राष्ट्रपति रामचन्द्र पौडेलनाप नेपाः भ्रमणय् झाया च्वनादीम्ह भारतया विदेश सचिव विक्रम मिश्रीं राष्ट्रपति भवन शीतल निवासय् नापलानादीगु दु।

उगु झ्वलय् राष्ट्रपति पौडेलं सत्तीगु जःला खःला देय् भारतं याःगु प्रगतिपाखें नेपालं लाभ काःगु व अझं अप्वः लाभान्वित जुइ मःदूगु धयादिल। “छगू न्ह्यावनाच्वंगु अन्तरराष्ट्रिय शक्तिया कथं भारतं सामाजिक–आर्थिक व प्राविधिक ख्यलय् याःगु प्रगतिं जिपिं तसकं लय्ताना च्वना, छम्ह पासा लिसें सत्तीगु जःला खःलाया ल्याखं भारतया प्रगतिं नेपालं नं लाभ कयागु दु व अझं अप्वः लाभान्वित जुइ मःदु”, राष्ट्रपति यादवया धापूयात न्ह्यथंसें वय्कःया प्रेस सल्लाहकार किरण पोखरेलं धयादिल।

वय्कलं नेपाः व भारत दथुया सलंसः दँनिसेंया सामाजिक, सांस्कृतिक, धार्मिक, आध्यात्मिक, आर्थिक लिसें जनस्तरया सत्तीगु स्वापू दूगु खँ ल्ह्वनादिसें निगू देय् दथुया स्वापू सार्वभौमिक, समानता, मैत्रीपूर्ण ग्वाहालि, थःथवंय् सम्मान यानाः नापं विश्वासय् लिधनाच्वंगु धयादिल।“नेपालं भारतनाप स्वापूयात न्ह्याबलें उच्च प्राथमिकताय् तःगु दु, जःला खःलापिं नापया स्वापूयात विशेष महत्व बिइगु भारत सरकारया ‘जःला खःला न्हापा नीति’ या नेपाः च्वछाना च्वनी”, राष्ट्रपतिं धयादिल।

विदेश सचिव मिश्रीं भारतया प्रधानमन्त्री नरेन्द्र मोदीं जःला खःला देय् लिसेया स्वापूयात प्राथमिकताय् तयेगु नीति कथं नेपाः प्राथमिकताया धलखय् च्वये लाःगु धयादीगु प्रेस सल्लाहकार पोखरेलं धयादिल। विदेशसचिवं थःगु भ्रमणया झ्वलय् आधुनिक युगय् निगूलिं देय् दथुया प्रगति व विकासया निंतिं ‘कनेक्टिभिटी’ तब्याकेगु नापनापं थःथवंय् हित व चिउताःया विषयय् स्वापू दूपिं अधिकारीपिंनाप सहलह यायेगु ह्वःताः चुलाःगु धयादिल।

बागमती प्रदेशया स्वास्थ्य मन्त्रालयं प्रदेश दुनेया झिंस्वंगू जिल्लाया पत्रकारतय् निंतिं निःशुल्क स्वास्थ्य बिमा यानाबिइगु जूगु दु।

थौं ख्वपय् सञ्चारकःमितय्त थुकिया जानकारी बियादिसें प्रदेशया स्वास्थ्यमन्त्री किरण थापां प्रदेश दुनेया सकलें पत्रकारतय्त निःशुल्क स्वास्थ्य बिमाय् दुथ्याकेगु यानाः बिमा ज्याझ्वः न्ह्याके त्यनागु धयादिल। मन्त्री थापां धयादिल, “पत्रकारतय्गु स्वास्थ्यबारे जिपिं गम्भीर जुयाः ज्या याना च्वनागु दु, अथे जुयाः प्रदेशया झिंस्वंगूलिं जिल्लाया पत्रकारतय्त स्वास्थ्य बिमा दुने दुथ्याकाः बिमाया प्रिमियम ध्यबा प्रदेश सरकारं फयेगु कथं ज्याझ्वः न्ह्याकेत्यनागु दु, थुकिया निंतिं बजेटया व्यवस्था याये धुनागु दु।”

वयकलं पत्रकार स्वास्थ्य बिमाया निंतिं मन्त्रालयं नीगु लखया बजेट न्ह्याना च्वंगु आर्थिक दँया निंतिं फ्यानागु धयादिसें थुकिया निंतिं कार्यविधि तयार जुयाच्वंगु धयादिल। बिमाया प्राविधिक पक्षयात अःपुगु, पारदर्शी व डिजिटलमैत्री दयेकुसें पत्रकार तय्त न्याम्हेसिया छेँजः दूगु तायेकाः पुचलय् स्वानाः बिमाया प्रिमियम सरकारं पुलेगु कथं व्यवस्था यायेगु तयारी जुयाच्वंगु धयादिल। मन्त्री थापां पत्रकारया स्वास्थ्य सुरक्षाया बिमां दीर्घकालीन कथं सुधार जुइगु विश्वास प्वंकादिल।

