निर्वाचन आयोगय् जनता समाजवादी पार्टी (जसपा)या केन्द्रीय कार्यकारिणी समिति सदस्यपिनिगु सनाखत सुरु जुगु दु।

सनाखतया लागि जसपा अध्यक्ष उपेन्द्र यादव नाप नेतापि निर्वाचन आयोगय् वंगु खः।मेम्ह अध्यक्ष महन्थ ठाकुर पक्षय् दुपि मनिष सुमन लगायतया नेतापि न निर्वाचन आयोगय् दु।

निर्वाचन आयोगया प्रवक्ता राजकुमार श्रेष्ठं जसपाया कार्यकारिणी समिति सदस्यपि नाप ‘हेड काउन्ट’ सुरु जुगु धका धागु दु।

श्रेष्ठं जसपाया आधिकारिकता सम्बन्धी निर्णय थौं हे वइ धका धागु दु।

गुरु पुन्हिया लसताय् येँया खुसिबुँ खुसिपार्क (बुद्धपार्क) य् छगु ज्याझ्वः दथुइ बुद्धया प्रतिमा अनावरण जुगु दु।

उगु ज्याझ्वलय येँ महानगरपालिका १७ वडाध्यक्ष नविन मानन्धरं उगु बुद्ध प्रतिमा अनावरण यानादीगु खः।

निर्वाचन आयोगं जनता समाजवादी पार्टी आधिकारिकताया लागि केन्द्रीय कार्यकारिणी समिति यागु सदस्यपिनिगु सनाखत याये दइगु जुगु दु।

जसपाया अध्यक्ष महन्थ ठाकुरं समितिया सदस्यपिनिगु सनाखत याइगु निर्वाचन आयोगया ज्या रोके यायेगु माग यासे सर्वोच्च अदालतय् रिट दर्ता यागु खः।

तर थौं आइतवाः न्यायाधीश कुमार रेग्मीया एकल इजलासं अन्तरिम आदेश बिइम्वागु ठहर यासे निगु पक्षयात १५ दिं दुने छलफलया लागि सःतूगु खः। निर्वाचन आयोग थे संवैधानिक निकाय न इजलासं निगु पक्षयात सःतूगु निर्णय अन्तरिम आदेश बिइम्वागु इजलासं ठहर यागु खः।

जसपाया अध्यक्ष महन्थ ठाकुर व उपेन्द्र यादव निगु पक्षं आधिकारिकता दाबी यायेवं निर्वाचन आयोगं कार्यकारिणी समितिया सदस्यपिनिगु सनाखतपाखे निर्णय काइगु जुगु दु। उकिया लागि आयोगं कन्ह्य सोमवाः सुथय् ११ बजे सकसित आयोगय् उपस्थित जुइत धागु दु। कार्यकारिणी समितिइ दुपि ५१ म्ह मध्ये थःगु पक्षय् ३२ म्ह दुगुलि आयोगं मान्यता बिइत उपेन्द्र यादव पक्षं दाबी यागु खः।

गृहमन्त्री बालकृष्ण खाँणया अध्यक्षताय् केन्द्रीय सुरक्षा समितिया बैठक च्वंगु दु।

सिंहदरबारय् जुगु उगु बैठकय् आन्तरिक सुरक्षा चुनौतिया थीथी विषय छलफल जुगु खः। बैठकय् गृहसचिव महेश्वर न्यौपाने, नेपाली सेनाया रथी प्रभुराम शर्मा, नेपाल प्रहरीया महानिरीक्षक शैलेश थापा क्षेत्री, सशस्त्र प्रहरी बलया प्रमुख आईजीपी शैलेन्द्र खनाल, राष्ट्रिय अनुसन्धान विभागया प्रमुख गणेश अधिकारी, मन्त्रालयया शान्ति सुरक्षा महाशाखाया प्रमुख फणिन्द्रमणि पोखरेल लगायतपिनिगु उपस्थित दुगु खः।

उगु बैठकय् कोभिड–१९ भाइरसया सम्भावित स्वगूगु लहरया संक्रमण रोकथाम व नियन्त्रणय् गृह प्रशासनं म्हिते माःगु भूमिकाबारे न छलफल जुगु खः।

स्वास्थ्य तथा जनसंख्या राज्यमन्त्री उमेश श्रेष्ठं थौं आइतबाः सिंहदरबारय् शपथ कागु दु।

प्रधानमन्त्री नाप मन्त्रिपरिषद कार्यालय मन्त्रीपिनिगु उपस्थितिइ प्रधानमन्त्री शेरबहादुर देउवां राज्यमन्त्री श्रेष्ठयात शपथ याकूगु खः।

थ्व स्वया न्ह्यः राज्यमन्त्रीया शपथ समारोह न राष्ट्रपति कार्यालय जुइगु प्रचलन दुगु खः। शपथ समारोहय् राज्यया प्रमुख पदाधिकारीपिनिगु सहभागी जुइगु प्रचलन दुगु खः।

शपथ समारोह राष्ट्रपति कार्यालय जूसा न राज्यमन्त्रीयात शपथ धासा प्रधानमन्त्रीं याकेगु प्रचलन दुगु खः।

तर कोरोना महामारीया इलय् जुगुलि राष्ट्रपति कार्यालयं राष्ट्रपति न शपथ याकेयगु बाहेक मेपि पदाधिकारीया शपथ राष्ट्रपति कार्यालय यायेम्वाःगु धका उल्लेख यागु दु।