राष्ट्रपति विद्यादेवी भण्डारी समक्ष न्यागु देशया गैरआवासीय राजदूतपिन्स थःथःगु ओहदाया प्रमाणपत्र बुझे याउगु दु।

बुधबाः राष्ट्रपति भवन शीतल निवासय् बिस्क बिस्कं जुगु विशेष समारोहय् उमिसं थःथःगु ओहदाया प्रमाणपत्र बुझे याउगु दु धका राष्ट्रपति कार्यालयं धाउगु दु।

राष्ट्रपति कार्यालयया प्रवक्ता जगन्नाथ पन्तया कथं ओहदाया प्रमाणपत्र बुझेयापि नेपाःया लागि सिंगापुरया राजदूत सिमोम वोङ वाइ कुइन, नेपाःया लागि न्युजिल्याण्डया राजदूत डेभिड ग्रेगोरी पाइन, नेपाःया लागि होली सीका राजदूत लियोपोल्दो गिरेल्ली, नेपाःया लागि टर्कीया राजदूत फिरात सुनेल व नेपाःया लागि रोमानियाया राजदूत ड्यानिएला मारिएना सिजोनोभ तानेपि खः। न्याम्हं नेपाःका लागि गैरआवासीय राजदूतपि खः।

ओहदाया प्रमाणपत्र बुझे याउगु समारोहय् सरकारया परराष्ट्रमन्त्री डा.नारायण खड्का लगायत उच्च पदस्थ सरकारी कर्मचारीपिनिगु न उपस्थित दुगु खः।

वंगु २४ घण्टाया दुने देयन्यक थप ३३२ म्हेसित कोरोना भाइरस संक्रमण पुष्टि जुगु दु।

७ हजार ५ सय ९० म्हेसिगु पीसीआर परीक्षण याउगुलि ३०५ म्ह व २ हजार ३ सय ३० म्हेसिगु एन्टिजेन परीक्षण याउगुलि २७ म्ह याना ३३२ म्हेसित कोरोना भाइरसया संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं प्यम्ह सीउगु दु सा २३२ म्ह कोरोनामुक्त जुगु दु। मन्त्रालयया कथं आःतक देयन्यक सक्रिय संक्रमितपि ७ हजार ३६९ म्ह दु।

उकि मध्ये येँ जक १४४ यलय् २६ व ख्वपय् ११ म्ह याना १८१ म्ह स्वनिगः दुने कोरोना संक्रमितपि दु।

लगातार घटे जुया वयाच्वंगु शेयर बजाः थौं बुधबाः धासा सम्हाले जुगु दु।

न्हिच्छियकं थहाकुहा वना बन्द जुगुलि १ दशमलव ८२ अंकं बढे जुया बजाः बन्द जुगु खः। नेप्से परिसूचक सकारात्मक खनेदुसा ‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स न सकारात्मक खने मन्त।

अय्न, कारोबार रकम धासा भचा सुधार खने मदु। सोमबाः ४ अर्ब न मथ्यंगु शेयर कारोबार रकम मंगलबाः ४ अर्ब १६ करोड हाराहारी थ्यंगु दु। बुधबाः धासा कारोबार रकम ४ अर्ब २१ करोड स्वया अप्वोगु दु। न्हिच्छियक ५४ हजार ७ सय ३ कारोबारपाखे २२७ कम्पनीया ७४ लाख ४५ हजार २२७ कित्ता शेयर किनबेच जुगु खः।

कारोबार रकम ४ अर्ब २१ करोड ७४ लाख १५ हजार ३३७ रुपैयाँ थ्यंगु दु। बैंकिङ, व्यापार निर्जिवन बीमा कम्पनीया कारोबार मापन याइगु सबइन्डेक्स न घटे जुया नकरात्मक खनेदुगु खःसा ल्यःदनिगु थहावंगु दु। बुधबाः यक्को कमे याउगुलि मैलुङ खोला हाइड्रापावर कर्णाली विकास बैंक खः।

येँ महानगरपालिकां ‘पर्यटन प्रवर्धन कोष सञ्चालन कार्यविधि ०७८’ स्वीकृत याउगु दु। राष्ट्रिय सभा गृहय् महानगरया मेयर विद्यासुन्दर शाक्यया सभाध्यक्षताय् च्वंगु ७१ क्वःगु कार्यपालिका बैठकं कार्यविधि स्वीकृत याउगु दु।

आर्थिक बर्ष ०७५÷०७६ य् होटल व्यवसायीपिन्स पूगु करं ६५ प्रतिशत रकमपाखे कोष सञ्चालन यायेत्यःगु खः। थुगु दँय् कोविडया कारण होटल व्यवसाय समस्या जुगु खः। थ्व हे कारणं महानगरय् आर्थिक ऐनपाखे उमित ६५ कर छुट बिउगु खः। बाँकी ३५ प्रतिशत दाखिला जुगु करं ६५ प्रतिशत रकम कोषय् जम्मा याइ।

कोष सञ्चालनया लागि येँ महानगरया मेयरया अध्यक्षताय् महानगरपाखे न्याम्ह व होटल संघ, नेपालं प्यम्हयाना गुम्हेसिगु निर्देशक समिति दयकूगु दु। वार्षिक बजेट, नीति तथा कार्यक्रम तर्जुइ यायेगु व नीतिगत प्रबन्ध यायेमाःगु समितिया मुख्य ज्या जुइ। अथेहे राजस्व विभागया प्रमुखया संयोजकत्वय् संघया प्रतिनिधि दुगु कार्यान्वयन समिति गठन याइ। बैठकया अध्यक्ष शाक्यं धयादीगु दु, ‘करदातां पुगु कर, करदाताया हे सेवाया लागि खर्च यायेगु नीति कथं कोष दयकेत्यनागु खः।

थुकिइ करया दायराय् वयेल्यःदुपि करदातापिन्त न दायराय् वइगु व मंकाः हितया ज्याय् लगे जुइगु भलसा कयाउगु दु।’ उगु बैठकं मेयर शाक्यया संयोजकत्वय् २७ क्वःगु महानगर दिवस मुल समारोह समिति गठन याउगु दु। समितिइ सदस्यपि उपप्रमुख, प्रमुख प्रशासकीय अधिकृत व कार्यपालिका सदस्यपि दथ्याउगु दु।अथेहे पुरस्कार छनौट व मेमेगु ज्याझ्वःया लागि क्षेत्रगत उपसमिति गठन याउगु दु।

बैठकं डाउन सिन्ड्रोम समाज, अटिजम केयर सोसाइटी नेपाल, विशेष स्कूल व पुनस्र्थापना केन्द्र नेपाल, व मस्तिष्क पक्षघात स्वाबलम्बन समूह नेपाल याना प्यंगु संस्थायात आर्थिक अनुदान बिइगु निर्णय स्वीकृत जुगु दु।

नेपाली काँग्रेसया १४ क्वःगु महाधिवेशनया केन्द्रीय महाधिवेशन प्रतिनिधिइ येँ महानगरपालिकाया उपमेयर हरिप्रभा श्रेष्ठ खड्गी अत्याधिक मत विजय जुयादीगु दु।

येँया क्षेत्र न ६ पाखे उपमेयर हरिप्रभा श्रेष्ठ खड्गी मिसा केन्द्रीय महाधिवेशन प्रतिनिधि कथं निर्वाचित जुयादीगु खः। वयकलं १९३ मत कयादीगु खः।