वय्कलं स्वास्थ्यया ख्यः सुधार यायेगु योजनाया कथं ‘जिगु उसाँय्, जिगु जिम्मेवारी, छघौ जिगु निंतिं’ अभियान, ‘छगू जिल्ला, छगू स्वस्थ सहर’ व ‘छगू स्थानीय तगिं, छगू नमूना स्वास्थ्य संस्था’ ज्याझ्वःनं थुगुसीनिसें सञ्चालनय् हयेगु धयादिल।

मन्त्री थापां झिंस्वंगू जिल्लाया झिंस्वंगू प्रादेशिक अस्पताल जक मखुसें आः तापाक्क च्वंगु लागाया नागरिकतय्त नापं अःपुइगु कथं स्वास्थ्य सेवाया पहुँच थ्यंकाः सकल नागरिकं सरकार गांगामय् थ्यंगु वाःचाइगु कथं ज्या न्ह्याकागु धयादिल । स्वास्थ्य सामग्री, वासः, उपकरण ज्वनाः थः हे गांगामय् वनेगु यानाच्वनागु धयादिसें वय्कलं जनतातय्सं ह्यूपाःयात वाः चायेकेगु कथं सकस्यां ज्या यायेमाःगु खँय् बः बियादिल।

नेपाः–अङ्ग्रेज युद्धय् त्याकू दिंया लुमन्तिइ थौं पाल्पाय् ऐतिहासिक भगवतीया खःलिसेंया सिन्दुर जात्रा न्यायेकेत्यंगु दु। न्हापा न्हापाथें हे थुगुसिइ नं निसः व खुक्वःगु खःयात्राया कथं सिन्दुर जात्रा पिकायेत्यंगु खः।

विसं १८७१ निसें १८७२ जक जूगु तत्कालीन नेपाः–अङ्ग्रेज युद्धय् पाल्पाली कमाण्डर कर्णेल उजिरसिंह थापां अङ्ग्रेज फौजयात बुकेत ताःलाःगुलिं पाल्पाय् दँय्दसं भाद्र कृष्ण नवमीया दिं विजयोत्सव न्यायेका वयाच्वंगु दु। हलिंमय् गनं मबूगु ब्रिटिस सेनायात नेपालं युद्धय् बुकूगु खः।

हलिंन्यंकं थःगु साम्राज्य तब्याकाः जूगु अङ्ग्रेज फौजयात नेपाली सेनां बुकाः जितगढीपाखें हे नेपाःया वीरताया इतिहास कीउगु खः। तत्कालीन कर्णेल थापाया नेतृत्वय् दूगु नेपाली फौजं वीरता व मग्यासें ल्वानाः त्याकाः थःगु ध्वाँय् ब्वयेकेत ताःलाःगु खः। नेपालं विसं १८७१ पुसनिसें १८७२ जेठ तक जूगु अङ्ग्रेजलिसेया युद्धय् बुटवलया जितगढीलिसेंया लागाय् त्याकूगु लुमन्तिइ १८७७ सालनिसें मदिक्कं दँय् दसं पाल्पाय् विजयोत्सव न्यायेकेगु परम्परा न्ह्याकाच्वंगु दु।

कर्णेल उजिरसिंह थापां जितगढीइ त्याकल। पाल्पाया तानसेनय् भगवतीया देगः पलिस्था यानाः सिन्दुर यात्रा यानाः भगवतीया जात्रा पिकाये धकाः भाकल याःगु व युद्ध त्याके धुंकाः १८७६ लय् भगवतीया देगः पलिस्था यानाः भगवती जात्रा पिकायेगु परम्परा न्ह्याकूगु खः। थौंया दिं मस्त, ज्याथः जिथि, ल्याय्म्ह, ल्यासे सकलें भगवती उत्सवया ब्वः जुइ। गां–गामं मेला स्वयेया निंतिं मनूत थन थ्यंकः वइ। तानसेन बजाःया चहःपहः स्वयेबहःजु, स्वःस्वथाय् मनूत म्वःम्वः दु। नेपालं अङ्ग्रेजलिसेया युद्धय् बुटवलया जितगढीलिसेंया थासय् त्याकूगु लुमन्तिइ विसं १८७७ निसें न्यायकेका वयाच्वंगु विजयोत्सव थौं तकं मदिक्कं न्ह्यानाच्वंगु दु।

दँय्दसं पाल्पाय् श्री ७ रणउजिरेश्वरी भगवती गुठी व्यवस्थापन समितिं विजयोत्सव कथं ऐतिहासिक भगवती जात्रा (खः जात्रा) पिकायेगु यानाच्वंगु खः। थुगुसीया भगवती जात्राया तयारी पूवंगु समितिया नायः अशोककुमार महर्जनं धयादिल। वय्कलं धयादिल, “जिमिसं स्थानीय सरकार, जिल्लाया सरोकारवाला निकाय, थन न्ह्याइगु मेमेगु जात्राया व्यवस्थापकपिं नाप च्वनाः जात्रायात गथे यानाः व्यवस्थित व मर्यादित दयेके फइ धकाः न्वाखँ कायेगु व वहे कथं ज्या यायेगु याना च्वनागु दु।” ऐतिहासिक भगवतीया खः जात्रां भगवतीया महिमाया प्रचारप्रसार व धार्मिक पर्यटन प्रवद्र्धनय् ग्वाहालि जुइगु विश्वास कयागु धकाः नायः महर्जनं धयादिल।

