स्वास्थ्य तथा जनसंख्या मन्त्रालयया कथं थौं स्वनिगलय ६२४ म्हेसित कोरोना पुष्टि जूगु दु।

उकि मध्ये थौं येँ जक ४६८ म्हेसित कोरोना पुष्टि जूगु दु। अथेहे यलय ८९ म्ह व  ख्वपय् ६७ म्ह कोरोना पुष्टि जूगु दु।

अथेहे मोरङय् १८७, कास्कीइ ११४, सुनसरीइ ९४, बागलुङय् ७१, झापाय् ६३ व रुपन्देहीइ ४९ म्हेसित कोरोना संक्रमण जूगु दु।

मन्त्रालयया कथं सप्तरीइ २९, नुवाकोटय् २६, कञ्चनपुरय् १६, स्याङ्जाय् १३, रौतहट व गुल्मीइ १२÷१२, सिरहा व धादिङय् ११÷११ नाप गोरखा व नवलपरासी पूर्वय् १०÷१० म्हेसित संक्रमितपि थपे जूगु दु।

वंगु २४ घण्टाया दुने देयन्यक २ हजार २३७ म्हेसित कोरोना भाइरस संक्रमण पुष्टि जूगु दु।

१३ हजार ८३४ म्हेसिगु नमुना परीक्षणय् पीसीआरपाखे १ हजार ५३९ म्ह व एन्टिजेन परीक्षणपखे ६९८ याना २ हजार २३७ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धागु दु।

अथेहे कोरोना संक्रमणं १८ म्ह सीगु दु सा २ हजार ५० म्ह कोरोनामुक्त जुगु दु। थ्व नाप नेपालय् कोरोना संक्रमितपि ७ लाख ३४ हजार ७९९ म्ह थ्यंगु दु। उकि मध्ये ९ हजार ७१३ म्ह सी धुकुगु दु सा २४ हजार ५८४ म्ह होम आइसोलेसनय् च्वनाच्वंगु दु।

अथेहे संस्थागत आइसोलेसनय् २ हजार ६८० म्ह मध्ये ६६६ म्ह आईसीयू व १६८ म्ह भेन्टिलेटरय् उपचार यानाच्वंगु दु।

मन्त्रालयया कथं प्रदेश १ य् ३९४, प्रदेश २ य् ६६ बागमती प्रदेशय् ६९५ म्ह थपे जुगु दु।अथेहे गण्डकीइ २३२, लुम्बिनीइ १०७, कर्णालीइ २६ व सुदूरपश्चिम प्रदेशय् १९ म्हेसित कोरोना भाइरसया संक्रमण पुष्टि जुगु दु।

प्रधानमन्त्री शेरबहादुर देउवां सांसद उमेश श्रेष्ठयात स्वास्थ्य तथा जनसंख्या राज्यमन्त्री नियुक्त यागु दु।

प्रधानमन्त्री शेरबहादुर देउवां स्वास्थ्य मन्त्रालयया जिम्मेवारी थःम्ह नाप हे तया आइतबाः श्रेष्ठयात राज्य मन्त्री नियुक्त यागु खः सा मन्त्रालयया कार्यभार सम्हले यायेगु कथ राष्ट्रपति कार्यालयं धागु दु।

सत्ता गठबन्धनय् दुगु दलं मन्त्रालय भागवण्डा व मन्त्रीया ल्याः सहमति याये मफयाच्वंगुलि देउवां थःगु पार्टीया सांसद श्रेष्ठयात स्वास्थ्य मन्त्रालय हःगु खः। थ्व नाप मन्त्रिपरिषदया ल्याः खुम्ह थ्यंगु दु।

नवनियुक्त स्वास्थ्य राज्यमन्त्री श्रेष्ठं थौं बहनि प्रधानमन्त्री तथा मन्त्रिपरिषद कार्यालय शपथ कायेत्यंगु दु।

स्वनिगलय् निषेधाज्ञा १० दिं थपे यागु दु।

थ्व स्वया न्ह्यः यागु निषेधाज्ञाया आदेश थौं आइतबाः क्वचागु दु। येँ, यल व ख्वपया प्रमुख जिल्ला अधिकारीपिनिगु बैठकं थप १० दिं निषेधाज्ञा थप यागु दु।

निषेधाज्ञाया नियमय् धासा छु न ह्यूपा वंगु मदु धका येँया प्रमुख जिल्ला अधिकारी कालीप्रसाद पराजुलीं धागु दु।

सर्वोच्च अदालतं सशस्त्र प्रहरी नायब महानिरीक्षक प्रविणकुमार श्रेष्ठयात अनिवार्य अवकाश बिइगु निर्णय कार्यान्वयन मयायेत सरकारया नामय् अन्तरकालीन अन्तरिम आदेश जारी यागु दु।

न्यायाधीश अनिलकुमार सिन्हाया एकल इजलासं श्रेष्ठयात अनिवार्य अवकाश जुगु धासे सशस्त्र प्रहरी बलं असार ११ गते बिगु पौं यथास्थितिइ तयेत अन्तरकालीन अन्तरिम आदेश बिगु दु।

अन्तरिम आदेशया लागि सर्वोच्चं निगु पक्षयात साउन १३ गते छलफलय् सःतूगु खः । थःगु पदावधि क्वचागु धासे सशस्त्र प्रहरी बलं पौं बिगुनि डीआईजी श्रेष्ठ उकिया विरुद्ध सर्वोच्च अदालतय् रिट बिगु खः।

सर्वोच्चं श्रेष्ठया पदावधि दच्छि थपे यायेगु  विषय सशस्त्र प्रहरी महानिरीक्षकपाखे गृह मन्त्रालय सिफारिस यागुलि मन्त्रालयं गज्यागु  कारबाही न्हयने यकूगु व छु कारणं पदावधि थप मयानगु धइगु विषय निगु पक्ष तया छलफल यायेमाःगु उल्लेख यागु दु।