Display Style:
Column Style
ट्राफिकया नखः ब्यवस्थापन योजना सार्वजनिक यात
ञंलागा तृतीया ११४१, असोज ८ शुक्रवाः
लिक्कसं वयाच्वंगु मोहनि स्वन्तियात लक्षित याना ट्राफिक प्रहरीं सुरक्षा योजना सार्वजनिक याःगु दु । उगु अन्तर्गत स्वास्थ्य सुरक्षा, टिकटय् कालोबजारी नियन्त्रण व चेकजाँच याना यात्रुयात सकुशल गन्तव्य थ्यंकेगु लिसेंया विषय दु । सुरक्षित यात्राया नितिं येँय् न्हिं ४३गू ट्राफिक युनिट व १४गू यात्रु सहायता कक्ष सक्रिय जुइ । प्रहरीया कथं युनिटं न्हिं ४क्वः व नाकाय् २४ घौ हे चेकजाँच याइ ।
बसपार्क, टिकट काउण्टर, यात्रु प्रतिक्षालय थेंज्यागु भिडभाड जुइगु थाय्यात प्रहरीं विशेष निगरानीइ तइगु जूगु दु । यात्राया झ्वलय् कोभिड संक्रमणया जोखिम म्हो यायेत सुरक्षा मापदण्ड प्रभावकारी दयेकेगुलिइ प्रहरी न्ह्यागु दु । ताहाकःगु दूरीया सवारी ज्वलंनय् अनिवार्य निम्ह चालक दयेमाःगु व्यवस्था यायेगु , मादक पदार्थ सेवन विरुद्ध कडाई यायेगु उमिगु योजना दु । उगु बाहेक अप्वः भाडा काइगु, नाइटभिजन लेजर राडारं गाडीया गति नियन्त्रण याइगु जूगु दु ।
खुल्लामञ्चया बसपार्क बन्द जुइधुंका स्वनिगःलय् भाडाया सवारी ज्वलंया व्यवस्थापन ट्राफिक प्रहरीया नितिं थप थाकुया च्वंगु दु । थुगु अवस्थाय् ताहाकःगु दुरीया सवारी ज्वलंया व्यवस्थापन प्रहरीया नितिं थप छ्यँ स्याइगु विषय जूगु दु ।
अयेसां ई धलः दयेका अपुकेगु प्रहरीया धापू दु । भीडभाड जुइगु थायेया ह्वता छ्यला ध्यबा।, तिसा चोरीया घटना अप्वइगुलिइ उखेपाखे सचेत जुइत प्रहरीं सर्वसाधारणयात अपिल याःगु दु । दँय्दसं प्रहरीं हइगु थुकथंया सुरक्षा योजना कर्मकाण्डी जुइगु याःगु टिप्पणी तक्वः न्यने दइगु याः ।
योजना हइगु प्रहरी हे प्रलोभनय् लाना सुरक्षा योजना आलोचित जुइगु नं याःगु दु । अथेजूगुलिं सचेत यात्रु , कर्तव्यपरायण व्यवसायी व राजहाँस प्रहरी जूसा जक थुकथंया योजनाया औचित्य पूवनिइ । थुखेपाखे विचाः यायेगु नं मजिमगाः ।
थौं नानिचा याः
लहनान्युज | ञंलागा तृतीया ११४१, असोज ८ शुक्रवाः
येँयाः या लिपागु दिं थौं हनुमानध्वाखाय् यःसिं क्वथला औपचारिक रुपं क्वचाइ।
थौं बहनि १० बजे जुया ३६ मिनेटया साइतय् मानन्धर समुदायया नेतृत्वय् यःसिइ क्वथइ। वंगु २ गते यःसिं थना न्ह्यागु इन्द्रजात्रा थौं क्वचाइगु खः।
इन्द्रजात्राया लिपागु दिं कुमारीया रथ मिसापिन्स सालिइगु याइ। अथेहे राष्ट्रप्रमुखं कुमारीया ल्हातं सिन्हं टिइगु परम्परा दु।
पोखरा वनाच्वंगु कार त्रिशुली कुतुवना स्वम्ह बेपत्ता
लहनान्युज | ञंलागा तृतीया ११४१, असोज ८ शुक्रवाः
येँ न पोखरा वनाच्वंगु कार चितवनया इच्छाकामना गाउँपालिका वडा नं. ५ या नाग्दी खुसिइखोलापाखे त्रिशूली खुसिइ कुतुवना स्वम्ह बेपत्ता जूगु दु।
ग.२ च ४९१८ नम्बरया कार वंगु चान्ह्यसिया १२ः३० बजे अनियन्त्रित जुया सतकं करिब ३५ मिटर क्वय् त्रिशूली खुसिइ कुतुवना चालक नाप स्वम्ह बेपत्ता जूगु दु धका जिल्ला प्रहरी कार्यालय चितवनं धाउगु दु।
बेपत्ता जूपि कार चालक पोखरा महानगरपालिका वडा नं. १७ या ५५ दँया प्रेम बहादुर भुजेल, ५५ दँ दुम्ह लेख बहादुर भुजेल व वया जहान ३६ वदँ दुम्ह ईश्वरी भुजेल खः। बेपत्ता जूपिनिगु मालेगु ज्या जुयाच्वंगु दु धका प्रहरीं धाउगु दु।