थुगुसीया भगवती खःजात्राय् नेपाः सरकारया पाखें उपप्रधान लिसें अर्थमन्त्री विष्णुप्रसाद पौडेल, संस्कृति, पर्यटन लिसें नागरिक उड्डयनमन्त्री बद्रीप्रसाद पाण्डे, प्रधानसेनापति बलाधिकृत रथी श्री अशोकराज सिग्देल, प्रदेशया मन्त्री, सङ्घीय सांसद, प्रदेश सांसदलिसेंया उच्च पदस्थ व्यक्तित्व पिनिगु ब्वति दइगु भगवती देगः व्यवस्थापन समितिया सदस्यसचिव प्रकाशनाथ गङ्गोलं धयादिल। वय्कःया कथं पूजा तान्त्रिक विधि कथं मूलपुरोहितपाखें पाय्छि १२ः०० ताः इलय् बलिलिसेंया पुजा, बढाइँ यानाः भगवतीया द्यःया झ्वाताः यात खतय् तइ। सचिव गङ्गोलं धयादिल, “१२ः३० ताः इलय् खःयात स्वक्वः तक देगः चाःहिकी व कर्णेल पुजा यायेधुंकाः नगर चाःहिकी।”

रथयात्राय् नेपाली सेना, नेपाल प्रहरी, सशस्त्र प्रहरी, निजामती कर्मचारी, सङ्घसंस्थां ब्वति कायेगु याइ। दँय्दसं कुमाल समुदायपाखें विजयोत्सवया खः बजाः चाःहिकेगु परम्परा दयाच्वंगु दु। भगवतीया खःयात निखें तयातःगु निगू बल्लाःगु न्वःयात ब्वय् क्वबियाः जयजयकारया सः थ्वयेकाः व बन्दुकया बढाइँनापं झ्वाताःयात खःतय् तयाः नगर चाःहिकी। ऐतिहासिक महत्व क्वबिनाःच्वंगु जात्राया झ्वलय् शान्ति सुव्यवस्था ल्यंकातयेत जिल्लाया सुरक्षा व्यवस्था नापं कडा याःगु दु। जात्राया दिं प्रदेश सरकारं थौं थन सार्वजनिक बिदा नापं बियातःगु दु।

प्रधानमन्त्री केपी शर्मा ओलीयात भारतीय विदेश सचिव विक्रम मिश्रीं थौं नापलानादीगु दु।

परराष्ट्र मन्त्रालयया सचिव अमृतबहादुर राईया ब्वनाय् नेपाःया निन्हु भ्रमणया निंतिं थौं येँय् थ्यंकादीम्ह सचिव मिश्रीं प्रधानमन्त्री लिसें मन्त्रिपरिषदया ज्याकुथि, सिंहदरबारय् प्रधानमन्त्री ओलीयात नापलानादीगु खः।

नापलायेगु झ्वलय् प्रधानमन्त्रीया मुख्य सल्लाहकार विष्णुप्रसाद रिमाल, परराष्ट्र मन्त्रालयया अधिकारी, नेपाःया निंतिं भारतीय राजदूत लिसेंया नं ब्वति दु।

परराष्ट्र मन्त्रालयया सचिव अमृतबहादुर राईया ब्वनाय् भारतीय विदेशसचिव विक्रम मिस्री नेपाःया निन्हुया निति औपचारिक भ्रमणया झ्वलय् थौं थन थ्यंकादीगु दु।

भ्रमणया झ्वलय् थौं हे निगू देय्या परराष्ट्र सचिव दथुइ कनेक्टिभिटी, विकास ग्वाहालि व निगु पक्षया हितया मेमेगु विषय केन्द्रित जुयाः नेपाः व भारत साझेदारीया थीथी पक्षय् सहलह जुगु धका मन्त्रालयं धाःगु दु।

विदेश सचिव मिस्रीं भ्रमणया झ्वलय् नेपाःया थीथी उच्चपदस्थ व्यक्तित्वपिंनाप नापलाइगु ज्याझ्वः दूगु दु। वय्कः थःगु भ्रमण पूवंकाः कन्हय् भदौ २ गते येँ नं लिहां झाइगु ज्याझ्वः क्वःछिनातःगु दु।

भारत व नेपाः दथुइ न्ह्याबलें बल्लाःगु व मैत्रीपूर्ण परराष्ट्र स्वापू दया वयाच्वंगु दु। विदशेसचिवया भ्रमणं निगू देय् दथुया नियमित उच्चस्तरीय कालबिलया परम्परायात निरन्तरता बिइगु व निगू पक्षीय स्वापूयात अझं न्ह्याकेत ग्वाहालि दइगु धयातःगु दु।