वंगु २४ घण्टाया दुने देयन्यक थप ३,२१८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ८,८६६ म्हेसिगु पीसीआर परीक्षणय् २,२३१ म्हः व ४,७०७ म्हेसिगु एन्टिजेन परीक्षणय् ९८७ म्ह याना ३२१८ म्हेसित संक्रमण पुष्टि जूगु दु।

कोरोना संक्रमणया कारण लिपागु २४ घण्टाय् १९ म्ह सीगु दु सा १७२२ म्ह संक्रमणमुक्त जुगु दु।

स्वास्थ्य तथा जनसङ्ख्या मन्त्रालयं कोरोना भाइरसविरुद्धया खोप बिइगु निति खोप केन्द्र थप यगु दु।

मन्त्रालयया सहप्रवक्ता डा समिरकुमार अधिकारीें खोप काइपिन्स हुल यागुलि खोप केन्द्र थप यागु दु धका धागु दु। वयकःया कथं देयन्यक द्धःछि मल्याक दुगुलि आः हाकन १ हजार ४३३ खोप केन्द्र थप यागु दु।

न्हापा २ हजार ९८९ खोप केन्द्र दुगु आः ४ हजार ४२२ थ्यंगु दु। अथेहे स्वनिगलय् ८३ खोप केन्द्र थप याना १४९ थ्यकूगु दु। न्हापा स्वनिगलय् ६६ खोप केन्द्र दुगु खः।

सरकारं २०७७ माघ १४ गते तक नेपालय् कोरोना भाइरसविरुद्धया खोप बिइगु शुरु यागु खः । आः तक नेपालय् ४४ लाख ३ हजार २१ म्हेसिया न्हापागु मात्रा व २२ लाख ८ हजार ५५ म्हेसिया पूर्ण मात्राया खोप काये धुकुगु दु।

थौनिसे देयन्यक मास्क अभियान सञ्चालन जुइत्यंगु दु।

स्वास्थ्य तथा जनसङ्ख्या मन्त्रालय न थौंनिसे शुक्रवाः तक ‘महामारी नियन्त्रण व रोकथामय् जिगु प्रतिबद्धता, मास्क तयेगु हे थौंया आवश्यकता’ धइगु मुलनारा ज्वना मन्त्रालयं अभियान सञ्चालन यागु खः।

जनस्वास्थ्यया मापदण्ड उल्लङ्घन जुगु व मास्क तयेगुलि लापरबाही यागुलि स्वास्थ्यया मापदण्ड व मास्कया महत्वबारे जानकारी यायेगु निति उगु अभियान सुरु यायेत्यनागु धका मन्त्रालयं जानकारी बिगु खः।

छवाः तक जुइगु अभियानय् मास्क गयेयाना तयेगु धका स्यनेगु जुइ धका मन्त्रालयं धागु दु। मन्त्रालयया कथं स्वास्थ्य स्वयंसेविकापाखे थाय् थासय् मास्कया महत्वबारे स्यनेत्यंगु खः।

बालाजु औद्योगिक क्षेत्रय् चान्ह्यनिसे मिँच्यना च्वंगु दु।

औद्योगिक क्षेत्रय् दुने छगु विष्कुट फ्याक्टिइ मिँच्यागु दु धका प्रहरी वृत्त बालाजुं जानकारी बिगु दु।

थौं चान्ह्य २ बजे निसे मिँ च्यागु धका प्रहरीं धागु दु। १९ गः लः ट्याङ्कर ९ गः बारुणयन्त्रं मिँस्यायेगु कुतः यासा नियन्त्रणय वःगु मदुनि धका प्रहरीं धागु दु।

छु कारणं मिँच्यागु धासा सिइमदुनि धका प्रहरीं धागु दु।