Display Style:
Column Style
सेँ–खुँ हयाः बौद्ध सम्पदा न्हंके बिउगु खः, सांसद डा. अजयक्रान्ति शाक्य
लहानान्युज | गुंलागा द्धितीया ११४१, भाद्र ८ मंगलवाः
नेपाःया थीथी इलय् बौद्ध सम्पदा व बौद्ध धर्मय् प्रहार जूगु खँ बागमती प्रदेशया सांसद डा.अजयक्रान्ति शाक्यं न्ह्यथनादीगु दु। धर्माकर महाविहार स्वबहाया अशोक चैत्य पुनर्निमाण लिपा गजू छुइगु ज्याझ्वलय् वय्कलं अथे धयादीगु खः।
मल्लकालय् जयप्रकाश मल्ल जुजुया पालय् सेँ–खुँ हयाः बौद्ध सम्पदा न्हंके बिउगु व थ्वयां लिपा नं थीथी इलय् बौद्ध सम्पदा न्हंकेगु कुतः जूगु खँ वय्कलं कनादीगु खः।
सांसद डा. शाक्यया सांसद कोषया आर्थिक ग्वाहालिइ थुगु अशोक चैत्य व देगः पुनर्निमाण जूगु खः। मूपाहाँ कथं झायादीम्ह सांसद शाक्यं इतिहासया थीथी कालय् बौद्ध सम्पदा न्हंकेगु ज्या जूगु न्ह्यथँसें आः झीसं थज्याःगु सम्पदा संरक्षण याना यंकेमाः धयादीगु खः।
उगु ज्याझ्वलय् शाक्य महाविहार संघया नायः शुभकाजी शाक्य, येँ महानगरपालिका २१ या वडाध्यक्ष उदय चुडामणि बज्राचार्य नुगःखँ तयादीगु खः। शाक्य महाविहार संघया मूछ्यान्जे संघरत्न शाक्यं न्ह्याकादीगु उगु ज्याझ्वलय् हनुमानध्वाखा दरबार हेरचाहया कार्यालय प्रमुख रोशन शाक्यया लिसें वडा २१ या वडा दुजःपिं विशेष पाहाँ कथं झायादीगु खः।
ज्याझ्वः स्वबहा धर्माकर महाविहारया थकालि तिर्थ राज शाक्यया सभापतित्वय् जूगु खः।
हलिं नेवाः न्ह्यसः लिसः कासा शुरु
लहानान्युज | गुंलागा द्धितीया ११४१, भाद्र ८ मंगलवाः
हलिं नेवाः दबू (वल्र्ड नेवाः अर्गनाइजेसन)या ग्वसालय् ‘हलिं नेवाः न्ह्यसः लिसः कासा–११४१’ वंगु शनिवाःनिसें शुरु जूगु दु । हलिं नेवाः दबू पलिस्था जूगु छगू दशक क्यंगु लसताय् थुगु न्ह्यसः लिसः कासा जूगु खः ।
अर्जनाइजेसनया नायः सिजन श्रेष्ठया सभापतित्वय् जूगु ज्याझ्वःया उलेज्या मूपाहां वाङ्मय शताब्दीपुरुष सत्यमोहन जोशीं त्वाःदेवाय् मत च्याकाः यानादीगु खः । कासाया उलेज्या यासें मूपाहां शताब्दीपुरुष जोशीं विश्वस्तरया नेवाःतय् संस्था दबूपाखें न्हूकथंया थुकथंया ज्याझ्वः ग्वसाः ग्वःगु अतिकं च्वछायेबह व लसताया ज्याझ्वः खः धयादिल । लिसें वय्कलं नेपाः देशं पिनेच्वनाः थःगु भाषा, जाति, कला, संस्कृति व म्हसीका पिब्वयेगु ज्या यानाच्वंपिं विश्वन्यंकंया नेवाःतय्त छप्पँ यायेत थुकथंया ज्याझ्वलं तःधंगु ग्वाहालि जुइगु विश्वास प्वंकादिल ।
