु ।

म्हिगः हे भारतीय प्रधानमन्त्री नरेन्द्र प्रधानमन्त्री मोदीलिसेया भेटवार्ताया झ्वलय् पुटिनं निगू देय् दथुया स्वापू प्रगाढ जूगु व भविष्ययात थःपिन्सं स्वयाच्वनागु विचाः प्वंकादीगु खः । थगुने भारत व रुस दथुया व्यापार १७गू प्रतिशतं कुहाँवंगु तर २०२१ या न्हापांगु ९ ला दुने निगुलिं देशं ३८गू प्रतिशतं व्यापार अप्वःगु अनुभव जूगु पुटिनया धापू खः ।

रुसी नेताया थुगु भ्रमण भारत व रुसय् जुइगु वार्षिक शिखर सम्मेलनया परम्पराया निरन्तरता खः । अथेहे प्रधानमन्त्री नरेन्द्र मोदीं कोभिड–१९ महामारीया हुनिं ब्वलंगु हाथ्याःया बाबजुद भारत–रुस स्वापू च्वन्ह्याइगुलिइ छुं नं हिउपा मवःगु धयादील ।

निम्ह नेतां अफगानिस्तानया लिपांगु अवस्थाया खँय् नं खँल्हाबल्हा याःगु दु । निगू देय् दथुइ मन्त्रीस्तरीय वार्ता नं जूगु खः । निगू देय् दथुइ २०२१–३१ या नितिं सैन्य प्राविधिक ग्वहालि व्यवस्था अन्तर्गत भारत–रसिया राइफल्स प्रालि मार्फत ६ गू लख थान एके–२०३ राइफल खरिद यायेगु सम्झौता नं जूगु दु ।

म्यानमारय् सैन्य शासनया विरोधय् ब्वज्या यानाच्वंपिं ब्वज्यामितये दथुइ सेनाया गाडी न्याकुबलय् आपालं घाःपाः जूगु दु ।

सैन्य कु या विरोधय् यांगुनय् मदिक्क ब्वज्या यानाच्वंपिं दथुइ सेनाया ट्रक ब्वाकुगु खः । तच्वगु गतिया सैनिक ट्रकं ठक्क्र बिइगु न्ह्याकेगुधुंका ब्वज्यामित तितरबितर जूगु खः ।

उगु झ्वलय् आपालं ब्वज्यामि घाःपाः जूगु बुखँ दु । ट्रकं ठक्कर नकेधुंका सेनां सुं सुंयात गोलीं कयेकुगु व सुं सुंयात बाँमलाक्क ल्हा वाःगु धाःगु दु । ब्वज्याया झ्वलय् ११ म्हसित ज्वंगु व ३म्ह घाःपाः जूगु सेनाया दाबी दु ।

तर ब्वज्यामितयेसं धाःसा आपालं घाःपाः जूगु धाःगु दु । म्यानमारय् वंगु फेब्रुअरीइ सैनिक कु जूगु थुखे १२सः सिवें आपा ब्वज्यामि सीगु दु  ।

भारतय् कोरोना भाइरसया न्हुगु भेरियन्ट ओमिक्रोन सङ्क्रमण फैलै जुगु दु।

म्हिगः जक १७ म्हेसित ओमिक्रोन सङ्क्रमण खनेदुगु दु। थ्व नाप भारतय् आःतक २१ म्हेसित ओमिक्रोन भेरियन्ट पुष्टि जुइ धुकुगु दु।

दक्षिण अफ्रिकापाखे लिहावम्ह मनु नाप वनाप स्वापू दुम्हेसित ओमिक्रोन भेरियन्ट खने दुगु खः। भारतया राजस्थान, जयपुर, महाराष्ट्र व राजधानी दिल्लीइ थुगु सङ्क्रमण खने दुगु धका सञ्चारमाध्यमं धाउगु दु।

अथेहे, बेलायत, अमेरिका व अस्ट्रेलियाय् न ओमिक्रोनया सङ्क्रमण खनेदुगु धका बीबीसीं धाउगु दु।

इण्डोनेशियाया जाभा टापुइ ज्वालामुखी बिस्फोट जूबलय् छम्ह सीगु दु ।

बिस्फोटय् ४९ म्ह घाःपाः जूगु दु । माउन्ट सेमेरुइ जूगु विष्फोटया खरानी व कुँ तापाक्क तक्क न्यंगु दुसा उकिया हुनिं घटना लागा जःखःया जनजीवन प्रभावित जूगु दु ।

माउन्ट सेमेरु लिक्कसंया मलंग शहरय् तच्वकं कुँ जाःगुलिइ खिउँगु दु । हेलिकप्टरया ग्वहालिं छेँखाय् छेँखाय् तक्यनाच्वंपिनि उद्दार ज्या जुयाच्वंगु दु । लिच्वः लाःगु लागाया सर्वसाधारणयात सुरक्षित थाय्पाखे चिइकुगु दु ।

अनया सगँ पूवंक हे कुँ व खरानं त्वपूगुलिं हवाई उडान नं लिच्वःलय् लाःगु दु ।