मुस्ताङय् लोकंह्वाःगु धार्मिकस्थल मुक्तिनाथ द्यःया थाय् वइपि भक्तजनपिन्त तयेगु निति दयका तःगु धर्मशाला जीर्ण अवस्थाय् जुगु दु।

उगु धर्मशाला २१८ दँ दयका तःगु रानीपौवा धर्मशाला खः। संरक्षणया अभावमा उगु धर्मशाला जीर्ण जुजु वनाच्वंगु दु।

यलया बालकुमारीया छखा छेँय् मिँ न्वःगुलि फार्मेसी, जुम्बा डान्स सेन्टर व पसलय् क्षति जुगु दु।

स्वाभिमान श्रेष्ठया निगु तल्लाय् करेन्ट सर्त जुया मिँ न्वःगु खः।मिँ न्वया उगु छेँय् च्वंगु न्हापागु तल्लाय् ‘डगेरा फार्मेसी’ मिँ न्वःगु दु धका यलया प्रहरीं धाःगु दु।

श्रेष्ठया छेँय् च्वंगु ग्वाँ पसः व मःम पसलय् न क्षति जुगु दु सा नाप च्वंगु ‘जुम्बा डान्स सेन्टर’ तक क्षति जुगु दु। उगु घटनाय् गुलि क्षति जुल धइगु विवरण वःगु मदुनि धका प्रहरीं धाःगु दु।

न्यागः दमकलया ग्वाहालिं छ घौ लिपा मिँ स्याये फुगु खः।

थ्व हे वइगु मंसिर १६ गते जुइगु स्थानीय तह उपनिर्वाचनय् मनोनय याःपि मध्ये ३१ म्हेसिया उम्मेदवारी लितकाःगु दु। बुधवाः बहनि आयोगं पिकाःगु विज्ञप्ति कथं ३१ म्हेसिया थःगु उम्मेदवारी लितकाःगु दु।

अथेहे आयोगया कथं जिल्ला समन्वय समति प्रमुख, नगरपालिका प्रमुख, उपप्रमुख, वडा अध्यक्ष व गाउँपालिका अध्यक्ष, उपाध्यक्ष व वडा अध्यक्षया ४४ गु खालि जुयाच्वंगु पदय् थीथी राजनीतिक दलपाखे २८९ म्ह व १२१ म्ह स्वतन्त्र याना ४१० म्हेसिया उम्मेदवारी ब्यूगु दु।

अथेहे निर्वाचन जुइगु स्वंगु थासय् निर्विरोध निर्वाचित जूगु दु धका आयोगं धाःगु दु। आयोगया कथं ओखलढुंगा व कैलाली जिल्लाया जिल्ला समन्वय समिति प्रमुखय् नेपाली काँग्रेसया उम्मेदवार टेकराज भट्टराई व टीका कुमारी चौधरी (भुल) निर्विरोध निर्वाचित जुइ धुकुगु दु। अथेहे रुकुम (पूर्वी भाग) या पुथा उत्तरगंगा गाउँपालिका वडा नम्बर २ या वडा अध्यक्षय् नेपाल कम्युनिष्ट पार्टी माओवादी केन्द्रया उम्मेदवार जगत घर्ती निर्विरोध निर्वाचित जूगु दु धका आयोगं विज्ञप्तिपाखे धाःगु दु।

स्थानीय तह उपनिर्वाचनया निति दर्ता जूगुलि २५ गु राजनीतिक दलमध्ये हाम्रो नेपाल पार्टी, नेपाल कम्युनिष्ट पार्टी (माक्सवादी लेनिनवादी), नेपाली कांग्रेस (वी.पी.), नेपाली जनता दल व आम जनता पार्टी याना न्यागु दलं छु न खालि  पदय् उम्मेदवारी दर्ता याःगु मदु धका आयोगं धाःगु दु।(रासस)

प्रधानमन्त्री केपी शर्मा ओली न्ह्यःने प्यालेस्टाइनयात इजरायलं यानाच्वंगु हमलाविरुद्ध दनेमाःगु माग यासें थी थी राजनीतिक दल व नागरिक संस्थातय्सं थौं ध्यानाकर्षण पौ लःल्हाःगु दु।

नेपाल कम्युनिष्ट पार्टी (माओवादी केन्द्र) या वरिष्ठ उपाध्यक्ष नापं पूर्व उपप्रधानमन्त्री नारायणकाजी श्रेष्ठलिसें थीथी दल व नागरिक संस्थाया प्रतिनिधितय्सं थौं प्रधानमन्त्री निवास, बालुवाटारय् प्रधानमन्त्री ओलीयात नाप लानाः इजरायलं प्यालेस्टाइन व लेबनानयात मद्दिक बल छ्यलाः हमला यानाः च्वंगुलिं उकिया विपक्षय् नेपाल सरकार अन्तर्राष्ट्रिय मञ्चय् वनेमाःगु धकाः इनाप यानादिल।

ध्यानाकर्षण पतिइ नेपाःया तटस्थ परराष्ट्र नीतिया मान्यताय् ह्यूपाः हयेत व अन्याय जूपिनि पक्षय् संयुक्त राष्ट्रसङ्घ थेंजाःगु मञ्चय् मत बिइत माग यानातःगु दु। ज्ञापन पतिइ हमासं ज्वनातःपिं नेपाःया विपीन जोशी व इजरायलय् दुपिं द्वलंद्वः नेपाःया ल्याय्म्हतय्गु जीवन रक्षा यायेत युद्धकाल दुने नेपाः हयेत कुतः यायेमाःगु नं माग न्ह्यथनातःगु दु।

