राष्ट्रपति रामचन्द्र पौडेलं यलय च्वंगु कृष्ण देगलय् भगवान् श्रीकृष्णया पुजा आराधना यानादीगु दु। अनं लिपा वय्कःयात देगःया पुजारीं स्वां प्रसाद लःल्हागु खः।

लिसें राष्ट्रपति पौडेलं मङ्गहिटीया अवलोकन यानादिगु खः। राष्ट्रपतियात देगः लागाय् यलं निर्वाचित सङ्घीय संसदया दुजः, वागमती प्रदेशया कृषिमन्त्री मधुसूदन पौडेल, वाग्मती प्रदेशसभा दुजः, यल महानगरपालिकाया प्रमुख चिरीबावु महर्जन, यलया प्रमुख जिल्ला अधिकारी रमेशप्रसाद ढकाल, महानगरया उपप्रमुख मञ्जली शाक्य बज्राचार्य, सहायक प्रमुख जिल्ला अधिकारी गीता घिमिरे, महानगरया प्रमुख प्रशासकीय अधिकृत रेखादास श्रेष्ठपिन्स लसकुस याःगु खः।गुंलागा सप्तमी ११४५, सावन ३१ सनिवाः

साल्ट ट्रेडिङ कर्पाेरेशन लिमिटेडं १५ लख २३ द्वः बोरा रासायनिक मल भारतया कोलकत्ता बन्दरगाहय् वये धुंकूगु व उगु मल धमाधम नेपाःया कर्पाेरेशनया गोदमय् हयेगु ज्या जुया च्वंगु धाःगु दु।

कर्पाेरेशनं आः नकतिनि धइथें जक प्यंगू लख ४० द्वः बोरा युरिया व झिगू लख व ८३ द्वः बोरा डिएपी नापं मुक्कं १५ लख २३ द्वः बोरा रासायनिक मल आयात याःगु खः। गोदमय् वया च्वंगु उगु मल कोटा वितरणया निंतिं प्रदेश सरकारयात पौ छ्वये धुंकूगु व प्रदेश सरकार तय्सं पालिकायात कोटा वितरण जुइ धुंकूगु धइगु जानकारी कर्पाेरेशनयात वःगु नं सस्थां ध्वाथुइकूगु दु।

रासायनिक मलया लिपांगु अवस्थाया बारे कर्पाेरेशनं शुक्रबाः पिकाःगु विज्ञप्तिइ धयातःगु दु, “कर्पाेरेशनया मल बिक्रेता कथं दर्ता जूगु दक्व डिलर तय्त थःगु पालिका नापं कर्पाेरेशनया सम्बन्धित ज्याकुथिलिसे समन्वय यनाः कोटाकथंया मल बिक्री वितरण यायेत इनाप याना च्वना।

”थौंकन्हय् बजारय् रासायनिक मलया अभाव जूगु धकाः थी थी सञ्चार माध्यम नापं सामाजिक सजालय् बुखँ नापं पोष्ट जुया च्वंगुलिं कर्पाेरेशनं विज्ञप्तिपाखें थःगु ध्यानाकर्षण जूगु नं धाःगु दु।

बाघभैरव आःजु द्यःया जात्रा जुइगु दिं भाद्र १ गते किपू नगरय् सार्वजनिक विदा बिइत माग याःगु दु।

बाघभैरव मन्दिर गुठी व्यवस्थापन समितिं साउन ३० गते शुक्रवाः किपू नगरपालिकाया मेयर कृष्णमान डंगोलयात नगरपालिकाया ज्याकुथिइ हे वनाः भदौ १ गते किपू नगरय् सार्वजनिक विदा बिइत माग याःगु खः।

उगु इलय् मेयर डंगोलं बाघ भैरव आःजु द्यःया जात्राया दिनय् सार्वजनिक विदा बिइगु सवालय् थः सकारात्मक दु धयादिसें सार्वजनिक विदा बिइगु सवालय् कार्यपालिकाया मुँज्याय् प्रस्ताव यंकेगु बचं बियादीगु खः।

बाघभैरव मन्दिर गुठी व्यवस्थापन समितिया नायः दुरुगोविन्द महर्जनं ल्हाःचिं तयातःगु उगु पतिइ शिवदेव तृतियपाखें किपू निर्माणया झ्वलय् बाघभैरव देगः दयेकूगु, जुजु विष्णु मल्लया इलंनिसें भदौ १ गतेया दिनय् बलि सहितया पुजा याना बुसादँ हना वयाच्वंगु व उगु हे दिनयात नाला २०१३ सालंनिसें द्यःखः जात्रा यानाः वयाच्वंगु खःसा आः वया थुगु जात्रा किपूया हे म्हसीका जुइ धुंकूगु जुया जात्रायात भब्य यायेगु व प्रत्येक किपूमित ब्वति कायेखनीगु लकस ब्वलंकेगु नितिं स्थानीय सरकारपाखें स्थानीय पालिका दुने सार्वजनिक विदा बिइगु व्यवस्था कथं सार्वजनिक विदा बिइत माग यानातःगु दु।

गकथंया माग पौ लःल्हायेगु झ्वलय् गुठी व्यवस्थापन समितिया पदाधिकारी नापं स्थानीय ब्यक्ति व पत्रकारपिं नं सहभागी जूगु खः।

थिमिइ झींनिदँ लिपा नगदेश भैरव जात्रा पिकाःगु दु। वंगु सोमवाः निसे न्ह्यागु उगु जात्रा बिहीवाः चान्ह्यः नगदेश चाःहिका क्वचाःगु खः।

तान्त्रिक व नेवाः परम्पराय् आधारित सांस्कृतिक प्याखनय् ज्यापुंगचा, न्हापा भैल, लिपा भैल, न्हापा दागिं, लिपा दागिं याना न्याम्ह देवगणपि दइ।

नेवाः समुदाय न थाइगु धाँ बाजं, भुस्या , च्वाङ्वागा लगायत बाजंया तालय् भैरव द्यः लगायत देवगणपिन्स प्याखं हुलेगु याइगु खः।

मुख्यमन्त्री इन्द्रबहादुर बानियां नेपाली कांग्रेसपाखें न्याम्हेसित मन्त्री नियुक्त यानाः बागमती प्रदेशया मन्त्रीपरिषद् बिस्तार याःगु दु।

मुख्यमन्त्री बानियां सामाजिक विकास मन्त्री कञ्चनचन्द्र बादे, आर्थिक मामिला नापं योजना मन्त्री प्रभा चामाङ, युवा नापं खेलकुद मन्त्री उर्मिला केसी नेपाल, संस्कृति नापं पर्यटन मन्त्री सुरेश श्रेष्ठ व सहकारी नापं गरिबी निवारण मन्त्री बिनु रायमाझीयात नियुक्त याःगु खः।

नवनियुक्त मन्त्रीतय्त म्हिगः छगू समारोह दथुइ प्रदेश प्रमुख दीपकप्रसाद देवकोटां सपथग्रहण याकूगु खः।

अथे हे मुख्यमन्त्री बानियां नेपाल कम्युनिस्ट पार्टी (एमाले)या पाखें मधुसूदन पौडेलयात कृषि नापं पशुपंक्षी विकास मन्त्री, डा. दिनेशचन्द्र देवकोटायात भौतिक पूर्वाधार विकासमन्त्री, भरत केसीयात वन नापं वातावरण मन्त्री, जयराथ थापायात श्रम नापं यातायात मन्त्री, बिन्दु श्रेष्ठयात उद्योग, वाणिज्य, भूमि नापं प्रशासनमन्त्रीइ नियुक्त यानादीगु खः।