यलया पुच्वय् च्वपिन्स सम्य फल्चाः लगायत फल्चा दयके माःगु माग यासे प्रदर्शन यागु दु।

नेवाः समुदाय यागु परम्परागत फल्चाः न्ह्यके मज्यू तर पुनर्निर्माणय् थीथी पंगः थःगु धासे स्थानीयपिन्स प्रदर्शन यागु दु।

उगु थासय् यल महानगरपालिकां फल्चा निर्माण यायेत स्वयेवं पंगः थःगु खः।

स्थानीय लालीगुराँस सहकारीं फल्चा निर्माण यायेत स्वयेवं थःगु जग्गा दावी याना फल्चाय् निर्माण यायेगुलि पंगः थःगु खः।

सर्वोच्च अदालतं नेपाल विद्युत प्राधिकरणया कार्यकारी निर्देशकय् कुलमान घिसिङया नियुक्तिसम्बन्धी निर्णय झिके यायेगु आदेश बिउगु दु।

प्रधानन्यायाधीश चोलेन्द्रशमशेर जबराया एकल इजलासं २०७७ पुस २६ गते हितेन्द्र देव शाक्ययात प्राधिकरणया कार्यकारी निर्देशकय् यागु नियुक्ति, २०७८ साउन २५ गते प्राधिकरणया कार्यकारी निर्देशकय् जुगु कुलमानया नियुक्ति सक्कल निर्णय मगे यायेत आदेश बिगु दु।

अथेहे अदालतं हितेन्द्र देव शाक्ययात जल तथा ऊर्जा आयोगया ऊर्जा विशेषज्ञय् यागु नियुक्ति व विद्युत प्राधिकरण सञ्चालक समितिं शाक्य नाप यागु कार्यसम्पादन सम्झौता न माग यागु खः।

उगु दक्को निर्णयया सक्कल फाइल स्वन्हु दुने पेश यायेत सर्वोच्चं आदेश बिगु दु।

स्वनिगलय् आः बहनि ८ बजे लिपा सवारी साधन सञ्चालन याये दइगु जुगु दु।

स्वनिगःया स्वम्ह प्रमुख जिल्ला अधिकारीपि मंगलबाः च्वंगु बैठकं निजी व सार्वजनिक सवारी साधनयात ८ बजे चले याये दइगु कथं व्यवस्था जुगु दु।

साउन २८ गतेनिसे भदौ ८ गते तक निषेधाज्ञां आदेश यासे स्वनिगःया जिल्ला प्रशासन कार्यालयं अत्यावश्यक सेवा, ढुवानीया साधन व स्वनिगः दुहा वयेगुलि सवारी साधन बाहेकया मेमेगु निजी नाप सार्वजनिक सवारी साधन बहनि ८ बजे लिपा बन्द यागु खः।

प्रस्तावित नेकपा एकीकृत समाजवादीया अध्यक्ष माधवकुमार नेपालं थःगु हे सहमतिइ अष्टलक्ष्मी शाक्य बाग्मती प्रदेशया मुख्यमन्त्री जुगु धका धागु दु।

तर आः छु जुइ शाक्यया भरय् जुइ धका धागु दु। नेता नेपालं न्हुगु पार्टी दर्ता यायगु इलय् डोरमणि पौडेलं राजीनामा बिया शाक्य न्हुम्ह मुख्यमन्त्री जुगु खः। तर शाक्य नेकपा एकीकृत समाजवादीइ वंगु धासा मदुनि। प्रस्तावित नेकपा एकीकृत समाजवादीया अध्यक्ष नेपालं धासा मुख्यमन्त्री शाक्यं आः छगु दल ल्ययेमाः धका धयादीगु खः।

मंगलबाः चन्द्रगिरिइ सञ्चाःकःमि नाप खँ ल्हानादीसे नेता नेपालं धागु दु, ‘वयकः (अष्टलक्ष्मी) न सहमति कागु हे खः । तर वयकः अप्ठ्याराय् दु।’ राजनीतिक दलसम्बन्धी अध्यादेश कथं प्रदेश व स्थानीय तहया जनप्रतिनिधिपिन्स २१ दिं दुने दल ल्ययेमाः धका धयादीसे नेता नेपालं धागु दु, ‘जब पार्टी अलग जुइ धुकूगुलि छगु पार्टी ल्ययेमाःगु अवस्था दु। आः वयकःया भरे जुगु, जिं यक्को धायेमालि मखु।’

साहित्यकार मालिका केशरीया बौद्ध दर्शनया आधारित आख्यान ‘दुङाल’ येँ पितब्बज्या जुगु दु।

उपन्यासया इतिहासकार नाप हिमाली अध्ययनया ज्ञाता डा. रमेश ढुंगेल, मानवअधिकारवादी सुदीप पाठक, पूर्वसचिव नाप साहित्यकार डा.सुधा शर्मा व आख्यानकार मालिका केशरीपिन्स मंकाः कथं पितब्बज्या यानादीगु खः।

उगु ज्याझ्वलय् मानवअधिकारवादी पाठकं उपन्यास न शरणार्थीपिनिगु  मानवअधिकार, न्याय व आत्मसम्मानया खँ ल्ह्वंगु दु धका धयादीगु खः। वयकलं धयादीगु दु,– ‘उपन्यास ब्बना पाठकपि हरेक घटनाय् थःपिन्त हे जुगु च्वं धका धयादीगु खः।आप्रवासन वा शरणार्थी जुइगु रहर मजुसे बाध्यता जुगु खँ उपन्यासय् बालाक्क स्थापित यागु दु।

मानवअधिकार दृष्टिं ‘दुङाल’ पाठकपिन्त रोचक व घोचक कोसेली खः।’ थुकिइ तिब्बती समुदायं समस्या जक मल्ह्वसे उमिगु न्याय व आत्मसम्मानया वातावरण दयकूगु धका धयादीगु खः। पूर्व स्वास्थ्य सचिव डा. शर्मां मिजंम्ह च्वमि जुगुसा मिसापिनिगु भावनाया दुग्यंक थिगु शरणार्थीया बाखनय् उपन्यासया सफलता जुगु धका टिप्पणी यानादीगु खः। अथेहे आख्यानकार मालिका केशरीं थःगु मचा वलय् शरणार्थी शिविरनाप सामीप्यताया कारण ‘दुङाल’ जन्मय् जुगु खः।

‘देशय् च्वने मफुगुलि म्वाय्गु लागि थन थ्यंगु शरणार्थीप्रति झीसं याइगु व्यवहार सही खः धइगु न्ह्यसः उपन्यास मच्वसे मफुगु’– धका वयकलं धयादीगु खः। मालिका केशरीया थ्व स्वया न्ह्यः बौद्ध दर्शनय् आधारित उपन्यास ‘पुनरुत्थान’ व ‘सुवर्णलता’ प्रकाशित जुइ धुकुगु खः। सांग्रिला बुक्सं प्रकाशन यागु ‘दुङाल’ वयकःया स्वंगूगु उपन्यास खः। वयकः बौद्ध दर्शनया अध्येता खः।