बागमती प्रदेश सभाया बैठक थौं च्वनिइगु जुगु दु। बागमती प्रदेश सभाया गुक्वःगु अधिवेशन अन्तर्गत थौं न्हिनय् ३ बजे प्रदेश सभाया बैठक च्वनेत्यःगु खः।

थुगु हे अधिवेशनय् मुख्यमन्त्री अष्टलक्ष्मी शाक्यं विश्वासया मत काएगु जुगु दु। एमाले विभाजन जुइवं बागमती प्रदेशकी मुख्यमन्त्री अष्टलक्ष्मी शाक्य अल्पमतय् लाउगु खः।

एमालेया विभाजनलिपा १३ म्ह सांसदपिन्स नेकपा एकीकृत समाजवादी पार्टीइ वनेवं शाक्य न विश्वासया मत कायेत्यःगु खः। प्रदेश सभा सचिवालयया सचिव कृष्णहरी खड्कां थौं सुथय् च्वनिइगु कार्यव्यवस्था परामर्श समितिं थौं हे कार्यसूची टुंग्ये याइ धका धाउगु दु।

बागमती प्रदेश सभाय् आः १०९ म्ह सांसदपि मध्ये एमालेय् ४३, कांग्रेसय् २२, माओवादीइ २३, समाजवादीइ १३, विवेकशील साझाय् ३, नेमकिपाय् २, राप्रपाका २ व स्वतन्त्र सांसदपि छम्ह दु। विश्वासया मत कायेगु निति शाक्ययात ५७ मत आवश्यक जुइ। गठबन्धनय् दुगु दलपाखे बहुमत दुगु कारण शाक्य विश्वासया मत काइगु सम्भावना म्हो जक खनेदु।

सरकारय् नवनियुक्त उद्योग वाणिज्य तथा आपूर्ति मन्त्री गजेन्द्रबहादुर हमालं राजीनामा बिइगु घोषणा याउगु दु।

प्रधानन्यायाधीश चोलेन्द्र शमशेर जबराया कोटापाखे मन्त्री जुगु द्धपः बियाच्वंगु खः। हमालं थौं हे प्रधानमन्त्री शेरबहादुर देउवासमक्ष राजीनामा बुझे यायेगु धका धाउगु दु।

‘जिः थःगु हे स्वविवेक प्रयोग यासे, यक्को बिचाः यानाछाय् विवादय् वयेगु। छाय् राजीनामा बिइगु धइगु धका नेतापिन्स धाउगु दु तर अय्न राजीनामा बिइ,’धका वयकलं धाउगु दु। देउवा निकट हमाल नातां प्रधानन्यायाधीश जबराया ससः दाजु खः। ५ पुस २०७७ य् न्हापागु पटक संसद विघटन यागुलि संवैधानिक परिषद् न याइगु नियुक्तिइ भागबण्डा काम्ह जबरां निक्वःगु पटक विघटनलिपा हमालयात मन्त्री दयकेत तत्कालीन प्रधानमन्त्री केपी शर्मा ओलीयात इनाप याउगु खः।

सर्वोच्च अदालतया २८ असारया आदेश कथं २९ असारय् देउवा प्रधानमन्त्री दयके धुका जबरां निम्ह मन्त्री फ्वंगु खः। सत्तारुढ दलया नेतापिनिगु कथं वयकल वन तथा वातावरण व उद्योग वाणिज्य तथा आपूर्तिमन्त्री फ्वःगु खः।आः उद्योग वाणिज्य तथा आपूर्तिमन्त्री हमाल जुगु खः। थुकि जबराया हे कोटा मन्त्री जुगु प्रष्ट जुगुे स्वयं सत्तारुढ दलया नेतापिन्स धयाच्वंगु दु।

येँ महानगरपालिकां दक्षिणकालीस्थित मनमोहन स्मृति सामुदायिक अस्पतालय् अक्सिजन प्लान्ट निर्माण यायेत ग्वाहालि याउगु दु।

महानगरया मेयर विद्यासुन्दर शाक्य व उपमेयर हरिप्रभा खड्गी श्रेष्ठया रोहबरय् महानगरकापाखे जनस्वास्थ्य विभागया प्रमुख हरिबहादुर कुँवर व अस्पतालया कार्यवाहक अध्यक्ष पूर्णबहादुर शाहीं हस्ताक्षर यानादीगु खः।

हस्ताक्षर याये धुका मेयर शाक्यं महानगरं स्वास्थ्य क्षेत्रय् यानागु लगानीया विषय उल्लेख यासे, कोविड उपचार व रोकथामया लागि येँ महानगरं लगानी स्थानीय सरकारपाखे छक्वल अप्वो  खः धका धयादीगु दु। ‘येँ पिने सूयात विशेषज्ञ स्वास्थ्य सेवा आवश्यक जूसा येँ वयेमाः। थथे उपचारया लागि वइपिन्त सहजताया लागि जिमिसं अस्पतालया क्षमता अप्वोकेगु कथं लगानी याना च्वनागु दु। जिमिसं चाहे जु, उपचारया लागि सूयात येँ वये म्वालेमाः। उपचार थःगु हे थासय् याये दयेमा। थुकि याना विरामीया परिवारपिनिगु आर्थिक बोझ कम जुइ। थुकिया लागि येँ महानगरं जिल्ला पिने स्वास्थ्य सेवा सुधारय् ग्वाहालि यानाच्वनागु दु।’ मेयर शाक्य धयादीगु दु।