विशेष पाहांकथं झायादीम्ह वरिष्ठ साहित्यकार हितकरवीर सिंह कसाःजुं नेपालभाषा न्ह्यसः लिसः कासाया इतिहास कुलादिसें थनिं न्यय्दँ न्ह्यसः ने.सं. १०९१ य् त्रिचन्द्र कलेजपाखें न्हापांखुसी नेपालभाषा न्ह्यसः लिसः कासा याःगु लुमंकादिल । क्याम्पसपाखें कासा शुरु जूगु दछि लिपा हे थानकोटया मंगलोदय माध्यमिक विद्यालयपाखें नं विद्यालयस्तरय् न्ह्यसः लिसः कासा शुरु जूगु खँ कनादिसें वय्कलं क्याम्पसपाखें शुरु जूगु कासाय् त्रिचन्द्र व विद्यालयस्तरय् कासाया निंतिं मंगलोदयं शिल्डया व्यवस्था याःगु खँ कनादिल ।
न्यय्दँ न्ह्यः थुकथं विद्यार्थीतय् दथुइ न्ह्यसः लिसः कासा शुरु जूगु इलय् विचाः मयानाकथं व्यापकता व छगूकथंया उचाइ कया यंकूगु व व ०४६ सालया जनआन्दोलन लिपा नेवाः ख्यःया सकता गतिविधि शुन्यय् कुहां वःगु खँय् नं दुःख तायेकादिल ।
लिसें वय्कलं उगु इलय् कासाया ब्यापकताया कारणं ब्वति काइपिं जक मखसे कासा स्वइपिनिगु ल्याः नं गाक्कं अप्वःगुलिं राष्ट्रिय सभागृह व प्रज्ञा भवन थेंज्याःगु थासय् तकं टिकट मियाः सेमीफाइनल व फाइनल कासा यायेमाःगु अवस्था वःगु व अज्याःगु थासय् कासा यानाः नं सकसितं दुथ्याके मफुगु अनुभव कनादिल । प्रत्यक्ष जुइगु कासाय् थें भर्चुअलमाध्यमं जुइगु कासापाखें उलि प्रभाव लाके मफइगु जूसां दबुलिइ आवद्ध जूपिं जक मखसे मेमेपिंसं नं ब्वति काये धइगु वातावरण ब्वलंका वने फयेमा धइगु नं वय्कलं कामना यानादिल।
कासा ग्वसाः खलःया कजिलिसें दबूया ज्यासना पुचःया दुजः विमलमान श्रेष्ठं लसकुस यासें शनिवाःपतिकं नेपाःया ईकथं सनिलया ५ ताःइलय् न्ह्याइगु थुगु कासा वइगु नोभेम्बर महिनातक मदिक्क न्ह्याइगु जानकारी बियादिल ।
न्ह्यसः निर्माण कमिटीया कजिलिसे साहित्यकार केशरमान ताम्राकारं सुभाय् देछानादीगु ज्याझ्वलय् सभानायः श्रेष्ठं हलिं नेवाः दबू पलिस्था जूगु छगू दशक क्यंगु दिं जूगुलिं विश्वया हरेक देशय् च्वंपिं नेवाःतय् निंतिं नं गर्व यायेबहगु दिं जूगु धासें गुगु उद्देश्यं दबू पलिस्था याःगु खः व बुलुहुं पूवंकेगु लँपुपाखे न्ह्याः वनाच्वंगु दु धयादिल ।
छगू पुचलय् स्वम्ह स्वम्ह कासामि दुथ्याकाः प्यंगू पुचःया दथुइ जुइगु कासाय् सहभागि पुचःयात नेवाः पहः वयेक थीथी स्वांया नां बियातःगु दु । न्हापांगु न्हिया कासाय् भ्वंस्वां पुचः न्हाप, सिन्हःस्वां पुचः लिउ व उफ्वःस्वां पुचः लियांलिउ लाःगु खः । न्हाप, लिउ व लियांलिउ लाःगु पुचः मेगु चरणय् दुहां वंगु दु । न्हापांगु चरणया कासा प्यंगूगु थासय् लाःगु पुचःमध्ये दकलय् अप्वः ल्याः हयेत ताःलाःगु छगू पुचः नं मेगु चरणय् दुहां वनीगु ग्वसाः खलकं जानकारी बिउगु दु ।