अपराधिक ज्याय् निरुत्साहित यायेत अन्तरक्रिया
लहनान्युज | ञंलागा तृतीया ११४१, असोज ८ शुक्रवाः
सामुदायिक प्रहरी साझेदारी कार्यक्रम अन्र्तगत मोहनी स्वन्ति न्ह्यने वयाच्वंगुलि समाजय् दुने सम्भावित अपराधिक क्रियाकलापयात रोकथाम तथा नियन्त्रण व अपराधिक ज्याय् निरुत्साहित यायेगु कथं छगु अन्तरक्रिया नाप दैलो कार्यक्रम याउगु खः।
महानगरीय प्रहरी बृत्त लैनचौर कार्यालयया प्रमुख प्रनाउ श्री दुर्गा प्रसाद दाहाल, कामपा १७ या वडा अध्यक्ष नवीन मानन्धर, सामुदायिक प्रहरीया सदस्यपि, छत्रपाटी बिकास उपभोक्ता समिति, थीथी टोल सुधार समिति नाप स्थानिय समाजसेवीपिनिगु सहभागिताय् कामपा १७ या क्षेत्रपाटी, थँहिति, ढल्को व खुशिबँुइ घर दैलो कार्यक्रम याउगु खः।
पत्रकार दबु न बागमती प्रदेशया डा अजयक्रान्ति शाक्यया भिन्तुना देछात
लहनान्युज | ञंलागा द्धितीया ११४१, असोज ७ बिहीवाः
नेवाः पत्रकार राष्ट्रिय दबुपाखें बागमती प्रदेशया आन्तरिक मामिला तथा कानूनी मन्त्री नियुक्त जुयादीगुलिं डा अजयक्रान्ति शाक्यया भिन्तुना देछायेगु नाप संस्कृति सम्पदा संरक्षणय् प्रदेश व स्थानीय तहया भूमिका यात कया सहलह यायेगु तातुना छगू ज्याझ्वः जुगु दु।
उगु ज्याझ्वलय् येँ महानगरपालिकाया मेयर विद्यासुन्दर शाक्यं दांया अभावया कारणं संस्कृति व सम्पदा संरक्षणया ज्या दिकेमखु धका धयादिल। महानगरपालिकाय् जनप्रतिनिधि वयेधुंका भाषा, संस्कृति व सम्पदा संरक्षणया खँयात उच्च प्राथमिकताय् तया बजेट विनियोजन याना वया च्वनागु खँ मेयर शाक्यं कनादिगु खः।
ज्याझ्वलय् बागमति प्रदेशया नव नियुक्त आन्तरिक मामिला तथा कानुन मन्त्री डा शाक्यं थःम्हं भाषा, संस्कृति संरक्षणया एजेण्डा ज्वना राजनीतिक यात्रा शुरु यानागु खँ लुमंकुसे बागमति प्रदेश थ्व खँय् सदां न्ह्यःने लाइ धका प्रतिबद्धता व्यक्त यानादिल। नेपालया संघीयताया अभ्यासयात क्वातुका यंकेगु ज्याय् थःम्हं सदां पलाः न्ह्याका च्वने धका नं धयादिसे मन्त्री शाक्यं काठमाडौं महानगरपालिकां संस्कृति व सम्पदा संरक्षणय् यक्व ज्या याना च्वंगु दु धका धयादिल।
उगु ज्याझ्वलय् पत्रकार दबूया केन्द्रीय अध्यक्ष सुरजबीर बज्राचार्यं मेयर शाक्यं संस्कृति सम्पदा संरक्षणया ज्याय् स्थानीय तहपाखें गुकथं क्वातुक्क पलाः ल्ह्वने फइ धइगु खँय् येँ महानगरपालिका छगू बाँलागु दसु जुया बिउगु दु धका धयादिल।अध्यक्ष बज्राचार्यं भाषा, संस्कृति, सम्पदा संरक्षणय् महानगरपालिकाया भूमिकायात ऐतिहासिक ज्या धका नं च्वछायादिल। वयकलं प्रदेश सरकारपाखें मातृभाषाया पत्रकारिता व समावेशी सञ्चारया निंतिं प्रदेश सरकारं ल्ह्वने माःगु थीथी पलाः यात कया मन्त्री शाक्य समक्ष ध्यानाकर्षण पौ नं लःल्हाना दिल।
अथेहे ज्याझ्वःया संयोजक पत्रकार दबु वरिष्ठ उपाध्यक्ष नृपेन्द्रलाल श्रेष्ठं महानगरपालिकापाखें येँय् विद्यालयस्तरय् नेपालभाषाया माध्यमं शिक्षा बिइगु नीति लागू याना युगान्तकारी ज्या यागु दु धका धयादिगु खः। ज्याझ्वलय् मन्त्री डा शाक्य व नेवाः पत्रकारत दथुइ छगू बिस्कं सहलह नं जुउगु खःसा उकिं बाँलागु लिच्वः बिइगु खँय् नेवाः पत्रकारिता ख्यः तसकं आशावादी धका ग्वसाखलः जुउगु दु।
