प्रधानमन्त्री निवास बालुवाटारय् थौ च्वंगु मन्त्रिपरिषदया बैठकं दमननाथ ढुङ्गानायात राष्ट्रिय सम्मान बिया अन्त्येष्टि यायेगु व थौ सोमवाः सार्वजनिक बिदा बिइगु निर्णय याःगु दु।

सरकारं पूर्वसभामुख ढुङ्गानायात राष्ट्रिय सम्मानया नापं अन्त्येष्टि यायेगु व बिदा बिइगु निर्णय जूगु दु धका सञ्चार लिसे सूचना प्रविधि मन्त्री नाप सरकारया प्रवक्ता पृथ्वी सुब्बा गुरुङं धाःगु दु।

“पूर्वसभामुख ढुङ्गानाया सम्मानय् थौ सार्वजनिक बिदा बिइगु व स्वदेश नापं विदेशस्थित दक्को कार्यालयय् थौ न्हिच्छि राष्ट्रिय ध्वाँय् बच्छि झुके यायेगु निर्णय जूगु दु”, प्रवक्ता गुरुङं धयादीगु दु, “राष्ट्रिय सम्मान व्यवस्थापनया जिम्मेवारी गृह मन्त्रालययात ब्यूगु दु।”

मदुम्ह पूर्वसभामुख दमननाथ ढुंगानाया सीम्ह श्रद्धाञ्जलीया निति सानोगौचनय् तयातःगु दु।

सरकारी उच्च पदस्थ मनूत, राजनीतिक दलया नेतापि सानोगौचरनय् वना श्रद्धाञ्जली ब्यूवंगु दु।

श्रद्धाञ्जली बिइगु निति प्रधानमन्त्री केपी शर्मा ओली, नेपाली कांग्रेसया सभापति शेरबहादुर देउवा, नेकपा माओवादी केन्द्रया अध्यक्ष पुष्पकमल दाहाल प्रचण्ड, नेकपा एकीकृत समाजवादीया अध्यक्ष माधवकुमार नेपालनापं विशिष्ट व्यक्तित्वपिन्स श्रद्धाञ्जली ब्यूवंगु दु।

थौ हे ढुंगानायात राष्ट्रिय सम्मानं पशुपति आर्यघाटय् अन्त्येष्टि याइगु जुगु दु।

राष्ट्रपति रामचन्द्र पौडेलं थीथी प्यंगू देय् या निति राजदूत जूपिन्त पद व गोपनीयताया शपथ काय्कूगु दु।

राष्ट्रपति कार्यालयय् छगु ज्याझ्वः दथुइ रीता धिताल (इस्लामिक गणतन्त्र पाकिस्तान), रमेशचन्द्र पौडल (कतार), प्रा धनप्रसाद पण्डित (इजरायल) व प्राडा कृष्णप्रसाद ओली (जनवादी गणतन्त्र चीन)या निति न्हुपि राजदूततय्त शपथ ग्रहण याकूगु दु धका राष्ट्रपति कार्यालयं धाःगु दु।

उगु ज्याझ्वलय् नेपाः सरकारया उच्चपदस्थ अधिकारीपिनिगु न ब्बति दुगु खः। राष्ट्रपति पौडेलं थीथी खुगु देय्या निति राजदूत नियुक्त जुगु खः। नेपाःया संविधान कथं मन्त्रिपरिषदं सिफारिस डा शैल रुपाखेतीयात जर्मनी, जङ्गबहादुर चौहान रुसी महासङ्घ, चन्द्रकुमार घिमिरेयात संयुक्त अधिराज्य, डा नरेशविक्रम ढकालयात साउदी अरेबियाया निति राजदूत नियुक्त याःगु दु।

अथेहे थाइल्याण्डया नित आवासीय राजदूत धनबहादुर ओलीयात क्याम्बोडिया व गणतन्त्र सिङ्गापुरया निति गैरआवासीय नेपाली राजदूत नियुक्त याःगु दु धका राष्ट्रपति कार्यालयं धाःगु दु।

बौद्ध विहार सङ्घ यलया ४९ क्वःगु साधारणसभाय् रत्नाकर महाविहारया प्रतिनिधि करुणा रत्न बज्राचार्य अध्यक्ष जुगु दु धका निर्वाचन अधिकृत पुष्परत्न शाक्यं जानकारी बिउगु दु।

अथेहे उपाध्यक्षय् मणिमण्डप महाविहारया पुष्प शाक्य, मयूरवर्ण महाविहारया सुरेन्द्र बज्राचार्य, हिरण्यवर्ण महाविहारया राजु बज्राचार्य व दत्तनाम महाविहारया अमोघबज्र बज्राचार्य निर्विरोध निर्वाचित जुगु दु।महासचिवय् यशोधर महाविहारया बाबुराजा बज्राचार्य निर्विरोध निर्वाचित जुगु खः।

सचिव पदय् ललितवर्ण महाविहारया दीपक शाक्य, कोषाध्यक्षया गोपीचन्द्र महाविहारया नरेश शाक्य व सहकोषाध्यक्षय् वैशवर्ण महाविहारया रवीन्द्र शाक्य निर्विरोध जुगु खः।

कार्यसमिति सदस्यय् रुद्र वर्ण महाविहारया किशोर शाक्य, सप्तपुर महाविहारया हेमरत्न शाक्य, धर्मकीर्ति महाविहारया सरोज बज्राचार्य, रक्षेश्वर महाविहारया रूपकुमार शाक्य, गुणलक्ष्मी महाविहारया बुद्धरत्न बज्राचार्य, सुरशचन्द्र महाविहारया सुनिल शाक्य, लोकाकीर्ति महाविहारया राजेश बज्राचार्य, श्रीबच्छ महाविहारया वत्सकुमार शाक्य, बलाधर गुप्त महाविहारया दिनेश शाक्य, यम्पि महाविहारया विनोदराज शाक्य व नापीचन्द्र महाविहारया शैलेन्द्रराज शाक्य निर्विरोध निर्वाचित जुगु खः।

