Display Style:
Column Style
मन्त्रिपरिषद्यात थौं पूर्णता बीगु विषयस सहलह न्ह्यात
दिल्लागा अष्टमी ११४१,साउन १७ सोमवाः
मन्त्रिपरिषद्यात पूर्णता बीगु विषयलय् सत्ता गठबन्धनया शीर्ष नेतातदथुइ थौं न सहलह जुइत्यंगु दु ।
प्रधानमन्त्रीया निवास बालुवाटारय् जूगु सहलह ज्याझ्वलय् सरकारय् दुथ्याइपिं मन्त्रीत क्वःमज्यूगु हुनिं मन्त्रिपरिषद्यात पूर्णता बीगुलिइ अलमल जुयाच्वंगु खः । दलतय्गु असमझदारीया हुनिं सरकार गठन जूगु ताःई तक न मन्त्रिपरिषदं पूर्ण मजूनि ।
मन्त्रालयया भागबन्डा जुइधुंकूगु अवस्थाय् दलतय्सं आन्तरिक रुपय् मन्त्रीत ल्ययेगु झ्वः न्ह्यानाच्वंगु दु । खासयानाः माओवादी केन्द्रपाखें सरकारय् छ्वइपिं मन्त्रीत ल्ययेत माओवादीया नायः पुष्पकमल दाहाल प्रचण्डयात समस्या जूगु खनेदु ।
पार्टीदुने मन्त्री जुइ चाहे याःपिं यक्व दयेवं मन्त्री ल्ययेगुलिइ समस्या जूगु खः । आधिकारिकता सम्बन्धिया कचवं ज्यंकेवं मन्त्री ल्ययेगु धाःगु जनता समाजवादी पार्टीं धाःसा सरकारय् छ्वइपिं मन्त्रीतय्गु लिच्वः पिकाःगु दु ।
अथेजुयाः थौंया मुँज्यां मन्त्रिपरिषद्यात पूर्णता बियाः कन्हय् सरकार बिस्तारया ज्या क्वचायेकेगु सहमति जूगु दु । शेरबहादुर देउवा नेतृत्वया सरकारय् आः न कांग्रेसं निम्ह मन्त्री व छम्ह राज्यमन्त्री अले माओवादी केन्द्रपाखें निम्ह मन्त्री दुथ्याः ।
ख्वपया ऐतिहासिक नवदुर्गा द्योछेँय् नकीं बिबाद अदालतय् थ्यन
लहानान्युज | दिल्लागा अष्टमी ११४१,साउन १७ सोमवाः
इतिहासय् न्हापागु पटक ख्वपया ऐतिहासिक नवदुर्गा द्योछेँय् नकीं (मिसा पुजारी) या छनौटय् विवाद जुगु दु।
दँय् दँसं मोहनीया दशमी कुन्हु राष्ट्रप्रमुखपाखे पूजा यायेत वइगु भक्तपुर नगरपालिका वडा नं ९ कमलविनायकया ऐतिहासिक देगलय् नकीं छनौटय् विवाद जुया अदालत तक थ्यंगु दु।
दँय् दँसं मिलेजुया नकीं छनौट याना वयच्वंगु खःसा थुगु दँय् थःगु पाः मिचे जुगु धका धासे इन्दिरा बनमालां नेपालया संविधान २९७२ या धारा १४४(१)(२) बमोजिम उपयुक्त आज्ञा आदेश जारी याये दयेमाः धका उच्च अदालत यलय् निवेदन पत्र दर्ता यागु दु। विवादया कारण आःतक नकीं छनौट जुगु मदुनि। नकीं छनौट यायेमाःगु तिथि सिधःगु सा व स्वया न्ह्यः यायेमाःगु विशेष पूजा निगु हे पक्षं दलबलं वया पुजा याना वयाच्वंगु दु।
