सुनुवाइ सभामुख अग्नि सापकोटाविरुद्धया मुद्दा संवैधानिक इजलासय् सुनुवाइ जुयाच्वंगु दु।

प्रधानन्यायाधीश चोलेन्द्रशमशेर जबरा नेतृत्वया संवैधानिक इजलासय् दीपककुमार कार्की, मीरा खड्का, हरिकृष्ण कार्की व ईश्वरप्रसाद खतिवडा न्यायाधीशपि खः। थ्व स्वया न्ह्यः १६ भदौय् पेशी दुगु थुगु मुद्दा स्वयेमलाउगुलि  लाउगु खः।

वयास्वया लिपा ३० फागुन २०७६ थुगु मुद्दा पेशीइ चढे याउगु खः। उगु इलय् स्वये मलाउगुलिं सुनुवाइ न्ह्याउगु खः। सशस्त्र द्वन्द्वकालय् काभ्रेया अर्जुन लामाया हत्याय् संलग्न दुगु द्धपः सापकोटायात बिउगु खः।

१६ वैशाख २०६२ य् श्रीकृष्ण मावि, दाप्चाय् अभिभावक भेला जुगु थासं लामा अपहरण जुगु खः। साउन स्वंगु वाः दुने गालय् म्वाः म्वाकं ल्हाकूगु धासे लामाया जहान पूर्णिमायां २०६४ सालय् जाहेरी बिउगु खः।

प्रहरीं जाहेरी मकाउगुलिं पूर्णिमायां सर्वोच्चय् उजुरी तःगु खः। २२ फागुन २०६४ य् सर्वोच्चया आदेशं जाहेरी दर्ता जुगु खः। तर बाबुराम भट्टराई नेतृत्वया सरकारं सापकोटाविरुद्धया जाहरी तामेलीय् तयेगु निर्णय याउगु खः।

वया लिपा पूर्णिमाया हाकन सर्वोच्च वसां सर्वोच्चं निर्णय कार्यान्वयन मयायेत आन्तरिम आदेश बिउगु खः। थुगु मुद्दा सर्वोच्चया संवैधानिक इजलासय् विचाराधीन जुयाच्वंगु खः।

प्रधानमन्त्री शेरबहादुर देउवायात नापलायेगु निति माओवादी केन्द्रया अध्यक्ष पुष्पकमल दाहाल ‘प्रचण्ड’ बालुवाटारय् वंगु दु।

मन्त्रिपरिषद विस्तारबारे छलफल यायेत प्रचण्ड प्रधानमन्त्री निवास बालुवाटार वंगु खः। माओवादीे केन्द्रया स्थायी कमिटी बैठक च्वने न्ह्यः प्रचण्डं देउवायात नापलाना मन्त्रिपरिषदयात पूर्णता बिइगु विषय छलफल यायेत वंगु खः।

सरकारय् वनिइपि मन्त्रीपिनिगु नां क्वछिइत माओवादी केन्द्रया स्थायी कमिटी बैठक थौं न्हिनय् १२ बजे पेरिसडाँडाय् च्वनेत्यंगु खः। प्रधानमन्त्री देउवा मन्त्रिपरिषद विस्तारया अन्तिम तयारीइ दु।

वंगु असार २९ गते प्रधानमन्त्री जुम्ह देउवां आःतक न मन्त्रिपरिषदयात पूर्णता बिइ फुगु मदुनि।

नेकपा माओवादी केन्द्रया नेता वर्षमान पुन थप उपचारया लागि थाइल्याण्डया बैंककय् प्रस्थान याउगु दु।

वयकःया स्वास्थ्यय् समस्या वयेवं निन्हु न्ह्यनिसे अस्पतालय् भर्ना याउगु खः। तर, सुधार मजुइवं थप उपचारया लागि डाक्टरपिनिगु सल्लाह कथं बैंककय् वनेत्यंगु धका वयकःया सचिवालयं धाउगु दु।

वयकःयात हाकनं जण्डिस खनेदुगु खः। थ्व स्वया न्ह्यः न स्वास्थ्यय् समस्या खनेदुगुलि उपचारया लागि थाइल्याण्ड वंगु खः। न्यादँ लिपा नेता पुनं हाकन बैंककयय् नियमित उपचार यावनेत्यंगु खः।

वंगु २४ घण्टाया दुने स्वनिगः दुने ३८३ म्हेसित कोभिड–१९ संक्रमितपि थपे जुुगु दु।

अथेहे येँ २७० म्हेसित कोरोना सक्रमण जुगु दु। ख्वपय् ४४ म्ह व यलय् ६९ म्हे संक्रमितपि थपे जुगु दु।

आःतक स्वनिगलय् कोरोना सक्रिय संक्रमितपि ४४४२ म्ह दु। आः देयन्यक १७ हजार १२५ म्ह होम आइसोलेसनय्, १२९७ म्ह संस्थागत आइसोलेसनय्, ३६४ म्ह आईसीयू व १२० म्ह भेन्टिलेटरय् च्वनाच्वंगु दु धका स्वास्थ्य तथा जनसंख्या मन्त्रालयं धाउगु दु।

वंगु २४ घण्टाया दुने देयन्यक १,१५८ म्हेसित कोरोना भाइरस संक्रमण पुष्टि जूगु दु।

११ हजार ६ सय ७२ म्हेसिगु पिसीआर परीक्षण याउगुलि ९०४ म्ह व २ हजार ३३१ म्हेसिगु एन्टिजेन परीक्षण याउगुलि २५४ म्ह याना १ हजार १५८ म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु। अथेहे वंगु २४ घण्टाय् कोरोना संक्रमणं १२ म्ह सीगु दु सा १ हजार ३१८ म्ह कोरोनामुक्त जुगु दु।

मंगलबाः थपे जूपि नाप नेपालय् कोरोना संक्रमितपि आःतक ७ लाख ९३ हजार २७१ म्ह थ्यंगु दु। अथेहे थ्व नाप आःतक नेपालय् सीपिनिगु ल्याः ११ हजार ११५ म्ह थ्यंगु दु सा ७ लाख ६३गु हजार ७३४ म्ह संक्रमणमुक्त जुइ धुकुगु दु।