थौं सःतूगु प्रतिनिधिसभाया बैठक हाकन छवाः न्ह्याउगु दु।

संघीय संसद सचिवालयं म्हिगः मंगलबाः बहनि छगु सूचं प्रकाशित यासे फागुन २ गते सोमबाः न्हिसिया १ बजे तकया लागि बैठक स्थगित जुगु धका उल्लेख याउगु दु।

संघीय संसद सचिवालयया महासचिव भरतराज गौतमं जारी याउगु छगु सूचं विशेष कारणं बुधबाःया बैठक स्थगित जुगु धका उल्लेख याउगु दु। स्रोतया कथं मंगलबाः कानुन, न्याय तथा संसदीय मामिलामन्त्री दिलेन्द्रप्रसाद बडुं सभामुख अग्निप्रसाद सापकोटायात टेलिफोन याना बैठक छवाः लिछाय्त इनाप याउगु खः।

अमेरिकी सहयोग परियोजना मिलेनियम च्यालेन्ज कम्प्याक्ट (एमसीसी) या विषय सत्तारुढ गठबन्धन दलपि छगु मत मजुगुलि प्रतिनिधिसभाया बैठक लिछाउगु अनुमान याउगु दु। नेकपा माओवादी केन्द्रं माघ २७ गते केन्द्रीय समितिया बैठक सःतूगु दु।

स्वनिगलय् थौं ४५१ म्हेसित कोरोना संक्रमण पुष्टि जुगु दु।

स्वास्थ्य मन्त्रालयया कथं येँ ३३८ म्हेसित कोराना सक्रमण जुगु दु। अथेहे, यलय् ७० म्ह व ख्वपय् ४३ म्हेसित कोरोना संक्रमित पुष्टि जुगु दु। 

मेमेगु जिल्ला कास्कीइ ९४, मोरङय् ६५, चितवनय् ३८, सुनसरीइ ३७, धनुषाय् ३३, काभ्रेपलाञ्चोक व रुपन्देहीइ २७÷२७ म्ह व कैलाली २५ म्हेसित कोरोना संक्रमण पुष्टि जुगु खः।

अथेहे, झापाय् २४, सिन्धुपाल्चोकय् २३, महोत्तरीम्ह १६, दाङ व अछामय् १४÷१४ म्ह, बाँके, कञ्चनपुर व डडेल्धुराय् १३÷१३ म्ह, तनहुँइ १२, बारा, सिन्धुली व बागलुङय् ११÷११ म्ह नाप धादिङ व मकवानपुरय् १०÷१० म्ह कोरोना संक्रमितपि थपे जुगु दु धका मन्त्रालयं धाउगु दु।

वंगु २४ घण्टाया दुने कोरोना भाइरस (कोभिड–१९) न संक्रमणपाखे थप ११ म्हेसिगु ज्यान वंगु दु।

अथेहे देयन्यक थप १ हजार ९५७ म्हेसित कोरोना संक्रमण पुष्टि जुगु दु। स्वास्थ्य तथा जनसंख्या मन्त्रालयया कथं देयन्यक १२ हजार ६९२ म्हेसिगु नमुना परीक्षण याउगु खः।

८ हजार ५८७ म्हेसिगु पीसीआर परीक्षण याउगुलि १ हजार १८४ म्ह व ४ हजार १०५ म्हेसिगु एन्टीजेन परीक्षण याउगुलि ७७३ म्ह याना १ हजार ९५७ म्हेसित संक्रमण पुष्टि जुगु खः।

वंगु २४ घण्टाय् ५ हजार १०३ म्ह संक्रमणमुक्त जुगु दु।

वइगु वैशाख ३० गते स्थानीय तहया निर्वाचनया मिति क्वःजिइवं निर्वाचन आयोगं मतदाता नांधलः मुंकेगु ज्या लिचिइकूगु दु ।