नेपाःयालिसें अमेरिका, क्यानडा, बेलायत, आयरल्याण्ड लगायतया देय्या नीगू पुचलं ब्वति कयाच्वंगु कासाय् न्हापयात ६०० अमेरिकी डलर, लिउयात ४५० अमेरिकी डलर, लियांलिउयात ३०० अमेरिकी डलर व हःपाःकथं १५० अमेरिकी डलर सिरपाः व दसिपौ बी ।
कवि पूर्ण वैद्य अस्पताल भर्ना
लहानान्युज | गुंलागा द्धितीया ११४१, भाद्र ८ मंगलवाः
नेपालभाषाया नांजाःम्ह कवि पूर्ण वैद्य अस्पताल भर्ना जुयादीगु दु।
कवि बैद्य कोराना संक्रमण जुयाः निदान अस्पतालय् भर्ना जुयादीगु खः। वयकःयात कब्जियत जुयाः निदान अस्पताल भर्ना जुगु खः।
अस्पताल भर्ना जुया स्वाब परीक्षण याःबलय् वय्कःयात कोरोना पोजिटिभ खनेदुगु खः।
अस्पतालं वय्कःयात कोरोनाया उपचार यानाच्वँच्वं हे सुधार मजुसेंलि भेन्टिलेटरय् तयेमाःगु खः।
जिल्ला सभापतिपि च्वंगु धर्नाय् नेता गोपालमान श्रेष्ठ
लहानान्युज | गुंलागा द्धितीया ११४१, भाद्र ८ मंगलवाः
नेपाली कांग्रेसया वरिष्ठ नेता रामचन्द्र पौडेल पक्षया जिल्ला सभापतिपि च्वंगु धर्नाय् नेता गोपालमान श्रेष्ठं न ऐक्यबद्धता क्यंगु दु।
कांग्रेस केन्द्रीय कार्यालय सानेपाय् वना श्रेष्ठं धर्नाय् ऐक्यबद्धता क्यनादीगु खः। नेपाली कांग्रेसया क्रियाशील सदस्यताया सूचीइ सार्वजनिक याये माःगु लगायतया स्वंगु बुँदे माग तया पौडेल पक्षया जिल्ला सभापतिपिन्स थौं निसे धर्ना सुरु यागु खः।
थ्व स्वया न्ह्यः जिल्ला सभापतिपिन्स सभापति शेरबहादुर देउवायात भदौ ७ गते तक ई बिगु खः।
भारतनाप सम्बन्ध बालाक्का यंकेगु इच्छा शीर्षनेतापिन्स यागु दु, विजय चौथाइवाले
लहानान्युज | गुंलागा द्धितीया ११४१, भाद्र ८ मंगलवाः
नेपाल भ्रमणय् वयाच्वम्ह भारतीय विदेश विभाग प्रमुख विजय चौथाइवाले न थःनाप जुगु दक्को राजनीतिक दलया शीर्ष नेतापिन्स भारत नाप सम्बन्धयात अझ बालाकां यंकेगु इच्छा व्यक्त यागु दु धका धागु दु।
आइतबाः नेपाल भ्रमणय् वम्ह वयकलं नेपालया प्रमुख राजनीतिक दलपि नाप भेटवार्ता यागु खः। थौं न थीथी राजनीतिक दलया नेतापि नाप भेटघाट यायेगु ज्याझ्वः दु।
थः नाप जुगु भेटबारे छगु संक्षिप्त प्रेस नोट सार्वजनिक यासे चौथाइवाले न नेतापि नाप फरक व विविधता दुगु खःसा मंकाः विषय चाहिं दक्को नेतापिन्स भारतनाप सम्बन्धयात अझ बालाका यकेमाःगु बिचाः दु धका धागु दु।
चौथाइवालें नेपाली कांग्रेसया सभापति शेरबहादुर देउवा, प्रमुख प्रतिपक्ष दल नेकपा एमालेया अध्यक्ष केपी शर्मा ओली, नेकपा माओवादी केन्द्रया अध्यक्ष पुष्पकमल दाहाल व मधेशवादी नेता महन्थ ठाकुरनाप नापलाये धुकुगु दु।
