वंगु २४ घण्टाय् देयन्यक ३,३६५ म्ह कोरोना संक्रमित पुष्टि जुगु दुु।

स्वास्थ्य तथा जनसंख्या मन्त्रालयया कथं ९ हजार ५५५ म्हेसिगु पीसीआर परीक्षण्य २३३५ म्ह व ४६८७ म्हेसिगु एन्टिजेन परीक्षणय् १०३० म्ह याना ३३६५ म्ह संक्रमण पुष्टि जुगु दु।

कोरोना संक्रमणया कारण वंगु २४ घण्टाया दुने १६ म्ह सीगु दु। अथेहे १३७३ म्ह संक्रमणमुक्त जुगु दु। बिहीबाः थपे जूगु नाप आःतक नेपालय् कोरोना संक्रमितपि ६ लाख ९० हजार ३४२ म्ह थ्यंगु दु।

कि मध्ये ९ हजार ८०७ म्ह सी धुकुसा ६ लाख ५० हजार ४४५ म्ह संक्रमणमुक्त जुइ धुकुगु दु।

शेयर बजाः परिसूचक नेप्से थौं बिहीवाः घटे जुगु दु। होटल व विकास बैंकबाहेक मेमेगु समूहया शेयर घटे जुइवं नेप्से १५ दशमलव ११ अङ्क घटे जुया ३ हजार ७९ दशमलव ८३ विन्दुइ कुहावंगु दु।

थौं बैंकिङ समूहया शेयर साढे १० अङ्क, व्यापारया ४ अङ्क, जलविद्युत २८ अङ्क, फाइनान्स ५४ व माइक्रोफाइनान्स समूहया शेयर ५ अङ्क घटे जुगु दु।

अथेहे जीवन बीमा समूहया शेयर ८६ अङ्क, निर्जीवनया ६९, उत्पादनय् ५३, मेमेगु १३ व लगानी समूहया शेयर साढे १ अङ्क घटे जुुगु दु। थौं २१७ कम्पनीया २ करोड ६० लाख कित्ता शेयर १० अर्ब ९० करोड रुपैयाँ कारोबार जुगु खः।

दकलय् अप्वो गुडविल फाइनान्सया ३३ करोड ९२ लाख रुपैयाँया शेयर किनबेच जुगु खः। थौं गुडविल फाइनान्सया शेयर ७ प्रतिशत व माउन्टेन हाइड्राया शेयर ६ प्रतिशत स्वया अप्वो घटे जुगु दु।

समग्र बजार घटे जुगुलि रिडी हाइड्रो धासा झन्डै १० व जीवन विकास लघुवित्त कम्पनीया शेयर ८ प्रतिशत स्वया अप्वो थहावंगु दु।

प्रधानमन्त्री शेरबहादुर देउवा व माओवादी केन्द्रया अध्यक्ष प्रचण्ड दथुइ भेटवार्ता जुगु दु।

प्रधानमन्त्री निवास बालुवाटारय् जुगु उगु भेटय् मन्त्रिपरिषद विस्तारबारे छलफल जुगु दु धका प्रधानमन्त्रीया सचिवालयं धागु दु।

थौं सुथय् सत्ता गठबन्धनया बैठक च्वनिइगु धासा देउवा व प्रचण्ड दथुइ जक भेटवार्ता जुगु खः। वंगु असार २९ गते प्रधानमन्त्री नियुक्त जुम्ह कांग्रेस सभापति शेरबहादुर देउवां आःतक न मन्त्रिपरिषद विस्तार याये फुगु मदुनि।

येँ महानगरपालिकां थौं निसे हाकन कोराना भाइरस (कोभडि–१९) विरुद्धया भेरोसेल खोप बिइगु जुगु दु।

थ्व स्वया न्ह्यः खोपया न्हापागु मात्रा छुटे जुपि ५० दँ स्वया च्वय्यापि दक्को समूहया लागि थौं बिहीबाः निसे खोप बिइगु धका येँ महानगरपालिकां जानकारी बिगु दु।

महानगरपालिकाया ३२ गु वडाय् थौं सुथय् १० निसे ५ बजे तक खोप बिइगु जुगु खः। खोप काइपिन्स नागरिकताया प्रमाणपत्र, पासपोर्ट, सवारी चालक अनुमति पत्रमध्ये छु न प्रमाणपत्र यकेमाः।