न्ह्यनेवइच्वंगु स्थानीय तह उपनिर्वाचनया निंतिं थौनिसें निर्वाचन आचारसंहिता लाःगु जूगु दु।

निर्वाचन आयोगं आइतबाःनिसें उपनिर्वाचन जुइगु सम्बन्धित जिल्लाय् सार्वजनिक पदय् दुपिं मनूत, निकाय व अधिकारीतय्त निर्वाचन क्वमचातले आचारसंहिता लगे जुइगु क्वछिउगु खँ आयोगया सहसचिव लिसें प्रवक्ता नीता पोखरेल अर्यालं कनादिगु दु।

आयोगया कथं नेपाल सरकार व मन्त्री, प्रदेश सरकार व प्रदेशमन्त्री, संवैधानिक निकाय व उकिया पदाधिकारी, नेपाल सरकार, प्रदेश सरकारया निकाय व उकिया पदाधिकारी, स्थानीय कार्यपालिका व उकिया दुजः, खलः, प्रदेश व स्थानीय तहया कर्मचारी, सुरक्षा निकाय, सुरक्षाकर्मी व कर्मचारी, सरकारी, अर्धसरकारी व सार्वजनिक संस्थाया ज्याकुथि व कर्मचारीतय्त आचारसंहिता लगे जुइ।

राजनीतिक दल वा दलया भ्रातृ संगठन, उम्मेदवार व उपिंलिसे स्वापुदुपिं मनूत, राजनीतक दल व उम्मेदवारया मतदान प्रतिनिधि व अनुगमनकर्ता, पर्यवेक्षक खलः व पर्यवेक्षक, सञ्चार प्रतिष्ठान, उकिया कर्मचारी व सञ्चारकःमि, निजी व गैरसरकारी संस्था, उकिया ज्यासनाः पुचःया दुजः व कर्मचारी व ब्वनेकुथि, महाविद्यालय व विश्वविद्यालय, उकिया स्यनामि व कर्मचारीयात नं थुगु आचारसंहिता लगे जुइगु न्ह्यथनातःगु दु।

अथे हे, मतदाता, विकास साझेदार संस्था, सरकारी बाय् अर्धसरकारी निकायपाखें न्ह्यानाच्वंगु परियोजना व परियोजनाया कर्मचारी, मतदाता शिक्षा ज्याझ्वः न्ह्याकीगु संस्था व उकिया कर्मचारी, निजी ख्यःया बैंक व वित्तीय संस्था, सहकारी संस्था, व्यापारिक व औद्योगिक लागा, उकिया पदाधिकारी, कर्मचारी व ज्यामि, वस्तु व सेवा प्रदायक व्यावसायिक संस्थाया पदाधिकारी, कर्मचारी व ज्यामि अले आयोगं क्वछिनातःपिं मेमेगु निकाय वा मनूतय्सं तकं आचारसंहिता पालना यायेमाः। आचारसंहिता लागू जूगु जिल्लाया निर्वाचन जुइगु स्थानीय तहबाहेकं मेगु लागाय् निर्वाचन आचारसंहितां यायेमदु धकाः धयातःगु ज्या यायेमाःसा निर्वाचन आयोगयात न्हापां जानकारी बियाः धाःकथंया ज्या यायेफइगु निर्वाचन आयोगं धाःगु दु।

आयोगं निर्वाचन आचारसंहिता सकल मनूत, संस्था व अधिकारीया कानुनी दायित्व व नैतिक बन्धन जुगूलिं थुकियात सकस्यां पूवंक पालना यानाः निर्वाचनयात स्वच्छ, स्वतन्त्र, निष्पक्ष व विश्वसनीय कथं क्वचायेगु ज्याय् सकस्यां ग्वाहालि याइगु भलसा नं काःगु दु। आचारसंहिता हाचांगाया छुं ज्या जूगु खनेदुसा वा जुइगु छुंकथंया माक्वः आधार खनेदुसा मौखिक, लिखित, सामाजिक सञ्जाल, विद्युतीय माध्यम व मेगु छुँ नं कथंया उजुरी बिइत नं आयोगं इनाप याःगु दु। आचारसंहिता हाचांगाःगु खनेदुसा कारबाही जुइ। थ्व हे मंसिर १६ गते जुइगु स्थानीय तह उपनिर्वाचनया निंतिं आइतबाः मनोनयन पौ दर्ता जुइत्यंगु दु।

सुथय् १० ताः इलंनिसें सनिलया ५ ताः ईतक सम्बन्धित स्थानीय तहलय् निस्वनाः तःगु निर्वाचन अधिकृतया ज्याकुथिइ उम्मेदवारया मनोनयन दर्ता जुइगु ज्याझ्वः दु। थी थी हुनिं स्थानीय तह दुने प्वंनाच्वंगु जिल्ला समन्वय समितिया प्रमुख निम्ह, गाउँपालिकाया अध्यक्ष निम्ह, उपाध्यक्ष प्यम्ह, नगरपालिका प्रमुख व उपप्रमुख छम्ह–छम्ह व वडाअध्यक्ष ३४ म्ह याना मुक्कं ४४ गू प्वंनाच्वंगू पदया निंतिं निर्वाचन जुइत्यंगु खः।(रासस)