सरकारं श्रमजीवी पत्रकारपिनिगु न्यूनतम पारिश्रमिक निर्धारण समिति खारेज याइगु दु।

मुख्यसचिव शंकरदास वैरागीया संयोजकत्वय् दुगु कार्यदलं समिति खारेज यायेगु निर्णय याउगु खः।

मन्त्रिरिषदं वैरागीयो संयोजकत्वय् सरोकारवाला मन्त्रालयया सचिवपि दुथ्यागु कार्यदलयात समिति खारेज यायेगु वा मयायेगु निर्णय यायेगु अधिकार प्रत्यायोजन याउगु दु।

कार्यदलं वंगु मंसिर १९ गतेया बैठकं न्यूनतम पारिश्रमिक निर्धारण समिति खारेज यायेगु निर्णय याउगु खः। थुगु सम्बन्धय् समितिं अध्यक्ष राजेन्द्र अर्यालयात पौ छ्वय धुकागु धका मुख्य सचिव वैरागीं जानकारी बिउगु दु।

कन्ह्यः प्रतिनिधिसभा बैठकया कार्यसूचीइ एमसीसी दुमथ्या कन्ह्यः बुधबाः प्रतिनिधिसभा बैठक च्वनिइगु जुगु दु।

बैठकय् सम्भावित कार्यसूचीइ एमसीसी प्रस्तावयात समावेश याउगु मदु। सचिवालयं थौं मंगलबाः सार्वजनिक याउगुलि कन्ह्यः बुधबाः न्हिनय् १ बजे च्वनिइगु बैठकय् सम्भावित कार्यसूचीइ शोक प्रस्ताव पेस जक दुथ्याकूगु दु।

बुधबाःया बैठकय् एमसीसी टेबुल याइगु धासा सम्भावित कार्यसूचीइ धासा दु थ्याकूगु मदु।

अय्न, सभामुख अग्निप्रसाद सापकोटां बुधबाःया लागि कार्यव्यवस्था परामर्श समितिया बैठक सःतूगु खः। उगु बैठकं प्रतिनिधिसभाया कार्यसूची ह्यूपा वयेफू धका न धाउगु दु।

सरकारं ११ म्ह सहसचिवपिन्त सरुवा याउगु दु।

संघीय मामिला तथा सामान्य प्रशासन मन्त्री राजेन्द्रप्रसाद श्रेष्ठं थौं मंगलबाः मन्त्रीस्तरीय निर्णय यासे ११ म्ह सहसचिव सरुवा जुगु दु।

खेमराज कोइरालायात प्रधानमन्त्री तथा मन्त्रिपरिषदया कार्यालय सरुवा याउगु दु। सेवन्तराज दाहालयात निर्वाचन आयोगं सामान्य प्रशासन मन्त्रालयया अतिरिक्त समूहय् सरुवा याउगु दु।

कृष्णप्रसाद काप्रीयात शिक्षा विज्ञान तथा प्रविधि मन्त्रालय, लिलाप्रसाद शर्मायात उद्योग, वाणिज्य तथा आपूर्ति मन्त्रालय व विनु बज्राचार्य कुँवरयात राष्ट्रिय सतर्कता केन्द्रय् छ्वंगु दु।

वंगु २४ घण्टाया दुने देयन्यक थप ६८० म्हेसित कोरोना संक्रमण पुष्टि जुगु दु।

अथेहे थप निम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं देयन्यक ७ हजार ९५ म्हेसिगु नमुना परीक्षण याउगु खः।

४ हजार २५६ म्हेसिगु पीसीआर परीक्षण याउगुलि ४९८ म्ह व २ हजार ८३९ म्हेसिगु एन्टीजेन परीक्षण याउगुलि १८२ म्ह याना ६८० म्हेसित संक्रमण पुष्टि जुगु दु।

अथेहे वंगु २४ घण्टाय् १ हजार ८३५ म्ह संक्रमणमुक्त जुगु दु। अथेहे स्वनिगलय् थप २०९ म्ह कोरोना संक्रमितपि थपे जुगु दु। उकि मध्ये येँ जक १७१ म्हेसित कोरोना सक्रमण जुगु दु।

यलय् २४ म्ह व ख्वपय् १५ म्ह संक्रमित जुगु दु धका मन्त्रालयं धाउगु दु।

शेयर बजार परिसूचक नेप्से थौं मङ्गलवाः ५३ अङ्कं थहावंगु दु।

म्हिगः सोमवाः सामान्य थहावंगु नेप्से थौं ५३ दशमलव ३ अङ्कं थहावना २ हजार ७ सय ५४ दशमलव २८ विन्दुइ थ्यंगु दु।

थौं दक्को समूहया शेयर थहावसा बीमा, माइक्रोफाइनान्स, जलविद्युत् व विकास बैंक समूहया शेयर यक्को कुहावंगु दु।  बजाः खुले जुगुनिसे न्हिनय् २ बजे तक सामान्य घटबढ जुगु नेप्से २ बजे लिपा थहावंगु खः।

२ बजे तक २ हजार ७ सय ८ विन्दु दुगु नेप्से ३ बजे २ हजार ७ सय ५३ विन्दुइ थ्यका बन्द जुगु खः। थौं २२४ कम्पनीया ६३ लाख ४३ हजार कित्ता शेयर ३ अर्ब २३ करोड ३३ लाख रुपैयाँया कारोबार जुगु खः।

दकलय् अप्पो हिमालयन डिस्टिलरीया २२ करोड ७७ लाख रुपैयाँया शेयर किनबेच जुगु खः। न्यादी हाइड्रोया शेयर १० प्रतिशत व तेह्रथुम पावर कम्पनीया शेयर ९ अङ्कं थहावंगु खः।