थथेयाना ग्वाहालि यानागु इलय् चिकित्सक व विरामी निम्हसिगु हे आत्मविश्वाश थहावंगु दु। थथे आत्मविश्वाशं ल्वय् लनेत ग्वाहालि जुइ धका मेयर शाक्यं धयादीगु दु। वयकलं धयादीगु दु, दक्षिणकाली नगरया प्रसिद्ध धार्मिक दक्षिणकाली द्यःया थाय् सुधारया लागि १ करोड रुपैयाँ व सार्वजनिक थासय् हरियाली पार्क दयकेत १ करोड रुपैयाँ महानगरं आर्थिक ग्वाहालि यानागु दु धका धयादीगु दु।

नेवाः समुदाय दुनेया थीथी जातिय संगठनतय् मंकाः संगठन कथं नेवाः जातिय महासंघ गठन जूगु दु।

नेवाः समुदाय दुनेया थीथी १८ जातीय संगठनया मुनां शनिबाः महासंघया तदर्थ कार्य समिति गठन यात। १८ जातिय संगठनलिसें संचारकर्मी, नेवाः अभियानकर्मीतकंया उपस्थितीइ नीस्वंगु ९ दुजःया तदर्थ समितिइ खड्गी सेवा समितिया मनोज नेवाः खड्गीयात नायः ल्यःगु दुसा स्यस्यः समाजया दानदास श्रेष्ठयात न्वकू ल्यःगु दु।

अथे हे, राजोपाध्याय समाजया बिराजकाजी राजोपाध्याययात मू छ्यान्जेया भाला ब्यूगु दु। रजक समाजया किरण मघैया छ्यान्जे पदय् च्वनादीगु दु। दांभरिं पदय् पुतुवार नगरकोटी राजवाहक (पुनरा) विकास समाजया सागर पुतुवारयात तःगु दु। प्यम्ह दुजलय् नेपाल तण्डुकार समाजया सुरेश तण्डुकार, बलामी समाजया बेखराम वलामी, कपाली समाजया श्यामकृष्ण दर्शनधारी व नेपाल माली समाजया अमर मालीयात तःगु दु ।

तदर्थ समिति गठन धुंकाः समितिया सकल पदाधिकारी व दुजःपिन्त नेवाः देय् दबूया पूर्व छ्यान्जेलिसें नेवाः संस्कृति सम्वन्धि अध्येता जितेन्द्र विलास बज्राचार्यं खादा क्वखायेकादिल। महासंघया तदर्थ कार्य समितिया नायः ल्ययेधुंकाः नवासें मनोज नेवालं नेवाः समाजया शक्ति जुयाच्वंगु जातिय संगठनतय्त नेतृत्व वर्गं कार्यकर्ताया रुपय् जक प्रयोग यानावःगुलिइ आः सकसिगु शक्ति छथाय् मुंकाः थप उर्जाशील जुयाः न्ह्याःवनेगु धयादिल।

‘हरेक नेवाः समाजया गतिविधि, आन्दोलनया शक्ति धयागु जातिय समाज खः, आः थ्व शक्ति दक्वं छथाय् मुनाः थःगु हक अधिकारया प्राप्तिया नितिं झन बल्लाक, धिसिलाक्क झी न्ह्याःवनेगु जुइ’ नेवालं धयादिल। आः १८ जातिय समाज दुथ्याःगुलिइ आवश्यकता कथं मेगु जातीय समाज नं तनावनेगु व आवश्यक प्रकृयाय् न्ह्याःवनेगु वयकलं धयादिल।

महासंघं वइगु कार्तिक ६ गते स्वन्ति व नेपाल सम्वत न्हूदँ ११४२ या लसताय् भिंतुना कालबिल ज्याझ्वः यायेत्यंगु दु।

साहित्यकार जितेन्द्र रसिकया १२ गु कृति मचाबाखं सङ्ग्रह ‘गुलेली’ बजारय् वंगु दु।

शिखा बुक्सं प्रकाशन याउगु मचाबाखं ‘गुलेली’ च्याप्टर सफु खः। बाखं सङ्ग्रहय् खुगु बाखं रङ्गीन चित्र न दुथ्याकातःगु दु।

सङ्ग्रह गुफाको बाघ, सपना व विज्ञान, गुलेली, केरकारे कान्छो, सिंगौरीको शहर भ्रमण व सोरोको खुत्रुके शिर्षक बाखनय् दुथ्याकातःगु दु। लिपागु इलय् कोभिड महामारीं छेँ छेँ कुनातःपि मस्तय् कोभिड महामारी कम जुयावंगु इलय् विद्यालय वःपि मचापिन्त रिफ्रेसमेन्ट यायेगु कथं बाखनय् दुथ्याकातःगु दु दु च्वमि रसिकं धाउगु दु।

मचापिन्त मोहनिया बिदायात लक्षित यासे मचा बाखं ‘गुलेली’ बजारय् हयाउगु दु धका शिखा बुक्सं धाउगु दु। उगु सफूया भाः १ सय २५ रुपैयाँ तया तःगु दु।