येँ महानगरपालिका १७ वडाया ग्वसालय् एसईई ताःपिन्त हने ज्या जुगु दु। ८१ सालय् १७ वडापाखे ३३ म्ह एसईई ताः लापिन्त छगु ज्याझ्वः दथुइ मूपाहाँ सृजना सिंहपाखे हनापौ लःल्हानादीगु खः।

अथेहे १७ वडाय् च्वपिन्त कासामि नाप समजासेविपिन्त न हनेज्या जुगु खः। उगु ज्याझ्वलय् टेबुलटेनिसया निम्ह कासामि, कराटेया छम्ह व बास्केबलया छम्ह कासामि नाप निम्ह कानून ब्यवसायी, समाजसेवि रबि बिक्रम राणा व पुर्व वडाध्यक्ष बद्रीनारायाण मानन्धरयात हने ज्या जुगु खः।

येँ महानगरपालिका १७ या वडा अध्यक्ष नबिन मानन्धरं १७ वडा दुने च्वपि एसईई नाप थीथी ख्यलय् योगदान यानाच्वपिन्त हने ज्या यानागु धका धयादीगु खः।

अथेहे सम्मान ज्याझ्वः लिपा नागरिक सुनुवाई ज्याझ्वः न जुगु खः।

ताम्रकार कुलदेवता उग्रचण्डी संरक्षण समिति, ताम्रकार समाज यलं नेपाल संवत ११४५ या लसताय् भिंतुना कालबिल व कौला ज्याझ्वः याःगु दु।

उगु ज्याझ्वलय् बागमती श्रम लिसे रोजगार मन्त्री प्रेमभक्त महर्जन, संघिय सांसद प्रेम महर्जन, बागमती प्रदेशया सांसदपि रामेश्वर श्रेष्ठ, रघुभक्त महर्जन, यल महानगरपालिकाया कार्यवाहक मेयर मंजली शाक्य, न्हुदँ राष्ट्रिय समारोह समिति ११४५ या नायः राजेन्द्र श्रेष्ठ नाप पत्रकार व समाजसेविपिनिगु ब्बति दुगु खः।

समाजया नायः बिनोद ताम्रकारया सभाध्यक्षताय् उगु ज्याझ्वः जूगु खः।

जनता समाजवादी पार्टीया नेता तय्स जाति, भाषा, धर्म व संस्कृतिइ जुइगु विभेद आःतक न जुयाच्वंगु दु थुकियात याकन हे क्वचायेकेमाः धका धयादीगु दु।

जनता समाजवादी पार्टी येँ जिल्ला समन्वय समितिया ग्वसालय् थां येँ जुगु नेपाल संवत् ११४५ न्हूदँ, स्वन्ति व छठया लसताय् छगु तुच्चा ज्याझ्वः जुगु अथे धयादीगु खः।

उगु ज्याझ्वलय् जनता समाजवादी पार्टीया अध्यक्ष अशोक राई न आः खँ ल्हायेगु स्वया न ज्या याना क्यनेमाःगु ई खः धका धयादीगु खः। भाषाया आन्दोलन नेपाल संवत्, दक्को नेपाःमि तयेगु संवत खः धका धयादीसे अध्यक्ष राई न नेपाःया लोकतान्त्रिक आन्दोलनय् कायेमाःगु बहुदलीयता आवधिक निर्वाचनया हक व गणतन्त्र वःगु खः। अय्न भाषा आन्दोलन व नेपाल संवतयात स्थापित यायेत अझ न आन्दोलन यायेमाला च्वंगु दु धका धयादीगु खः।

अथेहे पार्टीया सङ्घीय परिषद् अध्यक्ष राजेन्द्र श्रेष्ठं पार्टी न ल्ह्वंगु नेपाल संवत्, राष्ट्रिय संवत लगायत मुद्दाय् छु उपलब्धि जुगु दु सा दक्को पूरा जुगु मदुनि, उकिया निति दक्कोसिया थः थःथु थासं ज्या यायेमाः धका धयादीगु खः।

