सर्वोच्च अदालतं खड्गी समुदायपिनिगु आत्मसम्मानय् घाः मजुइगु कथं थर कायम यायेत सरकारयात निर्देशनात्मक आदेश जारी यागु दु।

खड्गी समुदायपिन्त राज्यं बिइगु नागरिकता, पासपोर्ट, सवारी चालक अनुमतिपत्र, जग्गाधनी प्रमाणपत्र, शैक्षिक प्रमाणपत्र लगायत सरकारी भ्वँतय् साविकय् दुगु थर गथेकि कसाई, कसाही, साही, साईया कथं आत्मसम्मान जुइकथं नायः सिंह, शाही व खड्गी कायम यायेत व उकिया लागि आवश्यक कानुनी लिसें मेमेगु व्यवस्थापकीय प्रबन्ध कार्यान्वयन यायेत सर्वोच्चं निर्देशनात्मक आदेश जारी याःगु खः।

सर्वोच्चं २०७६ चैत्र २ गते हे थज्याःगु निर्देशनात्मक आदेश जारी यासाः नं छुं दिं न्हय् जक पूर्ण पाठ जारी याःगु खः। अदालतं जारी याःगु पूर्ण पाठय् नेपाःया संविधानं ब्यूगु सम्मानपूर्वक म्वायेदयेमाःगु हकया व्याख्या यागु खः।

नेपाल खड्गी सेवा समितियापाखें संरक्षक मनोज नेवाः खड्गीं साविकया थर खड्गी समुदाययात मदिक्क मानसिक, सामाजिक लिसें आर्थिक विकासय् गम्भीर नकारात्मक असर लाःगु धासें सर्वोच्चय् रिट दायर यागु खः।

उगु रिटय् विपक्षी दयेकातःगु नेपाल सरकार, प्रधानमन्त्रीलिसें मन्त्रिपरिषद् ज्याकु, गृह मन्त्रालय, भूमिसुधार मन्त्रालय, शिक्षा मन्त्रालय, परीक्षा नियन्त्रण ज्याकु सानो ठिमी ख्वप, उच्च माध्यमिक शिक्षा परिषद्लगायतया नामय् सर्वोच्चं उगु आदेश जारी याःगु खः।

शेयर बजार परिसूचक नेप्से थौं सोमवाः न सामान्य थहावंगु दु।

नेप्से थौं १ दशमलव ५४ अङ्कं थहावना ३ हजार १ सय ९ दशमलव ६६ विन्दुइ थ्यंगु दु। छु दिं निसे उत्साहजनक रूपं थहावंगु जलविद्युत् समूह थौं न अथेहे थहावंगु दु।

जलविद्युत् समूहया शेयर थौं १ सय १९ अङ्कं थहावंगु दु, अथेहे फाइनान्स ९१, निर्जीवन बीमा समूह ३९, जीवन बीमा समूह ४८ व मेमेगु समूहया शेयर साढे ८ अङ्कं थहावंगु दु। बैंक, विकास बैंक, होटल, व्यापार, उत्पादन व लगानी समूहया शेयर धासा कुहावंगु दु।

थौं आईसीएफसी फाइनान्स, कर्पोरेट विकास बैंक, हिमालयन पावर पार्टनर, ङादी ग्रुप पावर, नेपाल हाइड्रो, युनियन हाइड्रो, युनियन लाइफ इन्सोरेन्स व जीवन विकास लघुवित्त याना च्यागु कम्पनीया शेयर १० प्रतिशतं थहावना सकारात्मक सर्किट थ्यंगु दु। थौं २२४ कम्पनीया २ करोड ५३ लाख ९३ हजार कित्ता शेयर १४ अर्ब १३ करोड रुपैयाँ कारोबार जुगु दु।

दकलय् अप्वो अरुण भ्याली हाइड्रोया ६७ करोड ४८ लाख रुपैयाँ शेयर किनबेच जुगु खः।

उर्जा, जलस्रोत तथा सिंचाई मन्त्री पम्फा भुसालं कुलमान घिसिङयात नेपाल विद्युत प्राधिकरणया कार्यकारी निर्देशक नियुक्त यायेगु प्रस्ताव मन्त्रिपरिषदय् यकेगु तयारी यागु दु।

मन्त्रिपरिषदया बैठक सोमबाः ४ बजे सःतूगु दु। थौं बैठक नियमित एजेण्डाय् धासा मदु। तर मन्त्री भुसाल धासा हितेन्द्रदेव शाक्ययात विशिष्ट श्रेणी सरह सेवा सुविधा बिया मन्त्रालय सालेगु व घिसिङयात प्राधिकरणया कार्यकारी निर्देशकय् नियुक्त यायेगु प्रस्ताव तयार दु धका स्रोतपाखे जानकारी वंगु दु।

येँ महानगरया मेयर विद्यासुन्दर शाक्यं छगु वडा छगु पार्कया नीति कथं येँ महानगरपालिका न्ह्यावना च्वनागु दु धका धागु दु।

थौं वडा नम्बर–५ हाँडीगामय् नरबुद्धपार्कया शिलान्यास यायेगु झ्वलय् सम्वोधन यायेगु मेयर शाक्यं अथे धयादीगु दु। ‘येँ महानगरपालिकां छगु वडा छगु पार्कया नीति कयागु दु,’ शाक्यं धयादीग दु, ‘नरबुद्ध पार्कया शिलान्यास न उगु हे नीति कथंयागु खः।’

मेयर शाक्यं येँ महानगरपालिकां आःतक तधःगु व चिधःगु याना ७० गु पार्क निर्माणया ज्या न्ह्याके धुकगु दु। येँ महानगरपालिकां सार्वजनिक जग्गाया संरक्षण यासे पार्क निर्माणया अभियान न्ह्याकेगुलि प्राथमिकताय् तयागु दु,’ मेयर शाक्यं धयादीगु दु, ‘आः तक करीब ७० गु पार्क निर्माणया ज्या न्ह्याके धुकागु दु। गु तःधगु वडा दु, गु चिधःगु वडा दु गुन थासय् यागु सार्वजनिक जग्गा मदुगु न वडा दु। सार्वजनिक जग्गा यक्को दुगु वडा न दु। गन ला वडाय् १०–१२ गु पार्क न दु। गन वडाय् छगु जक न दु।’

वयकलं पार्क निर्माणया अभियानयात प्राथमिकताय् तयागु दु धका धयादीसे ‘पार्क निर्माण नाप जिमिसं सम्पदा निर्माण, पुननिर्माणया अभियानयात प्राथमिकता तयागु दु,’

अथेहे उगु ज्याझ्वलय् वाग्मती प्रदेशया सांसद नारायण सिलवाल, उपप्रमुख हरिप्रभा खड्गी श्रेष्ठ, वडाध्यक्ष रमेश डंगोलल न थःथःगु खँ तयादीगु खः। करीब ७ रोपनी क्षेत्रफलय् निर्माण जुइत्यंगु उगु पार्कया लागत १ करोड ४८ लाख दुगु धका येँ महानगरपालिकां जानकारी बिगु खः।

लुँया भाः थौं न क्वहावंगु दु।

थौं लुँ तोलां द्धःछि कुहावया ८९ हजार रुपैयाँ थ्यंगु दु। म्हिगःजक तोलां १५ रुपैयाँ घटे जुगु खः।

अथेहे वहः तोलां न नीन्यातका कुहावःगु दु। थौं वहः तोलां नीन्यातका घटे जुया १२ सय १५ रुपैयाँ थ्यंगु दु।