प्रधानमन्त्री ओलीं नेपाः विश्वशान्ति, मानव अधिकार व न्यायया पक्षय् च्वनेगु धयादिल। वय्कलं तटस्थता धइगु बल्लाम्हेसिनं दायाच्वनेगु व बःमलाम्हेसिनं सह यानाः च्वनेगु धइगु मखु धासें ध्यानाकर्षण पतिइ न्ह्यथंगु विषयया अःखः सरकार मवनेगु धयादिल। “झीपिं विश्वशान्तिया पक्षय् दु। छुं नं शक्ति विरुद्ध थः हे ल्वाः वनेगु मखु।

छुं नं सैन्य गठबन्धनय् च्वनेगु मखु तर अन्याय सह यानाः च्वनेगु मखु”, प्रधानमन्त्री ओलीं धयादिल, “झीसं हलिमय् निरीह शान्ति मखु, न्यायपूर्ण शान्ति व मानव अधिकारया रक्षा यायेगु खः।”

थ्व हे ज्याझ्वलय् माओवादी केन्द्रया महासचिव देवप्रसाद गुरुङ, राष्ट्रिय जनमोर्चाया नेत्री दुुर्गा पौडेल, नेकपा (एकीकृत समाजवादी) या सचिव शेरबहादुर कुँवर, क्रान्तिकारी कम्युनिष्ट पार्टीया वरिष्ठ नेता सिपी गजुरेल, जनता समाजवादी पार्टी नेपालया विदेश विभाग प्रमुख अर्जुन थापा, प्रगतिशील रुपान्तरण आन्दोलनया न्ह्यलुवा श्याम श्रेष्ठपि ब्वति काःगु खः।(रासस)

राष्ट्रपति रामचन्द्र पौडेलं समाजय् ल्यूने लाःगु ख्यः व वर्गया हित व आम नागरिकया जीवनस्तर भिंकाः थ्व हे व्यवस्थाय् जक जिगु भविष्य बांलाइ धइगु जनतायात भलसा याकेमाःगु सङ्घीय लोकतान्त्रिक गणतन्त्रया आज्जु जूगु धयादिल।

राष्ट्रपति भवन शीतल निवासय् थौं जूगु महेन्द्रनारायण निधिया सङ्घर्षमय जीवनीइ आधारित ‘नेपाःया निधि’ नांया सफू चिकिफ्यनाः वय्कलं सङ्घीय लोकतान्त्रिक गणतन्त्रया थ्व आज्जु पूवंकेत न्यायपूर्ण, समावेशी व समृद्ध आधुनिक नेपाः दयेकेगु ज्याय् सकलें वनेमाःगु धयादिल। राष्ट्रपति पौडेलं जनताय् भलसा थनेत शासन प्रणाली पारदर्शी जवाफदेही व सुशासन न्हापांगु सर्त जूगु न्ह्यथनादिल।

वय्कलं धयादिल, “सत्ता व शक्तिइ च्वनीपिनि कमजोरीं लोकतन्त्रया शाश्वत मूल्यमान्यता व पवित्रतायात स्यंकेगु अवस्था वयेके बिइ मज्यू। थ्व खँय् ध्यान बिइ फःसा हे लोकतन्त्रया मूया सुनापनं सम्झौता मयाइम्ह निधिजी लिसेंया अग्रजतय्त धात्थें हनेगु जुइ धइगु नं तायेका।’ राष्ट्रपति पौडेलं महेन्द्रनारायण निधिया बहुआयामिक व्यक्तित्व, नेपालय् लोकतन्त्र नीस्वंगु व पुनस्र्थापना नापं सामाजिक, सांस्कृतिक जागरण बारे सिइकेगु व थुइके यःपिंत नं सङग्रहणीय सामग्री जुइगु धयादिल।

वय्कलं महेन्द्रनारायण निधि बिपी कोइराला व समाजवादी नेता डा राममनोहर लोहियाया बिचाःपाखें प्रभावित जुयादीम्ह महेन्द्रनारायण निधि नेपाःया लोकतान्त्रिक आन्दोलनया न्ह्यलुवा जूगु कनादिसें वय्कलं देय्या राजनीति, आर्थिक व सामाजिक ह्यूपाया निंतिं थःगु जीवन ब्यूगु लुमंकादिल। वय्कलं धयादिल, “जहानियाँ राणाशासन व छगूदलीय पञ्चायत जक मखु रूढीवादी, पछौटेपन नापं कुसंस्कारपाखें मुक्त यानाः नेपाःया समाजया ह्यूपाःया लँय् न्ह्याकेत निधिजीं यानादीगु भूमिका न्ह्याबलें अनुकरणीय जुइ।

राजनीतिक जीवनया यक्व थथ्याःक्वथ्याः जूगु इलय् जिं निधिजीयात तसकं धैर्यवान्, सरल, सादगी नेताकथं म्हसिकेगु व थुइकेगु मौका लुइका।” (रासस)