द्यःयया थाय् दच्छि छकः पालंपाः नकीं छनौट याना पाः हिला वयाच्वंगु खः। नाप नवदुर्गा देवगण जुया दच्छियकं देवगण न छनौट याना वयाच्वंगु खः। १९ म्ह देवगणपिनिगु हकय् धासा विवाद जुुगु मदु।
न्हुम्ह नकीं व पुलापि देवगण हिला पाः न हस्तान्तरण जुयाच्वंगु खः। छनौट जुम्ह नकीं न नवदुर्गा द्यःया थाय् न्हिन्हि नित्यपूजा व आरती याइगु खः। सहमतिइ खँ मिले मजुलि आः अदालतया फैसला कथं हे न्हुम्हं नकीं छनौट जुइ।
थ्व स्वया न्ह्यः नकीं छनोट जुया गथांमुगः निसे लगभग निला न्हुपि नियुक्त देवगणपिन्त प्याखँ हुलेगु परम्परा दु।
मेलम्ची खुसिइ हाकनं बाः वया १०खा छेँ चुइकल
लहानान्युज | दिल्लागा अष्टमी ११४१,साउन १७ सोमवाः
सिन्धुपाल्चोकया हेलम्बु व मेलम्ची खुसिइ बाः वया हेलम्बु व मेलम्ची बजाः लागायात क्षति याःगु दु । वंगु चान्ह्य् वःगु खुसिबालं आःतक १०खा छेँ चुइकूगु दु धाःस हेलम्बुया ग्यालथुम व चनौटे बजाः खतराय् लाःगु दु ।
अथेहे हेलम्बु– १ चिउरीखर्कया २० खाः छेँ परिवारया ९५म्हेसिन थःपिं खुसिबा व चलाया खतराय् लाःगु धासें उद्धार व गुहार फ्वंगु दु । मध्यचान्हय् खुसि बाः वयाः सिन्धुपाल्चोकया चनौटेय्च्वंगु रातो पुल चुइकूगु दु ।
चनौटे व हेलम्बु स्वाइगु ताँ थौं सुथय् ८ताः ईलय् ति चुइकूगु स्थानीय मनूतय्सं धागु दु । ताँ चुइकेवं थ्व क्षेत्रय् आः सवारी वयेवने यायेफयाच्वंगु अवस्था मरु । अथेहे ग्यालथुमया छपु झोलुङ्गेताँ न चुइकूगु दुसा खुसिइ लःया सतह अप्वयेवं ग्यालथुम बजाः तकं जोखिमय् लाःगु जिल्ला प्रहरी ज्याकू सिन्धुपाल्चोकं धागु दु ।
थ्व तां मेलम्ची नगरपालिकाया ७ व ८ वडा, पाँचपोखरीया १ व २ वडा अले हेलम्बुया थीथी थाय् स्वाः । तर मध्यचान्हय् हे मेलम्ची बाः वःगुलिसे सुथय्निसें सडकया स्वापु त्वाःदःगु दु ।
अथेहे, खुसि बाः वायः रेडियो मेलम्चीया भवन चुइकूगु दु । छुंया ल्याखय् छेँय् ध्याचःनापया लः दुहाँवःगु दुसा प्रहरी चौकीया प्रहरीत न थाय् त्वःतेत बाध्य जूगु दु । चनौटे बजाःया दथूं लः बाः वनाच्वंगु दु ।
खुसि बाः वयाः जूगु क्षतिया विस्तृत विवरण धाःसा मवःनि । वंगु असार १ गते खुसि बाः वयाः हेलम्बु व मेलम्चीलिसेया थासय् यक्व हे धनजनया क्षति याःगु खः । आः तक ५म्ह मनूत सीगु दुसा १५म्ह अझं बेपत्ता तिनि ।
उदयपुरय् कोरोनां छगु हे परिवारय् स्वम्ह सीत
शोभा श्रेष्ठ | दिल्लागा अष्टमी ११४१,साउन १७ सोमवाः
