वंगु २४ घण्टाया दुने देयन्यक १०४३ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं ११ हजार १६५ म्हेसिगु पीसीआर परीक्षणय् ८४९ म्ह व ४,३०० म्हेसिगु एन्टिजेन परीक्षणय् १९४ म्ह याना १०४३ म्हेसित कोरोना भाइरस संक्रमण पुष्टि जूगु दु।

लिपागु २४ घण्टाय् ८९१ म्ह कोरोना भाइरस संक्रमणमक्त जूगु दु सा १२ म्ह सीगु दु। आःतक देयन्यक कोरोना भाइरसया सक्रिय संक्रमितपिनिगु ल्याः १६ हजार १९४ म्ह दु।

उकि मध्ये १४ हजार ९७५ म्ह होम आइसोलेसनय् व १२१९ म्ह संस्थागत आइसोलेसनय् च्वना च्वंगु दु।

अथेहे २४ घण्टाय् येँ जक ३४४, यलय् ६१ व ख्वपय् ३५ म्हेसित कोरोना संक्रमण जुगु दु।

बुद्धभुमि नेपाल हाइड्रोपावर लिमिटेडया साधारण शेयर (आईपीओ) कसं शुक्रबाः बाँडफाँट जुइगु दु।

कम्पनीं असोज ११ गतेनिसे १४ गते तक सर्वसाधारणया लागि ८ करोड रुपैयाँ बराबरया ८ लाख कित्ता साधारण शेयर निष्काशनय् हःगु खः।

उगु आईपीओ शुक्रबाः सुथय् १० बजे बाँडफाँट यायेगु धका कम्पनीया बिक्री प्रबन्धक सिभिल क्यापिटलं जानकारी बिउगु दु।

कम्पनीया आईपीओया लागि २१ लाख ११ हजार ८१९ जना आवेदकपिन्स २ करोड ६५ लाख ३१ हजार ४० कित्ताया लागि आवेदन बिउगु ख। आवेदन बिउपि यक्कोसिगु ल्हाः खालि जुइगु दु।

थुगु आईपीओ योग्य आवेदक मध्येपाखे ७४ हजार ४०० म्हेसिया १० कित्ता शेयर ल्हातय् लाइगु जुगु दु सा २० लाख स्वया अप्वोसित शेयर मथइगु पक्का जुगु दु।

थुगु वाःया लिपगु वाः थौं बुधबाः शेयर बजारय् सुधार जुगु दु। निन्हु लगातार घटे जुगु नेप्से परिसूचक थैं दोहोरो अंकं थहावंगु दु।

बुधबाः शेयर कारोबार मापक नेप्से परिसूचक दोहोरो अंकं थहावःगु खः। नेप्से परिसूचक ६८ दशमलव ४७ अंकं थहावना २ हजार ६ सय ८१ दशमलव १० अंकय् थ्यंगु दु।

शेयर कारोबार रकम न ४ अर्ब ५० करोड रुपैयाँ अप्वो थ्यंगु दु। नेप्से परिसूचक छगु दर्जन हाराहारी कम्पनीया शेयर भाः सकारात्मक सर्किटय् वंगु दु।

नेपाल स्टक एक्सचेञ्जं छन्हु हे छधःगु च्वय् क्वय् मवने माः धका कम्पनीया शेयर भाः छन्हुय दुने १० प्रतिशत स्वया थहा क्वहा मवनिइगु नियम दयकूगु खः।

उगु नियम कथं थौं बुधबाः किसान लघुवित्त वित्तीय संस्था, प्रोगेसिभ फाइनान्स, नयाँ सारथी लघुवित्त, ग्लोबल आइएमई लघुवित्त, सबैको लघुवित्त, सपोर्ट माइक्रोफाइनान्स लगायतया कम्पनीया शेयर भाः १० प्रतिशतं थहावंगु दु।

सतकय् वेसहारा जुया म्वाना च्वपि मनू तयेगु व्यवस्थापनया लागि मानव सेवा आश्रम निर्माण जुइगु दु।

नागार्जुन नगरपालिकां जग्गा उपलब्ध याइगु, जग्गाय् भवन निर्माणया ज्या येँ महानगरपालिकां यानाबिइगु व सेवा सञ्चालन मानव सेवा आश्रमं याइगु कथं त्रिपक्षीय सम्झौता सम्पन्न जुगु दु। सम्झौताय् येँ महानगरपालिकाया मेयर विद्यासुन्दर शाक्य, नागार्जुन नगरपालिकाया मेयर मोहनबहादुर बस्नेत व मानव सेवा आश्रमया अध्यक्ष रामजी अधिकारीं हस्ताक्षर यउगु दु। थुकिया लागि येँ महानगरपालिकां २०७८ असोज १२ च्वंगु कार्यपालिकाया बैठकं उगु निर्णय याउगु खः।

अथेहे नागार्जुन नगरपालिकां न वंगु असार २१ गते सम्पन्न नगरसभां निर्णय याउगु खः।  नागार्जुन नगरपालिका वडा नं. ६ या सेतो गुम्बानाप स्वाउगु बागेश्वरी द्यः नाप कि. नं. ८२ व १८९ या करीब १८ रोपनी जग्गाय् नगरपालिकाय हे नामय् आश्रम निर्माण जुइ। भवनया नां ‘सहिद धर्मभक्त माथेमा महानगर मानव सेवा आश्रम’ जुइ। अन च्वनिपि मनू तयेगु लिंग, दँ, शारीरिक नाप मानसिक अवस्था, आवश्यकता व प्रकृतिया अवस्थाया आधारय् छुटे याना सेवा सञ्चालन व व्यवस्थापन याइ धका मानव सेवा आश्रम धाउगु दु।

सम्झौतालिपा महानगरया मेयर शाक्यं, सहरया गु न खुल्ला थासय् च्वना कष्टकर जीवन विते याये म्वालेमाः धका आश्रम दयकेत्यनागु धका धाउगु खः। ‘येँ मानवीयताया सहर खः। थन शारीरिक नाप मानसिक रुपं अशक्त, मनोरोगी, अनाथ, अपाङ्गता जूपि, अशक्त नाप सहयोगापेक्षी सूना न च्वने म्वालेमाः। सूया थः मदुसा वयागु लागि सरकार दु।’ शाक्यं धयादीगु दु, ‘सू मदया वेसहारापिनिगु उद्धार, उपचार, पालन पोषण व माःगु शिक्षादीक्षा थे जाःगु आधारभूत मानवीय आवश्यकताया परिपूर्ति थ्व हे आश्रमपाखे जुइ।’

अथेहे नागार्जुन नगरया मेयर बस्नेतं, आः येँ महानगर व नागार्जुन नगर दथुइ सहकार्य विस्तारं जिल्ला नाप दक्को नगरनाप स्वाइगु भलसा काउगु दु।

मानवीयता ल्यका तयगु कुतःया लागि यानागु थ्व छगु महत्वपूर्ण सम्झौता खः। महानगरया उपमेयर हरिप्रभा खड्गी श्रेष्ठं धयादीगु दु, ‘योजना निर्माण यायेत व क्षेत्रगत सहकार्य यानागु थ्व छगु नमूना ज्या खः।’