नेकपा विप्लव समूहया महासचिव नेत्रविक्रम चन्दं थौं आइतबाः जनता समाजवादी पाटीया अध्यक्ष उपेन्द्र यादवयात नापलागु दु।

यादवया निवासय् विप्लव नाप वयागु पार्टीया नेता खड्गबहादुर विश्वकर्मा न वंगु खः। वंगु वाःया दुने विप्लवं थीथी दलया नेतापि नापलायेगु यागु खः।

विप्लवं प्रधानमन्त्री शेरबहादुर देउवा, पूर्वप्रधानमन्त्री केपी शर्मा ओली, पुष्पकमल दाहाल प्रचण्ड, माधवकुमार नेपाल, डा. बाबुराम भट्टराई, राप्रपा अध्यक्ष कमल थापा, नेकपा क्रान्तिकारी माओवादीया महासचिव मोहन वैद्य, नेकपा एमालेया नेता रामबहादुर थापा बादल, जनता समाजवादी पार्टीया अध्यक्ष महन्थ ठाकुर लगायतयात नापलाये धुकुगु खः।

वाःया न्हापागु दिं शेयर बजाःया कारोबार मापक नेप्से झन्डै ५५ अङ्क थहावंगु खः।

होटल व म्युचल फन्ड समूह बाहेक मेमेगु समूहया शेयर थहावंगुलि नेप्से ५४ दशमलव ३१ अङ्क थहावना ३ हजार ५८ दशमलव ६३ विन्दुइ थ्यंगु खः।

थौं बैकिङ समूहया शेयर ७२ अङ्क, व्यापारय् ३ अङ्क, विकास बैंकय् १३ अङ्क, जलविद्युतया ७१ अङ्क, फाइनान्सया २५ अङ्क व  माइक्रोफाइनान्स समूहया शेयर ८६ अङ्क थहावंगु खः। अथेहे जीवन बीमा समूहया शेयर ३१ अङ्क, निर्जीवन बीमा ४८ अङ्क, उत्पादनया ७२ अङ्क व मेमेगु समूहया शेयर ६ अङ्क थहावंगु खः। थौं २२३ कम्पनीया ४ करोड ४१ लाख कित्ता शेयर १४ अर्ब ३० करोड रुपैयाँ कारोबार जुगु खः।

दकलय् अप्वो नेपाल बैंक व ग्लोबल आईएमई बैंकया शेयर ४९÷४९ करोड रुपैयाँया शेयर किनबेच जुगु खः।अथेहे थौं विशाल बजार कम्पनी, सर्पोट लघुवित्त, ङादी जलविद्युत्, राधी जलविद्युत्, पञ्चकन्यामाई हाइड्रो, जोशी हाइड्रो, कालिका पावर, युनिभर्सल पावर व हिमालयन ऊर्जा विकास कम्पनी याना गूगु कम्पनीया शेयर १० प्रतिशतं थहावंगु दु।

समग्र बजार थहावंसा लक्ष्मी उन्नति कोष, कुमारी इक्विटी फन्ड व लक्ष्मी डिबेन्चरया शेयर ३ प्रतिशत स्वया अप्वो कुहावंगु दु।

किसान लघुवित्त वित्तिय संस्थां एफपीओ जारी याइगु जुगु दु।

छगु कित्ता १२५ रुपैयाँ अंकित दरं थप सार्वजनिक निष्कासन (एफपीओ) जारी यायेत कम्पनीं नेपाल धितोपत्र बोर्डय् आवेदन बिगु दु।

कम्पनीं संस्थापक साधारण सेयर अनुपात कायम यायेत १२ लाख ९८ हजार २५९ कित्ता एफपीओ जारी यायेत्यंगु खः। संस्था न छगु सेयर २५ रुपैयाँ प्रिमियम थपे याना १२५ रुपैयाँ दरं १२ लाख ८९ हजार २५९ कित्ताया लागि १६ करोड २२ लाख ८२ हजार ४३६ रुपैयाँ बराबरया बिक्री अनुमतिया लागि निवेदन बिगु खः।

कम्पनीें सेयर निगुगु बजारय् प्रतिकित्ता १७३२ रुपैयाँ किनबेच जुयाच्वंगु दु। संस्थाया संस्थापक सेयरधनीया हिस्सा ६० प्रतिशत व सर्वसाधारणया भागय् ४० प्रतिशत खः।

 लुम्बिनी प्रादेशिक अस्पतालय् उपचार याना च्वपि न्याम्ह कोरोना संक्रमितपि सीगु दु।

सीपि रुपन्देही व गुल्मीइ च्वपि निम्ह निम्ह व प्यूठानय् छम्ह याना १८ घण्टाया दुने न्याम्ह मदुगु खः।

लुम्बिनी प्रादेशिक अस्पतालया सूचना अधिकारी डा. विष्णु गौतमया कथं रुपन्देहीयो तिलोत्तमा नगरपालिका–५ या ३२ दँ दुम्ह मिसाम्ह, बुटवल उपमहानगरपालिका–७ या ४४ दँ दुम्ह मिजंम्ह, गुल्मीया चन्द्रकोट–५ या ५६ दँ दुम्ह मिजंम्ह, गुल्मी इस्मा–५ या ७१ दँ दुम्ह मिजंम्ह व प्यूठानया सरुमारानी–२ या ६३ दँ दुम्ह मिसाम्ह उपचारया झ्वलय् मदुगु खः।

यातायात व्यवसायीपिन्स थीथी माग तया सरकारयात ताःचा लल्हागु दु।

सार्वजनिक यातायात केन्द्रीय महासंघं थौं आइतबाः येँया प्रमुख जिल्ला अधिकारी कालीप्रसाद पराजुलीपाखे प्रधानमन्त्री शेरबहादुर देउवायात सांकेतिक रुपं गाडीया ताःचा लल्हागु दु।

सार्वजनिक यातायात केन्द्रीय महासंघं ७ बुँदे माग तया असार २४ गतेनिसे आन्दोलन याना वयाच्वंगु खः। थःपिनिगु माग पूरा मयागुलि यातायात सञ्चालन याये फइमखु धका व्यवसायीपिन्स धागु खः। ताःचा बुझे यासे ज्ञापनपत्रय् खोपया व्यवस्था व सवारी दुर्घटना जूसा राष्ट्रिय ट्रमा सेन्टरय् उपचारया व्यवस्था मिले यायेमागु, भाडा समायोजन याये माःगु, २० दँ पुलागु गाडीयात प्राविधिक चेकजाँचया आधारय् थप १० दँ चले याके दयमाःगु माग यागु खः।

अथेहे कोरोनाया कारण बन्दाबन्दीया इलय् शून्य समय माने यासे मौद्रिक नीतिपाखे यातायात व्यवसायीपिन्त थप कर्जा, पुनर्कर्जा, कर्जा पुनर्तालिकीकरण नाप ब्याजदरय् कम्ती न बेस रेट कायम याये माःगु, दुर्घटनाया गम्भीर उपचारय् २० लाख तक  विमा जुइमागु व्यवसायीपिनिगु माग यागु खः।