कोरोना संक्रमणं देयन्यक थप ५३ म्ह मन्त।

अथेहे थप ८ हजार ४१८ म्हेसित कोरोना संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं १७ हजार ३१५ म्हेसिगु नमुना पीसीआर परीक्षण यागुलि ८ हजार २८७ म्हेसित व ९८९ म्हेसित एन्टिजेन परीक्षण यागुलि १३१ म्हेसित कोरोना भाइरस (कोभिड–१९) या संक्रमण खने दुगु खः ।

अथेहे आःतक नेपालय् सक्रिय कोरोना संक्रमितपिनिगु ल्याः ८३ हजार ४९३ म्ह दु । संक्रमितपिनिगु ल्याः ३ लाख ८५ हजार ८९० म्ह थ्यंगु दु । अथेहे सीपिनिगु ल्याः ३ हजार ६३२ म्ह थ्यंगु दु ।

वंगु २४ घण्टाय् ३ हजार ३७० म्ह कोरोना संक्रमणमुक्त जुगु दु । थ्वनाप नेपालय् कोरोना संक्रमणमुक्त जूूपिनिगु ल्याः २ लाख ९८ हजार ७६५ म्ह थ्यंगु दु।

येँ महानगरपालिकां त्रि. वि. शिक्षण अस्पताल महाराजगञ्जयात १० गः भेन्टलेटर ग्वाहालि यागु दु ।

कोविड संक्रमितपि अप्वोया वंगुलि मानवीय जीवन रक्षाया लागि भेन्टिलेटर उपलब्ध यागु खः। थौं अस्पतालय् वना येँ महानगरया मेयर विद्यासुन्दर शाक्यं अस्पतालया निर्देशक प्रा. डा. दिनेश काफ्लेयात उगु सामाग्री हस्तान्तरण यागु खः । उगु ज्याझ्वलय् उपमेयर हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, चिकित्सा शास्त्र अध्ययन संस्थानया डीन प्रा. डा. दिव्या सिंह शाह, वडा ३ या अध्यक्ष दिपक के. सी. लगायतपिनिगु सहभागी दुगु खः।

मुल्य अभिवृद्धि कर व भन्सार नाप उगु भेन्टलेटरया भाः २ करोड ९ लाख रुपैयाँ खः। सामाग्री हस्तान्तरण लिपा थःगु खँ तयादीसे मेयर शाक्यं महानगरं संक्रमण रोकथाम व नियन्त्रणया कुतःयाना च्वनागु दु धका धयादीसे, समुदाय स्तरय् संक्रमण घटे यायेत व उपचारया लागि अस्पताल वनिपिनिगु लागि सुविधा अप्वोकेगु ज्या जुयाच्वंगु दु धका धयादीगु खः।

‘जिमिगु योजना अस्पतालय् भेन्टिलेटर व आइसियु अप्वोकेगु स्वया मनू तयेत संक्रमण जुइपाखे बचे यायेगुलि केन्द्रीत जुयागु दु धका धयादीगु खः । ‘जिमिसं सरकारी व सामुदायिक अस्पतालय् सरकारं यागुलि मगागु थाय् ग्वाहालि याना वयाच्वनागु दु धका धयादीगु दु ।

त्रि. वि. शिक्षण अस्पताल नाप मेमेगु अस्पतालपाखे न प्रस्ताव वंगु दु। जिमिसं अस्पतालया क्षमता अप्वोकेगुलि ग्वाहालि यायेगु जुइ ।’ धका धयादीसे मेयर शाक्यं चिकित्सकपिनिगु ज्याया प्रशंशा न यानादीगु दु, ‘छिकपिनिगु उत्साहं न मनूतयस म्वायेगु आशा याइ । उकि सहास बढे यानादीस । मागु ग्वाहालि यायेत जिपि तयार दु ।’

उगु ज्याझ्वलय् अस्पतालया कार्यकारी निर्देशक प्रा. डा. काफ्ले महानगरया प्रमुख व उपप्रमुख अस्पतालय् वया ग्वाहालि या वगुलि थःपि महामारी विरुद्ध ल्वायेत थप उत्साहित जुयागु दु धका धयादीगु दु ।

उपमेयर खड्गी श्रेष्ठ, डीन प्रा. डा. सिंह शाह,अस्पतालया सूचना अधिकृत रामविक्रम अधिकारीपिन्स थःथःगु खँ तयादीगु खः ।

शंखरापुर नगरपालिका वडा नं ४ का वडा अध्यक्ष बुद्धि बहादुर तामाङ कोभिड १९ या कारण मन्त ।

मदुम्ह वडा अध्यक्ष तामाङ नेपाल मेडिकल कलेजय् उपचारया झ्वलय् थौं मदुगु खः।

प्यन्हु न्ह्यः कोरोना सक्रमित जुया स्थानीय नगर हस्पिटल इन्द्रायणी भर्ना जुयादीगु खः। अन लिपा नेपाल मेडिकल कलेजय् भर्ना जुयादीगु खः।

कोरोनां सङ्क्रमित जुया पत्रकार दिनेश दाहाल मन्त ।

वंगु १ गते कोरोना सङ्क्रमण पुष्टि जुइवं होम आइसोलेशनय् च्वनाच्वम्ह दाहालयात सासः ल्हायेत समस्या जुइवं  १० गतेसुमेरु अस्पतालय् भर्ना जुगु खः।

अस्पतालय् वासः यायेगु झ्वलय दाहाल थौं सुथय् ४० दँय् मदुगु खः। निगु दशकनिसें पत्रकारिताय् यानाच्वम्ह दाहालं जनप्रहार साप्ताहिकय् ताईतक सम्पादकया रुपय् ज्या यानादिगु खःसाः लिपांगु इलय् सिपोष्ट न्यूज डटकमया सम्पादक व प्रकाशक जुया पत्रकारिता याना च्वनादिम्ह खः।

कोरोनाया देयन्यक ८ म्ह पत्रकारपि मदय धुकुगु दुसाः ६५०म्ह मल्याकं पत्रकारपि सङ्क्रमित जुयाच्वंगु दु ।