ज्याझ्वलय् जनता समाजवादी पार्टीया नेता, खानेपानीमन्त्री प्रदीप यादवं स्वनिलय् व मेलम्चीइ च्वपिनिगु सङ्घर्ष नाप चेतावनी ब्यूसा मोहनिया इलय् स्वनिलय् लः हयेत ताः लागु दु धका धयादीगु खः। मन्त्री यादवं थःगु हे कार्यकालय् येँ चौबिसै हे घण्टाय् लः वइगु वातावरण दयका च्वनागु दु धका धयादीगु खः।

उगु ज्याझ्वः जनता समाजवादी पार्टी येँ जिल्लाया अध्यक्ष सृजनमान श्रेष्ठया सभाध्यक्षताय् जुगु खः।

हुम्लाया यइता लागाय् च्वंगु अदानचुली गाउँपालिकापाखें २० न्हु न्ह्यः मचा बुइकूम्ह मिसायात उद्धार याःगु दु। शुक्रबाः नेपाली सेनाया हेलिकोप्टरं वय्कःयात उद्धार याःगु खः।

अदानचुली–५ करगै गांया २० दँ दुम्ह झुपा छत्यालयात बिहीबाः छत्थुँ बेहोस जूगुलिं वासः यायेत श्रीनगर स्वास्थ्य चौकी थ्यंकूगु व अन वासः यायेत सम्भव मजूबलय् हेलिकोप्टरपाखें उद्धार याःगु स्वास्थ्य सेवा ज्याकुथिया प्रमुख डा प्रतीक्षा भारतीं कनादिल।

गामय् च्वंगु स्वास्थ्य चौकीइ मचा बुइकूम्ह छत्यालयात छत्थुँ रक्तस्राव जूबलय् पालिका केन्द्र श्रीनगर स्वास्थ्य चौकीइ यंकूगु व अनं वासः यायेत सम्भव मजूबलय् सम्बन्धित निकायय् खबर बियाः थप वासः यायेत कर्णाली प्रदेश राजधानी वीरेन्द्रनगरया सुर्खेत अस्पतालय् यंकूगु खः।

राष्ट्रपति मिसा उत्थान ज्याझ्वलं हुम्लालिसें कर्णाली प्रदेशया दुर्गम जिल्लाया प्वाथय् दुपिं, मचा बू व्यथां समस्याग्रस्त मिसातय्गु उद्धार यानावयाच्वंगु दु। (रासस) 

ख्वपय् ट्र्याक्टर दुर्घटना जुयाः छम्ह मन्तसा मेपि न्याम्ह घाःपाः जूगु दु।

चाँगुनारायणं ख्वपया डेकोचापाखे वयाच्वंगु ना २ त ९३४० ल्याःया ट्र्याक्टर अनियन्त्रित जुयाः सतकं क्वय् क्वब्वानां ट्र्याक्टरय् च्वनाःवनाच्वंम्ह चाँगुनारायण नगरपालिका–५ य् च्वंम्ह ४५ दँया हरिगोविन्द सुवालया वासः जुइगु झ्वलय् थौं मदुगु जिल्ला प्रहरी ज्याकुथि ख्वपया प्रहरी नायब उपरीक्षक ढुण्डीराज न्यौपानें न्ह्यथादीगु दु।

दुर्घटनाय् ट्याक्टरय् च्वनाःवंपिं चाँगुनारायण–५ या ३५ दँदुम्ह राधिका अवाल, ६० दँ दुम्ह गोपाल कोजु, ४४ दँदुम्ह राधेश्याम सितिखु व ७४ दँदुम्ह पूर्णकेसी शिल्पकारयात ख्वप अस्पतालय् सामान्य वासः यानाः छें लिछ्वये धुंकूगु वय्कलं धयादिल।

दुर्घटनाय् घाःपाः जूम्ह ड्राइभर ख्वप नगरपालिका–२ व्यासी च्वनीम्ह ४८ दँदुम्ह गणेश सुवालया धाःसा ख्वप अस्पतालय् वासः जुयाच्वंगु दु ।(रासस)