येँ महानगरपालिकाया मेयर विद्यासुन्दर शाक्यं येँया ऐतिहासिक सम्पदायात धार्मिक पर्यटननाप स्वाना धार्मिक पर्यटकीय सहरया पहिचान बिइगु अभियानय् वनाच्वनागु दु धका धयादीगु दु।

थौं २१ या इनाखा त्वालय् गणेश देगःया उलेज्या यानादीसे अथे धयादीगु खः। ‘येँ महानगरपालिकाया ३२ गु हे वडाय् सम्पदा निर्माण–पुर्ननिर्माणय् प्राथमिकता बियाच्वंनागु दु,’ शाक्यं धयादीगु दु, ‘दुगु सम्पदाया संरक्षण सम्वद्र्धन यायेगु व पर्यटननाप जक स्वायेगु मखु न्हुगु सम्पदा निर्माण अभियानय् न महानगरपालिका न्ह्या वनाच्वंनागु दु।’

मेयर शाक्यं धयादीगु दु सकल नेपाःमि व विदेशीपिन्त न थनया धार्मिक ऐतिहासिक महत्वया बारेय् अध्ययन अनुसन्धान यायेत धार्मिक–पर्यटकीय थाय् दयकेगु  धका धयादीगु दु। वयकलं मूर्त–अमूर्त सम्पदा संरक्षण–सम्वद्र्धन याना येँ चाःहिइ वइपि पर्यटकपिन्त यक्को तये फइगु कथं योजना ज्वना न्ह्यावयाच्वनागु दु।

‘थन चाःहू वइपि स्वदेशी–विदेशी पर्यटकपि यक्को च्वने फइगु कथं थनया पर्यटन प्रवद्र्धनय् ग्वाहालि जुइगु कथं जिमिसं सम्पदा निर्माण–पुर्ननिर्माणया अभियानय् न्ह्यावना च्वनागु दु,’ वयकलं धयादीगु दु, ‘थनया स्थानीयपिनिगु व्यवसाय थकायेत थनया सम्पदायातल पर्यटन नाप स्वायेतिनागु खः।’

उगु ज्याझ्वलय् पूर्वमन्त्री कृष्णगोपाल श्रेष्ठ नाप २१ वडाध्यक्ष उदयचुदामणि बज्राचार्य न उपस्थिति दुगु खः।

ह्याउँम्ह किसि संरक्षण खलःया न्हापागु साधारण सभा थौं क्वचाःगु दु।

मूपाहां येँ महानगरपालिका १८ वडाध्यक्ष नाप सम्पदा व पर्यतन बिभागया प्रमुख न्हुच्छेकाजी महर्जंन छगु ज्याझ्वः दथुइ उलेज्या यानादीगु खः। वडाध्यक्ष महर्जनं आः येँ महानगर दुने यक्को सम्पदा निर्माण जुइ धुकुगु दु धका धयादीगु खः।अथेहे खलःया न्हुपि निर्वाचित जुयादीपिन्त न भिंतुना देछाना दीगु खः।

अथेहे वडा सदस्या शोभा महर्जनं १८ वडा दुने अप्वो धइथे सम्पदा निर्माण जुइ धुकुगु दु सा किलागः दुने आँगछेँ छगु जक ल्यः दनिइ धका धयादीगु खः।

थौं जुगु साधारणसभां गोपाल कृष्ण महर्जनया अध्यक्षताय् न्हुगु ज्यासना पुचः सर्वसम्मतं ल्यःगु दु। उगु ज्यासना पुचलय् सुसिलरत्न तुलाधर उपाध्यक्ष, रबिन्द्र मान शाक्य सचिव व बिनोद शाक्यया कोषाध्यक्षय् ल्यःगु खः।

अथेहे दुजलय् सुरेन्द्र शाक्य, अमर काजी शाक्य, रामचन्द श्रेष्ठ, योगेन्द्र मान श्रेष्ठ, हेराशोभा महर्जन, रश्मिता तुलाधर व पार्वती फजु श्रेष्ठपि सर्वसम्मतं ल्यःगु खः। 

नेवाः न्ह्यलुवाः, मानवाधिकारकःमि, वरिष्ठ साहित्यकार मल्ल के सुन्दरया न्हूगु उपन्यास ‘सेप्टेम्बर १७’ छगु ज्याझ्वः दथु सफू विमोचन जूगु दु।

नेपालभाषा एकेदेमि पाखें पिथंगु उगु उपन्यास छगू ज्याझ्वःया दथुइ जनकवि दुर्गालाल श्रेष्ठं विमोचन यानादीगु खः।ज्याझ्वलय् न्ववानादिसें उपन्यासकार मल्लं थःम्हं गुलि नं सफू च्वयाः थःगु नां च्वनेमाः धकाः च्वयागु मखु धासें धयादिल, ‘जिं गुलि नं च्वया जिगु मांभाय्या निंतिं च्वया। जिगु मांभाय् नेपालभाषाय् नं थुलि ग्यंगु सफू दु धयागु लिपाया पुस्तां गर्व याये फयेमा धयागु ल्याखं जिं सफू च्वयाच्वनागु खः ।

’विमोचित उपन्यासया बारे टिप्पणी यानादिसें लोकसाहित्यविद् मदनसेन वज्राचार्यं नेपालभाषां पिहां वःगु थ्व छगू अन्तर्राष्ट्रियस्तरया उपन्यास जूगु खँ धयादिल । ‘थ्व उपन्यासया  देछाय् थःगु देय् त्वःताः समुद्रपारी च्वनाः नं थःगु मांभाय् ल्यंकेगु निंतिं मदिक्क ज्या यानाच्वं गैरआवासिय नेवाःतय्त देछा धकाः धयातःगु दु, तर जितः ताः थ्व गैरआवासिय नेवाःतय् बाखं जक मखु, थःगु पहिचान त्वःफिके माःपिं सकलें विश्वया सकलें नेवाःतय् बाखं खः।

थःगु म्हसीका त्वःफिके माःपिं मनूतय् बाखंयात थुकी तसकं बांलाक न्ह्यब्वयातःगु दु ।’वय्कलं अन्तर्राष्ट्रिय परिवेशय् च्वनाः थःगु म्हसीका मालाच्वंपिनि ब्यथा न्ह्यब्वयातःगु थ्व उपन्यास याकनं अंग्रेजी भासं अनुवाद जुयाः पिहां वयेमाःगु खँ नं धयादीगु दु।

उपन्यासकार मल्लया नेवाः भासं पिहांवःगु थ्व न्यागूगु उपन्यास खः । थ्वयां न्ह्यव वय्कःया नसना, व लँपु ः थ्व पलाः, द पोस्टर, शंखधर साख्वाः उपन्यास पिदने धुंकूगु दु।

वंगु २४ घण्टाय् देयन्यक थप १५५८ म्हेसित कोरोना भाइरस (कोभिड–१९) या संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं देयन्यक ८ जार ६६५४ नमुनाया पीसीआर टेष्ट यागुलि १०८६ व ३७२० म्हेसिगु एन्टीजिन टेष्ट याउगुलि ४७२ म्हेसित संक्रमण पुष्टि जुगु दु।

अथेहे थौं १३५१ म्ह संक्रमणमुक्त जुगु दु सा आःतक २५ हजार ४९७ सक्रिय संक्रमितपि दु। उकि मध्ये ११७ म्हेसित भेन्छिलेटरय्, ३८६ म्ह आईसीयूलय् उपचार यानाच्वगु दु।