राष्ट्रियसभाय् सामाजिक सञ्जाल विधेयक, २०८१ पेस जूगु दु। सभाया आइतबाःया बैठकय् सञ्चार व सुचना प्रविधिमन्त्री पृथ्वीसुब्बा गुरुङं उगु विधेयक पेस यानादीगु खः।

थ्व स्वया न्ह्यः राष्ट्रियसभा अध्यक्ष नारायणप्रसाद दाहालं उगु विधेयकया खँय् छुं नं कथंया विरोधया सुचं मवःगु व्यहोरा न्यंकूगु खः। सरकारं सामाजिक सञ्जालया छ्यला बुलाय् व्यवस्थित, मर्यादित व सुरक्षित यायेत कानुन दयेके माःगु तायेकाः थ्व हे माघ १५ गते राष्ट्रियसभाय् उगु विधेयक दर्ता याःगु खः।

सञ्चारमन्त्री गुरुङं सामाजिक सञ्जालया सही व व्यवस्थित छ्यला बुला यानाः सामाजिक सद्भाव, सांस्कृतिक सहिष्णुता व सुशासन प्रवद्र्धन यायेत सामाजिक सञ्जालया ‘प्लेटफर्म’ सञ्चालक व छ्यलीपिंत जिम्मेवार व जवाफदेही दयेकेत उगु विधेयक न्ह्यःने हयागु खः धयादिल। विधेयकय् डिजिटल प्लेटफर्म न्ह्याकेमंदूपिं कंपनी, फर्म लिसें सस्थां न्ह्याकेगु अनुमति कायेमाःगु, अनुमतिपत्रया नवीकरण यायेमाःगु, प्लेटफर्म सञ्चालन दिके फइगु, अनुमति कयाःतम्ह मनूनं पालना यायेमाःगु सर्त, सामाजिक सञ्जाल प्लेटफर्मपाखें विषयवस्तु लिकायेत निर्देशन बिइफइगु व सामाजिक सञ्जाल छ्यलिम्हेस्यां पालना यायेमाःगु सर्त न्ह्यथनातःगु दु।

अथे हे साइबर बुलिङ व स्टकिङ्ग लिसें आइडी ह्याक, सेक्सटोर्सन बाय् एक्सटोर्सन याये मज्यूगु, अश्लील, मखूगु व भ्रामक विषयवस्तु प्रचारप्रसार नापं डिपफेक भिडियो अपलोड बाय् प्रचार प्रसार नापं बेनामी व छद्मभेषी पहिचान दयेकेमदूगु लिसेंया विषय विधेयकय् दुथ्याका तःगु दु। विधेयकय् सामाजिक सञ्जाल न्ह्याकेगु सम्बन्धी अनुमतिपत्रया ई निदँया जुइगु व न्हूधाः यायेमंदुसा १५ न्हु न्ह्यः हे न्हूधाःया निंतिं निवेदन बिइमाःगु व्यवस्था यानातःगु दु। अनुमतिपत्र कयातम्ह मनूखं देय्या शान्ति सुरक्षा, अमनचैन, सार्वभौमसत्ता, भौगोलिक अखण्डता, राष्ट्रिय सुरक्षा, राष्ट्रिय छवाः, स्वाधीनता, स्वाभिमानय् क्वथुनेगु बाय् राष्ट्रहित प्रतिकूलया विषयवस्तु प्रसार याःसा बाय् याकूसा सामाजिक सञ्जाल प्लेटफर्मया अनुमतिपत्र खारेज याये फइगु व क्वःछिनातःगु सर्त पालना मयाःसा सञ्चालन दिके फइगु नापं व्यवस्था विधेयकय् यानातःगु दु।

सामाजिक सञ्जाल छ्यलिम्हेस्यां सुयांगु मान प्रतिष्ठाय् हानी जुइगु बाय् क्वह्यंकेगु नियतं बांमलाःगु खँग्वः, श्रव्य दृश्य, किपाया ट्रोल दयेकेगु, ब्वःबिइगु बाय् हेट स्पीच, मखूगु व भ्रामक सुचंया दुष्प्रचार, सुचं क्वत्यला प्रचारप्रसार, प्रचलित कानुनं निषेध यानातःगु वस्तुया विज्ञापन बाय् कारोबार याये मदूगु खँत न्ह्यथनातःगु दु। गलत बिचारं सामाजिक सञ्जालय् पोष्ट, सेयर, लाइक, रिपोष्ट, लाइभ स्ट्रिमिङ, सब्सक्राइब, कमेन्ट, ट्याग, ह्यासट्याग बाय् मेन्सन याःसा सामाजिक सञ्जाल छ्यलिम्हेसित न्यागू लख दां तक बं पुइकिगु व्यवस्था दु।

