विश्व सम्पदा सूचीकृत पाटन दरबार क्षेत्रय् च्वंगु भिंद्यः भिमसेन मन्दिर पुनःनिर्माणया अगुवा नाप उद्यमी कृष्णलाल महर्जनयात पितृशोक जुगु दु।

ललितपुर उद्योग वाणिज्य संघया निर्वतमान अध्यक्ष महर्जनया अबु रत्नलाल महर्जन (नायचा) आईतबाः सथय् ८ः४० बजे सानेपास्थित स्टार हस्पिटलय् मदुगु खः। ८२ दँ दुम्ह महर्जन स्वँय् समस्या जुया उपचार यायेगु झ्वलय् मदुगु खः।

मदुम्ह महर्जनया जहान लक्ष्मीमाया महर्जन, काय्पि कृष्णलाल महर्जन, सुनीललाल महर्जन, सुशील महर्जन व सुमन महर्जन व म्ह्याय्पि नानीमाया महर्जन, लक्ष्मीदेवी महर्जन, मैया महर्जनपि दी।

मोहनी न्ह्यःया लिपागु दिं थौं सोमबाः सेयर बजाः परिसूचक नेप्से २३.१९ अंकं घटे जुगु दु।

शेयर कारोबार जुगु कम्पनी व रकम निगुलि हे गिरावट वंगुलि नेप्से परिसूचक २६३९ अंकय् कुहावंगु खः। सोमबाः समूहिक लगानी कोष व लगानी सूचकबाहेक दक्को परिसूचक घटे जुगु खः।

न्हिच्छियकं २१९ कम्पनीया सेयर दोस्रो बजारय् खरीद बिक्री जुगुलि मुक्कं कारोबार रकम ३ अर्ब ६३ करोड रुपैयाँय् जक सीमित जुगु दु।

कन्ह्य मंगलबाः निसे आः न्यान्हु तक मोहनीया बिदा जुगु कारण बजार बन्द जुइ।

स्वास्थ्य मन्त्रालयया कथं थौं दकलय् अप्वो येँ १९१ म्हेसित कोरोना सक्रमित जुगु दु।

अथेहे, यलय् ७८, झापाय् ६५, कास्कीइ ४७, मोरङय् ४६, रुपन्देहीइ २८, सुनसरी व ख्वपय् २६÷२६ म्ह, चितवन व कञ्चनपुरय् १६÷१६ म्ह व मकवानपुर व कैलालीइ १३÷१३ म्हेसित कोरोना संक्रमण पुष्टि जूगु दु धका मन्त्रालयं धाउगु दु।

वंगु २४ घण्टाया दुने देयन्यक ७८५ म्हेसित कोरोना भाइरस संक्रमण पुष्टि जूगु दु।

७ हजार २३३ म्हेसिगु पीसीआर परीक्षण याउगुलि ६६३ म्ह व ४ हजार ९६२ म्हेसिगु एन्टिजेन परीक्षण याउगुलि १२२ म्ह याना ७८५ म्हेसित कोरोना भाइरसया संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाय् कोरोना संक्रमणं १२ म्ह सीउगु दु सा ८८८ म्ह कोरोनामुक्त जुगु दु। थौं थपे जुपि नाप आःतक नेपालष्य् कोरोना संक्रमित जूपि ८ लाख २ हजार ८६१ म्ह थ्यंगु दु।

अथेहे ११ हजार २४३ म्ह सी धुकुगु दु सा ७ लाख ७६ हजार ८३१ म्ह संक्रमणमुक्त जुइ धुकुगु दु।

करिब ८ लाख १९ हजार आवेदकपिन्त १० कित्ता लाइगु मध्ये भोटेकोशी जलविद्युत कम्पनीया आईपीओया लागि आवेदन बिइगु थौं लिपागु दिं खः।

२० असोजनिसे सर्वसाधाराणया लागि खुला जुगु आइपीआय् थौंतक आवेदन बिइफइ। कम्पनीं कुल ९० करोड रुपैयाँ बराबरया ९० लाख कित्ता शेयर निष्काशनय् हया ८१ लाख ९० हजार कित्ता शेयरया लागि जक सर्वसाधरणपिन्स आवेदन बिइफइगु खः।

उकिइ ८ लाख १९ हजार स्वया अप्वो बिगुलि आवेदकपिन्त म्हति न १० कित्ता शेयर लाइगु निश्चित दु। कुल निश्कासन मध्ये ४ प्रतिशत अर्थात ३ लाख ६० हजार कित्ता शेयर कम्पनीया कर्मचारीपिनिगु लागि व ५ प्रतिशत अर्थात ४ लाख ५० हजार कित्ता शेयर सामूहिक लगानी कोषयात छुटेयायगु खः।

कम्पनीयो आईपीआ असोज २५ गतेतक आवेदन बिइगु ई क्वछिना तःगु खः। इच्छुक लगानीकर्तापिन्स प्रतिकित्ता १०० रुपैयाँया दरं न्यूनतम १० कित्तानिसे अप्वो १० हजार कित्तातकया लागि आईपीओ आवेदन आह्वान बिइगु ई तयातःगु खः।