वंगु २४ घण्टाया दुने देयन्यक ३८४० म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १० हजार ८८६ म्हेसिगु पीसीआर परीक्षण यागुलि २,६३४ म्ह व ४,९२२ म्हेसिगु एन्टिजेन परीक्षणय् १,२०६ म्ह याना ३,८४० म्हेसित संक्रमण पुष्टि जूगु दु।

मन्त्रालयया कथं स्वसनगलय् ८५९ म्हेसित कोरोना संक्रमण पुष्टि जूगु दु। उकि मध्ये येँ ५५९, यलय् २०६ व ख्वपय् ९४ म्हेसित संक्रमित जूगु दु। अथेहे २४ घण्टाया दुने १९९३ म्ह संक्रमणमुक्त जुगु दु।

अथेतु, ३३ म्ह सी धुकुगु दु। देयन्यक सक्रिय संक्रमितपि २९ हजार ४४४ म्ह दु धका स्वास्थ्य मन्त्रालयं धागु दु।

सेयर कारोबार मापक नेप्से परिसूचक आःतक हे दकलय् अप्वो विन्दुइ थ्यंगु दु।

बुधबाः निगु अंकं बजाः थहावना नेप्से परिसूचक ३ हजार ९४ दशमलव ९४ अंक थ्यंगु दु। थ्व आतक हे दकलय् उच्च विन्दु थ्यंगु खः।

थ्व स्वया न्ह्यः मंगलबाः २९.२४ अंक थहावना ३ हजार ७९ दशमलव ६७ अंक थ्यना न्हुगु रेकर्ड कायम जुगु खः। बुधबाः हाकन न्हुगु रेकर्ड कायम जुगु दु। नेप्से परिसूचक १५ दशमलव ३० अंकं थहावसा सेन्सेटिभ इन्डेक्स धासा स्थिर खनेदुगु दु।

न्हिच्छि यक १ लाख २८ हजार ७८० कारोबारपाखे २१९ कम्पनीया २ करोड ८१ लाख ७० हजार १७२ कित्ता सेयर किनबेच जूगु खः।उगु कारोबार रकम १३ अर्ब २९ करोड १९ लाख ५४ हजार ५३५ रुपैयाँ थ्यंगु खः।

कारोबार रकम मंगलबाः स्वया करिब २ अर्ब रुपैयाँ कम खः।

महानगरयात छेँ, बुँया नाप सम्पत्ति कर बुझे मयापि २० गु तधःपि करदातापिनिगु छेँ व कार्यस्थलया राजस्व विभागं माइकिङ सुरु यागु दु।

माइकिङ् नाप वंगु असार १६ गते कर पुलेगु लागि ३० दिंया सार्वजनिक सूचना जारी यागु खः। माइकिङ नाप क्वछिगु इलय् कर पूमवंगुलि वयालिपा छेँ, पसः व व्यवसाय शिलबन्दी यायेगु व सरकारी बाँकी सरह राजस्व असुली यायेगु सम्बन्धी सूचं टिकूगु दु।

‘थ्व स्वया न्ह्यः जिमिस उमित सम्पर्कय हयेगु यक्को कुतः जुल, इनाप यानागु जूसा उमिसं विवरण तक बुझे मया,’ राजस्व विभागया प्रमुख डा. शिवराज अधिकारी धागु दु। वयकःया कथं न्हापागु चरणय् नां सार्वजनिक यायेगु २० करदाता मध्ये थौं तक वडा ११ या एनआरटी क्लव, वडा १३ या काठमाडौं इञ्जिनियरिङ कलेज, वडा ४ या देवेन्द्र श्रेष्ठ सम्पर्कय् वःगु दु। मेपिन्स धासा सम्पर्क यागु मदु। थुपि करदातां थःगु सम्बन्धी विवरण बुझे मयागु कारण थुलि हे धाये त थाकु धका धागु दु।

