निर्वाचन आयोगं माधव नेपाल नेतृत्वं प्रस्तावित यागु पार्टी नेकपा एकीकृत समाजवादी व महन्थ ठाकुर नेतृत्व यागु लोकतान्त्रिक समाजवादी पार्टीया दर्ता प्रक्रिया थौं क्वछिइगु तयारी जुगु दु।

आयोगं निगु दलया नेतापिन्त सनाखतया लागि थौं सःतूगु दु। सामान्यता सनाखत लिपा आयोगं दल दर्ताया प्रमाणपत्र बिइगु याइ।सनाखतया लागि थौं बुधबाः सुथय् ११ः३० बजेनिसे २ बजे तकया ई बिउगु खः। दल दर्ताया निवेदनय् सुयागु नां दु, उपि थः हे उपस्थित जुया सनाखत यायेमाः धका निर्वाचन आयोगया प्रवक्ता राजकुमार श्रेष्ठं धागु दु।

राजनीतिक दल सम्बन्धी अध्यादेश कथं न्हुगु दल दर्ताया लागि संघीय संसद वा केन्द्रीय सदस्यपिनिगु २० प्रतिशत अलग जुगु जुइमाः। एमालेय् २०३ म्ह केन्द्रीय सदस्यपि मध्ये माधव नेपालयाके नेकपा एकीकृत समाजवादी दर्ताया लागि ५७ म्ह केन्द्रीय सदस्यपिनिगु नां आयोगय् बुझे यागु खः।

अथेहे ठाकुरं ३१ म्ह कार्यकारिणी सदस्यपिनिगु नां आयोगय् बुझे यागु खः।

लगातार बिदाया कारण प्यंन्हु लिपा खुले जुगु शेयर बजाः थौं कुहावंगु दु।

नेप्से थौं मङ्गलवाः ५६ अङ्क घटे जुया ३ हजार १२४ दशमलव ८७ विन्दुइ कुहावंगु दु। थौं फाइनान्स व निर्जीवन बीमाबाहेक दक्को समूहया शेयर घटे जुगु दु।

दकलय् अप्वो विकास बैंक समूहया शेयर २४४ अङ्क, जलविद्युतया शेयर २३२ अङ्कं घटे जुगु दु। अथेहे बैंकिङ समूहया शेयर २०२ अङ्क, व्यापारया ६२, होटलया १७, उत्पादनया १५७, मेमेगु ३०, माइक्रोफाइनान्सया ३१ व जीवन बीमा समूहया शेयर १४३ अङ्कं घटे जुगु खः।

थौं १६ जलविद्युत् कम्पनीया शेयर १० प्रतिशतं घटेर जुया नकारात्मक सर्किटय् वंगु दु। दकलय् अप्वो गुमे यागु सूचीइ सुरुया ३१ कम्पनी जलविद्युत् समूहय जुगु दु।

समग्र बजाः घटे जूसा गुराँस फाइनान्स व जीवन विकास लघुवित्तया शेयर १० प्रतिशतं थहावंगु दु। थौं २२५ कम्पनीया २ करोड ५३ लाख १६ हजार कित्ता शेयर १६ अर्ब १२ करोड रुपैयाँ किनबेच जुगु दु।

दकलय् अप्वो अरुण भ्याली हाइड्रो पावरया ७५ करोड ४३ लाख रुपैयाँ शेयर कारोबार जुगु खः।

नेपाल स्टक एक्सचेन्ज (नेप्से)या प्रमुख कार्यकारी अधिकृत (सीईओ) चन्द्रसिंह साउदं राजीनामा बिगु दु।

सर्वोत्तम सिमेन्टया ‘बुक बिल्डिङ’ प्रक्रियाय् वनाच्वंगु इलय्उगु कम्पनीइ थः जहानया नामय् सेयर न्यायेवं बिवादय् वंगु खः। मन्त्रालयं तक साउदयात स्पष्टीकरण न्यंगु खः।

संसदया अर्थ समितिया सदस्यपिन्स साउदयात निलम्बन याना कारवाही सुरु यायेत अर्थ मन्त्रालययागु ध्यानाकर्षण यागु खः। नियामक निकायया नेतृत्वय् च्वंगु सूचंया आधारय् सेयर न्यागु धका धासे सांसदपिन्स छानबिन याना दोषीयात कडा जुइमाःगु धका धागु खः।

साउदया कार्यकाल करिब निला जक ल्यःदनिइगु खः।

स्वास्थ्य तथा जनसंख्या मन्त्रालयया कथं थौं दकलय् अप्वो येँ ५१८ म्हेसित कोरोना सक्रमण जुगु दु धका धागु दु।

अथेहे झापाय् १९६, कास्कीइ १६३, मोरङय् १५०, यलय् ११९ व काभ्रेपलाञ्चोकय् १०१ म्हेसित कोरोना संक्रमण पुष्टि जुगु दु। अथेतु, सुनसरीइ ९६, बागलुङय् ७४, ख्वपय् ५२, रुपन्देहीमा ४९, मकवानपुरय् ३९, कैलालीइ ३७, सिन्धुपाल्चोकय् ३३, तनहँुइ ३१ म्हेसित कोरोना संक्रमण पुष्टि जुगु दु।

नुवाकोट व पर्वतय् २८÷२८ म्ह, चितवन व गोरखाय् २१÷२१ म्ह, नवलपरासीइ २०, बाँकेय् १९, स्याङजा व दाङय् १८÷१८ म्ह, धनकुटाय् १५, इलामय् १३, रामेछाप व बर्दियाय् १२÷१२ म्ह व लमजुङय् १० म्हेसित कोरोना संक्रमण पुष्टि जुगु दु धका मन्त्रालयं धागु दु।

वंगु २४ घण्टाया दुने देयन्यक २,५२५ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ९,९०९ म्हेसिगु पीसीआर परीक्षण यागुलि २,०२० म्ह व ४,९०१ म्हेसिगु एन्टिजेन परीक्षणय् ५०५ म्ह याना २,५२५ म्हेसित कोरोना संक्रमण पुष्टि जुगु दु।

वंगु २४ घण्टाय् जक २,०८६ म्हेसित कोरोना भाइरस संक्रमणमुक्त जुगु दु सा ३५ म्ह सीगु दु। मंगलबाः थपे जुपि नाप नेपालय् कोरोना संक्रमित ७ लाख ५१ हजार १ म्ह थ्यंगु दु।

अथेहे आःतक १० हजार ५६८ म्ह सी धुकुगु दु सा ७ लाख २ हजार १८३ म्ह संक्रमणमुक्त जुगु दु।