प्रधानमन्त्री शेरबहादुर देउवां नेपाःया मौलिक राष्ट्रिय संवत् नेपाल संवतयात प्रधानमन्त्रीया लेटरप्याडय् छ्यलेगु व मन्त्रिपरिषदया मुँज्यां याइगु थीथी निर्णयया निर्णय पुस्तिकाय् नेपाल संवतयात नं छ्यलेगु खँ तःधंगु मजूगु बिचाः प्वंकादीगु दु।

वय्कलं उगु विचाः नेपाल संवत् राष्ट्रिय न्हूदँ समारोह समिति ११४२ या नायः निरञ्जनरत्न शाक्यया नेतृत्वय् न्हूदँ समारोह समितिया दुजःपिं दुथ्याःगु प्रतिनिधि मण्डललिसे प्रधानमन्त्री निवास बालुवाटारय् नापलासें प्वंकादीगु खः ।

प्रधानमन्त्री देउवां थथे थःगु विचाः प्वंकेगु लिसें थः स्वकीय सचिवयात तत्काल थ्वबारे विचाः यानाः ज्या न्ह्याकेत उजं बियादीगु खः। नेवाः न्ह्यलुवाःलिसें नेपाल संवत् आन्दोलनया अग्रज मल्ल के. सुन्दरं प्रधानमन्त्री देउवायात नेपाल संवत् ११४२ न्हूदँया लसताय् व वय्कःया कार्यकालय् म्होति नं प्रधानमन्त्रीया लेटरप्याडय् नेपाल संवत् छ्यलेत, मन्त्रिपरिषदया निर्णय पुस्तिकाय् नेपाल संवत् नं च्वयेत व नेपाःया नोटय् नेपाल संवत् तयेत इनाप यानादीगु खः।

थथे नेवाः न्ह्यलुवाः सुन्दरं यानादीगु इनापयात कयाः तत्काल हे प्रधानमन्त्रीं निगू ज्या तत्काल यायेगु कथं सकारात्मक विचाः प्वंकादीगु खः।समारोह समितिया नायः निरञ्जनरत्न शाक्यं न्हूदँया लसताय् थ्वहे वइगु कछलाथ्व पारु (कार्तिक १९ गते) शुक्रवाः येँया बसन्तपुरय् जुइगु भिन्तुना सभाय् मूपाहाँ कथं ब्वति कायेत इनाप यानादीगु खःसा प्रम देउवां थःपिं उगु सभाय् वयेगु बचं बियादीगु खः।

अथेहे, समारोह समितिंं लःल्हाःगु नेपाल संवतयात कयाः ध्यानाकर्षण पौयात नं प्रम देउवां सकारात्मक रुपं कयादीगु खः ।नायः शाक्यया नेतृत्वय् समारोह समितिया सल्लाहकार, पूर्वमन्त्री, सांसद भिमसेनदास प्रधानं नं प्रम देउवायात नेपाल संवतया महत्व व जनस्तरं थ्व संवतयात कयाः यानाच्वंगु अभियानयात कयाः जानकारी बियादीगु खः।

समारोह समितिया दुजः नविन मानन्धरं न्हूदँ ११४२ या पाखें औपचारिक रुपं प्रधानमन्त्रीयात ध्यानाकर्षण पौ ब्वनाः न्यंकादीगु खः।

थौंनिसें येँया ८गू स्थानीय तहलय् एस्ट्राजेनिका खोपया निगूगु डोज तयेकेगु दु ।

जिल्ला स्वास्थ्य ज्याकू येँया कथं थौंनिसें कात्तिक ११ गतेतक स्वन्हुया नितिं किपू, चन्द्रागिरी, नागार्जुन, कागेश्वरी, तारकेश्वर, टोखा व गोकर्णेश्वर नगरपालिकाय् निगूगु डोज तयेकीगु धागु खः ।

एस्ट्राजेनेकाया न्हापांगु डोज कायेधुंकूपिन्त थौंनिसें निगूगु डोज खोप तयेकीगु धागु दु । येँ महानगरपालिकाय् धाःसा कन्हय्निसें जक खोप तयेकी ।

वीर अस्पताल, परोपकार प्रसूती तथा स्त्री रोग, वीरेन्द्र सैनिक व निजामती अस्पतालय् निन्हुतक खोप ज्याझ्वः न्ह्याइगु सुचं पितब्यूगु दु ।

प्रधानन्यायाधीश चोलेन्द्र शमशेर राणायात पद त्वःतेत प्यखेरं दबाब लाःगु दु ।

सर्वोच्च अदालतदुने याकःचा जुयादीम्ह राणायात नेपाल बार एशोसियसननिसें पूर्व प्रधानन्यायाधीश व वरिष्ठ अधिवक्तापिन्सं न पद त्वःतेत दबाब ब्यूगु दु । सर्वोच्च अदालतय् आः दुपिं २०म्ह मध्ये १३म्ह न्यायाधीशत, प्रधानन्यायाधीश जबरां राजीनामा बीमाःगु पक्षय् दु ।