त्रियुगा नगरपालिका–२ खैजनपुर गामय् कोरोना सङ्क्रमणं छगु हे परिवारया स्वम्ह सीगु दु।
वडाध्यक्ष घमानसिंह खत्रीया कथं कोरोना सङ्क्रमणं झीन्यान्हु न्ह्यः ४३ दँ दुम्ह रमण पोखरेल, न्ह्यन्हस न्ह्यः ३८ दँ दुम्ह हेमराज पोखेरल व शुक्रवाः चान्ह्यः ३६ दँ दुम्ह देवी पोखरेल सीगु खः।
सङ्क्रमण अप्वोया वंगुलि शनिबाः चान्ह्यनिसे गामय् सिल यानाबिगु दु। स्वास्थ्य कार्यालय उदयपुरया प्रमुख मोहन सुवेदीया कथं जिल्लाय् झीन्हु न्ह्यनिसे कोरोना सङ्क्रमण घटे जुगु खःसा छवाः निसे हाकन सङ्क्रमण अप्वोया वंगु धका धागु खः
गामय् सिल यायेवं सुथय् ७ निसे ९ बजेतक जक दैनिक उपभोग्य वस्तुया सामान्य पसः चायकेत अनुमति बिगु खः।
भैसेपाटीइ निथाय् डिजिटर डिस्प्ले बोर्ड स्थापना
लहानान्युज | दिल्लागा सप्तमी ११४१,साउन १६ सनिवाः
रोटरी क्लब अफ सैबु भैसेपाटीं यलय् निगु थासय् डिजिटर डिस्प्ले बोर्ड स्थापना यागु दु। यलया नख्खुचोक व भैसेपाटी चोकय् उगु डिस्प्ले तःगु खः।
ट्राफिक जनचेतना थकायेगु उद्देश्यं ट्राफिक सन्देश, ई व टम्परेचर सहितया डिस्प्ले तःगु खः। क्लब सन् २०२१–२०२२ या अध्यक्ष मिलन थापाया आर्थिक ग्वाहालि निगु थासय् स्थापना यानागु धका डिस्प्लेया रोटरी क्लबया पुर्व गभर्नर नाप जोन–१५ या डिस्ट्रिक एसिस्टेन्ट गभर्नर सुनिलकृष्ण श्रेष्ठं डिस्प्लेया उलेज्या यानादीगु खः।
उगु उलेज्या झ्वलय् थःगु खँ तयेगु झ्वलय् एसिस्टेन्ट गभर्नर श्रेष्ठं सामाजिक सेवाय् समर्पित रोटरी क्लबं देशया थीथी जिल्लाय् सचेतना थकायेगु ज्या यानागु धका धागु खः। वयकलं धयादीगु दु–कोभिड–१९ महामारीपाखे बचे जुइत देयन्यक थीथी ज्याझ्वः दु धका धयादीगु खः। व बाहेक राहत वितरण, मस्तय्त लक्षित यासे कासाया मैदान निर्माण, लः व सरसफाइ, छात्रा शिक्षा, विपन्न मस्तय्त निःशुल्क अध्ययनया व्यवस्था लगायतया ज्या याना च्वनागु दु धका धागु खः।
ज्याझ्वलय् न्ववासे क्लबया संस्थापक अध्यक्ष नाप सरुवारोग विशेषज्ञ डा. वासुदेव पाण्डे न कोभिडया इलय् क्लबं यानागु ज्याया चर्चा यानादीसे सामाजिक ज्यायात निरन्तरता बिइमाःगुलि बःबियादीगु खः। अथेहे वयकलं धयादीगु दु–रोटरी क्लब अफ भैसेपाटी स्थापना जुइ धुका थीथी सामाजिक ज्या जुया वयाच्वंगु दु धका थःगु बिचाः तयादीगु खः।
क्लबया अध्यक्ष मिलन थापां क्लब शिक्षा, स्वाथ्य, सरसफाई लगायत क्षेत्रय् ज्यायाना वयाच्वनागु दु धका धयादीगु खः।