उगु ऐनया छ्यलाबुलां नेपालं विद्युतीय स्वरुपय् दूगु सुचं सुरक्षा व वैयक्तिक विवरणया गोपनीयताया स्तर बांलाइगु, साइबर सुरक्षाया निंतिं माःगु कानुनी व संरचनागत व्यवस्था जुयाः साइबर सुरक्षाया अवस्थाय् सुधार वइगु व सुचं प्रविधिसम्बन्धी व्यवसाय व्यवस्थित, नियमित व मर्यादित जुयाः थुगु ख्यलय् वैदेशिक लाय् अप्वइगु सरकारया धापू दु। सामाजिक सञ्जालया छ्यलाबुलायात व्यवस्थित यायेगु सम्बन्धी विधेयक, २०८० आः छ्यलाबुलाय् दु।

आव २०८१÷८२ या बजेटय् नापं सामाजिक सञ्जाल लिसें डिजिटल प्लेटफर्म व डिजिटल मिडिया छ्यलाबुलायात व्यवस्थित व मर्यादित दयेकेगु व सामाजिक सञ्जालया लिधंसाय् सञ्चार माध्यमयात औपचारिक दायराय् वयेत हःपाः बिइगु नापं नियमनया निंतिं कानुनी व्यवस्थाय् सुधार यायेगु जुइ धकाः धयातःगु दु। (रासस)

चन्द्रागिरि नगरपालिका, न्यायिक समितिं थःपिंसं सम्पादन याःगु निर्णय याःगु सफू दयेकाः पिथंगु दु।

सफू दुने समितिं विसं २०७५ निसें २०८१÷८२ या पुस मसान्त तक याःगु निर्णय सङ्ग्रहित यानातःगु दु। चन्द्रागिरि नगरपालिकाया प्रमुख घनश्याम गिरी व उपप्रमुख बसन्ती श्रेष्ठं आइतबाः ग्वसाः ग्वःगु ज्याझ्वलय् सफू पितब्वया याःगु खः।

चन्द्रागिरि नगरपालिकाया प्रमुख प्रशासकीय अधिकृत हेमराज अर्यालं सफू पाखें भिंगु अभ्यासया बारे सुचं कायेत ग्वाहालि जुइगु भलसा यानादिगु खः।

प्रधानमन्त्री केपी शर्मा ओलीें सेवा प्रवाह, सुशासन, समग्र प्रगति, विद्यमान चुनौती व सङ्घीय सरकारं यायेमाःगु सहजीकरणया विषय न्ह्यय्गू हे प्रदेशया मुख्यमन्त्रीनाप भर्चुअल बैठक च्वनादीगु दु।

सिंहदरबारस्थित प्रधानमन्त्री लिसे मन्त्रिपरिषदया कार्यालय याःगु ‘एक्सन रुम’ पाखे प्रधानमन्त्री ओलीं मुख्यमन्त्रीनाप न्हापागु पटक थथे खँल्हानादीगु खः। उगु खँल्हावल्हा निघौ त्याः जुगु खः। प्रधानमन्त्री ओलीें प्रदेशया मुख्यमन्त्रीपि नाप याक याक न सहलह यायेमाःगु खःगु दु धका धयादीसे वइगु आर्थिक वर्षया बजेट निर्माण यायेगु झ्वलय् मेगु हाकन सहलह यायेगु भलसा बियादीगु खः।

वयकलं फयाफतले प्रदेशय् वना व गुलि प्रदेशसभाय् न वना राष्ट्र निर्माणबारे केन्द्र व प्रदेशया बारे खँ ल्हायेगु व खँ ल्हायेगु व समस्यायात म्हसिका कार्यान्वयन यायेगु ’एक्सन’ य् वनेगु जानकारी बियादीगु खः। प्रधानमन्त्री ओलीें आः सूचं व प्रविधिया जमाना जुगुलि थुकिया उपयोग याना जिल्ला तह व आयोजनागत कथं मुख्यमन्त्रीं थज्यागु सहलह यायेत सुझाव ब्यूगु खः।

प्रधानमन्त्री ओलीं थः न्हापा प्रधानमन्त्री जुयागु इलय् सिंहदरबारस्थित कार्यालय न एक्सन रुमपाखे देयन्यक निर्माणाधीन आयोजनाबारे अनुगमन व सहलह यानागु लुमकादीसे थुगु कक्षयात उपयोग याना न्ह्यावनेगु धका धयादीगु खः।

नेपाल सरकारया मुख्यसचिव एकनारायण अर्यालं मुख्यमन्त्रीं ल्ह्वंगु समस्याया विषय सङ्घीय मन्त्रिपरिषद् न बैठक व नेपाल सरकारया सचिव याःगु बैठकय् सहलह याना उगु विषययात सम्बोधन यायेगु धका धयादीगु खः।

उगु संवाद ज्याझ्वलय् प्रधानमन्त्रीया मुख्य सल्लाहकार विष्णुप्रसाद रिमाल, आर्थिक सल्लाहकार डा. युवराज खतिवडा व उच्चाधिकारीपिनिगु ब्बति दुगु खः।

प्रधानमन्त्री नापं अध्यक्ष केपी शर्मा ओलीया अध्यक्षताय् थौं जूगु चिकित्सा शिक्षा आयोगया १६ क्वःगु मुँज्यां निजी मेडिकल कलेजय् ब्वनाच्वंपिं आवासीय चिकित्सक तय्त सरकारी सरह –च्याःगु तह)या निर्वाह भत्ता बिइगु क्वःछ्यूगु दु।

