कोरोना सङ्क्रमणं नेपालगञ्जय् छखा छेँय् स्वम्ह दाजुकिजा अकालं मदुगु दु ।

सीपि नेपालगञ्ज उपमहानगरपालिका –३ या इम्तियाज, एजाज व जहीर अहमदपि खः।

जहीर मदय धुका कन्ह्य कुन्हु हे एजाज मदुगु खःसा थौं सुथय् इम्तियाज मदुगु धका धागु दु ।उपि स्वम्हं भेरी अस्पतालय् उपचारया झ्वलय् मदुगु खः।

बाँकेय् आःतक सङ्क्रमणं सीपि १६९ म्ह थ्यंगु दु।

वंगु २४ घण्टाया दुने थप ९१९६ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १९ हजार ९८७ म्हेसिगु पीसीआर परीक्षणय् ९ हजार २३ म्ह व ४९५ म्हेसिगु एन्टिजेन परीक्षणय् ७३ म्ह याना ९१९६ म्हेसित संक्रमण पुष्टि जुगु दु ।

कोरोना भाइरस संक्रमणया कारण वंगु २४ घण्टाय् ५० म्हेसिगु ज्याना वंगु दु ।

ललितपुर सुनचाँदी व्यवसायी संघया संस्थापक अध्यक्ष ज्ञानुराज शाक्य थौ सुथसिया ४ बजे मन्त ।

वयकं यलया धापाखेलय् सुमेरू अस्पतालय् ६१ दँय् मदुगु खः ।

निला न्हयःनिसे उपचार याका वयाच्वम्ह शाक्य उपचारया झ्वलय् मदुगु खः ।

वयकः व्यवसायी नाप धामिर्क, सांस्कृतिक विकासय् नं थःगु च्यूता प्वंका दिम्ह ।

वयकःयात थौं हे यलया शंखमुलय् दाहसंस्कार यागु खः ।

प्रधानमन्त्री केपी शर्मा ओलीं कोरोना भाइरस सङ्क्रमण परीक्षणया लागि स्वाब सङ्कलन यागु दु।

थौं शुक्रवाः बालुवाटारय् हे स्वास्थ्यकर्मीपिन्स ओलीं स्वाबया नमुना कागु वयकःया सचिवालयं धागु दु ।

बालुवाटारय् प्रधानमन्त्री नाप स्वकीय व निजी सचिवालय, सुरक्षा निकाय व चालकपि नाप सच्छिम्ह स्वया अप्वोसिगु स्वाब सङ्कलन यागु खः ।