नेकपा एमालेया उपाध्यक्ष भीम रावलं सांसद पदपाखे बिगु राजीनामा पौं लित काःगु दु।

रावलं शुक्रबाः सुथय् सभामुख अग्नि सापकोटायात नापलाना राजीनामा लितकाःगु दु। पार्टी दुने आन्तरिक विवाद तंच्वगुलि रावलं सांसद पदपाखे राजीनामा बिइगु घोषणा यागु खः।

रावल अछाम क्षेत्र नम्बर १ पाखे निर्वाचित जुम्ह नेता खः।

राप्रपा अध्यक्ष कमल थापा व नेपाल कम्युनिष्ट पार्टीया महासचिव नेत्रविक्रम चन्द ‘विप्लव’ दथुइ भेटवार्ता जुगु दु।

केपी शर्मा ओली नेतृत्वया सरकार नाप स्वंगू बुँदे जूगु सहमति व समसामयिक विषय खँल्हाबल्हा जुगु धका राप्रपा अध्यक्ष थापां जानकारी बिगु दु।

विप्लव नेतृत्वया माओवादी नाप सरकारं यागु सहमति कार्यान्वयन जुइमाः धका राप्रपाया धारणा दु धका थापां उल्लेख यागु दु।

थ्व स्वया न्ह्यः विप्लवं प्रधानमन्त्री नाप कांग्रेस सभापति शेरबहादुर देउवा, नेकपा एमालेया अध्यक्ष केपी शर्मा ओली, एमाले वरिष्ठ नेता माधव कुमार नेपाल, नेकपा माओवादी केन्द्रया अध्यक्ष प्रचण्ड व जसपा अध्यक्ष डा. बाबुराम भट्टराई नाप बिस्क बिस्क भेटवार्ता जुगु खः।

गुथि संस्थानया नवनियुक्त कार्यकारी प्रमुख किरण शाक्ययात नेवाः पत्रकार राष्ट्रिय दबू न भिंतुना देछाःगु दु। येँया त्रिपुरेश्वरय् च्वंगु गुथि संस्थानया केन्द्रिय ज्याकुथी अनौपचारिक ज्याझ्वः यानाः सफल कार्यकालया नितिं भिंतुना देछाःगु खः ।

नवनियुक्त कार्यकारी प्रमुख शाक्य पत्रकार राष्ट्रिय दबूया कानुनी सल्लाहकार न खः ।

जात्रा, पर्व व थीथी अमूर्त संस्कृति नाप स्वागू गुठीयार व सरोकारवाला नाप संस्थानप्रति अपनत्व कमी व मैत्री मजुगु धका धयादीसे वयकलं पत्रकारपिन्स तःगु न्ह्यसलय् ‘ संस्थानप्रति सरोकारवाला यक्को खँ दु धका धयादीसे। उकियात आःयागु विद्यमान ऐन, संरचनाया दायराय् च्वना सम्बोधन यायेगु जिगुपाखे कुतः जुइ धका नवनियुक्त कार्यकारी प्रमुख किरण शाक्यं धयादीगु खः। गुठी संस्थानयात निर्देशित याइगु ऐन पुलागु धुकुगुलि आः यक्को समस्या व चुनौती समाधान यायेत न्हुगु ऐन, कानून माये धुकुगु दु धका धयादीगु दु।

उगु ज्याझ्वलय् पत्रकार दबूया केन्द्रीय अध्यक्ष सुरजवीर बज्राचार्यं थःगु कार्यकालय् शाक्यले गुठी सम्बन्धी खनेदुगु समस्या, असन्तुष्टियात सम्बोधन याइगु भलसा काःगु दु। प्रशासक शाक्य स्वयं न नेपाल भाषा, संस्कृतिया आन्दोलन वम्ह मनू जुगुलि गुठी सम्बन्धी समस्या खँ थुम्ह खँ धका धयादीगु खः।

पत्रकार दबूया वरिष्ठ उपाध्यक्ष नृपेन्द्रलाल श्रेष्ठं जात्रा, पर्वया लागि बियावया च्वंगु नगद व जिन्सी सहयोग बजाः जुइमाः धका धागु खः। अथेतु दबूया महासचिव सुनील महर्जनं गुठी सम्बन्धी समस्या, आन्दोलनया माग, सरोकारवालापिनिगु असन्तुष्टि दुगु मध्ये छु विद्यमान प्रशासनिक व ऐन कानून दायरापाखे समाधान याये फइ व मेगु न्हुगु ऐन मार्फत सम्बोधन यायेमाः धका धागु खः।

स्वनिगः दुने थौं सुथय् भुखाय् ब्बंगु दु।

राष्ट्रिय भूकम्प मापन केन्द्रया कथं थौं ख्वपया सल्लाघारी नाप केन्द्रविन्दु जुया उगु भुखाय् ब्बंगु खः।

केन्द्रया प्राविधिक सहायक राजेश शर्माया कथं थौं सुथय् ७ बजे जुया ५ मिनेट वंगु इलय् ३.५ म्याग्निच्युटया भुखाय् ब्बंगु दु धका धागु दु।

स्वास्थ्य मन्त्रालयया कथं थौं येँ जक दकलय् अप्वो ५३६ म्हेसित कोरोना सक्रमण पुष्टि जूगु दु।

अथेहे मोरङय् २४५, सुनसरीइ १४९, यलय् १३०, झापाय् १०८ व कास्कीइ १०२ म्हेसित कोरोना संक्रमण पुष्टि जुगु दु।

अथेतु नवलपरासी पुर्वय् ९३, ख्वपय् ८५, मकवानपुरय् ४७, गोरखाय् ३९, धादिङय् ३३, नुवाकोटय् २८, काभ्रेय् २५, बागलुङय् १६, स्याङजाय् १४, चितवनय् १३, दाङ, रुपन्देही व सुर्खेतय् १२÷१२ म्ह व सिन्धुपाल्चोकय् १० म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धागु दु।

वंगु २४ घण्टाय् २,७१४ म्हेसित कोरोना भाइरस संक्रमण पुष्टि जूगू दु।