Display Style:
Column Style
नेप्से ७० दशमलव ०१ अंकं घटे जुल
रसिया श्रेष्ठ | ञंलागा सप्तमी ११४१, असोज १२ मंगलवाः
लगातार घटे जुया वनाच्वंगु शेयर कारोबार मापक नेप्से परिसूचक थौं मंगलबाः न घटे जुगु दु।
थौं मंगलबाः नेप्से परिसूचक ७० दशमलव ०१ अंकं घटे जुया २ हजार ६१५ दशमलव ४० अंकय् कुहावंगु दु।
‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स न ११ दशमलव ४२ अंकं घटे जुगु दु। कारोबार रकम धासा सोमबाः स्वया भचा सुधार जुगु दु। सोमबाः ५ अर्ब १२ करोड ९ लाख रुपैयाँया शेयर कारोबार जुगु खःसा मंगलबाः ५ अर्ब ७४ करोड ५४ लाख ८८ हजार १७९ रुपैया कारोबार जुगु खः। शेयर बजारय् कारोबार जुगु अधिकांश कम्पनीया शेयर भाः मंगबाः घटे जुगु दु।
यक्को घटे जुगु फाइनान्स कम्पनीपि खः। फाइनान्स कम्पनीया सवइन्डेक्स ७ दशमलव ३७ प्रतिशतं घटे जुगु खः। मनकामना स्मार्ट लघुवित्त, मैलुङ खोला जलविद्युत् कम्पनी, मेगा बैंक लगायतया कम्पनीया शेयर भाः थहावंगु दु।
चीनया चिउता
ञलागा सप्तमी ११४१, असोज १२ मंगलबाः
नेपालिसेया स्वापू थप क्वात्तुकेगु मनंतुना दूगु चीनया धापू , नेपाःलिसे सहकार्य याना न्ह्यायेत मनंतुनागु विदेशमन्त्री वाङ यीया हसना ।
चीनं नेपाःलिसेया स्वापूयात थप क्वात्तुकेगु लँपू न्ह्यायेत मनंतुंगु न्ह्यथंगु दु । राज्यपरिषद् दुजः लिसें विदेशमन्त्री वाङ यीं परराष्ट्रमन्त्री डा. नारायण खड्कायात भिन्तुना हसना छ्वया निगू देय् दथुया स्वापू न्हूगु पहःलं प्रवद्र्धन यायेत मनंतुनागु धयादीगु खः ।
नेपाःया नितिं चिनियाँ राजदूत हउ यान्छीं थःपिनि विदेशमन्त्रीं परराष्ट्रमन्त्री खड्कायात भिन्तुना हसना छ्वयादीगु व चीन नेपाः दथुया स्वापूयात न्हूगु उँचाइलय् थ्यंकेत वयेकलिसे सहकार्य यायेत थःपिं इच्छुक दूगु हसनाय् उल्लेख जूगु सामाजिक सञ्जालय् च्वयादीगु दु ।
चीन–नेपाः स्वापूयात न्हूगु उचाइय् थ्यंकेत थःपिनि समकक्षीलिसे विदेशमन्त्री वाङ यी नापंनापं ज्या यायेगु तत्परता प्वंकादीगु राजदूत यान्छीं उल्लेख यानादीगु दु ।
स्काउटया दिक्षान्त समारोह नाप पद गोपनीयताया शपथ ग्रहण
नृपेन्द्रलाल श्रेष्ठ | ञंलागा षष्ठी ११४१, असोज ११ सोमवाः
बागमती प्रदेशया मुख्यमन्त्री माननीय अष्टलक्ष्मी शाक्ययात स्काउटया संरक्षक कथं थौं छगु ज्याझ्वः दथुइ शपथ ग्रहण याकूगु दु।
उगु ज्याझ्वलय् सामाजिक बिकाशमन्त्रीयात प्रदेश प्रमुख व हैटौडा उपमहानगरपालिकाया प्रमुखयात स्थानीय संरक्षक, उपप्रमुखयात स्थानीय प्रमुख स्काउट पालीका संयोजक व सदस्यपिन्त दिक्षान्त समारोह नाप पद गोपनीयताया शपथ ग्रहण ज्याझ्वः जुगु दु।
ज्याझ्वः प्रदेश स्काउट तर्दथ समिति, बागमती प्रदेशया ग्वसालय् जुगु खः।
चःमतिइ दयेकल वृद्ध विश्राम भवनलिसेंया पार्क