राणाया ज्यापहलं न्यायालयया निष्पक्षता व विश्वसनीयताय् न्ह्यसः ब्वलंगु धासें इमिसं प्रधानन्यायाधीस राणायात दबाब ब्यूगु खः । राणाया राजीनामा फ्वंपिं न्यायाधीशत मध्ये दीपक कार्की, मीरा खडका, हरिकृष्ण कार्की, विश्वम्भर श्रेष्ठ, आनन्दमोहन भट्टराई, प्रकाशमान सिंह राउत, बमकुमार श्रेष्ठ, टंकबहादुर मोक्तान, प्रकाशकुमार ढुंगाना, सुष्मालता माथेमा, हरि फुयाँल, कुमार रेग्मी, मनोजकुमार शर्मा व नहकुल सुवेदी दु ।

प्रधानन्यायाधीशं सःतूगु फुल कोर्टय् न मवनेगु अडान काःपिं इमिसं थौं प्रधानन्यायाधीश राणायात नापलानाः पद त्वःतेत औपचारिक रुपय् इनाप याइगु जूगु दु ।

पद त्वःतेत प्यखेरं दबाब लाःसां प्रधानन्यायाधीश राणां आःतक राजीनामा मबीगु अडान कयाच्वंगु दु ।

भारत जुयाः अफगानी शरणार्थीत नेपाः दुहाँवयेगु झ्वः न्ह्याःगु दु ।

अफगानिस्तानय् तालिवान शासन सुरु जुइवं अनं बिस्युवःपिं अफगानी नागरिक भारत जुयाः नेपाः दुहाँवयेगु झ्वः अप्वःगु खनेदु । भारतय् नक्कली भ्वँ दयेकाः इपिं नेपाः दुहाँवयाच्वंगु धागु दु ।

अथेहे, सरकारं परिचयपत्र मदुपिन्त कोठा बालं मबीत इनाप याःगु दु । विदेशी नागरिकत सीमा नाकां घूसपैठ यानाः नेपालय् दुहाँवयाः च्वनेगु यानाच्वन धइगु खँ सीवं गृहमन्त्रालयं विज्ञप्ति हे जारी यानाः अन्यागु इनाप याःगु खः ।

सोमवाः ११म्ह अफगान नागरिकतय्त येँया सिनामंगलं नियन्त्रणय् काःगु दु ।

“छगु वडा, छगु पार्क” नीति अनुरुप येँ महानगरपालिका छन्हू हे वडा ३२ यु निगू पार्कया शिलान्यास याःगु दु ।

येँ महानगरपालिका प्रमुख विद्यासुन्दर शाक्यं थ्यंमथ्यं ४गू रोपनी ११ आनाय् “बागमती दोभान” व “अमरावती” याना निगू पार्कया शिलान्यास यानादिगु खः ।

ज्याझ्वलय् प्रमुख शाक्यं तःधंगु व चीधंगु याना येँ महानगरपालिकाय् ५०गू सिबें अप्वः पार्कया देयेकेज्या जुयाच्वंगु धयादिल । सार्वजनिक जग्गाया संरक्षण याय्गु, हरियालीया थपू यायेगु व स्थानीयपिनिगु ब्वतिइ संरक्षणया जिम्मा नं उपिन्त हे बिइकथं प्रत्येक वडाय् म्होतिइ छगू पार्क निर्माण यायेगु अभियान न्ह्याकागु, मेयर शाक्यं न्ह्यथनादिल ।

वय्कलं, गलिखे जमिन गुथीया नामय् जुयाच्वंगुलिं पार्क निर्माण यायेगु व हरियाली कायम यायेगु ज्याय् पंगु ब्वंलना च्वंगु धयादिल । व्यावसायिक भवन तं आः निजी क्षेत्रपाखें यक्वः हे दयेकेज्या जुयाच्वंगु दु, गुथीया जमिनय् व्यावसायिक भवन आवश्यक मदु, अन पार्क निर्माण जुइमाःगु नं ज्याझ्वलय् मेयर शाक्यं धयादिल ।

ज्याझ्वलय् उपमेयर हरिप्रभा खड्गी श्रेष्ठं बागमती खुसि सिथय् पार्क व हरियाली यायेत बागमती सभ्यता एकीकृत विकास समितिइ जम्मा जूगु राजस्व पर्याप्त जूगु उल्लेख यानादिसें थुकियात कार्यान्वयन यायेमाःगलिइ बः बियादिल ।

वय्कलं महानगरपालिकां न्ह्याकूगु सार्वजनिक जग्गा संरक्षण व हरियालि विकास यायेगु नीति व्यवहारिक कथं हे न्ह्याःगु धयादिल । वय्कलं महानगर दुने पार्क दयेकेत सम्भवय् मजुइधुंकूलिं बाहिरी शहरय् गन सम्भव दु अन अन पार्क दयेकेत इनाप यानादिल ।

बागमती दोभान पार्क थ्यंमथ्यं ११ आनाय् ६७ लखःया लागतय् निर्माण जुइत्यंगु दु धाःसा करिब प्यंगु रोपनी निर्माण जुइगु अमरावती पार्क ९०गू लखया लागतय् निर्माण जुइत्यंगु खः ।