‘तर, जिमिसं करीव ७० करोड रुपैयाँ अप्वो राजस्व वइगु अनुमान यानागु दु,’ धका वयलं धागु दु। राजस्व अधिकृत प्रदीप कोइरालाया नेतृत्वय् नगर प्रहरी नाप थौं वडा ११ या एनआरटी क्लब व युनाइटेड वर्ल्ड ट्रेड सेन्टर, वडा १२ या बागमती च्याम्बर व बुद्धबारी कम्प्लेक्स व वडा १३ या काठमाडौँ इञ्जिनियरिङ कलेज व नेपाल रेडक्रस सोसाइटीइ माइकिङ् यायेगु व सूचं टिकेगु ज्या जूगु दु।

महानगरयात करया विवरण तक बुझे मयापि मेमेपि करदाता वडा १४ या आदर कम्प्लेक्स, कृषि सामाग्री संस्थान व एलआरआई स्कूल, वडा १५ या मनमोहन मेमोरियल कलेज एण्ड शिक्षण अस्पताल, वडा ३ या कान्तिपुर डेन्टल अस्पताल व चिरायु अस्पताल व वडा ४ या देवेन्द्र श्रेष्ठ खः। अथेहे वडा २२ या आरबी कम्प्लेक्स, वडा २४ या सुरज आर्केट, वडा २९ या शुभश्री कोअपरेटिभ लिमिटेड, वडा २८ या काठमाडौं प्लाजा व नेपाल सेयर मार्केट व वडा ३० या गोपालजी प्रपर्टिज प्रालि. व स्टार मल खः।

खरिबोट माइक्रो बस स्ट्याण्डय् २२ आना सार्वजनिक जग्गा बचे यायेत स्थानीयपिन्त थाकूगु दु।

येँ महानगरया वडा १६ वोहोराटार (खरिबोट माइक्रो बस स्ट्याण्ड) वनदेवी गल्लीइ दुगु २२ आना सार्वजनिक जग्गा बचे यायेत स्थानीयपिन्स तसकं चुनौती जूगु दु।

थुकियात बचे यायेत उपभोक्ता समिति, टोल सुधार समिति, क्लव नाप स्थानीय १५ गु संघसंस्था लगे जूगु दु। स्थानीयपिन्स सार्वजनिक जग्गा क्यसे महानगरया उपप्रमुख हरिप्रभा खड्गी श्रेष्ठ, वडाध्यक्ष मुकुन्द रिजाल नाप अधिकारीयात सःतूगु खः।

वयकःपि अन थ्यने धुका स्थानीयपिन्स धाःगु दु, थज्यागु जग्गा थन गुलि दु गुलि। पहिचान जुइ धुकुगु जग्गा ला बचे याये मफु।

मखगु सार्वजनिक जग्गा गये याना मालिइगु? उमिसं सार्वजनिक जग्गाय् मनमोहक वकिङ्क ट्रायल, सार्वजनिक शौचालय, पार्क दयकेगु योजना दुगु धका धागु दु।

थज्यागु सार्वजनिक जग्गाय् हरियाली यायेगु व पार्क दयकयेगु महानगरया नीति हे खः। थ्व हे नीति कथं थुकिया संरक्षण यायेगु महानगरया दायित्व खः। जग्गा स्वये धुका उपमेयर खड्गी श्रेष्ठं धयादीगु दु, थुगु थासय् आः पखाः दयेकमाः धका धयादीगु दु।

सार्वजनिक जग्गा बचे यायेत स्थानीय १५ गु संघ संस्थां एकीकृत समिति हे दयकूगु दु। समितिया संयोजक कथं सुदन रेग्मीं नेतृत्व यानाच्वंगु खः।

सांसद पद पुनर्बहालीया माग यासे पूर्व नेकपा माओवादी केन्द्रया प्यम्ह नेतापि सर्वोच्च अदालतय् रिट दायर यागु दु।

टोपबहादुर रायमाझी, लेखराज भट्ट, प्रभु साह व गौरीशंकर चौधरीं थःपि सांसद पद पुनर्बहालीय माग यासे थौं बुधबाः सर्वोच्चय् रिट दर्ता यागु दु।