थौं देयन्यक थप ८६७ म्हेसित कोरोना संक्रमण पुष्टि जूगु दु।

शनिबाः देयन्यक ५ हजार ५९८ म्हेसिगु पीसीआर परीक्षण याउगुलि ६५९ म्ह व २ हजार ३२१ म्हेसिगु एन्टिजेन परीक्षणय् २०८ म्ह याना ८६७ म्हेसित कोरोना संक्रमण पुष्टि जुगु दु धका स्वास्थ्य मन्त्रालयं धाउगु दु।

थ्व नाप आःतक नेपालय् कोरोना संक्रमित जूपि ८ लाख ८८ हजार ५४७ म्ह थ्यंगु दु। अथेहे कोरोनाया कारण थप गुम्ह सीउगु दु। आःतक नेपालय् ११ हजार १ सय ५७ म्ह कोरोनाया कारण सी धुकुगु दु।

अथेहे १ हजार १२३  म्ह संक्रमित कोरोनामुक्त जुगु दु। थ्व नाप आःतक नेपालय् ७ लाख ६७ हजार ८१९ म्ह कोरोना संक्रमणमुक्त जुइ धुकुगु दु।

आःतक नेपालय् १७ हजार ६४२ म्ह सक्रिय संक्रमितपि दु।

ललितपुर रेण्टल क्याटरिङ्ग तथा पार्टी प्यालेस संघया ११ क्वःगु बार्षिक साधारण सभा व खुक्वःगु अधिबेसन छगु ज्याझ्वः दथुइ यल महानगरपालिकाया मेयर चिरिबाबु महर्जनं छगु ज्याझ्वः दथुइ उलेज्या यानादीगु दु।

यलया साझा पार्टी प्यालसय् जुगु उगु ज्याझ्वलय् राजु महर्जनया नेतृत्वय् न्हुगु कार्यसमिति गठन जुगु दु।

उगु कार्यसमितिइ बच्चुराम दुंगाना उपाध्यक्ष, हिम किशोर राई सचिव व कोषाध्यक्षय् बाबुराजा महर्जनयात सर्वसम्मतं ल्यःगु खः।

अथेहे दुजलय् नरेन्द्र महर्जन, प्रदिप दुलाल, रोशन घिमिरे, ईश्वर खड्का व अमिरकृष्ण श्रेष्ठयात ल्यःगु खः।

नेपाली कांग्रेसया नेता प्रकाशमान सिंह १४ क्वःगु महाधिवेशनय् थः पार्टी सभापतिया उम्मेदवारी बिइगु धका धाउगु दु।

शनिबाः पार्टीया काठमाडौं महानगरपालिका समिति याउगु अधिवेशनया उलेज्या यासे  नेता सिंह कांग्रेसयात सक्षम दयकेत थः‘फस्र्ट म्यान’ जुया न्ह्या वनेगु धका धाउगु दु। ‘येँ जन्मे जुगु धासे, गणेशमान व मंगलादेवीया काय् जुगुलि हे जि सभापति जुइत अयोग्य खःला?’ वयकलं न्ह्यसः तःगु दु, ‘मेपिनिगु काय्पिन्स अवसर काउगु दु।’

वयकलं धाउगु दु, वर्तमान पार्टी सभापति शेरवहादुर देउवा व वरिष्ठ नेता रामचन्द्र पौडेल लगायतया नेतापिन्स विश्राम कायमाः धका धयादीगु दु। नेता सिंहं जनताया विश्वास याउगु मत कायेगु खःसा जनतां नेतृत्वय् ह्यूपाः वयोमाःगु अवस्था दु धका धाउगु दु। २०७४ सालया कांग्रेस स्वंगु तहया निर्वाचनय् बामलाक्क पराजित जुगुलि थःम्हेसिया सभापति देउवा असफल जुगु धासे राजीनामा फ्वनागु खः धका धाउगु दु।

सभापति देउवां थःगु गृह जिल्ला डडेलधुराय् जिल्ला सभापतियात वाइपास यासे शक्ति प्रदर्शन याउगु धका नेता सिंह आरोप बिउगु दु।

येँ महानगरपालिका १८ वडाध्यक्ष न्हुच्छेकाजी महर्जनया अबु कूलनारायण महर्जन थौं ७७ दँय् मन्त।

मदुम्ह महर्जन ०७४ सालनिसे म्ह मफयाच्वम्ह खः। वयकःया जहान नाप स्वम्ह काय् व छम्ह म्ह्याय् दी।

वडाध्यक्ष न्हुच्छेकाजी महर्जन तधीम्ह काय् खः।

जिल्ला प्रशासन कार्यालय काठमाडौं न स्वनियलय् सभा, सम्मेलन व धार्मिक÷सांस्कृतिक मेला, जात्रा, पर्व लगायत नखःयात लक्षित मेमेगु क्रियाकलापय् स्वास्थ्य मापदण्डया पालना याना यायेत प्रतिबन्ध मयानागु स्पष्ट याउगु दु।

जिल्ला प्रशासन कार्यालय काठमाडौंया सहायक प्रमुख जिल्ला अधिकारी दीपक पौडेलं छगु विज्ञप्ति जारी यासे धाउगु दु, ‘जिल्ला प्रशासन कार्यालयं मिति २०७८÷०६÷१४ गतेनिसे लागु जुइ कथं जारी यासे आदेशया बुँदा नम्बर १(क)य् उल्लेखित विषय सार्वजनिक रुपं च्यूता व अभिव्यक्तिया सम्बन्धय् ध्यानाकर्षण जुगु दु।’

काठमाडौं प्रशासनं कोरोना संक्रमणया जोखिम कायमै दुगुलि नेपाल सरकार मन्त्रिपरिषदया निर्णय नाप प्रचितलि कानुनं बिउगु अधिकार याना न्हापा हे जारी जुगु आदेशया निरन्तरताया रुपं उगु आदेश जारी यासे व उगु आदेशय् छु न प्रकारया सभा, सम्मेलन, धार्मिक÷सास्कृतिक मेला, जात्रा पर्व लगायत नखः लक्षित मेमेगु क्रियालापय् स्वास्थ्य मापदण्ड पालना याकेत व यायेत छु न बन्देज मयानागु स्पष्ट याउगु दु।

थ्व स्वया न्ह्यः असोज १४ गते स्थानीय प्रशासनं विज्ञप्ति जारी याउगु आदेशया बुँदा १ (क) य् स्वनिगलय् हुलमुल, सभाजुलुस, जात्रा, महोत्सव व भ्वँय् यायेगुलि प्रतिबन्ध याउगु खः।