नेपालय् कोरोना भाइरसया न्हुगु भेरियन्टया परिवर्तित रूप पुष्टि जुगु दु।

स्वास्थ्य मन्त्रालयं आः खनेदुगु न्हुगु प्रजातीया भाइरस अप्वो संक्रामक व दक्को दँ दुपि समूहया मनूतयेत असर याइगुलि थप सचेतता अपने यायेत इनाप यागु दु।

वंगु वैशाख २७ निसे जेठ २० तक देया थीथी थासय् थीथी दँ दुपि मनू तयेगु समूहया मनूपाखे संकलन याना राष्ट्रिय जनस्वास्थ्य प्रयोगशालापाखे भारतय् छ्वःगु नमूना मध्ये ४७ गु नमूनाय् डेल्टा भेरियन्टया बी.१.६१७.२, छगु नमूनाय् अल्फा भेरियन्ट मन्त्रालयं विज्ञप्ति पिकया धागु दु।

डेल्टा भेरीयन्ट पुष्टी जूपि ४७ नमूनामध्ये ९ गु थप उत्परिवर्तन एवाई. १ धाइगु के १४१७ एन म्युटेसन खनेदुगु धका मन्त्रालयया सहप्रवक्ता समिरकुमार अधिकारीया हस्ताक्षर याना जारी यागु विज्ञप्तिइ उल्लेख दु । आःतक थुगु प्रजाती नेपाल नाप संसारया १० गु स्वया अप्वो राष्टय् पुष्टि जुगु दु धका मन्त्रालयं धागु दु। 

युवा संघया नेतृ खुश्बु घिमिरेयात अभद्र व्यवहार यागु द्धपनय् प्रहरीं ज्वाला संगौला नाप स्वम्हेसित ज्वंगु दु। काठमाडौं प्रहरी प्रमुख एसएसपी अशोक सिंहया कथं संग्रौलाया भात हिमाल उपाध्याय व शर्मिला वाइबायात न ज्वंगु दु।

उमित अभद्र व्यवहार सम्बन्धी कसूरय् प्रहरीले अनुसन्धान यानाच्वंगु दु। प्रहरीया कथं ज्वाला जापानय् च्वना विकृतिविरुद्ध उग्र स्टाटस च्वंगुलि सामाजिक सञ्जाल प्रयोगकर्तापिनिगु मिखाँय् लागु खः। आः प्रहरी हिरासतय् थ्यंगु कारण चाहिँ पुलाम्ह पासा खुश्बु (नविता) घिमिरे न बिगु किटानी जाहेरी खः। रंगभेदी अभिव्यक्ति न छानविन जुइगु वंगु वाः मंगलवाः सामाजिक सञ्जाल ट्वीटरय् छगु भिडियो सार्वजनिक जुगु खः, उकिइ रंगभेदी शब्द प्रयोग यासे प्रहरी सहायक निरीक्षक (असई) मणिकान्त झायात अपमान यागु खः। संग्रौलां प्रहरीयात सुरुवातय् नां न्यंगु खः ।

नां न्यने धुकावं धागु खः, ‘छि मधेसी, आः उखे मधेसपाखे हुँ, अन बुँज्या याः। ट्राफिकया जागिर नया ज्या मदु ।’ वं प्रहरीया सरुवा याना बिइ धका धम्की बिगु खः। उगु अभिव्यक्ति लिपा सामाजिक सञ्जालय् संग्रौलायात कारबाही याये मागु  माग वंगु खः। ज्वालां बिगु उगु अभिव्यक्ति लिपा छु दिं लिपा हे झायागु बग्गिखानाय् काज सरुवा जुगु खः ।

अय्न प्रहरी अधिकृतपिन्स उगु घटनाबारे मस्यूगु व संयोग जक जुगु धका दाबी यागु खः। घटना मधेशी आयोगं च्यूता कागुलि, प्रहरी प्रधान कार्यालयं छानविन सुरु यायेत धागु खः। उगु इलय् पुलागु घटना सार्वजनिक जुइवं उकिया जाहेरीया आधारय् प्रहरीं ज्वाला नाप उगस पुचःयात ज्वंगु खः। आः असई झायात न जाहेरी बिइत धागु दु। झा न जाहेरी बिगुलि संग्रौलाविरुद्ध अभद्र व्यवहारया कसूर सहित रंगभेदी अभिव्यक्ति बिगु अभियोगय् न अनुसन्धान जुइ।

लुँया भाः थौं प्यसः थहा वंगु दु ।

लुँ तोलां प्यसः थहावना ९० हजार ४ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धागु दु।

म्हिगः लुँ तोलां ९० हजार रुपैयाँ थ्यंगु खः। अथेहे, थौं वहः तोलां न्यातक थहावना १२ सय ९५ रुपैयाँ थ्यंगु दु।

थौं विश्व योग दिवस हने त्यःगु दु। सन् २०१४ निसे थुगु दिवस हरेक दँया जुन महिनाया २१ तारिखय् माने याना वयाच्वंगु खः।

सन् २०१६ य् युनेस्को तक योगयात थःगु अभौतिक सांस्कृतिक सम्पदाया रुपय् दर्ता यागु खः। अथेहे सरकारं योग दिवस माने यायेत शिक्षा, विज्ञान तथा प्रविधिमन्त्री कृष्णगोपाल श्रेष्ठया अध्यक्षताय् मुख्य समारोह समिति गठन यागु खः।

कोरोना भाइरसया सङ्क्रमण कारणं समिति थौं थुगु दिवस भर्चुअल माध्यमपाखे हने त्यःगु खः।

थौं प्रधानमन्त्री केपी शर्मा ओलीं विशेष अतिथ्यताय् भर्चुअल माध्यमपाखे ज्याझ्वः जुइ धका शिक्षा विज्ञान तथा प्रविधि मन्त्रालयं धागु दु।