रसिया श्रेष्ठ | ञंलागा षष्ठी ११४१, असोज ११ सोमवाः
चःमतिइ दयेकल वृद्ध विश्राम भवनलिसेंया पार्क चःमति जग्गा एकीकरण आयोजना क्षेत्र दुने वृद्ध विश्राम भवनलिसें पार्क दय्कूगु दु।
छगू ज्याझ्वःया दथुइ पार्कया उलेज्या नं क्वचाःगु दु। उद्घाटन ज्याझ्वलय् नवासें येँ महानगरपालिका प्रमुख विद्यासुन्दर शाक्यं व्यवस्थित विकासया ज्याय् थःपिं स्थानीय वासिन्दालिसे हे दुगु हसना बीत पार्क दय्केत लगानी यानागु धयादिल। ‘येँ जिल्लाया दक्वं नगरलिसे साझेदारी ज्याझ्वःअन्तर्गत सार्वजनिक जग्गा संरक्षण यानाः पार्क दय्केत ग्वाहालि यानागु दुसा येँ जिल्लां पिने मध्यपुर थिमिलिसें १ प्रदेश १ भगिनी सम्बन्ध स्थापना यायेगु नीति कथं थीथी नगरयात नं पार्क दय्केगु योजनाय् ग्वाहालि यानागु दु’ शाक्यं धयादिल ।
ज्याझ्वलय् संघीय सांसद जीवनराम श्रेष्ठं जेष्ठ नागरिकया सहज जीवन यापनया लागिं येँय् पूर्वाधार अप्वय्का यंकेमाःगुलिइ बः बियादिल। महानगर प्रवक्ता लिसें वडा १५ या अध्यक्ष ईश्वरमान डंगोलं आयोजना सञ्चालन इलय् स्थानीयपाखें वःगु ग्वाहालियात च्वछानादिल। निर्माण समितिया संरक्षक पूर्णकाजी ज्यापुं पार्क दय्केधुंकाः स्थानीय सामाजिक जीवनय् ह्यूपाः वइगु आशा प्वंकादिल।
स्थानीयबासीया योगदानं वःगु १ रोपनी १४ आना जग्गाय् २ तजाःया भवनलिसेंया पार्क दय्कूगु खः। पार्कयात जेष्ठ नागरिकमैत्री दय्केत थाय्थासय् थीथी द्यःया मूर्तिलिसें चैत्य व प्यधाः ल्वहँहिति नं तःगु दु। पार्क दय्केत येँ महानगरपालिका, चःमति जग्गा एकीकरण आयोजना व स्थानीय पूर्वाधार साझेदार ज्याझ्वः अन्तर्गत येँ क्षेत्र नं. ८ या सांसद जीवनराम श्रेष्ठया सांसद कोषया लागत सहभागिता दु। अथे हे, चःमति नेवाः खलःलिसेया सहकार्यय् स्थानीयं करीव ३० लाख तकाया सहभागिता क्यंगु दु।
थौं विश्व पर्यटन दिवस
ञलागा षष्ठी ११४१, असोज ११ सोमबाः
थौं सेप्टेम्बर २७ अर्थात् ४२क्वःगु विश्व पर्यटन दिवस । नेपालय् नं थीथी ज्याझ्वः यानाः थुगु दिवस हनाच्वंगु दु ।
थुगुसीया पर्यटन दिवसया नारा टुरिज्म फर इन्क्लुसिभ ग्रोथ तयातःगु दु । कोरोना संक्रमण कुहांवःगु ह्वःताः लाकाः सरोकारवाला सरकारी निकाय व पर्यटनलिसे स्वापू दुगु थीथी संघसंस्थां भौतिक रूपं हे दिवस हनेत्यंगु दु ।
पर्यटन मन्त्रालयया सचिव यादवप्रसाद कोइरालाया नायकय् गठीत ४२क्वःगु विश्व पर्यटन दिवस मूल समारोह समितिं नं भौतिक रुपं ज्याझ्वः यायेत्यंगु दु ।
नेपाल एशोसिएशन अफ टूर एन्ड ट्राभल एजेन्ट्स (नाट्टां) नं हिादान ज्याझ्वः यायेत्यंगु दु । उखे पर्यटकीय नगरी पोखराय् नेपालस्थित ११ देय्या राजदूत मुंगु दु ।
गण्डकी प्रदेश सरकारया ब्वनाय् म्हिगः थीथी ११ देय्या राजदूत, कूटनीतिक नियोगया उच्च पदस्थ प्रतिनिधिलिसें २५ पोखरा थ्यंगु खः ।