निर्वाचन आचारसंहिता कथं देय्न्यंकं मतदाताया नांधलः मुंकीगु ज्याकूतय्त थौंनिसें मतदाताया नांधलः मुंकेगु ज्या मयायेत अले आःतक मुंकूगु धलः जक छ्वयाहयेत निर्देशन ब्यूगु आयोगया प्रवक्ता शालिकराम शर्मां धयादीगु दु ।

आयोगं मतदाता नांधलः प्रकाशनया तयारी याःगु दु । कानुनी व्यवस्था कथं निर्वाचनया मिति घोषणालिपा मतदाताया नांधलः मुंके दइमखु । वहेकथं आयोगं उगु ज्या मयायेत धागु खः ।

निर्वाचनया मिति घोषणा जुइवं सोमवाः न्हिनय् आयोगय् मुँज्या च्वनाः च्वनाः नांधलः मुंकेगु ज्या दिकेत निर्देशन बीगु निर्णय याःगु खः ।

आःतक देय्न्यंकं छगू कोती ९०गू लखम्हेसिया मतदाता नांधलः दुथ्याकेधुंकूगु आयोगया प्रारम्भिक धलः दु ।

चीनं नेपाली भूमि अतिक्रमण याःगु निष्कर्षनापया प्रतिवेदन सीमा अध्ययन कार्यदलं नेपाल सरकारयात लःल्हाःगु खुलासा जूगु दु ।

बीबीसी विश्व सेवां थःत चूलाःगु प्रतिवेदनयात हवाला बियाः हुम्लाय् चीनं नेपाली भूमि अतिक्रमण याःगु धागु दु । नेपाःया सरकारी स्तरं उत्तरी छिमेकीं सीमा त्यःगु निष्कर्ष न्हापांखुसि वःगु न वीवीसीं धागु दु ।

चीनं सीमा त्यःगु धइगु अपुष्ट खबरत सार्वजनिक जुइवं सरकारं वंगु असोजय् सरकारी अधिकारीत, विज्ञ व सुरक्षा निकायया प्रतिनिधिनापया ज्यासना पुचः दयेकूगु खः । उगु पुचलं स्थलगत निरीक्षण यानाः सीमा त्यःगु धइथें विवरण उल्लेख यानाः प्रतिवेदन सरकारयात लःल्हाःगु खः ।

हुम्लाय् चिनियाँ पक्षं नेपाःयापाखे सिमाना त्यलाः भौतिक संरचना न दयेकातःगु प्रतिवेदनय् उल्लेख यानातःगु दु । तर नेपाल सरकारं उगु प्रतिवेदन धाःसा आःतक सार्वजनिक मयाःनि । नेपाः व चीनदथुइ द्वछि व ४सः किलोमिटर ताःहाकःगु सिमाना दु ।

उकि मध्ये उप्वः धइथें थाय् न्ह्याब्लें च्वापुं त्वःपुयाः च्वनीगु जुयाः निरन्तर सीमाना अनुगमन मयाः । हुम्लाया लालुङजोङनापया सिमा लागाया नेपामिपिन्त चिनियाँ सुरक्षाकःमिपिन्सं धार्मिक गतिविधिइ तकं प्रतिबन्ध तयाःतःगु धागु दु ।

हिन्दु व वौद्धमार्गीतय्गु आस्थाया केन्द्र कैलाश पर्वत लिक्कया उगु थाय् जुयाः मनूत धार्मिक यात्राय् वनेगु याः । तर चीनं उगु लागाय् तजाःगु पःखाः दनाः नेपाली भूमि त्यलाःतःगु दुसा सडक व खुचा तकं दयेकातःगु प्रतिवेदनय् उल्लेख यानातःगु दु ।

प्रतिवेदनय् नेपाल सरकारयात सीमा लागाय् सुरक्षा पोस्ट तयेत छ्याता ब्यूगु अले नेपाः व चीन निगुलिं देशं थ्व सिमाना सम्बन्धीया कचवं ज्यंकेत धागु दु । चिनियाँ बजारय् आश्रित सीमा लागाया नेपालमित धाःसा सिमाना त्यःगु विषयलय् नवाये चाहे मयाःगु प्रतिवेदनय् उल्लेख यानातःगु दु ।