वंगु २४ घण्टाया दुने थप ३११४ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं १०६२५ म्हेसिगु पीसीआर परीक्षणय् २३०९ म्ह व ४२८५ म्हेसिगु एन्टिजेन परीक्षणय् ८०५ म्ह याना ३११४ म्हेसित संक्रमण पुष्टि जूगु दु।

अथेहे २४ घण्टाय् कोरोना संक्रमणया कारण १६ म्ह सी धुकुगु दु सा २१९७ म्ह संक्रमणमुक्त जूगु दु।

नेकपा विप्लव समूहया महासचिव नेत्रविक्रम चन्द विप्लवं जनता समाजवादी पार्टीया अध्यक्ष महन्थ ठाकुर नापलागु दु।

विप्लव व नेता खड्गबहादुर विश्वकर्मा ठाकुरयात नापलागु दु। उगु भेतघाट ठाकुरया निवासय् जुगु खः।

विप्लवं वंगु वाःनिसे थीथी राजनीतिक दलया नेतापि नाप भेटघाट याना वयाच्वंगु खः।

विप्लवं प्रधानमन्त्री शेरबहादुर देउवा, पूर्वप्रधानमन्त्री केपी शर्मा ओली, पुष्पकमल दाहाल प्रचण्ड, डा. बाबुराम भट्टराई, कमल थापा, मोहन वैद्य लगायतया नेतापि नाप भेटघाट याये धुकुगु दु।

नेकपा (एमाले)या नेता योगेश भट्टराई न अध्यक्ष केपी शर्मा ओली पक्ष व माधव नेपाल समूहया युथ फोर्स नाप अखिल फोर्स गठन यागुलि आपत्ति यागु दु।

पार्टी हे दुगु अनेरास्ववियु व युवासंघयात ल्यूनेलाका मेमेगु संगठन तयार यागु धासे नेता भट्टराई न उकिया औचित्य न्ह्यसः थंगु द। ‘अनेरास्ववियु व युवासंघ थेजाःगु संगठनयात लिउने लाका निर्माण यागु युथ फोर्स अखिल फोर्सेया औचित्य छु खः?’ भट्टराई न न्ह्यसः तःगु दु।

एमाले दुने नकतिनि हे गुटगत संगठन निर्माण जुगु दु। समानान्तरण जनवर्गीय संगठन निर्माण याना माधव समूह निकट अनेरास्ववियु न अखिल फोर्स निर्माण यागु खःसा अध्यक्ष ओली पक्षं युथ फोर्स न्ह्यने हःगु खः। नेपाल निकट युवा संघ न पिपुल्स भोलिन्टियर ‘पीभी’ न न्ह्याकेगु तयारी यानाच्वंगु दु।

खोटाङय् थौं बहनि भुखाय् ब्बंगुदु।

थौं शुक्रबाः बहनिसिया ६ बजे जुया ५७ मिनेटय् भुखाय् ब्बंगु दु धका राष्ट्रिय भूकम्प मापन केन्द्रं धागु दु।

केन्द्रया कथं बहनि ६ बजे जुया ५७ मिनेटय ४.२ म्याग्निच्युटया भुखाय् ब्बंगु दु धका धागु खः।

अथेहे थौं सुथय् न सल्लाघारी जःखः केन्द्रविन्दु जुया ३.५ म्याग्निच्युटया भुखाय् ब्बंगु खः।

स्वास्थ्य तथा जनसंख्या मन्त्रालयया कथं थौं दकलय् येँ ४१० म्हेसित कोरोना सक्रमित जूगु दु।

अथेहे, झापा् ३०१, चितवनय् १८६, कास्कीइ १७६, यलय् १३४ व सुनसरीइ १०५ म्हेसित कोरोना संक्रमण पुष्टि जूगु दु।

अथेतु मोरङय् ९५, ख्वपय् ६९, नवलपरासी पूर्वय् ६६, मकवानपुरय् ४२, रुपन्देहीइ ३४, नुवाकोटय् ३३, गोरखाय् ३०, दाङय् २९, बागलुङय् २६ म्हेसित कोरोना संक्रमण पुष्टि जुगु दु।

अथेहे धनकुटा व म्याग्दीइ १६÷१६ म्ह, इलामय् १३, काभ्रेपलाञ्चोय् १२, रामेछाप व तनहुँइ ११÷११ म्ह व धादिङय् १० म्हेसित कोरोना संक्रमित पुष्टि जूगु दु धका मन्त्रालयं धागु दु।