प्रधानमन्त्री नापं मन्त्रिपरिषदया ज्याकुथि, सिंहदरबारय् जूगु आयोगया मुँज्याय् थ्व स्वयां न्ह्यः सम्बन्धित पक्ष लिसे याःगु सहलह व वःगु प्रतिवेदनलिसेंया लिधंसाय् आवासीय चिकित्सक तय्त समान सुविधा (लच्छिया ४८ द्वः व ७००) बिइमाःगु निर्णय जूगु खः।

मेगु विषयय् थप सहलह यानाः याकनं आयोगया मुँज्यां निर्णय कायेगु लिच्वः पिकाःगु दु।मुँज्यां सम्बन्धित कलेजय् २ दँ अध्ययन व ज्याया सम्झौता याये मानय् मजुइपिं विद्यार्थीतय्के वार्षिक २३ लख शुल्क कायेगु विषय नं सहलह याःगु खः। थौंकन्हय् निजी मेडिकल कलेजं लच्छिया २० द्वः निर्वाह भत्ता बिया वयाच्वंगु दु। पोष्ट ग्राजुएट तहया विद्यार्थी तय्सं समान सुविधाया निंतिं आन्दोलन न्ह्याका च्वंगु व आयोगया परीक्षातकं प्रभावित जुइगु स्थितिइ प्रधानमन्त्री ओली न्ह्यचिलाः समस्या ज्यंकेगु कुतः जूगु खः।

मुँज्याय् निजी मेडिकल कलेज एसोसिएनया नायः प्रा डा ज्ञानेन्द्रमान सिंह कार्कीं कार्यविधि दयेके धुंकाः निर्णय यायेत इनाप यानादीगु खः तर आयोगया अध्यक्ष तकं जुया च्वनादीम्ह प्रधानमन्त्री ओली व सहअध्यक्षपि स्वास्थ्य नापं जनसङ्ख्यामन्त्री प्रदीप पौडेल व शिक्षा, विज्ञान नापं प्रविधिमन्त्री विद्या भट्टराईं आवासीय चिकित्सक तय्गु समान सुविधाया प्रतिबद्धतां लिचिलेमदइगु खँ ध्वाथुइकादिल।

चिकित्सा शिक्षाया एकीकृत नियमन, अनुुगमन, प्रवेश परीक्षा सञ्चालन, शिक्षण संस्थायात बिइगु विद्यार्थी सिट ल्याः व शिक्षण शुल्क निर्धारण सम्बन्धी ज्या याना वयाच्वंगु आयोगया मुँज्याय् राष्ट्रिय चिकित्सा शिक्षा ऐन, २०७५ य् आवश्यक संशोधनया प्रक्रिया न्ह्याकेगु विषयकय् नं सहलह जूगु प्रधानमन्त्रीया सचिवालयं धाःगु दु।

सरकारं विकास निर्माणपाखें नागरिकयात अःपुक सेवा बिइगु व आर्थिक वृद्धि हासिल यायेगु ताःतयाः न्ह्याकूगु राष्ट्रिय गौरवया आयोजनाया प्रगति सन्तोषजनक खने दयाच्वंगु मदु।

सरकारं फुक्कं कथंया स्रोत व साधन उपलब्ध याःगु जुसां नं अजाःगु आयोजनाया प्रगति अपेक्षित जुइ मफूगु खनेदु। मुक्कं २७ गू राष्ट्रिय गौरवया आयोजना मध्ये थुगु आर्थिक दँय् १९ गू आयोजनाया निंतिं ६६ अर्ब ७५ क्वःति स्वंगू लख ध्यबाः विनियोजन याःगु खः। वंगु पुस मसान्त तक मुक्कं १७ अर्ब १५ क्वःति ३२ लख ध्यबाः खर्च जूगु दु।

थुगु कथं राष्ट्रिय गौरवया आयोजनाया समीक्षा अवधिइ २५।७० प्रतिशत खर्च जूगु दु। आर्थिक दँ २०६८÷६९ या न्हापांगु अवधिइ १७ गू राष्ट्रिय गौरवया आयोजना म्हसिइकूगुलिइ नेपाः सरकारं आवश्यकता व औचित्यताया लिधंसाय् क्रमागत व न्हूगु आयोजनायात नापं स्वाःगु खः। थजाःगु आजोजनाया ल्याः तब्याकाः २७ थ्यंगुलिइ पूवने धुंकूगु व ज्या हे मन्ह्यानीगु बाहेकं आर्थिक दँ २०८१÷८२ तक थ्यंबलय् १९ गू आयोजना कार्यान्वयनय् दु।

आर्थिक दँ २०८०÷८१ सं राष्ट्रिय गौरवया आयोजनाया निंतिं ६० अर्ब ३८ क्वःति ७१ लख दां खुद बजेत विनियोजन याःगुलिइ ५४ अर्ब २४ क्वःति ८ लख दां खर्च जुयाः वित्तीय प्रगति ८९।८२ प्रतिशत व भौतिक प्रगति ५७।५० प्रतिशत जूगु अर्थ मन्त्रालयं धाःगु दु।