१० बुँदे सहमति यायेत निस्वनातःगु कार्यदलं नेतापि नाप नेकपा एमालेया निगु हे पक्षया सांसदपि नाप छलफल यागु दु।

सिंहदरबारय् न्हिनसिया १ बजे छलफल जुइ धका धागु दु। ‘पार्टी एकता बचे यायेत कार्यदलया नेतापि नाप छलफल यायेत्यनागु दु। एकता बचे यायेत जिमिगु अभियान जारी दु धका ’, यज्ञराज सुनुवारं धागु दु।

अध्यक्ष केपी शर्मा ओली व बरिष्ठ नेता माधवकुमार नेपाल समूह दथुइ विवाद हल याना पार्टी बचे यायेत निगु हे पक्षया सांसदपिन्स पार्टी एकता दबाव समूह दयकूगु खः।

उगु अभियानय् ओलीया पाखे  कृष्णप्रसाद दाहाल, डा. सूर्य पाठक, लालप्रसाद साँवा (एलपी), शान्ति पाख्रिन, यज्ञ बोगटी लगायतपि दुगु खःसा नेपालपाखे यज्ञराज सुनुवार, झपट रावल, जयकुमार राई, डा.दीपकप्रकाश भट्ट, नारायण खतिवडा, पवित्रा खरेल, राजबहादुर बुढा लगायत सामेल जुगु खः।

येँ महानगरपालिकां ज्ञानमाला भजन खल स्वयम्भूया लागि अक्षय कोष २० लाख रुपैयाँ लल्हागु दु।

थौं सुथय् भजन खलःयात महानगरया मेयर विद्यासुन्दर शाक्यं उगु चेक खलःया अध्यक्ष तीर्थनारायण श्रेष्ठनाप पदाधिकारीपिन्त हस्तान्तरण यागु खः। कोषया व्याजं भजन छेँ जुइगु धार्मिक व सांस्कृतिक गतिविधि सञ्चालन जुइगु खः। उगु चेक लल्हाय धुका थःगु खँ तयेगु झ्वलय् मेयर शाक्यं धयादीगु दु, सम्पदा ल्यका तयेगु लागि महानगरं नीति दयका ज्या याना च्वनागु दु धका धयादीगु खः।

आः सम्पदाय् मर्मत, सम्भार वा जीर्णोद्धारया ज्या जुयाच्वनागु दु व अमूर्त सम्पदा बचे यायेगु लागि वंपि सु न मनूत खालि ल्हातं लित छ्वयागु मदुनि। बुद्धवाणीयात भजनपाखे जनमानसय् जीवित यायेगु ज्या यानाच्वंगु दु धयादीसे भजनया महत्वय् न चर्चा यानादीसे मेयर शाक्यं ज्ञानमाला भजन खलः नाप दुगु भजन संग्रहयात नेपाल भाषाय् जक मात्र सीमित मयासे मेमेगु भाषा, राष्ट्रिय व अन्तरराष्ट्रिय भाषाय् न अनुवाद याना यकेत सुझाव बियादीगु दु। ज्ञान गुलि इन उलि हे अप्वइ। उकि ज्ञानमालायाके दुगु पूलागु भजनयात वितरण यायेमाल धका मेयर शाक्यं धयादीगु खः।

भजनं स्वयम्भू क्षेत्रय् धार्मिक गतिविधियात जीवन्त तयेगु लागि तधःगु भुमिका दु धका धयादीसे थुकिया निरन्तरता व पुन्तान्तरणय् बःबियादीगु दु। ०७६ सालय् भजन छेँ मिँ नःगु खः। वयालिपा पुरातत्व विभागं उगु भजन याइगु थाय् मेथाय् स्थानान्तरण यायेगु कुतः यागु खः। 

स्यस्यः समाज यल महानगरपालिका वडा नं १६ य् दुगु जग्गाय् भवनया शिलान्यास जुगु दु।

उगु भवन शिलान्यास वांगमय शताब्दी पुरुष डा सत्यमोहन जोशीया छेँय् संकल्प पूजा याना भवन निर्माण जूगु थाय् थौं सुथय् ८ः४२ या भिं साइतय् जग साइत पूजा यागु खः।

उगु ज्याझ्वलय् समाजया अध्यक्ष ई सुरेन्द्र गोविन्द जोशीपाखे लसकुस यागु खःसा यल महानगरपालिकाया मेयर चिरीबाबु महर्जनपाखे भिंतुना बियादीगु खः।

ज्याझ्वलय् प्रदेश सभाया सांसदपि ज्ञानेन्द्र शाक्य व शोभा शाक्य, उप मेयर गीता सत्याल, वडा अध्यक्षपि निर्मल रत्न शाक्य व बिनोद ताम्राकार, सल्लाहकारपि गोपाल मान श्रेष्ठ व अजर मान जोशी, ललितपुर उद्योग वाणिज्य संघया अध्यक्ष मनोज न्याछ्यों लगायत नाप थीथी जातीय समाज व संघ संस्थाया प्रतिनिधिपिनिगु न उपस्थिति दुगु खः।