थौं शुक्रबाः लुँया भाः तोलां १४०० रुपैयाँ घटे जूगु दु।

बिहीबाः ९० हजार ५०० रुपैया तोला खरिदबिक्री जुगु  छापावाल लुँ थौं ८९ हजार १०० रुपैयाँ थ्यःगु खः।

अथेहे तेजावी लुँ ८८ हजार ६५० रुपैयाँ कुहावंगु दु। बिहीबाः ९० हजार रुपैयाँ तेजावी लुँया कारोबार जूगु दु।

थौं वहः तोला न ३० रुपैयाँ घटे जूगु दु। बिहीबाः १२ सय रुपैयाँ तोलाय् कारोबार जुगु वहः थौं ११ सय ७० रुपैयाँ कायम जुगु दु धका नेपाल सुन चाँदी व्यवसायी महासंघं धाउगु दु।

मोहनी, स्वन्ति व छठ पवयात लक्षित यासे सरकारं थौंनिसे सुपथ मूल्य पसः सञ्चालनय् हःगु दु।

सुपथ मूल्य पसलय् जाकिइ, सीमी, फापर, चि, चिनी नाप खसी, दुगू व दुग्धजन्य पदार्थ न बिक्रीइ याइगु जुगु दु। उद्योग वाणिज्य तथा आपूर्ति मन्त्रालयं जारी याउगु सूचं कथं सुपथ मूल्य पसः मेमेगु पसः स्वया छगु किलोय् न्यातका निसे झीतक तक कम जुइ धका धाउगु दु।

देयन्यक ३९ गु थासय् सञ्चालन जुइगु सुपथ मूल्य पसलय् बिक्री जुइगुलि जाकि, चिनी किलोय् न्यातक, सीमी÷फापर खसी, दुगुइ किलोय् झीतका छुट यागु दु सा चि नीतक छुट बिइगु दु।

सुपथ मूल्य पसः कात्तिक २४ गते तक सञ्चालन जुइ।

ताप्लेजुङया नांजागु तीर्थस्थल पाथीभराया दर्शन थौंनिसे खुला याइगु जुगु दु।

कोरोना भाइरस महामारीया कारण वंगु न्यालालिपा पाथीभरा द्यःया दर्शन खुला यउगु दु। आः कोभिड–१९ या प्रभाव म्हो जुयावंगुलि व पाथीभरा दर्शनया ई न जुगुलि थौंनिसे खुला यायेगु निर्णय यानागु दु धका पाथीभरा क्षेत्र विकास समितिं धाउगु दु।

समितिं जारी याउगु विज्ञप्ति कथं स्वास्थ्य सुरक्षाया मापदण्ड पालना यासे भक्तजनया लागि दर्शन, पूजा यायेगु, ध्यान व प्रार्थना यायेत खुला यानागु धका धाउगु दु।

कोभिडया जोखिम आः न दुगुलि पाथीभरा दर्शन यायेत वइपि तीर्थयात्रीपिन्त सरकारं लागू याउगु स्वास्थ्य सुरक्षाया मापदण्डयात अनिवार्य पालना यायेत समितिं इनाप याउगु दु।